Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa  |  No. 5 2017

Waswe, Iu Savve Finis?

Waswe, Iu Savve Finis?

Waswe, Jesus tok daonem pipol taem hem iusim tokpiksa abaotem “olketa smol dog”?

Karving from Greece or Rome bilong smol pikinini wea holem wanfala puppy (olketa wakem midolwan first century B.C.E. and mek-tu century C.E.)

Wantaem, Jesus go long Syria, wea hem province long Rome, and wanfala woman from Greece askem hem for helpem hem. Jesus talem tokpiksa long woman hia wea luk olsem hem comparem pipol wea no Jew witim “olketa smol dog.” Law bilong Moses sei dog hem animal wea no klin. (Leviticus 11:27) Taem Jesus storyim datwan, waswe, hem tok daonem datfala woman from Greece and pipol wea no Jew?

Nomoa. Olsem Jesus storyim long olketa disaepol, main waka bilong hem long datfala taem hem for helpem olketa Jew. Dastawe hem talem tokpiksa hia long datfala woman from Greece. Hem sei: “Hem no stret for tekem bred bilong olketa pikinini and torowem go long olketa smol dog.” (Matthew 15:21-26; Mark 7:26) Pipol from Greece and Rome savve lovem dog bilong olketa and hem stap long haos, and hem savve plei witim olketa pikinini. So taem Jesus storyim “olketa smol dog,” maet woman hia tingim datwan. Hem minim tokpiksa hia and sei: “Datwan hem tru Lord, nomata olsem, olketa smol dog savve kaikaim olketa pis bred wea foldaon from tebol bilong man wea ownim olketa.” Jesus praisem woman hia bikos hem garem faith, and healim dota bilong hem.—Matthew 15:27, 28.

Taem aposol Paul sei for ship wea hem go insaed mas weit firstaem, waswe, datwan hem gudfala advaes?

Karving bilong big kago ship long first century C.E.

Aposol Paul go insaed wanfala ship wea gogo for Italy bat olketa meetim big wind long sea. Taem olketa stop long wanfala port, hem sei for olketa mas weit firstaem long there. (Acts 27:9-12) Waswe, datwan hem gudfala advaes?

Olketa sailor long bifor savve hem danger tumas for travel long Mediterranean sea long olketa month bilong winter. Start long samting olsem November 15 go kasem March 15 no eni ship savve gogo. Bat luk olsem datfala gogo bilong Paul hem long September or October. Vegetius, wea hem man for raet long Rome long mek-foa century C.E. sei long buk bilong hem, Epitome of Military Science: “Samfala month hem fitim for travel, olketa nara month hem no mas gud, and olketa nara month moa hem hard nao for travel.” Vegetius sei hem sef for travel long Mediterranean sea start long May 27 go kasem September 14, bat tufala taem wea hem nogud tumas for travel nao hem start long September 15 go kasem November 11, and start long March 11 go kasem May 26. From Paul savve travel evritaem, hem savve long olketa samting hia. Luk olsem kapten and man wea ownim ship savve tu long olketa samting hia, bat olketa no laek followim advaes bilong Paul. Gogo ship hia hem rek nao.—Acts 27:13-44.