Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa  |  No. 5 2017

 KAVA SUBJECT | WANEM NAO BIBLE TALEM ABAOTEM OLKETA ANGEL?

Samfala Nogud Angel Stap Tu?

Samfala Nogud Angel Stap Tu?

Yes, olketa nogud angel tu stap. Hao nao gogo olketa olsem? Tingim, God wakem olketa angel long wei wea olketa savve disaed seleva. No longtaem bihaen God wakem Adam and Eve, wanfala perfect angel iusim rong long freedom bilong hem for disaedem samting, and hem startim wei for againstim God long earth. Hem mekem Adam and Eve for againstim God. (Genesis 3:1-7; Revelation 12:9) Bible no storyim nem and position wea datfala angel garem long heven bifor hem againstim God. Bat bihaen hem againstim God, Bible kolem hem, Satan, wea minim “man for againstim man,” and Devil, wea minim “man for tok spoelem man.”—Matthew 4:8-11.

Sorre tumas, olketa nara angel tu againstim God. Long taem bilong Noah staka angel “lusim ples wea olketa shud stap,” wea hem nao witim famili bilong God long heven. Olketa kam daon long earth and tekem body bilong man bikos olketa laek for durong witim olketa woman long earth, wea diswan hem no plan bilong God for olketa.—Jude 6; Genesis 6:1-4; 1 Peter 3:19, 20.

Wanem nao kasem olketa nogud angel hia? Taem God mekem datfala flood for kasem earth, olketa lusim body wea olketa garem olsem man and go bak for stap long heven. Bat God no letem olketa nogud angel hia for go bak long “ples wea olketa shud stap.” Hem daonem olketa long barava low position and baondem olketa long “Tartarus, wea hem barava dark tumas” long spiritual wei. (Jude 6; 2 Peter 2:4) Satan nao kontrolem olketa demon hia. Bible sei Satan hem ‘boss bilong olketa demon’ and hem “act olsem wanfala angel wea givim laet.”—Matthew 12:24; 2 Corinth 11:14.

Wanem Bible storyim showimaot Kingdom bilong God, wea hem wanfala gavman long heven, hem start for rul long 1914. * Bihaen datwan, olketa aotem Satan and olketa demon from heven and torowem olketa kam daon long earth. From staka nogud samting happen long world distaem and wei for durong hem kamap big tumas, datwan pruvim olketa demon kros tumas and laek for spoelem pipol.—Revelation 12:9-12.

Bible showimaot taem evri samting kamap barava worse and pipol raf tumas, datwan showimaot lelebet taem nao stap for olketa angel hia then God bae aotem paoa olketa garem for spoelem pipol. Bihaen Kingdom bilong God hem rul ovarem paradaes long earth for 1,000 year, God bae letem olketa nogud angel hia for testim olketa man for lelebet taem. Bihaen datwan, God bae finisim olketa for olowe.—Matthew 25:41; Revelation 20:1-3, 7-10.

^ par. 6 For samfala moa information abaotem Kingdom bilong God, lukim chapter 8 bilong buk Wanem Nao Really Samting wea Bible Teachim? wea Olketa Jehovah’s Witness pablisim. Hem stap tu long www.jw.org/pis.