Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa  |  No. 5 2017

 KAVA SUBJECT | WANEM NAO BIBLE TALEM ABAOTEM OLKETA ANGEL?

Hao Olketa Angel Savve Helpem Iu

Hao Olketa Angel Savve Helpem Iu

Olketa gudfala angel barava interest long iumi olketa man and olketa duim will bilong Jehovah. Taem God wakem earth, olketa angel “hapi and singaot tugeta, and evri son bilong God start for singaot for praisem God.” (Job 38:4, 7) Start kam long bifor, olketa angel “barava laek for minim” olketa profesi abaotem olketa samting wea bae happen long earth.—1 Peter 1:11, 12.

Samfala story long Bible showimaot samfala taem olketa angel protectim pipol bilong God mekem plan bilong God kamap tru. (Psalm 34:7) Olsem example:

  • Taem Jehovah distroem Sodom and Gomorrah wea fulap witim nogud pipol, olketa angel helpem Lot wea hem raeteous man, and famili bilong hem for ranawe from datfala ples.—Genesis 19:1, 15-26.

  • Long Babylon bifor, taem olketa torowem thrifala young Hebrew insaed long fire, God “sendem angel bilong hem and sevem olketa.”—Daniel 3:19-28.

  • Bihaen Daniel hem stap for full naet insaed long hol bilong olketa lion, hem sei hem no dae bikos God “sendem kam angel bilong hem and satem mouth bilong olketa lion.”—Daniel 6:16, 22.

Olketa angel helpem pipol bilong God start kam long bifor yet

OLKETA ANGEL HELPEM OLKETA CHRISTIAN LONG FIRST CENTURY

Samfala taem olketa angel bilong God helpem olketa Christian long first century for mekem plan bilong God kamap tru. Olsem example:

  • Taem olketa bigman long religion putim olketa aposol long prison, wanfala angel kam and openem door bilong datfala prison and talem olketa aposol hia for go and preach long temple.—Acts 5:17-21.

  • Wanfala angel talem Philip for go followim wanfala road wea start long Jerusalem go kasem Gaza, mekem hem savve story witim wanfala man long Ethiopia, wea gogo long Jerusalem for worship.—Acts 8:26-33.

  • Cornelius, wanfala bigman long army, hem first man wea no Jew wea kamap Christian. Wanfala angel nao kam and talem hem for go askem Peter for kam long haos bilong hem.—Acts 10:3-5.

  • Taem olketa putim aposol Peter long prison, wanfala angel kam and leadim hem go aot from prison.—Acts 12:1-11.

 HAO OLKETA ANGEL SAVVE HELPEM IU

No eni samting showimaot God iusim olketa angel for duim mirakol for sevem pipol distaem olsem hem duim for pipol bifor wea Bible storyim. Nomata olsem, Jesus storyim samting wea bae happen long distaem. Hem sei: “Olketa disaepol bilong mi bae talemaot disfala gud nius abaotem Kingdom long evri ples long world mekem pipol long evri kantri mas herem. Bihaen datwan nao, world bae finis.” (Matthew 24:14) Waswe, iu savve olketa angel nao leadim olketa disaepol bilong Christ for duim disfala waka?

Olketa angel sapotim waka for talemaot gud nius long full earth

Bible buk Revelation showimaot olketa angel willing for helpem pipol evriwea long earth for lane abaotem Jehovah God and plan bilong hem for iumi olketa man. Aposol John sei: “Mi lukim nara angel hem flae long skae. Hem garem gud nius for talemaot long evriwan long earth. Disfala gud nius bae hem stap for olowe and hem talem long pipol bilong evri kantri, tribe, and languis. Hem singaot olsem: ‘Fraet long God and givim glory long hem bikos taem bilong hem for judgem pipol hem kam finis. So worshipim God wea wakem skae and graon and sea and olketa springwata.’” (Revelation 14:6, 7) Staka samting wea happen showimaot olketa angel sapotim disfala waka for preach abaotem Kingdom evriwea long world. Taem wanfala sinner hem repent and kam bak long Jehovah, “olketa angel bilong God barava hapi tumas.”—Luke 15:10.

Wanem nao bae happen taem disfala waka for preach hem stop? “Army long heven,” wea hem olketa angel, bae joinim Jesus Christ, King bilong olketa king, for faet insaed “war wea bae kamap long bigfala day bilong Olmaeti God,” wea hem Armageddon. (Revelation 16:14-16; 19:14-16) God bae iusim olketa angel for finisim nogud pipol long taem wea Lord Jesus bae “panisim olketa wea . . . no obeyim datfala gud nius abaotem Lord bilong iumi Jesus.”—2 Thessalonica 1:7, 8.

Olketa angel barava interest long iu. Olketa laekem tumas for helpem olketa wea laek for worshipim God, and hem iusim olketa angel hia for strongim and protectim pipol bilong hem long earth.—Hebrew 1:14.

So iumi evriwan mas disaedem wanfala important samting. Waswe, bae iumi willing for herem and followim gud nius wea pipol preachim evriwea long earth? Olketa Jehovah’s Witness long community bilong iu bae hapi for helpem iu for kasem gud samting from waka wea olketa angel duim.