Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa  |  No. 5 2016

 BIBLE CHANGEM LAEF BILONG PIPOL

Bifor Mi No Hapi and Mi Man for Raf

Bifor Mi No Hapi and Mi Man for Raf
  • YEAR HEM BORN: 1974

  • KANTRI HEM KAM FROM: MEXICO

  • HISTORY: TAEM MI TEENAGER MI MAN FOR FAET AND RAF

LAEF BILONG MI BIFOR:

Mi born long Ciudad Mante, wanfala taon long Tamaulipas, Mexico. Staka pipol long there olketa kaen tumas. Bat hem no sef bikos wanfala grup stap wea organizem olketa criminal for duim staka nogud samting long datfala taon.

Long famili bilong mifala, mifala fofala boy and mi nao mek-tu long famili. Taem mi baby, dadi and mami tekem mi long Catholic Church for baptaes. Taem mi pikinini, mi joinim choir bilong church. Mi laek duim samting for mekem God hapi bikos mi no laekem hem for judgem mi and bonem mi long hellfire.

Taem mi faev year, dadi bilong mi lusim mifala. Datwan mekem mi barava sorre and mi missim hem. Mi no minim why nao hem lusim mifala bikos mifala lovem hem tumas. From datwan, mami bilong mi mas barava waka hard for provaedem wanem mifala needim.

Staka taem mi savve misstim skul mekem mi savve spendem taem witim olketa boy wea no skul. Olketa lanem mi for swear, smoke, steal, and for faet. Mi laekem tumas for winim narawan, so mi lanem boxing, wrestling, martial arts, and hao for iusim eni weapon. Diswan mekem mi barava raf. Staka taem mifala savve faet long gun, and from datwan samfala taem mi garekil and leidaon hafded long street. Mi tingim taem mami bilong mi kam and lukim mi, then hem kwiktaem tekem mi long hospital, hem sorre tumas.

Taem mi 16 year, Jorge, wanfala fren wea mifala growap tugeta, kam for lukim mifala. Hem talem mifala hem wanfala Jehovah’s Witness and hem laek for storyim wanfala important message long mifala. Hem iusim Bible for explainim olketa biliv bilong hem. No enitaem mi readim Bible, so mi hapi tumas for savve long nem bilong God, and plan bilong hem for olketa man. Jorge askem sapos mifala laek for studyim Bible and mifala agree for duim datwan.

BIBLE CHANGEM LAEF BILONG MI:

Mi hapi for faendemaot datfala teaching abaotem hellfire hem no kam from Bible. (Psalm 146:4; Ecclesiastes 9:5) Taem mi savve long datwan, mi no fraetem God nao. Mi luksavve God hem Dadi wea lovem olketa pikinini bilong hem and hem laekem olketa for kasem gud samting.

 Taem mi gohed for studyim Bible, mi luksavve mi mas changem wei bilong mi. Mi need for hambol and taem samwan duim samting wea mi no laekem mi mas no raf long hem. Datfala toktok wea stap long 1 Corinth 15:33 helpem mi. Hem sei “man wea fren witim pipol wea wei bilong olketa hem nogud bae spoelem gudfala wei bilong hem.” Mi luksavve sapos mi laek for changem wei bilong mi, mi mas no fren witim pipol wea savve spoelem mi. So mi lusim olketa fren bilong mi and start for fren witim olketa long kongregeson. Taem eni problem kamap, olketa no raf bat olketa followim olketa Bible principle.

Nara scripture wea helpem mi hem Rome 12:17-19 wea sei: “Sapos eniwan duim nogud samting long iufala, iufala no changem bak. . . . Traem best bilong iufala for stap gud witim olketa narawan. Iufala mas no changem bak nogud samting wea narawan duim, . . . bikos olketa Holy Raeting talem finis: ‘“Jehovah hem sei, mi nao bae changem bak nogud samting. Mi nomoa savve duim diswan.’” Mi start for luksavve Jehovah bae stretem olketa nogud samting wea happen long taem wea hem markem. Isisi mi start for lusim olketa nogud wei bilong mi.

Mi tingim yet samting wea happen long wanfala evening taem mi gogo bak for haos. Samfala boy bilong wanfala gang wea mifala enemy bifor, olketa attakim mi, and leader bilong olketa hitim baksaed bilong mi and sei, “Feisim mi!” Stretawe mi prea long Jehovah for helpem mi garem gudfala tingting. Nomata mi laek for faet, mi disaed for ranawe. Long next day, mi seke for lukim leader bilong datfala gang long road. Taem mi lukim hem mi laek for killim hem, bat mi prea long Jehovah for helpem mi no duim datwan. Datfala boy kam long mi, and mi sapraes taem hem sei: “Sorre tumas for samting wea mi duim long iu last naet. Mi no laek for duim kaen samting olsem. Mi laek for olsem iu tu. Mi laek for studyim Bible.” Mi hapi tumas mi kontrolem kros bilong mi! Bihaen datwan, mi start for studyim Bible witim hem.

Long datfala taem, olketa long famili bilong mi no laek for gohed studyim Bible. Bat mi disaed strong for gohed study and for no letem eni samting for stopem mi. Mi luksavve wei for fren witim pipol wea worshipim God savve mekem mi for hapi and olketa bae kamap olsem famili bilong mi. Mi gohed for followim wanem mi lanem, gogo long 1991, mi baptaes and kamap wanfala Jehovah’s Witness.

GUD SAMTING WEA MI KASEM:

Long bifor mi no hapi, mi laek for winim narawan, and mi man for raf. Bat Bible hem changem laef bilong mi. Distaem mi laek talem evriwan abaotem message bilong peace wea stap long Bible. Insaed 23-fala year wea go pas mi garem privilege for duim full-taem waka for teachim pipol abaotem Bible.

Lelebet taem mi duim volunteer waka long branch office bilong Olketa Jehovah’s Witness long Mexico. Long datfala taem, mi meetim Claudia, wanfala young gele wea strong for duim waka. Gogo mitufala marit long 1999. Mi hapi tumas Jehovah givim mi gudfala waef olsem!

Mitufala joinim wanfala saen languis kongregeson long Mexico for helpem olketa wea earpas for lane abaotem Jehovah. Bihaen, mitufala muv go long Belize for teachim Bible long olketa long there. Nomata distaem mitufala no garem staka samting, mitufala hapi nomoa and no ting for go bak long Mexico.

Mi hapi bikos mami bilong mi studyim Bible moa and gogo hem baptaes. And tu, big brata bilong mi, waef bilong hem, and olketa pikinini bilong tufala, olketa Jehovah’s Witness distaem. Samfala fren bilong mi bifor wea mi preach long olketa, olketa tu worshipim Jehovah distaem.

Bat sorre samting, samfala long famili bilong mi olketa no laef distaem bikos olketa no changem wei bilong olketa for raf. Sapos mi no changem wei bilong mi, maet mi tu bae no laef distaem. Mi tinghae long wei wea Jehovah helpem mi for savve long hem and pipol bilong hem. Olketa patient and kaen taem olketa teachim mi for followim olketa Bible principle.