Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa  |  No. 4 2016

 KAVA SUBJECT | BIBLE STAP KAM KASEM DISTAEM

Hao Nao Bible No Savve Rotten?

Hao Nao Bible No Savve Rotten?

PROBLEM: Long bifor, olketa man wea raetem and copyim Bible savve raet long papyrus and parchment. * (2 Timothy 4:13) Waswe, hem gud for raetem Bible long kaen samting olsem?

Papyrus hem isi nomoa for brek, kala bilong hem savve aot, and hem no barava strong. Richard Parkinson and Stephen Quirke wea studyim olketa old samting bilong Egypt sei: “Gogo papyrus savve rotten and kamap olsem dust. . . . Hem savve garem blak markmark, or olketa rat or insect olsem white ants, savve kaikaim.” Bihaen olketa faendem samfala papyrus, sun or hot weather savve mekem hem rotten kwiktaem.

Parchment hem strong winim papyrus, bat hem tu savve rotten sapos man no keepim gud or hem putim long ples wea hem sun or wea hem hot tumas. * Parchment tu olketa insect savve laek kaikaim. Dastawe staka raeting bilong bifor hem no stap distaem. Sapos datwan hem happen long Bible, bae message bilong Bible hem lus tu.

HAO NAO BIBLE STAP KAM KASEM DISTAEM?: Law bilong olketa Jew sei evri king mas “raetem insaed long buk for hemseleva wanfala copy bilong disfala Law,” wea hem nao first faevfala buk insaed long Bible. (Deuteronomy 17:18) Kasem first century C.E., plande manuscript hem stap insaed staka sinagog long Israel and nomata long Macedonia wea farawe tumas! (Luke 4:16, 17; Acts 17:11) Hao nao samfala old manuscript stap kam kasem distaem?

Olketa Dead Sea Scroll stap insaed long olketa botol for plande handred year insaed long olketa cave long drae ples

Wanfala Bible savveman, Philip Comfort, hem sei: “Olketa Jew savve keepim olketa scroll bilong olketa Holy Raeting insaed long olketa botol wea olketa wakem long clay.” Luk olsem, olketa Christian duim sem samting tu. Dastawe olketa savveman faendem samfala old manuscript insaed long olketa botol wea olketa wakem long clay, olketa dark ples for haedem samting, and insaed long olketa cave long ples wea barava drae.

GUD SAMTING WEA KAMAOT FROM DATWAN: Staka thousand Bible manuscript stap kam kasem distaem, and samfala hia olketa raetem winim 2,000 year bifor. No eni nara buk hem garem staka old manuscript olsem.

^ par. 3 Olketa wakem papyrus from wankaen plant wea hem savve grow long wata. Olketa wakem parchment from skin bilong animal.

^ par. 5 Olsem example, olketa raetem datfala U.S. Declaration of Independence long parchment. Nomata hem no kasem 250 year bihaen datwan, hem hard nao for man readim.