Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa  |  No. 3 2017

 FOLLOWIM FAITH BILONG | OLKETA SARAH

“Iu Woman wea Luk Naes Tumas”

“Iu Woman wea Luk Naes Tumas”

TINGIM wanfala woman from Midol East wea eye bilong hem luk naes tumas. Hem standap midol long wanfala rum, and hem lukluk long evri samting insaed long datfala rum. Nem bilong hem Sarah. Maet hem lelebet luk sorre tu. Why nao olsem? Hem garem staka naes memory bilong taem wea hem and hasband bilong hem Abraham tufala stap long datfala haos. * Tufala laekem tumas datfala haos.

Tufala stap long Ur, wanfala rich taon wea garem staka bisnis and stoa and pipol long there savve tumas hao for wakem olketa naes samting. So luk olsem tufala garem staka naes samting. Bat haos bilong Sarah hem no ples for putim nomoa olketa naes samting. Sarah and hasband bilong hem stap long datfala haos for staka year nomata long taem wea hem no isi, and long olketa gudfala taem tu. Tufala prea staka taem long God bilong tufala, Jehovah, long datfala haos. Olketa samting hia mekem Sarah lovem tumas datfala haos.

Nomata olsem, Sarah willing for lusim evri samting wea hem getius long hem. Nomata maet hem 60 year finis, Sarah bae go long ples wea hem no savve long hem, staka taem bae laef bilong hem hard, bae hem stap long danger, and luk olsem bae hem no kam bak long hom bilong hem tu. Hao nao gogo laef bilong hem barava change olsem? And wanem nao iumi savve lanem from faith bilong Sarah?

“LUSIM HOM BILONG IU”

Luk olsem Sarah hem grow ap long Ur. Distaem, ples wea Ur stap long hem bifor hem emti and no eniwan stap long hem. Bat long taem bilong Sarah, olketa kago ship savve followim Euphrates River and tekem kago from olketa farawe ples kam long datfala big taon. Staka pipol nao stap long datfala taon, olketa ship savve kam lei long wharf, and pipol salem staka samting long olketa market. Sarah hem growap long datfala taon wea staka samting gohed happen insaed, and maet hem savve long pipol long there tu. Pipol long there savve long hem tu bikos hem woman wea barava luk naes tumas. Hem kam from bigfala famili tu wea stap long datfala taon.

Bible storyim Sarah hem wanfala woman wea garem strongfala faith. Bat hem no worshipim moon god wea staka pipol worshipim, and wea olketa wakem wanfala taoa for datfala god long Ur. For lelebet taem, Dadi bilong hem tu worshipim olketa idol. Bat Sarah hem worshipim Jehovah, datfala tru God. Bible no storyim hao nao Sarah start for worshipim Jehovah. Sarah hem maritim Abraham, wea hem ten year winim Sarah. * (Genesis 17:17) Bihaen, Bible sei Abraham hem “dadi bilong evriwan wea garem faith.” (Rome 4:11) Abraham and Sarah waka tugeta for strongim marit bilong tufala, so tufala respectim each other, tufala savve story gud tugeta, and taem tufala kasem problem, tufala willing for deal witim datwan tugeta. Main samting  wea strongim marit bilong tufala nao hem love wea tufala garem for God bilong tufala.

Sarah lovem tumas hasband bilong hem, and bihaen tufala marit, tufala stap klosap long olketa relative bilong tufala long Ur. Bat no longtaem bihaen, tufala kasem wanfala samting wea mekem tufala sorre. Bible sei Sarah “hem no savve garem pikinini.” (Genesis 11:30) Datwan mekem hem no isi for Sarah bikos long datfala taem sapos woman no garem pikinini, pipol savve ting daonem hem. Nomata olsem, Sarah gohed faithful for worshipim God bilong hem, and hem faithful long hasband bilong hem tu. Lot hem nephew bilong tufala wea dadi bilong hem dae finis. Luk olsem tufala ting long Lot olsem son bilong tufala. Gogo, evri samting hem change.

Wanday Abraham kam long Sarah and laek for talem hem wanfala important nius. Hem sapraes tumas long samting wea happen long hem. God wea tufala worshipim hem kam long Abraham and story long hem. Luk olsem wanfala angel nao kam story long hem! Tingim Sarah hem lukluk strong long hasband bilong hem and hem ask olsem: “Wanem nao hem talem long iu? Plis iu talem mi!” Maet Abraham hem sidaon firstaem and tingim wanem nao bae hem talem. Then hem talem Sarah samting wea Jehovah talem long hem. Jehovah sei: “Lusim hom and pipol bilong iu and go long nara ples wea bae mi showim long iu.” (Acts 7:2, 3) Bihaen Abraham talem datwan, tufala ting raonem wanem Jehovah askem tufala for duim. Tufala bae lusim gudfala laef bilong tufala and go stap long nara ples! Wanem nao bae Sarah talem? Luk olsem Abraham hem lukluk strong long Sarah for lukim sapos hem bae willing for duim wanem God askem tufala for duim.

Maet samting wea happen long Sarah no happen long iumi. Maet iumi ting olsem, ‘No enitaem God askem mi or marit partner bilong mi for duim eni samting olsem!’ Nomata olsem, iumi evriwan tu mas disaedem sem samting olsem Sarah. Iumi stap long disfala world wea mekhae long wei for garem gudfala laef, olketa material samting, and for garem staka selen. Bat Bible encouragem iumi for duim difren samting. Hem sei samting wea shud important long iumi nao hem for duim olketa samting wea God laekem, and no olketa samting wea iumiseleva laekem. (Matthew 6:33) Taem iumi ting abaotem wanem Sarah duim, hem gud for tingim diswan, ‘Waswe, bae mi mekem sem disison olsem Sarah?’

TUFALA “LUSIM HOM” BILONG TUFALA

Taem Sarah redyim olketa samting wea bae hem tekem, hem mas disaedem wanem hem bae tekem and wanem bae hem no tekem. Hem bae no tekem eni samting wea big tumas for olketa donkey and camel for karem, and eni samting wea bae olketa no needim taem olketa travel. Masbi hem salem or givim staka samting long nara pipol. Bae hem lusim tu isi laef wea hem garem long Ur. Olsem example, hem isi for hem go long  market for peim olketa grain, meat, frut, kaleko, and olketa nara samting wea olketa needim.

Faith bilong Sarah mekem hem for lusim olketa naesfala samting and gudfala laef

Maet samting wea barava hard long Sarah nao hem for lusim haos bilong hem. Olsem olketa nara haos wea olketa archaeologist faendem long Ur, maet haos bilong Sarah hem naes haos wea garem evri samting insaed. Samfala long olketa haos hia hem garem staka rum, and wata supply hem kam insaed long haos. Nomata wanfala simpol haos tu hem garem strongfala ruf, wall, and door wea garem olketa strongfala lok. Waswe, olketa tent garem olketa samting hia wea savve protectim olketa from man for steal? Or from olketa lion, leopard, bear, and olketa wild dog wea staka tumas long datfala taem?

Waswe long famili bilong Sarah? Hu nao olketa long famili wea bae hem lusim olketa? Taem God sei long tufala: “Lusim hom and pipol bilong iu” maet datwan hem barava hard samting for Sarah. Maet hem garem olketa brata and sista, olketa niece and nephew, and olketa aunty and uncle wea hem barava lovem wea maet bae hem no lukim olketa moa. Nomata olsem, Sarah hem gohed for redyim olketa samting for datfala gogo.

Nomata hem no isi, bat long day wea olketa markem for go Sarah redyim evri samting finis. Terah, wea hem nao hed bilong famili hem tu go witim Abraham and Sarah nomata hem samting olsem 200 year finis. (Genesis 11:31) Sarah bae hem busy for lukaftarem Terah wea olo finis. Lot tu go witim olketa. Evriwan hia obeyim Jehovah and “lusim Chaldea.”Acts 7:4.

Datfala grup go followim Euphrates river for go kasem Haran, wea hem samting olsem 960 kilometer long northwest long Ur. Taem olketa kasem Haran olketa stap firstaem long there bikos maet long datfala taem Terah hem sik and hem no fit for travel. Olketa stap go kasem taem wea hem dae and hem dae taem hem 205 year. Bifor olketa lusim Haran Jehovah story moa witim Abraham. Hem talem hem for lusim datfala ples and go long ples wea Jehovah bae showim long hem. Long datfala taem tu Jehovah talem hem disfala nambawan promis: “Mi bae mekem laen bilong iu kamap wanfala big nation.” (Genesis 12:2-4) Bat taem olketa lusim Haran, Abraham hem 75 year and Sarah hem 65 year, and tufala no garem eni pikinini. So hao nao bae wanfala nation kam from laen bilong Abraham? Waswe, bae hem tekem nara waef moa? Hem wei bilong pipol long there for garem tu-thri waef, so maet Sarah tu tingting abaotem hao nao bae datfala promis kamap tru.

So olketa lusim Haran nao. Bat hu nao go witim olketa taem olketa lusim Haran? Bible sei taem famili bilong Abraham lusim datfala ples olketa garem staka samting and staka wakaman tu go witim olketa. (Genesis 12:5) Iumi sure Abraham and Sarah story abaotem Jehovah long pipol wea willing for lisin. Samfala old buk bilong olketa Jew wea storyim diswan sei olketa wakaman hia hem olketa pipol long datfala ples wea worshipim Jehovah witim Abraham and Sarah. Sapos olsem, datwan minim Sarah hem wanfala woman wea garem strongfala faith taem hem story abaotem God bilong hem and hope wea hem garem. Example bilong Sarah savve helpem iumi bikos iumi stap long taem wea pipol no garem faith and no garem eni hope tu. Taem iu lanem gudfala samting from Bible, waswe, iu storyim datwan long nara pipol?

“GO DAON LONG EGYPT”

Bihaen olketa akrosim Euphrates river, maet datwan hem long Nisan 14, 1943 B.C.E., olketa go daon long ples wea Jehovah promis for givim olketa long south. (Exodus 12:40, 41) Tingim taem olketa gogo Sarah hem lukim datfala ples hem luk naes, staka samting grow long there, and weather hem naes tu. Klosap long olketa big tree long Moreh, wea klosap long Shechem, Jehovah kam story moa long Abraham. Hem sei: “Mi bae givim disfala land long pikinini bilong iu.” Datfala toktok “pikinini” garem bigfala mining long Abraham! Datwan mekem hem tingim samting wea happen long garden bilong Eden, taem Jehovah talem profesi abaotem wanfala pikinini wea bae killim dae Satan. Jehovah talem finis long Abraham nation wea bae kam from laen bilong hem bae mekem wei for evri pipol long earth for kasem blessing.Genesis 3:15; 12:2, 3, 6, 7.

Nomata olsem, famili bilong tufala feisim olketa problem tu. From bigfala hangre kamap long Canaan, Abraham disaed for tekem famili bilong hem go daon long Egypt. Bat Abraham luksavve olketa stap long danger. So hem sei olsem long Sarah: “Plis iu herem mi! Iu wanfala woman wea luk naes tumas. So taem olketa bilong Egypt lukim iu bae olketa sei, ‘Diswan nao waef bilong hem.’ Then bae olketa killim mi dae, bat bae olketa no killim iu dae. Plis iu mas sei iu sista bilong mi mekem no eni nogud samting kasem mi bikos  long iu. And bae iu sevem laef bilong mi.” (Genesis 12:10-13) Why nao Abraham askem Sarah for duim datwan?

Samfala pipol sei taem Abraham duim datwan hem showimaot hem man for laea and hem man for fraet. Bat tru samting nao Sarah hem haf sista bilong hem. And Abraham garem gudfala reason for duim datwan. Abraham and Sarah luksavve plan bilong God hem for wanfala pikinini and wanfala nation bae kam from laen bilong Abraham dastawe hem barava important for Abraham mas stap sef. Interesting samting nao, olketa archaeologist faendem pruv wea showimaot wei bilong olketa bigman long Egypt bifor hem for killim dae man mekem olketa savve stealim waef bilong hem. So Abraham duim wise samting and Sarah hambol for sapotim datfala disison.

No longtaem bihaen, samting wea Abraham tingim hem happen. Samfala prince bilong Pharaoh lukim Sarah hem luk naes tumas, wea diswan hem sapraesing samting bikos Sarah hem olo finis. Olketa storyim abaotem Sarah long Pharaoh and Pharaoh sei for olketa mas go tekem kam Sarah! Masbi Abraham hem wari tumas and Sarah hem barava fraet. Luk olsem olketa no holem Sarah olsem prisoner bat hem wanfala guest long haos bilong King. Maet Pharaoh plan for switim Sarah and mekem hem laekem olketa riches bilong hem and then bae hem go askem Abraham wea hem tingse hem brata bilong Sarah, for hem maritim Sarah.Genesis 12:14-16.

Tingim Sarah, hem standap long wanfala window or varanda long haos bilong King and hem lukluk go aot evriwea long datfala ples. Iu ting hao nao hem feel taem hem stap moa insaed gudfala haos, and olketa givim hem barava naesfala kaikai? Waswe, hem laekem kaen rich laef olsem wea maet hem winim tu laef bilong hem long Ur? Satan bae hapi tumas sapos Sarah hem lusim Abraham and maritim Pharaoh! Bat Sarah no duim datwan. Hem faithful long hasband bilong hem, long marit bilong hem, and long God bilong hem. Hem bae gud tumas sapos evriwan wea marit olketa faithful olsem Sarah! Waswe, iu savve followim example bilong Sarah for faithful long olketa wea iu lovem and olketa fren bilong iu?

Nomata Pharaoh trae for switim Sarah, hem faithful long hasband bilong hem

Jehovah protectim Sarah taem hem mekem Pharaoh and famili bilong hem for kasem nogud samting. Taem Pharaoh luksavve Sarah hem waef bilong Abraham, hem sendem Sarah go bak long hasband bilong hem and talem olketa for lusim Egypt. (Genesis 12:17-20) Masbi Abraham hapi tumas taem Sarah hem kam bak! Tingim wanem hem talem long Sarah: “Iu woman wea luk naes tumas.” Bat Abraham no tinghae long wei wea Sarah luk naes nomoa. Sarah hem garem olketa gudfala wei, wea hem nao Jehovah tinghae long hem. (1 Peter 3:1-5) Iumi evriwan laek for garem olketa gudfala wei olsem. Iumi followim example bilong Sarah sapos iumi duim olketa samting wea God laekem and no aftarem olketa material samting, story abaotem God long nara pipol, and followim olketa standard bilong God nomata eniwan trae for switim iumi.

^ par. 3 Firstaem nem bilong tufala hem Abram and Sarai, bat staka pipol savve long nem wea Jehovah givim long tufala bihaen, hem nao Abraham and Sarah.Genesis 17:5, 15.

^ par. 8 Sarah hem haf sista bilong Abraham. Terah hem dadi bilong tufala, bat tufala born long tufala difren woman. (Genesis 20:12) Nomata distaem hem no fitim for man maritim sista bilong hem, bat iumi mas remember datfala taem hem difren from distaem. From olketa laef no longtaem bihaen Adam and Eve lusim perfect laef, olketa savve maritim klos relative. Nomata olketa duim datwan, hem no affectim health bilong olketa pikinini bilong olketa bikos long datfala taem olketa man strong and laef longtaem. Bat samting olsem 400 year bihaen, olketa man no savve laef longtaem, olsem iumi distaem. Start long taem hia nao Law bilong Moses hem stopem wei for duim sex witim klos relative.Leviticus 18:6.