Waswe, olketa oldfala samting wea olketa savveman faendem sapotim wanem Bible talem? Long 2014, Biblical Archaeology Review magasin askem disfala kwestin: “Haomas pipol wea olketa Hebrew Scripture story abaotem nao olketa savveman faendem pruv abaotem olketa, wea showimaot olketa really stap bifor?” Ansa: “Samting olsem 50-fala pipol!” Wanfala man wea nem bilong hem no insaed long datfala list nao hem Tattenai. Hu nao datfala man? Distaem bae iumi storyim wanem Bible talem abaotem hem.

Taem Persia hem world paoa, hem rulim staka ples and wanfala hem Jerusalem. Jerusalem stap long area wea olketa bilong Persia kolem Narasaed Long River, wea hem long west saed bilong Euphrates River. Bihaen olketa bilong Persia winim Babylon, olketa letem olketa Jew wea prisoner long there for go bak long Jerusalem for buildim bak temple bilong Jehovah. (Ezra 1:1-4) Bat olketa enemy bilong olketa Jew againstim olketa and sei samting wea olketa Jew duim hem againstim gavman bilong Persia. (Ezra 4:4-16) Long taem wea King Darius I (522-486 B.C.E.) hem rul, wanfala bigman bilong Persia wea nem bilong hem Tattenai, hem leadim wanfala sekson for faendemaot sapos samting wea pipol hia talem hem tru or nomoa. Bible sei Tattenai hem “governor bilong area wea olketa kolem Narasaed Long River.”​—Ezra 5:3-7.

Olketa savveman faendem samfala ston wea garem nem bilong Tattenai long hem. Olketa sei maet olketa ston hia hem bilong famili bilong Tattenai. Raeting long wanfala ston hem abaotem wanfala wakaman bilong Tattenai. Datfala wakaman hem witness long wanfala agreement wea olketa saenem long 502 B.C.E, wea datwan hem long mek-20 year wea King Darius I hem rul. Datfala raeting sei hem wakaman bilong “Tattannu, governor bilong Narasaed Long River,” wea hem sem Tattenai wea Bible buk Ezra storyim.

Wanem kaen waka nao Tattenai duim? Long 535 B.C.E., Cyrus wea hem king bilong Persia hem divaedem evri ples wea hem rulim for kamap olketa province. Nem bilong wanfala long olketa province hia hem Babylon and Narasaed Long River. Bihaen, olketa divaedem moa datfala province for kamap tufala province. Nem bilong wanfala hem Narasaed Long River. Hedquarter bilong disfala province hem long Damascus, and olketa area wea insaed nao hem Coele-Syria, Phoenicia, Samaria, and Judah. Tattenai nao hem governor bilong datfala province start long 520 go kasem 502 B.C.E.

Bihaen Tattenai go long Jerusalem for faendemaot sapos samting wea pipol talem abaotem olketa Jew hem tru or nomoa, hem sendem report go long King Darius. Hem sei olketa Jew sei Cyrus nao givim order long olketa for buildim bak temple bilong Jehovah. So olketa chekim olketa record long haos bilong king and olketa faendem datfala order wea Cyrus hem givim long olketa Jew. (Ezra 5:6, 7, 11-13; 6:​-3) So King Darius talem Tattenai for letem olketa Jew buildim bak datfala temple, and Tattenai duim wanem king talem.​—Ezra 6:6, 7, 13.

“Tattenai, datfala governor bilong Narasaed Long River” hem no duim eni big samting long history. Nomata olsem, Bible story abaotem hem and stretfala title wea hem garem. So diswan hem narafala pruv wea olketa savveman faendem wea showimaot wanem Bible talem abaotem history hem tru.