Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa  |  No. 3 2017

Mi hapi for associate witim olketa young wan long kongregeson

 BIBLE CHANGEM LAEF BILONG PIPOL

Mi Laekem Tumas Baseball Winim Eni Nara Samting!

Mi Laekem Tumas Baseball Winim Eni Nara Samting!
  • YEAR HEM BORN: 1928

  • KANTRI HEM KAM FROM: COSTA RICA

  • HISTORY: SPORTS AND WEI FOR GAMBOL HEM MAIN SAMTING LONG LAEF BILONG MI

LAEF BILONG MI BIFOR

Mi growap long Puerto Limón, wanfala taon wea stap long saedsea long east saed long Costa Rica. Long famili bilong mifala, mifala eitfala pikinini, and mi nao mek seven pikinini. Taem mi eit year dadi bilong mi hem dae. Bihaen datwan, mami bilong mifala nomoa lukaftarem mifala.

Start taem mi pikinini yet mi pleim baseball. Mi laekem tumas disfala game. Taem mi klosap 20 year mi joinim wanfala baseball team long ples bilong mi. Taem mi gohed for plei long datfala team, wanfala man for chusim olketa wea savve pleim disfala game askem mi sapos mi laek for go plei for wanfala team long Nicaragua, and bae olketa peim mi. Bat long datfala taem mami bilong mi hem sik and mi nao lukaftarem hem, so mi no laek for go stap long Nicaragua. Mi talem datfala man bae mi no joinim datfala team. Bihaen, nara man askem mi moa for plei for national baseball team bilong Costa Rica, and olketa chusim olketa best player long olketa nara team long full kantri nao for joinim datfala team. So mi agree for duim datwan. Start long 1949 go kasem 1952, mi plei for national team and mifala plei long Cuba, Mexico, and Nicaragua. Position bilong mi hem baseman, and wantaem mi pleim 17-fala game and mi no mekem eni mistek. Mi laekem tumas taem evriwan long crowd singaotem nem bilong mi!

Nomata olsem, laef bilong mi hem olobaot tu. Mi frenim wanfala gele bat mi savve tekem olketa nara gele tu. Mi man for drinkim tumas alcohol. Wanday, mi barava spaka nogud and long next day, taem mi wekap mi no savve hao nao gogo mi kasem haos! Mi man for gambol tu. Mi savve pleim olketa domino game and lottery.

Long datfala taem mami bilong mi kamap wanfala Jehovah’s Witness. Hem trae for storyim long mi wanem hem lanem long Bible, bat mi no interest long datwan bikos main samting long laef bilong mi hem sports. Baseball nomoa hem only samting wea mi tingim. Sapos mi duim training, bae mi nating feel hangre  nomoa nomata hem kasem taem for kaikai! Mi laekem tumas for pleim baseball winim eni nara samting!

Bat taem mi 29 year, mi kasem wanfala injury wea hem serious. Datwan happen taem mi trae for kotem wanfala ball taem mifala plei. Bihaen mi kamap gud, mi no plei nao. Nomata olsem, mi gohed trainim olketa wea plei for wanfala baseball team long ples bilong mi.

BIBLE CHANGEM LAEF BILONG MI

Long 1957, mi attendim wanfala convention bilong Olketa Jehovah’s Witness long wanfala stadium wea mi savve plei baseball long hem bifor. Taem mi sidaon witim evriwan, mi lukim wei wea olketa Witness showimaot respect hem barava difren from crowd wea raf tumas wea kam for lukluk long olketa baseball game. Samting wea mi lukim long datfala convention mekem mi laek for studyim Bible witim olketa Witness, and for go long olketa meeting bilong olketa.

Mi sapraes tumas long staka samting wea mi lanem long Bible. Olsem example, Jesus sei olketa disaepol bilong hem bae talemaot gud nius abaotem Kingdom bilong God evriwea long world. (Matthew 24:14) Mi lanem tu olketa Christian no kasem pei taem olketa duim datfala waka. Jesus sei: “Samting wea iufala kasem hem free nomoa, so iufala mas no askem selen for samting wea iufala duim.”Matthew 10:8.

Taem mi gohed studyim Bible, mi lukim Olketa Jehovah’s Witness followim wanem Bible talem. Mi tinghae long wei wea olketa waka hard for talemaot gud nius abaotem Kingdom bilong God evriwea long world. Mi lukim olketa hapi for givim samting, wea hem nao wanem Jesus talem olketa Christian for mas duim. So taem mi readim Mark 10:21 wea Jesus sei for “iu kam followim mi,” datwan mekem mi laek for kamap wanfala Witness.

Bat hem tek taem for mi followim wanem mi lanem long Bible. Olsem example, for staka year mi iusim lucky namba bilong mi for pleim lottery evri week. Bat mi lanem long Bible God hem no hapi long pipol wea greedy, and long olketa wea worshipim “god wea nem bilong hem Gud Luck.” (Isaiah 65:11; Colossae 3:5) So mi disaed for no gambol nao. Firstfala Sunday bihaen mi stop for gambol, lucky namba bilong mi hem win! Pipol tok spoelem mi bikos long datfala week mi no plei and olketa barava encouragem mi for plei moa, bat mi no laek for plei. No enitaem bihaen mi gambol moa.

Long day wea mi baptaes long wanfala convention bilong Olketa Jehovah’s Witness, mi kasem nara test moa. (Ephesus 4:24) Long evening, taem mi go bak long hotel wea mi stap, gele wea mi frenim bifor hem weitim mi front long door long rum bilong mi. Hem sei long mi: “Sammy, kam iumi enjoy firstaem!” Long semtaem nomoa mi sei long hem, “Nomoa!” Mi talem hem moa distaem mi followim wanem Bible talem. (1 Corinth 6:18) Hem sei, “Iu hao ia?” Then hem tok daonem wanem Bible talem abaotem wei for durong and hem forcem mi for mitufala fren bak moa. Nomata olsem, mi go insaed long rum bilong mi and lokim door. Mi hapi tumas bikos start kam long 1958 taem mi kamap Witness, mi no duim moa olketa nogud samting wea mi duim bifor.

GUD SAMTING WEA MI KASEM

Mi kasem staka gud samting from mi followim wanem Bible talem! Mi garem olketa trufala fren, laef bilong mi garem mining, and mi barava hapi.

Mi still laek for plei baseball, bat hem no main samting long laef bilong mi nao. Taem mi plei baseball, mi kasem bignem and staka selen, bat olketa samting hia no stap for olowe. Wei wea mi fren witim God and olketa brata and sista hem nao olketa samting wea bae stap for olowe. Bible sei: “World bae finis and evri samting wea pipol long world laekem bae finis tu, bat man wea duim wanem God hem laekem bae stap for olowe.” (1 John 2:17) Distaem mi lovem Jehovah God and pipol bilong hem winim eni nara samting!