Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa  |  No. 3 2017

 KAVA SUBJECT | FOFALA MAN WEA RAEDEM HORSE—HAO OLKETA AFFECTIM IU

Fofala Man wea Raedem Horse—Hu Nao Olketa?

Fofala Man wea Raedem Horse—Hu Nao Olketa?

Maet iumi konfius or iumi fraet taem iumi read abaotem fofala man wea raedem horse bat iumi shud no feel olsem. Why? Bikos Bible and olketa samting wea happen distaem helpem iumi for savve long wanem nao fofala man wea raedem horse piksarem. And nomata wei wea fofala man hia start for raedem horse hem showimaot earth bae kasem trabol, bat diswan hem gud nius for iu and famili bilong iu. Hao nao olsem? Firstaem, iumi laek faendaot hu nao olketa man wea raedem horse.

MAN WEA RAEDEM WHITE HORSE

Bible sei: “Mi lukim wanfala horse wea kala bilong hem white and man wea sidaon antap long hem holem wanfala bow and arrow. God givim hem wanfala kraon and hem go for winim olketa enemy bilong hem.”Revelation 6:2.

Hu nao datfala man wea raedem white horse? Nara verse long Bible buk Revelation hem talem iumi hu nao datfala man. Hem sei: “Nem bilong hem Word bilong God.” (Revelation 19:11-13) Datfala title Word bilong God, hem title bilong Jesus Christ, bikos hem nao man wea toktok for God. (John 1:1, 14) And olketa nara title bilong hem tu hem “King bilong olketa king and Lord bilong olketa lord,” and hem “Faithful and Tru.” (Revelation 19:11, 16) Olketa title hia showimaot hem wanfala king wea garem paoa for faet, bat hem no iusim datfala paoa long rong wei or for spoelem narawan. Nomata olsem, maet iumi garem samfala kwestin.

Hu nao givim paoa long Jesus for go faet? God nao givim hem paoa. (Revelation 6:2) Profet Daniel lukim wanfala vision abaotem Messiah. Hem sei datfala “man from taem bifor kam,” wea hem nao Jehovah God, hem givim ‘paoa for rul, glory, and wanfala kingdom’ long datfala Messiah. * (Daniel 7:13, 14) So Olmaeti God nao givim paoa long Jesus for rul and for judgem pipol. Datfala white horse hem piksarem raeteous war wea Son bilong God hem faet insaed bikos staka taem Bible storyim white kala for piksarem samting wea stret.Revelation 3:4; 7:9, 13, 14.

Wanem taem nao olketa man hia start for raedem horse? Man wea raedem firstfala horse, Jesus, hem start for raed taem God givim hem wanfala crown. (Revelation 6:2) Wanem taem nao God mekem Jesus kamap King long heven? Datwan no happen bihaen hem dae and laef bak long heven. Bible sei bihaen Jesus go bak long heven, hem mas weit firstaem. (Hebrew 10:12, 13) Jesus talem olketa disaepol bilong hem wanem bae showimaot hem start for rul long heven. Jesus sei taem hem start for rul, evri samting long world bae worse. Pipol bae faetem nara pipol, bigfala hangre bae kamap, and olketa barava nogud sik bae kamap. (Matthew 24:3, 7; Luke 21:10, 11) No longtaem bihaen World War I hem start long 1914, evri samting wea happen long world showimaot datfala taem wea Jesus storyim hem start nao, and iumi stap long “olketa last day” wea Bible sei evri samting long earth bae hem nogud.2 Timothy 3:1-5.

Bat why nao evri samting long world hem kamap worse start long taem wea Jesus kamap king long 1914? Bikos long datfala taem, Jesus start for rul long heven, no long disfala earth. Bigfala faet hem kamap long heven, and Jesus wea start for rul, wea Bible sei nem bilong hem Michael, hem torowem Satan and olketa demon bilong hem kam daon long earth. (Revelation 12:7-9, 12) From Satan hem stap long earth, hem barava kros bikos hem savve hem garem lelebet taem nomoa. Klosap nao God bae finisim Satan. (Matthew 6:10) Distaem bae iumi storyim nara thrifala man wea raedem horse, and diswan bae helpem iumi for luksavve iumi stap long olketa nogud “last day.” Firstfala man wea raedem horse hem piksarem wanfala man, bat nara thrifala man wea raedem horse hem piksarem olketa samting wea happen evriwea long world.

 MAN WEA RAEDEM RED HORSE

“Mi lukim nara horse hem kam wea kala bilong hem red. Man wea sidaon antap long hem kasem paoa for aotem peace from earth mekem olketa pipol killim dae olketa narawan. Hem kasem tu wanfala big sword.”Revelation 6:4.

Man wea raedem red horse hem piksarem war. Disfala man hem kasem paoa for aotem peace from earth. Long 1914, wanfala war kamap wea kasem full world, wea hem firstaem for diswan happen. Then mek-tu world war hem kamap, wea hem worse winim firstfala world war. Samfala pipol sei winim 100 million pipol dae long olketa war start kam long 1914! And tu, staka narawan kasem olketa barava nogud samting from olketa war hia.

Waswe long taem bilong iumi? Distaem, olketa kantri raonem world garem olketa samting for faet wea olketa savve iusim for killim dae evriwan long full world long semtaem. Nomata olketa organization wea sei olketa savve mekem peace for kamap, olsem United Nation, olketa no fit for stopem datfala man wea raedem red horse.

MAN WEA RAEDEM BLAK HORSE

“Mi lukim wanfala horse wea kala bilong hem blak and man wea sidaon antap long hem holem wanfala scale. Mi herem samting olsem wanfala voice hem kam from fofala cherub hia. Hem sei: ‘Price bilong wan kilo wheat hem wanfala denarius, and price bilong thri kilo barley hem wanfala denarius. Iusim gud olive oil and wine nogud hem finis.’ ”Revelation 6:5, 6.

Man wea raedem blak horse hem piksarem bigfala hangre. Disfala scripture showimaot kaikai hem barava short so price bilong wan kilo wheat hem wanfala denarius, wea diswan hem pei bilong man wea waka for full day, long first century! (Matthew 20:2) Olketa savve peim thri kilo barley long wanfala denarius tu, wea hem grain wea quality bilong hem no mas gud olsem wheat. Waswe, kaikai hia bae fitim wanfala big famili? Taem scripture hia sei pipol mas iusim gud olive oil and wine, wea pipol long datfala taem savve iusim olowe, datwan hem olsem warning for olketa mas weim kaikai bilong olketa.

Start kam long 1914, waswe, iumi lukim samting wea pruvim man wea raedem blak horse hem gohed for raed? Yes! Samting olsem 70 million pipol dae from bigfala hangre long mek-20 century. Wanfala report sei: “Long 2012 go kasem 2014, samting olsem 805 million pipol no healthy bikos olketa no garem inaf kaikai or no kaikaim healthy kaikai. Diswan hem wanfala long evri naenfala pipol long full world.” Narafala report sei: “Evri year namba bilong pipol wea dae from bigfala hangre hem winim total namba bilong pipol wea dae from AIDS, malaria, and TB.” Nomata staka pipol waka hard for givim kaikai long olketa wea kasem bigfala hangre, olketa no fit for stopem datfala man wea raedem blak horse.

MAN WEA RAEDEM HORSE WEA KALA BILONG HEM LUK NOGUD

“Mi lukim wanfala horse wea kala bilong hem luk nogud, olsem man wea sik. Dae nao nem bilong man wea sidaon antap long hem, and grev hem go followim hem. Olketa kasem paoa for killim dae smol haf long evri pipol long earth. Olketa bae iusim bigfala sword, bigfala hangre, olketa barava nogud sik, and olketa wild animal for killim pipol dae.”Revelation 6:8.

Mek-foa man wea raedem horse hem piksarem dae, wea kamaot from olketa nogud sik and olketa nara nogud samting. Olsem example, no longtaem bihaen 1914, staka million pipol dae from datfala Spanish flu. Samting olsem 500 million pipol nao kasem datfala sik, wea diswan hem wanfala long evri thrifala man long earth!

Bat Spanish flu hem wanfala sik nomoa. Olketa savveman sei winim 300 million pipol dae from datfala sik smallpox long mek-20 century. Kam kasem distaem, staka million pipol dae from AIDS, TB, and malaria nomata olketa savveman duim staka research for finisim olketa sik hia.

Samting wea kamaot from war, bigfala hangre, and olketa barava nogud sik hem semsem, hem nao dae. Evriwan wea dae from olketa samting hia olketa go long Grev, and Grev no givim olketa hia eni hope.

 KLOSAP NAO IUMI BAE KASEM GUDFALA LAEF!

Klosap nao olketa nogud samting wea happen long world distaem bae finis. Iumi mas tingim diswan: Jesus hem torowem Satan kam daon long earth long 1914, bat hem no “winim olketa enemy bilong hem” yet. (Revelation 6:2; 12:9, 12) Klosap nao, long Armageddon, Jesus bae putim Satan insaed “hol wea deep tumas,” and hem bae finisim evriwan long earth wea sapotim Satan. (Revelation 20:1-3) Jesus bae no stopem nomoa wei wea thrifala man hia raedem horse bat hem bae aotem tu olketa nogud samting wea kamaot from wanem olketa duim. Hao nao bae hem duim datwan? Tingim olketa promis wea stap insaed Bible.

War bae finis, peace bae stap. Jehovah “bae finisim olketa war long full earth. Hem brekem bow and pisisim spia.” (Psalm 46:9) Pipol wea laekem peace “bae hapi fogud bikos evriwan bae garem peace.”Psalm 37:11.

Wei for short long kaikai bae finis, earth bae garem staka kaikai. Bible sei: “Earth bae garem staka kaikai. Antap long olketa maunten bae hem fulap long kaikai.”Psalm 72:16.

Klosap nao Jesus bae aotem olketa nogud samting wea kamaot from wanem thrifala man wea raedem horse duim

Olketa nogud sik and dae bae finis, evriwan bae healthy and laef olowe. God “bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu.”Revelation 21:4.

Taem Jesus stap long earth, hem duim olketa gudfala samting wea showimaot wanem hem bae duim long future taem hem bae rul. Jesus encouragem wei for stap gud witim nara pipol, duim mirakol for feedim staka thousand pipol, healim olketa wea sik, and mekem olketa wea dae for laef bak tu.Matthew 12:15; 14:19-21; 26:52; John 11:43, 44.

Olketa Jehovah’s Witness bae hapi tumas for showim long Bible wanem iu mas duim for redi for datfala taem wea Jesus bae stopem olketa man wea raedem horse. Waswe, iu laek for lanem moa samting abaotem diswan?

^ par. 7 Jehovah hem nem bilong God wea stap insaed Bible.