Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa  |  No. 3 2016

 KAVA SUBJECT | TAEM SAMWAN IUMI LOVEM HEM DAE

Waswe, Hem Rong for Iumi Gohed Sorre?

Waswe, Hem Rong for Iumi Gohed Sorre?

Maet enitaem iu garem flu, bat bihaen wan week nomoa iu gud bak, then iu no tingim moa datwan. Diswan hem difren from taem samwan wea iu lovem hem dae bikos iu bae gohed for tingim hem. Doctor Alan Wolfelt wea raetem datfala buk Healing a Spouse’s Grieving Heart, hem sei: “Taem samwan hem dae, datfala feeling for sorre hem hard for finis.” Bat hem sei tu: “Bihaen samfala taem go pas and from olketa narawan sapotim iu, bae iu no sorre tumas.”

Tingim example bilong Abraham taem waef bilong hem dae. Bible sei: “Abraham start for sorre and krae bikos Sarah hem dae.” Luk olsem from Abraham just “start for” krae long datfala taem, datwan showimaot maet hem gohed sorre for longfala taem bihaen waef bilong hem dae. * Nara example hem Jacob. Hem tingse wanfala wild animal killim dae Joseph bikos olketa nara boy bilong hem trikim hem. Hem feel sorre for “staka day” bihaen datwan nomata olketa long famili bilong hem trae for comfortim hem. Nomata bihaen staka year, hem tingim yet boy bilong hem.—Genesis 23:2; 37:34, 35; 42:36; 45:28.

Abraham barava lovem waef bilong hem Sarah, so taem Sarah dae hem sorre tumas

Nomata distaem tu, taem samwan wea iumi lovem hem dae, maet sorre feeling wea iumi garem hem hard for finis. Iumi bae storyim tufala example.

  • Gail, wea hem 60 year hem sei: “Long morning bilong July 9, 2008, mi and hasband bilong mi Robert duim nomoa samting wea mitufala savve duim evri morning. Firstaem, mitufala kaikai tugeta. Then bifor hem go waka mitufala kiss, hagem each other, and sei long each other ‘mi lovem iu.’ Bat long datfala day, Robert hem dae long wanfala accident. Nomata bihaen sixfala year, mi gohed sorre yet. Ating dae nomoa bae finisim sorre bilong mi.”

  • Etienne, wea hem 84 year hem sei: “Nomata hem 18 year finis bihaen waef bilong mi dae, mi still missim hem and mi gohed sorre yet. Taem mi lukim olketa naes samting long creation, datwan mekem mi for tingim hem bikos hem tu savve laekem tumas for lukim olketa samting olsem.”

So hem normal nomoa for man garem kaen feeling olsem taem samwan wea hem lovem hem dae. Iumi shud no judgem samwan wea sorre for longfala taem. Sapos samwan iumi lovem hem dae, iumi shud no tingse hem rong for iumi gohed for sorre. Bat hao nao iumi savve deal witim feeling for sorre?

^ par. 4 Lukim datfala article “Followim Faith Bilong Olketa” long disfala magasin. Datfala article storyim hao Isaac tu hem gohed for sorre nomata mami bilong hem, Sarah, dae thrifala year finis.—Genesis 24:67.