Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa  |  No. 2 2016

Hu Nao Disaedem wea for Putim Olketa Chapter and Verse Insaed Long Bible?

Hu Nao Disaedem wea for Putim Olketa Chapter and Verse Insaed Long Bible?

TINGIM sapos iu wanfala Christian wea laef long first century. Kongregeson bilong iufala kasem wanfala leta from aposol Paul. Taem olketa readim datfala leta, staka taem iu herem wei wea Paul hem quotem toktok long “olketa holy raeting,” wea long datfala taem hem olketa Hebrew scripture nomoa. (2 Timothy 3:15) Sapos iu laek for faendem olketa toktok wea Paul quotem insaed long olketa Hebrew scripture, datwan bae no isi. Why nao olsem?

NO ENI CHAPTER OR VERSE

Waswe, olketa copy bilong “olketa holy raeting” wea olketa iusim long taem bilong Paul garem olketa chapter and verse? Lukim piksa long daon wea showim wanfala part bilong buk bilong Isaiah wea stap insaed olketa Dead Sea Scroll. Hem no garem olketa chapter and verse, and tu hem no garem olketa comma or full stop.

Olketa man wea raetem olketa buk long Bible no iusim olketa chapter and verse for divaedem olketa toktok. Long datfala taem olketa raetem nomoa message wea olketa kasem from God and man wea readim datwan savve readim full message. Olsem example, taem iumi kasem wanfala leta from wanfala fren, iu laek for readim full leta, and no just samfala part nomoa, iaman?

Bat from olketa buk hia no garem olketa chapter or verse, datwan mekem hem hard for Paul talem olketa wea nao olketa savve faendem toktok wea hem quotem insaed olketa Hebrew scripture. Hem savve sei nomoa “olsem olketa Holy Raeting talem finis” or “Isaiah talem nara profesi wea sei.” (Rome 3:10; 9:29) Sapos man no barava savve gud long “olketa holy raeting” bae hem hard for hem faendem toktok wea Paul quotem.

Nara samting tu, “olketa holy raeting” hem no wanfala buk nomoa. Long end bilong first century C.E., 66 difren buk nao hem part long olketa holy raeting! Dastawe olketa wea studyim Bible barava hapi olketa buk hia garem olketa chapter and verse bikos datwan savve helpem olketa for faendem samting wea olketa lukaotem, olsem toktok wea Paul quotem from olketa Hebrew scripture.

So maet iu laek for savve ‘hu nao wakemaot wea for putim olketa chapter and verse insaed long Bible?’

HU NAO WAKEMAOT WEA FOR PUTIM OLKETA CHAPTER INSAED LONG BIBLE?

Olketa sei Stephen Langton, wea hem stap long England bifor and wea gogo hem kamap Archbishop of Canterbury, hem nao putim olketa chapter insaed long Bible. Hem duim datwan long start bilong mek-13 century C.E., taem hem teacher long University of Paris, long France.

Bifor datfala taem, samfala savveman divaedem Bible long olketa sekson or chapter. Datwan helpem olketa kwiktaem faendem moa samting wea olketa readim finis, winim wei for lukaotem samting long wanfala full buk. Olsem example, sapos olketa laek for faendem wanfala toktok wea stap long buk bilong Isaiah, olketa bae luk insaed wanfala chapter nomoa winim wei for lukluk long full buk bilong Isaiah.

Nomata olsem, olketa savveman garem olketa difren idea abaotem haomas chapter shud stap long olketa buk long Bible. Olsem example, samfala divaedem buk  bilong Mark long 50-fala chapter, bat long Bible distaem Mark garem 16-fala chapter nomoa. Taem Stephen Langton teach long university long Paris, olketa student kam from olketa difren kantri and tekem kam olketa Bible from ples bilong olketa. Bat from olketa teacher and student garem olketa difren chapter namba long Bible bilong olketa, olketa no savve faendem samting wea narawan storyim long Bible bilong hem.

So Stephen Langton disaed for traem wanfala difren wei for divaedem olketa chapter bilong olketa buk long Bible. The Book—A History of the Bible sei staka pipol laekem disfala idea and gogo staka long Europe followim disfala idea tu. Distaem klosap evri Bible garem olketa chapter long olketa buk wea followim idea bilong Stephen Langton.

HU NAO WAKEMAOT WEA FOR PUTIM OLKETA VERSE INSAED LONG BIBLE?

Bihaen samting olsem 300 year, long mek-16 century, Robert Estienne, wanfala savveman duim samting wea mekem hem isi for pipol studyim Bible. Hem luksavve wei for garem olketa chapter and olketa verse long Bible bae barava helpem pipol.

Bifor Estienne duim datwan, samfala divaedem finis olketa toktok long Bible long olketa verse. Olsem example, staka handred year bifor, samfala Jew wea copyim olketa Hebrew scripture (wea distaem samfala kolem Old Testament) divaedem olketa toktok hia long olketa verse, bat no long olketa chapter. Olsem firstaem wea olketa divaedem olketa buk long Bible long olketa chapter, samfala garem olketa difren idea abaotem hao for divaedem olketa toktok long Bible long olketa verse tu.

Estienne hem divaedem olketa toktok insaed long olketa Christian Greek Scripture long olketa verse, and hem joinim datwan witim olketa Hebrew Scripture wea olketa wakemaot finis olketa chapter and verse bilong hem. Long 1553, hem pablisim full Bible (long French languis) wea garem olketa chapter and verse wea semsem olsem wanem iumi garem long olketa Bible distaem. Samfala no laekem datfala idea bikos olketa sei taem Bible garem olketa verse, datwan savve mekem hem hard for minim full story. Nomata olsem, olketa narawan wea printim olketa Bible laekem and followim datfala idea.

MEKEM HEM ISI FOR PIPOL STUDYIM BIBLE

Disfala idea for divaedem Bible long olketa chapter and verse no kam from God, and samfala taem olketa divaedem olketa verse long ples wea maet luk olsem hem no fitim. Bat olketa chapter and verse barava helpem man for studyim Bible bikos hem mekem hem isi for faendem wanfala toktok and for showim long narawan toktok long Bible wea iumi barava laekem.

Nomata iumi savve readim olketa chapter and olketa verse long Bible, hem important for minim hao samting wea iu read abaotem hem join witim plan bilong God. So hem gud for no readim wanfala verse nomoa bat readim olketa verse wea stap raonem datfala verse. Taem iumi duim olsem, bae iumi savve gud long ‘olketa Holy Raeting wea savve mekem iumi wise and wea savve sevem iumi.’—2 Timothy 3:15.