• YEAR HEM BORN: 1964

  • KANTRI HEM KAM FROM: ENGLAND

  • HISTORY: MI GAREM PIKININI TAEM MI TEENAGER

LAEF BILONG MI BIFOR

 

Mi born long Paddington, wanfala ples long London, England. Mi stap witim mami and thrifala sista bilong mi. Dadi hem man for drunk, so staka taem hem savve go aot from mifala and datwan mekem mifala no interest long dadi.

Taem mi smol, mami bilong mi teachim mi for evritaem prea long God bifor mi sleep. Mi garem wanfala smol Bible wea garem nomoa buk bilong Psalms and mi mekem olketa tune for singim olketa psalm hia. Mi evritaem tingim wanfala toktok wea mi readim long wanfala buk, wea storyim enitaem nomoa man savve dae. Taem mi tingting abaotem datwan, hem mekem mi no savve sleep long naet and mi gohed for tingting abaotem future. Mi ting olsem, ‘Waswe, diswan nomoa laef?’ ‘Why nao mi laef?’ Mi no laek for dae!

Mi start for interest long olketa samting wea join witim devildevil. Mi trae for story witim olketa wea dae, mi savve go long olketa grev witim olketa skulfren, and mifala savve lukluk long olketa movie wea mekem man fraet. Mifala enjoyim, bat long semtaem mifala fraet tu.

Taem mi ten year nomoa, mi start for duim olketa nogud samting. Mi start for smokem tobacco, gogo, mi smokem marijuana tu. Taem mi 11 year, mi start for drinkim alcohol. Nomata hem teist nogud long mi bat mi laekem datfala feeling for drunk. Mi laek for lisin long music and for dance. Mi savve go long olketa party and naetclub. Mi savve go aot haed long naet and kam bak bifor hem daylaet. Staka taem mi no go long skul bikos mi taed tumas. Samfala taem, nomata mi long skul mi savve drink alcohol.

Long year wea mi finisim secondary skul, olketa mark wea mi kasem long report bilong mi hem low fogud. Mami no savve wei bilong mi hem barava nogud tumas, so taem hem lukim report bilong mi, hem barava kros and feel nogud long mi. Mitufala raoa and mi disaed for lusim haos and go stap witim Tony, boyfren bilong mi. Tony hem wanfala rasta man wea savve steal, salem drug, and hem raf tumas.  Gogo, mitufala garem wanfala baby boy. Long datfala taem mi 16 year nomoa.

BIBLE CHANGEM LAEF BILONG MI

 

Taem mi stap long wanfala hostel bilong olketa woman wea no marit bat garem baby, mi meetim Olketa Jehovah’s Witness. Tufala woman savve kam evritaem for storyim Bible long olketa nara woman long there. Wanday mi joinim story bilong olketa bikos mi laek pruvim long tufala Witness hia wanem olketa bilivim hem rong. Bat taem tufala ansarem olketa kwestin bilong mi, tufala iusim Bible for duim datwan. Mi barava laekem wei wea tufala kaen long mi. So mi start for studyim Bible witim tufala.

No longtaem bihaen, mi lanem samting long Bible wea changem laef bilong mi. Taem mi smol pikinini mi fraet for dae. Bat mi lanem long Bible olketa wea dae savve laef bak! (John 5:28, 29) Mi lanem tu hao God hem tingim mi. (1 Peter 5:7) Olketa toktok wea stap long Jeremiah 29:11 hem barava encouragem mi. Long datfala scripture “Jehovah hem sei: ‘Mi disaedem finis wanem bae mi duim for iufala. Mi laekem iufala for stap long peace and for no eni nogud samting kasem iufala mekem iufala garem hope and garem gudfala future.’” Datwan mekem mi luksavve mi garem hope for laef olowe long Paradaes long earth.—Psalm 37:29.

Firstaem wea mi attendim wanfala meeting bilong Olketa Jehovah’s Witness, evriwan barava kaen long mi! (John 13:34, 35) Olketa barava difren from olketa long wanfala church wea mi bin go long hem. Olketa Witness welkamim mi nomata mi garem pikinini nating. Olketa duim olketa samting for helpem mi. Datwan mekem mi feel olsem mi stap insaed long wanfala big famili wea lovem mi.

Wanem mi lanem long Bible helpem mi for luksavve mi mas changem samfala samting long laef bilong mi for fitim wanem God laekem. Hem no isi for mi stop smoke. Mi luksavve tu mi mas no lisin long olketa music wea bae mekem mi laek for smokem marijuana. Mi no laek for drunk, so mi disaed for no go long olketa party and long naetclub. And mi fren witim olketa wea garem gudfala wei mekem mi tu garem olketa gudfala wei.—Proverbs 13:20.

Long datfala taem, Tony tu studyim Bible witim Olketa Jehovah’s Witness. Taem Witness wea study witim Tony iusim Bible for ansarem olketa kwestin bilong hem, Tony tu luksavve wanem hem lanem hem tru. Hem changem staka samting long laef bilong hem. Hem stop for associate witim olketa fren wea savve raf, stop for steal, and hem stop for smokem marijuana. Mitufala luksavve for mekem Jehovah hapi, mitufala mas stretem marit bilong mitufala. So long 1982, mitufala marit.

“Distaem mi no wari abaotem future and dae, olsem bifor”

Mi readim olketa article long Wastaoa and Awake! * magasin wea storyim pipol wea duim olketa samting wea mi tu duim, bat olketa changem wei bilong olketa. Example bilong olketa barava encouragem mi for waka hard for lusim olketa nogud wei bilong mi and for no givap. Mi evritaem prea long Jehovah for helpem mi. Long July 1982, mi and Tony baptaes and kamap Olketa Jehovah’s Witness.

GUD SAMTING WEA MI KASEM

 

Mi luksavve, sapos mi no fren witim Jehovah, ating maet mi dae finis. Bihaen mitufala Tony baptaes, Jehovah barava helpem mitufala taem mitufala kasem hard taem. Long taem olsem, mitufala depend long Jehovah, and mitufala luksavve hem evritaem helpem and lukaftarem famili bilong mifala.—Psalm 55:22.

Mi hapi tumas bikos mitufala helpem son and dota bilong mitufala for savve long Jehovah. Mi hapi for lukim olketa grani bilong mitufala tu lane abaotem God.

Distaem mi no wari abaotem future and dae, olsem bifor. Mitufala Tony busy for visitim olketa difren kongregeson bilong Olketa Jehovah’s Witness for encouragem olketa. Mitufala joinim olketa for teachim pipol for showimaot faith long Jesus mekem olketa tu savve kasem laef olowe.

^ par. 19 Olketa Jehovah’s Witness nao pablisim.