Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa  |  No. 1 2016

Wawe, Iu Savve Finis?

Wawe, Iu Savve Finis?

Waswe, olketa Jew wea hipap long Jerusalem long Pentecost 33 C.E. “kam from evri kantri long world,” olsem Bible talem?

Staka pipol hipap long Jerusalem long Pentecost 33 C.E.

Bible storyim datwan long Acts 2:5-11. Philo, wanfala man wea stap long datfala taem, hem tu raet abaotem bigfala sekson hia wea kam long Jerusalem long Pentecost 33 C.E.

Philo raet olsem abaotem pipol wea savve kam long Jerusalem: “Staka pipol kam from staka taon. Samfala wakabaot kam and samfala kam long ship. Olketa kam from east, west, north and south for kam long olketa feast.” Hem talem tu olketa toktok from wanfala leta wea Agrippa 1, granson bilong Herod the Great, raetem long Caligula, King bilong Rome. Long datfala leta Agrippa sei datfala Holy Taon Jerusalem hem no kapitol taon bilong datfala kantri Judaea nomoa, bat hem kapitol taon bilong staka nara kantri tu, bikos olketa long Judaea sendem olketa Jew for go long olketa kantri hia for stap and lukaftarem olketa.

Agrippa sei olketa Jew go stap long olketa ples olsem Mesopotamia, North Africa, Asia Minor, Greece, and olketa island long Mediterranean. Joachim Jeremias, wanfala savveman, sei: “Nomata disfala leta no storyim wei wea olketa Jew from olketa kantri hia gogo long Jerusalem, masbi olketa go long there bikos olketa Jew mas go long Jerusalem for worship.”—Deuteronomy 16:16.

Long wea nao staka thousand pipol wea kam long Jerusalem for olketa festival bilong olketa Jew savve stap?

Wanfala pool long Jerusalem wea olketa iusim bifor for swim mekem man klin

Olketa Jew savve hipap long Jerusalem thrifala taem evri year for celebratem olketa festival olsem Pasova, Pentecost, and festival wea olketa stap insaed olketa smol leaf haos. Long first century, staka thousand pipol savve go long Jerusalem for olketa festival hia. Olketa kam from staka ples long Israel and from olketa nara kantri wea olketa Jew stap long hem. (Luke 2:41, 42; Acts 2:1, 5-11) Olketa pipol hia mas faendem ples for stap.

Samfala stap witim olketa fren, and olketa narawan stap long olketa resthaos. Staka stap long olketa tent wea olketa putim saed long wall bilong datfala taon. Nomata long lastfala taem wea Jesus go long Jerusalem, hem stap long Bethany, wanfala taon klosap long Jerusalem.—Matthew 21:17.

Insaed long olketa old building wea stap klosap long temple, olketa faendem staka old basin wea long bifor pipol savve iusim for swim. Olketa tingse olketa old building hia hem olketa hostel wea pipol iusim bifor for stap and for swim, mekem olketa klin bifor olketa go long temple. Wanfala raeting wea olketa lukim long wanfala old building hia showimaot Theodotus, wea hem wanfala priest bilong sinagog, hem buildim sinagog wea olketa savve readim datfala buk wea olketa kolem Torah, and tu, olketa hostel, olketa rum, and wata supply stap for pipol wea kam long there.