Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa  |  No. 1 2016

 KAVA SUBJECT | WANEM NAO IU SAVVE DUIM FOR MINIM BIBLE?

Why Nao Hem Gud for Minim Bible?

Why Nao Hem Gud for Minim Bible?

“Mi savve Bible hem wanfala buk bilong religion. Bat hem for pipol long olketa nara kantri and hem no fitim mifala olketa Chinese pipol.”—LIN, CHINA.

“Mi no savve minim olketa holy buk bilong mifala olketa Hindu. So hao nao bae mi minim Bible?”—AMIT, INDIA.

“Mi tinghae long Bible bikos hem wanfala buk wea stap for longfala taem finis. Olketa sei hem buk wea staka pipol baem winim eni nara buk, bat mi no lukim yet eni Bible.”—YUMIKO, JAPAN.

Staka pipol tinghae long Bible, bat maet olketa no savve wanem nao hem storyim. Staka pipol wea stap long Asia no savve eni samting abaotem Bible. Nomata long olketa kantri wea pipol garem Bible, staka no savve tu long wanem Bible storyim.

Maet iu laek for savve, ‘Why nao hem gud for mi minim Bible?’ Taem iu minim wanem Bible storyim hem savve helpem iu for:

  • Hapi and satisfae

  • Deal witim olketa problem wea kamap long famili

  • Deal witim olketa hard taem wea iu kasem

  • Stap gud witim olketa narawan

  • Iusim selen long wisefala wei

Tingim example bilong Yoshiko, wea stap long Japan. Hem laek for savve wanem nao Bible storyim, so hem disaed for readim. Wanem gud samting nao hem kasem from datwan? Hem sei: “Bible hem helpem mi for hapi and satisfae long laef and for garem hope for future.” Amit wea iumi storyim finis hem disaed for studyim Bible. Hem sei: “Mi barava sapraes. Bible hem storyim staka samting wea savve helpem evriwan.”

Bible hem helpem staka million pipol. Hem gud for iu studyim Bible and lukim hao hem savve helpem iu.