Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  November 2015

Waswe, Iu “Lovem Narawan Long Sem Wei wea Iu Lovem Iuseleva”?

Waswe, Iu “Lovem Narawan Long Sem Wei wea Iu Lovem Iuseleva”?

“Iu mas lovem narawan long sem wei wea iu lovem iuseleva.”—MATT. 22:39.

SONG: 73, 36

1, 2. Hao nao Bible showimaot love hem barava important?

LOVE hem main fasin bilong Jehovah God. (1 John 4:16) Jesus Christ hem first wan wea God wakem. Jesus stap witim Dadi bilong hem long heven for staka billion year and hem lanem hao Jehovah hem God wea garem bigfala love. (Col. 1:15) Taem Jesus stap long heven and long earth, hem showimaot semkaen love olsem Jehovah. So iumi barava sure Jehovah and Jesus bae evritaem rul long wei wea showimaot love.

2 Taem wanfala man askem Jesus wanem law nao hem important winim olketa nara law, Jesus sei: “‘Iu mas lovem God bilong iu Jehovah long full heart bilong iu, long full soul bilong iu, and long full mind bilong iu.’ Disfala law nao first wan, and no eni nara law important winim hem. Nara law wea barava important nao hem: ‘Iu mas lovem narawan long sem wei wea iu lovem iuseleva.’”—Matt. 22:37-39.

3. Hu nao olketa “narawan” wea iumi shud lovem?

3 Hem important for iumi showimaot love long evriwan. Jesus sei iumi mas lovem Jehovah and lovem tu olketa narawan. Bat  hu nao olketa “narawan”? Sapos iumi marit, hem hasband or waef bilong iumi. And tu, iumi mas showimaot love long olketa brata and sista long kongregeson. And iumi mas showimaot love long pipol wea iumi preach long olketa. Disfala study bae storyim wanem iumi savve duim for showimaot love long olketa narawan.

LOVEM HASBAND OR WAEF BILONG IU

4. Nomata iumi no perfect, wanem nao savve helpem hasband and waef for garem gudfala marit?

4 Jehovah wakem Adam, then hem wakem Eve for kamap waef bilong Adam. Datwan nao hem firstfala marit. God laekem tufala for garem gudfala marit and for olketa pikinini bilong tufala for stap evriwea long earth. (Gen. 1:27, 28) Bat taem tufala againstim Jehovah, tufala spoelem marit bilong tufala and mekem iumi evriwan kasem sin and savve dae. (Rome 5:12) Nomata olsem, olketa hasband and waef distaem savve garem gudfala marit. Jehovah, wea startim marit hem givim gudfala advaes insaed long Bible for olketa hasband and waef.—Readim 2 Timothy 3:16, 17.

5. Why nao hasband and waef mas lovem tufala?

5 Bible sei hem important for showimaot love sapos iumi laek for fren gud witim olketa narawan. So hasband and waef mas lovem tufala. Aposol Paul story abaotem wanem man wea showimaot love bae duim. Hem sei: “Man wea garem love hem patient and kaen. Hem no savve jealous, or tok praod, and hem no savve tinghae tumas long hemseleva. Hem evritaem showimaot respect, no tingim hemseleva nomoa, no kwiktaem for kros. Hem no tingim olowe nogud samting wea narawan duim long hem. Man wea garem love hem no hapi long olketa nogud samting, bat hem hapi long samting wea tru. Nomata wanem hem happen, man wea garem love hem hapi nomoa. Hem gohed for biliv, hem evritaem garem hope, and no eni samting savve mekem hem givap. Love no savve finis.” (1 Cor. 13:4-8) Taem iumi ting raonem wanem Paul talem long hia and followim datwan, iumi savve garem gudfala marit.

Bible savve helpem iumi for garem gudfala marit (Paragraf 6, 7 storyim diswan)

6, 7. (a) Wanem nao Bible talem abaotem wei wea hasband hem hed long famili? (b) Long wanem wei nao hasband shud treatim waef bilong hem?

6 Jehovah markem hasband for hed long  famili. Paul sei: “Mi laekem iufala for savve Christ hem hed bilong evri man, man hem hed bilong woman, and God hem hed bilong Christ.” (1 Cor. 11:3) Jehovah laekem hasband for showimaot love long famili, and for evritaem kaen and no raf long olketa. Jehovah showimaot example for olketa hasband followim. Hem no tingim hemseleva and hem evritaem kaen long Jesus. From Jehovah duim olsem, Jesus respectim wei wea God hem hed bilong hem. Jesus sei: “Mi lovem Dadi.” (John 14:31) Jesus bae no feel olsem sapos Jehovah raf long hem.

7 Nomata hasband hem hed long waef bilong hem, Bible sei hem mas respectim waef bilong hem. (1 Pet. 3:7) Hao nao hasband savve showimaot hem respectim waef bilong hem? Hem savve tingim wanem waef needim and letem waef for duim samfala samting wea hem laekem. Bible sei: “Iufala olketa hasband mas gohed for lovem waef bilong iufala, olsem Christ tu hem lovem kongregeson and givim laef bilong hem for datwan.” (Eph. 5:25) Tru nao, Jesus givim laef bilong hem for olketa disaepol bilong hem. Taem hasband showimaot love long waef bilong hem and followim example Jesus, datwan bae mekem hem isi for waef lovem hem, respectim hem, and for stap anda long hem.—Readim Titus 2:3-5.

LOVEM OLKETA BRATA AND SISTA

8. Wanem kaen tingting nao iumi shud garem abaotem olketa brata and sista bilong iumi?

8 Distaem, staka million pipol evriwea long world worshipim Jehovah. Evriwan hia olketa brata and sista bilong iumi. Wanem kaen tingting nao iumi shud garem abaotem olketa? Bible sei: “Iumi mas duim gudfala samting long evriwan, . . . main wan nao olketa wea garem sem biliv” olsem iumi. (Gal. 6:10; readim Rome 12:10.) Aposol Peter sei from iumi “obeyim olketa tru teaching,” iumi shud “showimaot love for olketa brata.” Peter sei tu long olketa Christian: “Barava important samting nao, iufala mas barava lovem narawan.”—1 Pet. 1:22; 4:8.

9, 10. Wanem nao mekem pipol bilong God for wan mind?

9 Organization bilong Jehovah hem barava spesol. Iumi lovem olketa brata and sista bilong iumi evriwea long world. And tu, bikos iumi lovem Jehovah and obeyim olketa law bilong hem, Jehovah iusim holy spirit, wea hem bigfala paoa bilong hem, for sapotim iumi. Spirit bilong God helpem iumi for wan mind witim olketa brata and sista bilong iumi evriwea long world.—Readim 1 John 4:20, 21.

10 Paul showimaot olketa Christian mas lovem each other taem hem sei: “Showimaot love, sorre long pipol, kaen long olketa, hambol, no raf, and patient. Nomata sapos eniwan long iufala hem feel nogud long narawan, hem mas no kros bat mas evritaem forgivim hem. Iufala mas olsem Jehovah wea hem willing for forgivim iufala. Nara samting moa, showimaot love, bikos datwan nao hem barava mekem pipol for wan mind.” (Col. 3:12-14) Iumi tinghae long wei wea pipol bilong Jehovah showimaot love bikos ‘hem barava mekem iumi for wan mind,’ nomata iumi kam from olketa difren kantri!

11. Hao nao bae iumi luksavve long pipol bilong Jehovah?

11 Wei wea pipol bilong Jehovah lovem each other and wan mind pruvim olketa garem tru religion. Jesus sei: “Sapos iufala lovem iufala evriwan, pipol bae savve iufala olketa disaepol bilong mi.” (John 13:34, 35) And aposol John sei: “Samting wea showimaot sapos man hem pikinini bilong  God or hem pikinini bilong Devil, hem olsem: Eniwan wea no gohed for duim stret samting hem no pikinini bilong God. And man wea no lovem brata bilong hem, hem no pikinini bilong God tu. Tingim datfala message wea iufala herem bifor wea sei iumi mas lovem iumi evriwan.” (1 John 3:10, 11) Wei wea Olketa Jehovah’s Witness showimaot love and olketa wan mind pruvim olketa tru Christian. God iusim olketa for preachim gud nius abaotem Kingdom long evri ples long earth.—Matt. 24:14.

HIPIMAP “WANFALA BIG CROWD”

12, 13. Wanem nao olketa bilong “big crowd” duim distaem, and wanem nao olketa luk forward long hem?

12 Klosap evriwan wea worshipim Jehovah distaem olketa bilong datfala “big crowd” wea kam from “evri kantri and tribe and pipol and languis,” and olketa sapotim Kingdom bilong God. Olketa hia bae “no dae long datfala big trabol. Olketa wasim kaleko bilong olketa long blood bilong datfala Pikinini Sheepsheep and kaleko bilong olketa kamap white” bikos olketa showimaot faith long ransom sakrifaes bilong Jesus. Olketa bilong datfala “big crowd” lovem Jehovah and Son bilong hem, and olketa worshipim Jehovah “evri day and evri naet.”—Rev. 7:9, 14, 15.

13 Klosap nao God bae finisim disfala nogud world long taem bilong “bigfala trabol.” (Matt. 24:21; readim Jeremiah 25:32, 33.) Bat Jehovah bae protectim olketa wea worshipim hem bikos hem lovem olketa, and olketa bae stap insaed long niu world. Klosap 2,000 year go finis, God promisim “hem bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu.” Waswe, iu luk forward for stap long Paradaes taem nogud pipol, wei for safa, and dae “hem nomoa nao”?—Rev. 21:4.

14. Haomas pipol nao insaed long datfala big crowd distaem?

14 Taem olketa last day start long 1914, tu-thri thousand pipol nomoa worshipim Jehovah long earth. From olketa lovem pipol and holy spirit bilong God helpem olketa, olketa anointed Christian hia preachim gud nius abaotem Kingdom nomata hem no isi long olketa. Wanem nao kamaot from datwan? Distaem God gohed for hipimap wanfala big crowd wea garem hope for laef olowe long earth. Samting olsem 8,000,000 Witness stap insaed winim 115,400 kongregeson, and staka pipol gohed yet for kam insaed long organization bilong Jehovah. Olsem example, long 2014 service year, winim 275,500 pipol baptaes and kamap Jehovah’s Witness. Datwan hem samting olsem 5,300 pipol baptaes evri week.

15. Wanem nao helpem staka pipol distaem for herem gud nius?

15 Staka pipol herem gud nius abaotem Kingdom. Distaem iumi transleitim olketa pablikeson bilong iumi long winim 700 languis. Staka pipol kasem Wastaoa magasin winim eni nara magasin long world. Distaem, evri month organization bilong Jehovah printim winim 52,000,000 copy bilong each Wastaoa magasin long 247 languis. And iumi transleitim long winim 250 languis datfala buk Wanem Nao Really Samting wea Bible Teachim? wea iumi iusim for studyim Bible witim pipol. Kam kasem distaem, iumi printim winim 200,000,000 copy bilong datfala buk.

16. Why nao staka pipol gohed for kam insaed long organization bilong Jehovah?

16 Staka pipol gohed for kam insaed organization bilong Jehovah distaem bikos iumi garem faith long God and acceptim Bible  hem kam from God. (1 Thess. 2:13) Jehovah blessim iumi and iumi gohed gud long spiritual wei nomata Satan heitim iumi and againstim iumi.—2 Cor. 4:4.

EVRITAEM SHOWIMAOT LOVE LONG OLKETA NARAWAN

17, 18. Wanem kaen tingting nao iumi shud garem abaotem pipol wea no worshipim Jehovah?

17 Taem iumi preach long pipol, samfala lisin long iumi, bat samfala les long message wea iumi preachim. Wanem kaen tingting nao iumi shud garem abaotem pipol wea no worshipim Jehovah? Nomata wanem nao pipol duim or talem taem iumi preach long olketa, iumi followim disfala kaonsel long Bible: “Toktok bilong iufala mas evritaem kaen and olsem iufala putim solt long hem, mekem iufala savve hao for givim ansa long evri man.” (Col. 4:6) Taem iumi ansarem pipol wea askem kwestin abaotem wanem iumi bilivim, iumi mas “hambol and showimaot bigfala respect” bikos iumi lovem olketa.—1 Pet. 3:15.

18 Nomata pipol tok kros long iumi taem iumi preach long olketa, iumi showimaot love long olketa and followim example bilong Jesus. Taem pipol tok spoelem Jesus, “hem no tok spoelem olketa. Taem hem safa, hem no sei bae hem changem bak nogud samting wea pipol duim long hem, bat hem trustim God.” (1 Pet. 2:23) So iumi mas evritaem hambol and followim disfala kaonsel: “No changem bak nogud samting wea narawan duim long iufala or tok spoelem man wea tok spoelem iufala. Bat iufala mas tok kaen long hem.”—1 Pet. 3:8, 9.

19. Wanem Bible principle nao Jesus storyim wea iumi mas followim taem pipol againstim iumi?

19 Sapos iumi hambol, datwan bae helpem iumi for followim wanfala important Bible principle wea Jesus storyim. Hem sei: “Iufala herem hao olketa sei: ‘Iu mas lovem olketa narawan, and heitim enemy bilong iu.’ Bat mi talem iufala distaem for gohed lovem olketa enemy bilong iufala and for prea for olketa wea spoelem iufala. Diswan bae showimaot iufala nao olketa son bilong Dadi bilong iufala long heven, from hem mekem sun hem shaen long pipol wea gud and pipol wea nogud and hem mekem hem rain long pipol wea raeteous and pipol wea no raeteous.” (Matt. 5:43-45) From iumi worshipim God, iumi mas lovem olketa enemy bilong iumi.

20. Why nao iumi barava sure evriwan wea stap long niu world bae showimaot love? (Lukim piksa long start bilong study.)

20 Iumi mas evritaem showimaot iumi lovem Jehovah and olketa narawan. Nomata pipol againstim iumi and les long message wea iumi preachim, iumi helpem olketa taem olketa needim help. Aposol Paul sei: “Iufala mas no kaonem samting wea iufala no fit for peim bak, bat samting wea iufala mas duim nao hem for lovem narawan. Man wea lovem narawan hem barava followim law. Law hem sei, ‘Iu mas no duim adultery, Iu mas no killim man dae, Iu mas no steal, Iu mas no kavet.’ Olketa law hia and olketa nara law hem wanfala law nomoa, wea hem sei: ‘Iu mas lovem narawan long sem wei wea iu lovem iuseleva.’ Man wea lovem narawan hem no duim nogud samting long hem. So man wea lovem narawan hem barava followim law.” (Rome 13:8-10) Long disfala nogud world bilong Satan wea pipol raf and no wan mind, pipol bilong God showimaot trufala love long olketa narawan. (1 John 5:19) Bihaen Jehovah finisim Satan, olketa demon, and disfala nogud world, evriwan wea stap long niu world bae showimaot love. Hem bae gud tumas taem evriwan wea stap long earth lovem Jehovah and olketa narawan!