Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  November 2015

Trainim Teenager Bilong Iu for Worshipim Jehovah

Trainim Teenager Bilong Iu for Worshipim Jehovah

“Jesus start for big nao and gohed for garem gudfala tingting. God barava hapi long hem and olketa man tu hapi long hem.”—LUKE 2:52.

SONG: 41, 89

1, 2. (a) Wanem nao samfala parents wea garem teenage pikinini olketa wari abaotem? (b) Wanem gud samting nao olketa teenager savve duim?

OLKETA dadi and mami savve hapi tumas taem pikinini bilong olketa baptaes. Berenice garem fofala pikinini, and evriwan baptaes bifor olketa fotin year. Hem sei: “Mifala hapi tumas bat mifala wari tu. Mifala hapi olketa pikinini laek for worshipim Jehovah. Bat mifala savve tu, from olketa teenager, olketa bae kasem samfala test.” Maet iu tu wari abaotem diswan sapos son or dota bilong iu hem wanfala teenager, or hem klosap kamap wanfala teenager.

2 Taem olketa pikinini kamap teenager hem taem wea hem no isi for olketa, and for dadi and mami bilong olketa. Nomata olsem, wanfala savveman sei parents shud no tingse olketa teenager krangge nomoa. Hem sei olketa teenager savve garem strongfala feeling, olketa laek for duim olketa difren samting, and olketa laek for garem olketa fren. So taem olketa teenager olketa savve fren gud witim Jehovah, olsem Jesus duim taem hem young. (Readim Luke 2:52.) Olketa savve kamap gud long wei for duim preaching waka, and markem olketa spiritual goal. And olketa seleva savve disaedem samting, olsem example, for baptaes and gohed obeyim Jehovah.  Bat wanem nao iufala dadi and mami savve duim for trainim teenager bilong iu for worshipim Jehovah? Iu savve lane from wei wea Jesus trainim olketa disaepol bilong hem. Hem lovem olketa, hem hambol, and hem garem wei for luksavve.

LOVEM TEENAGER BILONG IU

3. Wanem nao Jesus duim wea showimaot hem fren bilong olketa aposol?

3 Jesus hem olsem boss bilong olketa disaepol, bat hem fren bilong olketa tu. (Readim John 15:15.) Long taem bilong Bible, wanfala boss bae no storyim tingting and feeling bilong hem long olketa wakaman bilong hem. Bat Jesus no treatim olketa aposol bilong hem olsem olketa wakaman. Hem lovem olketa and spendem taem witim olketa. Hem storyim tingting and feeling bilong hem long olketa, and hem lisin gud taem olketa talemaot tingting and feeling bilong olketa. (Mark 6:30-32) From Jesus and olketa aposol story gud tugeta, olketa fren gud and datwan redyim olketa aposol for waka wea olketa bae duim bihaen.

4. Wanem nao iufala dadi and mami savve duim for kamap fren bilong olketa pikinini bilong iufala? (Lukim piksa long start bilong study.)

4 Nomata olketa pikinini mas stap anda long iufala dadi and mami, iu savve kamap fren bilong olketa tu. Hem wei bilong olketa fren for spendem taem tugeta. Waswe, iu savve spendem moa taem witim olketa pikinini bilong iu? For duim olsem, maet iu savve katdaon long waka bilong iu or olketa nara samting wea iu duim. Hem gud for iu prea abaotem and ting raonem diswan. Olketa fren savve interest tu long olketa semkaen samting. So trae for savve long wanem nao teenager bilong iu hem laekem, olsem example, wanem kaen music, movie, or sports nao hem interest long hem. Then trae for enjoyim olketa samting hia tu. Ilaria, wea stap long Italy, hem sei: “Parents bilong mi laekem tu for lisin long music wea mi interest long hem. Dadi bilong mi kamap best fren bilong mi, and mi no fraet for storyim eni samting long hem.” Taem iu gohed fren witim olketa pikinini bilong iu and iu helpem olketa for fren witim Jehovah, olketa mas gohed stap anda long iu. (Ps. 25:14) Olketa pikinini bae luksavve iu lovem and respectim olketa, and hem bae isi for olketa storyim eni samting long iu.

5. Wanem nao helpem olketa disaepol bilong Jesus for hapi long waka bilong Jehovah?

5 Jesus savve sapos olketa disaepol strong for duim olketa spiritual samting and gohed busy long preaching waka, olketa bae barava hapi. So hem encouragem olketa for duim best bilong olketa long preaching waka, and hem sei hem bae helpem olketa.—Matt. 28:19, 20.

6, 7. Why nao hem gud for parents teachim olketa pikinini for garem gudfala spiritual schedule?

6 Iu laekem olketa pikinini bilong iu for gohed fren gud witim Jehovah. And Jehovah laekem iu for stretem and trainim olketa. Hem markem iu nao for duim datwan. (Eph. 6:4) So iu mas gohed for trainim olketa pikinini bilong iu. Tingim diswan: Iu laekem olketa pikinini for go long skul bikos iu savve hem important for olketa kasem gudfala education and datwan bae helpem olketa for interest for gohed lane. Long sem wei tu, iu laekem olketa for go long olketa meeting, assembly, and for joinim famili worship. Education wea olketa kasem from Jehovah savve sevem laef bilong olketa. So helpem olketa for enjoyim wei for lane abaotem Jehovah and for luksavve Jehovah savve teachim olketa for duim olketa wise samting. (Prov. 24:14) And tu, trainim olketa pikinini for evritaem duim preaching waka. Followim example bilong Jesus long wei for helpem olketa for enjoyim wei for teachim nara pipol abaotem Bible.

7 Taem parents garem spiritual schedule, olsem for study seleva, go long olketa meeting, and duim preaching waka, hao nao datwan  helpem olketa teenager? Erin, wea stap long South Africa, hem sei: “Mifala pikinini savve les for duim famili worship, go long olketa meeting, and duim preaching waka. Samfala taem mifala duim samfala samting mekem mifala bae no duim famili worship. Nomata olsem, dadi and mami no givap for mifala duim famili worship.” Erin tinghae long wanem dadi and mami bilong hem duim bikos tufala helpem hem for luksavve hem important for duim olketa spiritual samting. Distaem, hem traem best for no misstim eni meeting and for evritaem duim preaching waka.

MAS HAMBOL

8. (a) Wanem nao showimaot Jesus hem hambol? (b) From Jesus hem hambol, hao nao datwan helpem olketa disaepol bilong hem?

8 Nomata Jesus hem perfect, hem hambol and hem talem olketa disaepol hem needim Jehovah for helpem hem. (Readim John 5:19.) Waswe, diswan mekem olketa disaepol for no respectim hem? Nomoa. Taem olketa lukim Jesus depend long Jehovah, datwan helpem olketa for trustim Jesus. Gogo olketa tu followim example bilong Jesus for hambol.—Acts 3:12, 13, 16.

9. Taem iu talemaot olketa mistek bilong iu and sei sorre, hao nao datwan savve helpem teenager bilong iu?

9 Iumi no perfect olsem Jesus, and samfala taem iumi savve duim samting wea no stret. So iumi mas hambol. Iumi mas luksavve samfala samting iumi no savve duim, and iumi mas hambol for talemaot olketa mistek bilong iumi. (1 John 1:8) Sapos iu duim olsem, teenager bilong iu bae willing tu for talemaot olketa mistek bilong hem and hem bae respectim iu. Tingim diswan: Which boss nao bae iu respectim? Waswe, bae iu respectim boss wea talemaot hem duim samting wea no stret, or boss wea no laek for sei sorre? Rosemary, wea garem thrifala pikinini, sei hem and hasband bilong hem tufala willing for talemaot olketa mistek bilong tufala. Rosemary sei: “From mifala duim olsem, olketa pikinini no hol bak for storyim long mitufala eni problem wea olketa garem.” Hem sei tu: “Mifala teachim olketa pikinini wea for kasem help for stretem problem bilong olketa. Taem olketa needim help, mifala talem olketa for lukluk long olketa Bible pablikeson, and mifala prea tugeta abaotem datwan.”

10. Wanem nao wanfala samting wea showimaot Jesus hem hambol?

10 Jesus garem raet for talem olketa disaepol wanem for olketa duim. Nomata olsem, from hem hambol, staka taem hem explainim why olketa shud duim datfala samting. Olsem example, hem sei Kingdom and olketa samting wea God sei hem stret mas first samting long laef bilong olketa. And hem sei tu: “Sapos olsem, God bae givim iufala olketa samting hia wea iufala needim.” Taem Jesus talem olketa for no judgem narawan, hem sei: “Mekem God no judgem iufala. Mi talem diswan bikos God bae judgem iufala followim hao iufala judgem narawan.”—Matt. 6:31–7:2.

11. Taem iu explainim why iu mekem wanfala rul or disaedem wanfala samting, hao nao datwan hem helpem teenager bilong iu?

11 Long taem wea fitim, explainim long teenager bilong iu why iu mekem wanfala rul or disaedem wanfala samting. Taem hem minim datwan, maet bae hem hapi for obeyim iu. Barry, wea hem garem fofala pikinini, hem sei: “Taem iu talem olketa teenager why iu talem wanfala samting, datwan bae helpem olketa for trustim iu.” Olketa teenager bae luksavve iu disaedem samting bikos iu garem gudfala reason, and no bikos iu garem paoa nomoa for duim datwan. And no forget, olketa teenager, olketa no olsem olketa smol pikinini. Olketa lane for ting raonem wanem olketa laek for duim, and olketa laek for disaedem samting seleva. (Rome 12:1) Barry sei: “Olketa teenager mas lane for disaed long gudfala wei, and no disaed followim feeling bilong olketa  nomoa.” (Ps. 119:34) So taem iu disaedem wanfala samting, showimaot iu hambol long wei for explainim long teenager bilong iu why iu disaedem datwan. Datwan bae helpem teenager bilong iu for disaedem samting seleva, and hem bae luksavve iu no ting long hem olsem wanfala smol pikinini.

GAREM WEI FOR LUKSAVVE

12. From Jesus garem wei for luksavve, wanem nao hem duim for helpem Peter?

12 From Jesus garem wei for luksavve, hem savve hao for helpem olketa disaepol bilong hem. Olsem example, taem Jesus talem olketa disaepol samfala pipol bae killim hem dae, Peter talem Jesus datwan bae no kasem hem nomoa. Jesus savve Peter lovem hem, bat Jesus savve tu Peter no garem stretfala tingting. Wanem nao Jesus duim for helpem Peter and olketa nara disaepol? Firstaem, hem stretem Peter. Then, Jesus storyim samting wea bae happen long olketa wea no duim wanem God laekem long taem wea hem no isi. Jesus sei tu Jehovah bae blessim olketa wea no tingim olketa seleva nomoa. (Matt. 16:21-27) Datwan helpem Peter for garem stretfala tingting.—1 Pet. 2:20, 21.

13, 14. (a) Wanem nao maet showimaot teenager bilong iu needim help for strongim faith bilong hem? (b) Wanem nao bae helpem iu for savve hao for helpem son or dota bilong iu?

13 Prea long Jehovah and askem hem for helpem iu for luksavve long hao for helpem teenager bilong iu. (Ps. 32:8) Maet iu luksavve hem no hapi distaem, or hem tok daonem olketa brata and sista. Maet iu feel olsem hem hol bak for storyim wanfala samting long iu. No kwiktaem for tingse teenager bilong iu duim bigfala sin. * Bat no leavim nomoa or tingse datwan bae finis seleva. Maet iu need for helpem hem for strongim faith bilong hem.

Helpem teenager bilong iu for garem olketa gudfala fren insaed long kongregeson (Paragraf 14 storyim diswan)

14 For savve hao for helpem teenager bilong iu, askem hem olketa kwestin long wei wea kaen and wea showimaot respect. Tingim diswan: sapos iu kwiktaem pullim baket wata from wanfala well, baket bae no fulap long wata. Long sem wei tu, sapos iu no patient or forcem teenager bilong iu for story, bae iu no savve long tingting and feeling bilong hem. (Readim Proverbs 20:5.) Ilaria sei taem hem  teenager, hem laek for associate witim olketa skulfren bilong hem bat hem savve datwan hem no stret. Parents bilong hem luksavve hem wari abaotem wanfala samting. Ilaria sei: “Wanfala evening, tufala sei mi no luk hapi and tufala askem mi wanem nao mi wari abaotem. Mi krae nao, and mi storyim samting wea mi wari abaotem and mi askem tufala for helpem mi. Tufala hagem mi and tufala sei tufala minim feeling bilong mi, and tufala sei bae tufala helpem mi.” Stretawe bihaen datwan, parents bilong Ilaria start for helpem hem for garem olketa gudfala fren insaed long kongregeson.

15. Wanem nao nara wei wea Jesus showimaot hem garem wei for luksavve?

15 Nara wei wea Jesus showimaot hem garem wei for luksavve, hem wei wea hem luksavve long olketa gudfala fasin bilong olketa disaepol. Olsem example, taem Nathanael savve Jesus hem kam from Nazareth, hem sei: “Waswe, eni gud samting savve kam from Nazareth tu?” (John 1:46) Sapos iu stap long there datfala taem, waswe, bae iu tingse Nathanael hem man for ting daonem narawan, hem favorim narawan, and hem no garem faith? Jesus no ting olsem abaotem Nathanael. Hem garem wei for luksavve and hem savve Nathanael hem man wea honest, so Jesus sei: “Hem wanfala man long Israel wea hem nating savve laea.” (John 1:47) Jesus savve lukim samting wea stap long heart bilong man, and hem tingim olketa gudfala wei bilong pipol.

16. Wanem nao iu savve duim for helpem teenager bilong iu for grow long spiritual wei?

16 Iumi no savve lukim samting wea stap long heart bilong man, bat iumi savve garem wei for luksavve. Jehovah savve helpem iu for tingim olketa gudfala wei bilong teenager bilong iu. Nomata teenager bilong iu duim samfala samting wea mekem iu sorre, iu mas no sei hem nogud pikinini or hem man for mek trabol. And no garem kaen tingting olsem. Talem hem iu luksavve long olketa gudfala wei bilong hem, and iu savve hem laek for duim stret samting. Luksavve long eni wei wea hem kamap gud long hem, and praisem hem for datwan. Helpem hem for grow long spiritual wei long wei for givim hem samfala moa waka wea hem fit for duim. Jesus duim sem samting witim olketa disaepol bilong hem. Wan and haf year bihaen Jesus meetim Nathanael (wea nara nem bilong hem Bartholomew), Jesus chusim hem for duim wanfala important waka. Hem markem Nathanael for kamap wanfala aposol, and Nathanael duim gud datfala waka. (Luke 6:13, 14; Acts 1:13, 14) No mekem teenager bilong iu feel olsem hem no savve duim eni gud samting, bat praisem and encouragem hem. Helpem hem for luksavve hem savve mekem iu and Jehovah for hapi, and hem fit for duim olketa gud samting long waka bilong Jehovah.

IU BAE BARAVA HAPI

17, 18. Sapos iu gohed for trainim teenager bilong iu for worshipim Jehovah, wanem nao savve kamaot from datwan?

17 Maet samfala taem iu garem sem feeling olsem aposol Paul. Hem wari tumas abaotem olketa wea hem helpem for lane abaotem Jehovah. Hem lovem olketa and olketa olsem olketa pikinini bilong hem. Hem wari nogud samfala long olketa bae stop for worshipim Jehovah. (2 Cor. 2:4; 1 Cor. 4:15) Victor, wea garem thrifala pikinini, hem sei: “Hem no isi taem olketa pikinini kamap olketa teenager. Nomata olsem, olketa samting wea mifala enjoyim tugeta hem winim olketa hard taem wea mifala kasem. Jehovah helpem mitufala for fren gud witim olketa pikinini bilong mifala.”

18 Iufala dadi and mami, gohed for trainim olketa pikinini bilong iufala for worshipim Jehovah. Datwan showimaot iufala barava lovem olketa. Iu bae barava hapi taem olketa pikinini disaed for worshipim God and gohed for faithful long hem.—3 John 4.

^ par. 13 Maet hem gud for parents readim Questions Young People Ask—Answers That Work, Volume 1, page 317, and Volume 2, page 136-141.