Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  October 2015

Evritaem Ting Raonem Olketa Spiritual Samting

Evritaem Ting Raonem Olketa Spiritual Samting

“Ting raonem olketa samting hia and tingting strong long olketa mekem evriwan lukim wei wea iu gohed for kamap strongfala Christian.”—1 TIM. 4:15.

SONG: 57, 52

1, 2. Hao nao iumi difren from olketa animal?

BRAIN bilong iumi hem wanfala spesol samting. Olsem example, iumi savve lanem wanfala languis. From datwan, iumi savve read, raet, story, and minim samting wea iumi herem. And tu, iumi savve prea and singsing for praisem Jehovah. Olketa animal no savve duim olketa samting olsem. Olketa scientist no barava minim hao brain bilong iumi savve duim olketa nambawan samting hia.

2 Wei wea iumi savve story long wanfala languis hem present from Jehovah. (Ps. 139:14; Rev. 4:11) And iumi difren from olketa animal long nara wei tu. God wakem iumi “for olsem hem.” Iumi savve disaedem samting seleva. And iumi savve iusim languis wea iumi savve long hem for worshipim and praisem Jehovah.—Gen. 1:27.

3. Wanem nao Jehovah givim long iumi for helpem iumi duim olketa samting wea wise?

3 Jehovah givim iumi Bible wea talem iumi wanem iumi savve duim for worshipim and praisem hem. Olketa transleitim full  Bible or samfala part bilong hem long winim 2,800 languis. Taem iumi ting raonem wanem Bible talem, iumi bae garem sem tingting olsem God. (Ps. 40:5; 92:5; 139:17) And taem iumi savve long tingting bilong Jehovah, datwan helpem iumi for duim olketa samting wea wise and for kasem laef olowe.—Readim 2 Timothy 3:14-17.

4. Wanem nao hem minim for ting raonem samting, and olketa wanem kwestin nao bae iumi storyim?

4 Wei for ting raonem samting hem minim for tingting strong abaotem wanfala samting and tingting raonem gud datwan. (Ps. 77:12; Prov. 24:1, 2) Iumi kasem barava gud samting taem iumi ting raonem wanem iumi lanem abaotem Jehovah and Jesus. (John 17:3) Long disfala study, iumi bae storyim ansa for thrifala kwestin hia: Wanem nao bae helpem iumi for ting raonem wanem iumi readim? Wanem nao samfala gud samting wea iumi savve ting raonem? And wanem nao savve helpem iumi for ting raonem olketa spiritual samting and for enjoyim datwan?

KASEM GUD SAMTING FROM WANEM IU STUDYIM

5, 6. Wanem nao savve helpem iumi for minim and for no forgetim wanem iumi readim?

5 Samfala samting iumi savve duim nomoa and no tingting firstaem abaotem. Olsem example, wei for brith, wakabaot, or raedem baesikol. Maet samfala taem iumi read, bat iumi no tingting abaotem wanem iumi readim. And maet samfala taem iumi tingting abaotem olketa narafala samting taem iumi read. Wanem nao bae helpem iumi for no duim olsem? Hem important for tingim nomoa wanem iu readim and wanem hem minim. Then, taem iu finis for readim wanfala paragraf or olketa paragraf andanit long wanfala subheding long wanfala pablikeson, iusim lelebet taem for ting raonem wanem iu just readim. Ting raonem wanem iu lanem, and mek sure iu minim wanem iu readim.

6 Olketa scientist sei wei for talemaot olketa word wea iumi readim savve helpem iumi for no forgetim datwan. Jehovah savve long datwan, dastawe hem talem Joshua for read smol taem hem readim buk bilong Law. (Readim Joshua 1:8.) Taem iumi talemaot olketa word wea iumi readim long Bible, datwan tu bae helpem iumi for tingting strong long wanem iumi readim and for no forgetim.

7. Wanem taem nao hem gud for ting raonem wanem iumi readim long Bible? (Lukim piksa long start bilong study.)

7 Iumi mas waka hard for ting raonem and tingting strong long wanem iumi studyim. Dastawe hem gud for iumi ting raonem olketa spiritual samting taem iumi no taed tumas and long ples wea no eni samting savve disturbim iumi. David savve ting raonem olketa spiritual samting taem hem leidaon long bed long naet taem hem no savve sleep. (Ps. 63:6) Nomata Jesus hem perfect, hem go long ples wea kwaet for prea and ting raonem samting.—Luke 6:12.

OLKETA GUD SAMTING FOR TING RAONEM

8. (a) Olketa wanem gud samting nao iumi savve ting raonem? (b) Hao nao Jehovah ting long iumi taem iumi story abaotem hem long olketa narawan?

8 Hem gud for iumi ting raonem wanem iumi readim long Bible. And iumi savve ting raonem olketa nara samting tu. Olsem example, taem iumi lukim olketa nambawan samting wea Jehovah wakem, ting raonem wanem iumi savve lanem abaotem  Jehovah from datwan. Datwan savve mekem iumi for talem thankiu long Jehovah. And sapos iumi stap witim olketa narawan, iumi laek for storyim wanem iumi lanem long olketa tu. (Ps. 104:24; Acts 14:17) Jehovah hem lukim and hem hapi taem iumi ting raonem olketa spiritual samting, prea long hem, and story abaotem hem long olketa narawan. Bible sei: “Olketa raetem wanfala buk front long hem for rememberim olketa wea fraet long Jehovah and olketa wea tingim nem bilong hem.”—Mal. 3:16.

Waswe, iu ting raonem hao for helpem olketa Bible study bilong iu? (Paragraf 9 storyim diswan)

9. (a) Wanem nao Paul talem Timothy for ting raonem? (b) Wanem nao iu savve ting raonem taem iu prepare for ministry?

9 Aposol Paul talem Timothy for ting raonem wei wea toktok bilong hem, samting wea hem duim, and samting wea hem teachim savve helpem nara pipol. (Readim 1 Timothy 4:12-16.) Iumi tu savve duim sem samting. Olsem example, taem iu prepare for wanfala Bible study, hem gud for ting raonem hao for helpem hem. Tingim wanfala kwestin or tokpiksa wea savve helpem Bible study bilong iu for gohed gud long study bilong hem. Taem iu duim olsem, datwan savve strongim faith bilong iu, iu bae kamap gudfala teacher, and iu bae interest long samting wea iu teachim. And tu, hem gud for redyim heart bilong iu bifor iu go preaching. (Readim Ezra 7:10.) Maet iu savve readim wanfala chapter long Bible buk bilong Acts for helpem iu gohed strong for duim ministry. Iu savve ting raonem tu olketa scripture wea iu plan for iusim long preaching waka and olketa pablikeson wea iu laek for offerim. (2 Tim. 1:6) Tingim pipol wea iu bae meetim long territory and wanem iu savve storyim for mekem olketa interest long gud nius. Taem iu duim olsem, iu bae iusim gud Bible taem iu preach long pipol.—1 Cor. 2:4.

10. Wanem nao olketa nara samting wea iumi savve ting raonem?

 10 Wanem nao olketa nara samting wea iu savve ting raonem? Sapos iu raetem olketa note long taem bilong pablik tok, assembly, and convention, markem taem for ting raonem moa wanem iu raetem. Taem iu duim datwan, ting raonem wanem nao iu lanem from Bible and from organization bilong God. And tu, ting raonem wanem iu readim insaed olketa Wastaoa and Awake! magasin evri month and olketa niu release long convention. Taem iu readim Yearbook, ting raonem eni experience wea iu readim mekem datwan savve encouragem iu. Taem iu readim olketa pablikeson bilong iumi, hem gud for andalaenem olketa main point or raetem samfala note long saed long wanem iu readim. Maet iu savve iusim samfala point hia for helpem iu taem iu duim return visit, shepherding kol, or wanfala tok. Samting wea important nao, sapos iu stop lelebet and ting raonem wanem iu readim, datfala information bae kasem heart bilong iu and iu savve talem thankiu long Jehovah for olketa samting wea iu lanem.

TING RAONEM TOKTOK BILONG GOD EVRIDAY

11. Wanem nao main pablikeson wea iumi shud ting raonem, and hao nao diswan savve helpem iumi? (Lukim tu footnote.)

11 Bible hem main pablikeson wea iumi shud ting raonem. Bat waswe sapos samting kasem iu and iu no garem Bible? * No eniwan savve stopem iu for ting raonem olketa samting wea iu baeheartim finis, olsem olketa favorite scripture bilong iu and olketa Kingdom song. (Acts 16:25) And holy spirit bilong God bae helpem iu for tingim moa olketa samting wea iu lanem finis, and datwan bae helpem iu for gohed faithful.—John 14:26.

12. Wanem nao wanfala wei wea iu savve duim Bible reading bilong iu evriday?

12 Wanem nao wanfala wei wea iu savve duim Bible reading bilong iu evriday? Maet iu savve markem tu-thri day long week for readim and ting raonem Bible reading for Theocratic Ministry Skul. Long olketa nara day, iu savve readim olketa Gospel bilong Matthew, Mark, Luke, and John, and ting raonem olketa samting wea Jesus talem and duim. (Rome 10:17; Heb. 12:2; 1 Pet. 2:21) And tu, iumi garem buk wea storyim olketa samting long laef bilong Jesus followim taem wea olketa samting hia happen. Disfala buk savve helpem iu for kasem gud samting taem iu readim olketa Gospel.—John 14:6.

HEM IMPORTANT FOR TING RAONEM OLKETA SPIRITUAL SAMTING

13, 14. Why nao hem important for evritaem ting raonem olketa spiritual samting, and diswan bae helpem iumi for duim wanem?

13 Taem man ting raonem olketa spiritual samting, datwan savve helpem hem for kamap strongfala Christian and for garem strong faith. (Heb. 5:14; 6:1) Man wea no spendem taem for ting raonem wanem hem lanem abaotem Jehovah and Jesus bae no gohed garem strongfala faith. Man olsem savve isisi go difren or lusim truth. (Heb. 2:1; 3:12) Dastawe Jesus sei hem important for iumi “minim and tinghae” long wanem Bible talem. Sapos nomoa, bae iumi “wari tumas abaotem enikaen samting” and “busy tumas tu for lukaotem riches and olketa samting wea mekem man hapi.”—Luke 8:14, 15.

14 So iumi laek for gohed ting raonem  wanem Bible talem and for savve gud long Jehovah. Diswan bae helpem iumi for followim olketa wei bilong Jehovah. (2 Cor. 3:18) Iumi savve gohed for lane abaotem Dadi bilong iumi long heven and followim hem for olowe. Datwan hem wanfala nambawan privilege!—Eccl. 3:11.

15, 16. (a) Wanem gud samting nao bae iumi kasem taem iumi ting raonem olketa spiritual samting? (b) Why nao maet hem no isi for faendem taem for ting raonem olketa spiritual samting, bat why nao iumi mas traem best for duim datwan?

15 Taem iumi ting raonem olketa spiritual samting, datwan bae helpem iumi for tinghae long truth. Wei wea iumi tinghae long truth bae encouragem olketa brata and sista and pipol wea iumi meetim long ministry. And taem iumi ting raonem ransom sakrifaes bilong Jesus, wea hem nambawan present wea God givim, datwan bae helpem iumi for tinghae long wei wea iumi fren witim Jehovah. (Rome 3:24; Jas. 4:8) Mark, wanfala brata from South Africa wea stap long prison for thrifala year from hem faithful long God, hem sei: “Wei for ting raonem samting hem olsem wei for travel long wanfala interesting ples. Taem iumi evritaem ting raonem olketa spiritual samting, bae iumi lanem olketa niu samting abaotem God bilong iumi, Jehovah. Taem mi wari or feel sorre samfala taem, mi readim samfala scripture long Bible and ting raonem datwan. Diswan savve helpem mi for no wari tumas and for feel gud.”

16 World distaem hem garem staka samting wea savve pullim mind bilong iumi go difren, so maet hem no isi for iumi faendem taem for ting raonem olketa spiritual samting. Patrick, wanfala brata long Africa sei evriday hem garem staka samting for tingim, samfala samting hem important and samfala no important. Samfala taem olketa samting wea hem tingim mekem hem for wari, so hem prea long Jehovah abaotem datwan, mekem hem savve ting raonem olketa spiritual samting. Hem savve tek taem lelebet for hem duim datwan. Bat wei for duim olsem hem helpem hem for fren gud witim Jehovah and followim wanem Bible talem. (Ps. 94:19) Tru tumas, iumi savve kasem staka gud samting taem iumi ting raonem Bible evriday.—Acts 17:11.

MARKEM TAEM

17. Wanem taem nao iu markem for ting raonem olketa spiritual samting?

17 Samfala Christian wekap early long morning for read, ting raonem olketa spiritual samting, and for prea. Olketa narawan wea waka duim datwan long lunch taem bilong olketa. Maet iu laek for readim Bible long evening or bifor iu sleep. Samfala laek for readim Bible long morning and readim moa bifor olketa sleep. (Josh. 1:8) Important samting nao hem for markem taem for readim and ting raonem Bible evriday.—Eph. 5:15, 16.

18. Wanem blessing nao olketa wea ting raonem toktok bilong God and wea traem best for followim wanem olketa lanem, bae kasem?

18 Bible sei Jehovah bae blessim olketa wea ting raonem toktok bilong hem and wea traem best for followim wanem olketa lanem. (Readim Psalm 1:1-3.) Jesus sei: “Olketa wea herem toktok bilong God and obeyim datwan nao olketa hapi!” (Luke 11:28) Samting wea barava important nao, taem iumi ting raonem toktok bilong God evriday, datwan bae helpem iumi for duim olketa samting wea mekhae long God. Taem iumi duim olsem, Jehovah bae helpem iumi for hapi distaem, and iumi bae kasem laef olowe long niu world.—Jas. 1:25; Rev. 1:3.

^ par. 11 Lukim article “Our Fight to Stay Spiritually Strong” long The Watchtower, December 1, 2006.