Skip to content

Skip to secondary menu

Olketa Jehovah’s Witness

Solomon Islands Pidgin

Awake!  |  2014-03

 Help For Olketa Famili | Marit

Taem Iu No Hapi Insaed Marit Bilong Iu

Taem Iu No Hapi Insaed Marit Bilong Iu

SAMTING WEA MEKEM HEM NO ISI

Bifor iutufala marit, iutufala agree long staka samting. Distaem, iutufala ting bak and no hapi. Nomata iutufala stap tugeta, iu feel olsem iutufala prisoner wea olketa chainim tugeta.

Iu savve mekem marit bilong iutufala kamap gud moa. Bat firstaem, tingim wanem nao maet mekem iu for no hapi long marit bilong iu.

WHY HEM OLSEM

Samting wea iu savve deal witim evriday. Samting wea iu savve duim evriday, olsem for go waka, lukaftarem pikinini, and deal witim olketa in-law savve isisi mekem iu for no hapi. And tu, olketa problem wea seknomoa happen, olsem hard taem saed long selen, or famili member garem sik wea no savve finis, savve mekem hasband and waef for wari.

Tingse wei bilong iutufala barava difren. Taem boy and gele fren, nomata wei bilong tufala difren, tufala acceptim nomoa. Bat taem tufala marit finis, tufala start for luksavve tufala barava difren saed long wei for story, iusim selen, and hao for deal witim problem. Nomata firstaem tufala feel nogud long samfala wei bilong each other, tufala maet tingse hem no big samting tumas. Bat bihaen, tufala no savve hao for deal witim datwan nao.

Start for no interest long each other. From hasband and waef no savve kaen long each other or evritaem tok spoelem narawan, and no kwiktaem stretem problem, datwan savve mekem tufala hol bak for storyim feeling bilong each other. And barava nogud samting nao, maet tufala start for interest long difren wan.

Samting wea iu expectim no happen. Samfala tingse man or woman wea olketa just maritim, hem nao raet partner bilong olketa. Bat, kaen tingting olsem bae mekem tufala for kasem problem. Taem problem kamap, disfala laea tingting  for sei “hem nomoa raet wan” hem change nao, and tufala bae tingse tufala chus rong.

WANEM FOR DUIM

Tingim olketa gudfala fasin bilong partner bilong iu. Traem disfala idea: Raetem thrifala gudfala fasin wea partner bilong iu garem. Then evritaem tekem datfala pepa witim iu or keepim long mobile phone. Lukluk long datfala list for remindim iu why iu disaed for maritim hem. Taem iu tingim olketa gudfala wei bilong partner bilong iu, datwan savve mekem iutufala for stap gud and deal witim eni samting nomata iutufala garem difren wei.—Bible principle: Rome 14:19.

Markem taem for duim samting tugeta. Taem iutufala no marit yet iutufala savve markem taem for story tugeta. From iutufala just fren, iutufala hapi and evritaem plan for spendem taem tugeta. Hao sapos iutufala duim olsem distaem tu? Mekem samfala spesol plan for spendem taem tugeta. Datwan savve helpem iutufala for fren gud and for deal witim eni problem wea seknomoa happen.—Bible principle: Proverbs 5:18.

Story tugeta abaotem feeling bilong iu. Taem iu feel nogud long eni toktok or samting wea partner bilong iu duim, waswe, bae iu savve trae forgetim datwan nomoa? Sapos hem hard, no gohed kwaet witim datwan. Kwiktaem story witim partner bilong iu, bat duim long kaenfala wei. Sapos fitim, duim long sem day.—Bible principle: Ephesus 4:26.

Taem iu feel nogud long eni toktok or samting wea partner bilong iu duim, waswe, iu savve forgetim datwan nomoa?

Luksavve feeling bilong iu savve difren from tingting bilong partner bilong iu. Staka taem iutufala no ting for mekem narawan feel nogud. Taem iu sei sorre long partner bilong iu, hem bae luksavve iu no min for duim olsem. Then storyim tugeta olketa samting wea iutufala savve duim for no mekem narawan feel nogud. Followim advaes long Bible wea sei: “Iufala mas kaen long narawan and sorre long hem. Iufala mas willing for forgivim narawan.”—Ephesus 4:32.

Luksavve problem bae kamap. Bible sei olketa wea marit “bae kasem hard taem.” (1 Corinth 7:28) Taem iutufala kasem hard taem, no kwiktaem tingse iu chusim rong partner. Bat iutufala mas stretem eni problem wea kamap and gohed for no ‘feel nogud long narawan, and mas no kros bat mas evritaem forgivim hem.’—Colossae 3:13.