Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Laef and Ministry Meeting Buk  |  June 2017

 LAEF BILONG CHRISTIAN

Keepim Olketa Standard Bilong Jehovah

Keepim Olketa Standard Bilong Jehovah

Jehovah God markem standard for samting wea stret and samting wea no stret for iumi evri man followim. Olsem example, hem sei taem man and woman tufala marit bae tufala stap tugeta for olowe. (Mt 19:4-6, 9) Hem sei wei for durong hem no stret. (1Co 6:9, 10) And tu, olketa principle stap long Bible abaotem kaen kaleko and lukluk wea fitim pipol bilong hem.—De 22:5; 1Ti 2:9, 10.

Distaem, staka pipol no laek followim olketa standard bilong Jehovah. (Ro 1:18-32) Olketa laek followim wanem narawan duim saed long kaleko and lukluk, and wei bilong olketa. Samfala no shame for duim barava nogud samting, and olketa tok daonem narawan wea no followim tingting bilong olketa.—1Pe 4:3, 4.

Iumi Jehovah’s Witness mas no fraet or shame for mekhae long wanem Jehovah sei hem stret. (Ro 12:9) Iumi savve talem pipol wanem nao samting wea God laekem. And tu, iumiseleva mas followim olketa hae standard bilong God. Olsem example, taem iumi chusim kaleko or laek for staelem hair, hem gud for tingim: ‘Waswe, kaleko or hair kat wea mi laekem hem followim olketa standard bilong Jehovah or bilong world? Waswe, bae olketa wea lukim kaleko and hair bilong mi luksavve mi wanfala Witness?’ Or taem iumi chusim TV program or movie for lukluk long hem, tingim: ‘Waswe, bae Jehovah laekem mi for lukluk long disfala program? Waswe, hem abaotem samting wea mekhae long olketa standard bilong disfala world, or bilong Jehovah? Waswe, olketa movie and program wea mi chus for lukim bae strongim mi for duim stret samting or nomoa? (Ps 101:3) Waswe, wanem mi chus for lukim bae affectim olketa narawan or famili bilong mi?’—1Co 10:31-33.

Why nao hem important for iumi followim olketa standard bilong Jehovah? Klosap nao Jesus bae finisim olketa nogud pipol. (Eze 9:4-7) Olketa wea duim wanem God laekem nomoa bae laef. (1Jo 2:15-17) So iumi laek for duim olketa samting wea followim wanem Jehovah laekem, mekem olketa wea lukim gudfala samting wea iumi duim bae praisem God.—1Pe 2:11, 12.

Waswe, kaleko and hair kat bilong mi showimaot mi followim olketa standard bilong God?

LUKIM VIDEO, KAMAP FREN BILONG JEHOVAH—WANFALA MAN AND WANFALA WOMAN, AND THEN STORY RAONEM OLKETA KWESTIN HIA:

  • Why nao hem wise for followim samting wea Jehovah sei hem stret?

  • Why nao olketa parents shud start for teachim pikinini bilong olketa abaotem samting wea Jehovah sei hem stret and no stret taem pikinini smol yet?

  • Nomata iumi young or olo, hao nao iumi savve helpem pipol for kasem gud samting from wanem God bae duim long future?