Start long September, Christian Laef and Ministry Meeting Buk bae garem wanfala niu idea long hao for story wea garem title “Teachim Truth Long Pipol.” Main goal bilong iumi hem for storyim truth insaed Bible, taem iumi askem wanfala kwestin and readim wanfala scripture.

Sapos iumi luksavve haosholder hem interest, iumi savve givim hem wanfala pablikeson, or showim hem wanfala video long jw.org. Iumi shud go bak long hem bihaen tu-thri day for story moa. Olketa idea for story hia and olketa assignment bilong olketa student kam from olketa main point wea stap long end bilong each chapter long datfala buk What Can the Bible Teach Us? (Disfala buk hem no stap yet long Solomon Islands Pidgin.) Samfala information moa and olketa scripture hem insaed long Wanem Bible Teachim buk wea iumi savve iusim for duim return visit or conductim Bible study wea iumi iusim Bible nomoa.

Wanfala road nomoa iumi savve followim for kasem laef olowe. (Mt 7:13, 14) From iumi savve preach long pipol wea garem olketa difren religion and laef bilong olketa no semsem, iumi mas storyim truth insaed Bible long wei wea bae mekem olketa interest. (1Ti 2:4) Taem iumi start for savve gud long samfala difren Bible subject and kamap gud long wei for “iusim long stretfala wei datfala toktok bilong God wea tru,” bae iumi barava hapi, and kasem gud samting taem iumi teachim truth long nara pipol.—2Ti 2:15.