Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Online Bible | NIU WORLD BIBLE

3 John 1:1-14

 Mi nao datfala elder* and mi raet kam long iu, gud fren bilong mi Gaʹius, wea mi lovem iu tumas.  Gud fren bilong mi, mi savve iu gohed gud tumas and mi prea for iu gohed olsem and for iu no kasem eni sik.  Mi hapi tumas taem olketa brata kam and story abaotem iu. Olketa sei iu barava faithful for followim olketa tru teaching, and mi hapi iu gohed for duim olsem.  Taem mi herem olketa pikinini bilong mi gohed followim olketa tru teaching, diswan mekem mi barava hapi.  Gud fren bilong mi, olketa samting wea iu duim for olketa brata, nomata iu no savve long olketa, hem showimaot iu faithful.  Olketa brata hia storyim long kongregeson love wea iu showimaot long olketa. Taem olketa lusim iu, plis duim samting for helpem olketa wea bae mekem God hapi.  Olketa go for preach. Olketa duim diswan for nem bilong God and olketa no kasem eni samting from pipol long world.  So iumi mas lukaftarem olketa brata hia, mekem iumi waka tugeta witim olketa for sapotim olketa tru teaching.  Mi raetem wanfala leta long kongregeson, bat Di·otʹre·phes, wea hem laek for leader bilong olketa, hem nating respectim samting wea mifala talem. 10  Dastawe, sapos mi kam, bae mi storyim olketa nogud samting wea hem duim. Hem talem olketa krangge samting abaotem mifala wea barava nogud. Taem olketa brata kam long iufala, hem nating showimaot respect long olketa tu. Hem trae for stopem olketa wea laek for welkamim olketa brata hia, and aotem olketa from kongregeson. 11  Gud fren bilong mi, no followim example bilong olketa wea duim nogud samting, bat followim example bilong olketa wea duim gudfala samting. Man wea duim gudfala samting hem bilong God. Man wea duim nogud samting hem no savve long God. 12  Olketa brata sei De·meʹtri·us hem gudfala man, and wei wea hem followim olketa tru teaching hem showimaot datwan. Mifala talem sem samting abaotem hem tu and iufala savve samting wea mifala talem hem tru. 13  Mi laek for talem staka samting long iu, bat mi no laek for raetem long disfala leta. 14  Bat mi hope klosap bae mi kam long iu, and bae iumi story. Mi prea for God helpem iu for garem peace. Olketa fren* long hia talem hello for iu. Talem hello bilong mi long olketa fren long kongregeson bilong iu.

Olketa footnote

Or, “olo man.”
“Olketa fren” hem minim olketa Christian brata and sista.