Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Online Bible | NIU WORLD BIBLE

1 Thessalonica 3:1-13

3  So from mifala* barava wari tumas, mifala disaed for stap seleva long Athens.  Bat mifala sendem kam brata bilong iumi Timothy, wea hem wakaman bilong God for talemaot gud nius abaotem Christ. Hem bae strongim and comfortim iufala for helpem faith bilong iufala,  mekem olketa hard taem hia no spoelem faith bilong eniwan. Iufala savve finis, bae iumi mas kasem olketa samting hia.  Taem mifala stap witim iufala, mifala storyim finis long iufala bae iumi kasem olketa hard taem, wea hem nao wanem hem happen, olsem iufala savve finis.  Dastawe, from mi barava wari tumas, mi sendem hem long iufala mekem mi savve sapos iufala gohed for faithful, nogud Devil hem traem iufala and mifala hard waka nating nomoa for helpem iufala.  Bat Timothy hem just arrive kam bak distaem and hem talem gud nius abaotem iufala. Hem sei iufala faithful and showimaot love. Hem talem tu iufala evritaem tingim and laek for lukim mifala, olsem mifala tu laek for lukim iufala.  Dastawe olketa brata, nomata mifala safa and kasem hard taem, iufala comfortim mifala bikos iufala faithful.  From iufala gohed followim Lord and no givap, datwan mekem mifala strong bak nao.  Mifala barava talem thankiu long God for iufala bikos iufala mekem mifala hapi tumas. 10  Evri day and evri naet mifala barava prea strong for mifala savve lukim feis bilong iufala and helpem iufala long wanem iufala needim for strongim faith bilong iufala. 11  Mifala prea for God wea hem Dadi bilong iumi and Lord bilong iumi, Jesus, mekem wei for mifala savve kam long iufala. 12  Mifala prea tu for Lord mekem love wea iufala garem for iufala and for evriwan hem barava kamap big, olsem hao mifala lovem iufala tu. 13  Diswan bae mekem God wea hem Dadi bilong iumi, lukim heart bilong iufala hem strong, and holy and no garem blame long taem wea Lord bilong iumi Jesus hem stap witim evri holy wan bilong hem.

Olketa footnote

Or, “mi.” Maet Paul hem iusim word “mifala” for storyim hemseleva.