Skip to content

Skip to table of contents

 KAVA SUBJECT | WANEM KAEN PIPOL NAO OLKETA JEHOVAH’S WITNESS?

Why Nao Mifala Preach?

Why Nao Mifala Preach?

Main samting wea pipol savve abaotem Olketa Jehovah’s Witness hem wei wea mifala pipol for preach long haos tu haos and long evri ples wea pipol stap. Why nao mifala preach?

Olketa Jehovah’s Witness duim preaching waka for mekhae long God and for helpem pipol savve long nem bilong God. (Hebrew 13:15) And tu, mifala laek for obeyim komand bilong Jesus wea sei: “Go and teachim pipol long evri kantri for kamap disaepol bilong mi. . . . Teachim olketa for followim evri samting wea mi laekem iufala for duim.”—Matthew 28:19, 20.

Nara reason why mifala preach hem bikos mifala lovem pipol. (Matthew 22:39) Mifala luksavve staka pipol garem religion finis and staka pipol no interest long message wea mifala preachim. Bat, mifala savve olketa teaching wea stap long Bible savve sevem laef bilong pipol. Dastawe mifala “gohed for teachim pipol and talemaot gud nius abaotem Jesus, wea hem nao datfala Christ,” olsem olketa Christian long first century duim.—Acts 5:41, 42.

Wanfala savveman Antonio Cova Maduro hem storyim hao “Olketa Jehovah’s Witness barava waka hard . . . , for helpem pipol evriwea long world for savve long Bible.”El Universal newspaper, Venezuela

Plande pipol wea interest for readim olketa buk and olketa magasin bilong mifala, olketa no Jehovah’s Witness. And staka million pipol wea mifala studyim Bible witim olketa, olketa garem difren religion. Bat olketa barava tinghae long wei wea olketa Jehovah’s Witness kam visitim olketa.

Maet iu laek for savve long olketa nara samting abaotem Olketa Jehovah’s Witness. Mifala encouragem iu for

  • Story witim eni Jehovah’s Witness.

  • Go long website bilong mifala, www.jw.org.

  • Kam long our olketa meeting bilong mifala. Eniwan savve kam and olketa no askem selen for datwan.