Skip to content

Skip to table of contents

Wei blo Iumi

Wei blo Iumi

Bible sei iumi shud garem olketa gudfala wei and for waka hard for lusim olketa nogud wei.

KONTROLEM KROS

BIBLE PRINCIPLE: “Man hemi no kros kuiktaem, hemi strong winim nambawan soldia.” —Provebs 16:32.

WANEM HEM MINIM: Hem gud for kontrolem kros blo iumi. Samfala samting savve mekem iumi kros, bat sapos iumi no kontrolem kros diswan savve spoelem iumi. Olketa savveman sei taem pipol kros, olketa savve talem or duim samting wea bihaen olketa sorre lo datwan.

SAMTING IU SAVVE DUIM: Hem important for kontrolem kros blo iu mekem iu no duim karangge samting. Lo tingting blo samfala pipol man no need for kontrolem kros blo hem, bat datwan hem no tru. Bible sei: “Yu no save kontrolem kros, yu wik olsem taon wea i no garem wolston raonem.” (Provebs 25:28) Wanfala wei for kontrolem kros blo iu hem for herem full story firstaem. Bible sei: “Yu waes, bae yu no save kros kuiktaem.” (Provebs 19:11) Hem gud for herem full story mekem iu minim samting wea happen and datwan maet daonem kros blo iu.

SHOWIMAOT WEI FOR TINGHAE

BIBLE PRINCIPLE: ‘Showimaot wei for thankiu.’—Colossae 3:15.

WANEM HEM MINIM: Samfala sei sapos man garem wei for tinghae bae hem hapi. Nomata pipol wea kasem barava nogud samting olketa agree witim datwan. Olketa hia sei samting wea helpem olketa deal witim nogud samting hem nao for tinghae lo olketa blessing wea olketa kasem.

SAMTING IU SAVVE DUIM: Evriday ting raonem olketa samting wea iu tinghae lo hem, nomata maet olketa smol samting nomoa. Olsem example,  maet iu tinghae lo wei wea skae luk naes taem sun kamap, or iu enjoyim naesfala story witim wanfala famili member, or iu hapi bikos iu still gohed laef. Taem iu tingim olketa gud samting hia, diswan savve mekem iu hapi.

Hem gud tu for tinghae lo famili and olketa frens. Taem iu lukim wanfala naesfala wei blo narawan storyim datwan lo hem, or talem hem lo leta, e-mail, or text message. Diswan savve mekem iu fren gud witim olketa narawan and iu bae hapi bikos iu duim gud samting for narawan.—Acts 20:35.

SAMFALA NARA BIBLE PRINCIPLE

Iu savve daonlodim audio recording blo Bible. Olketa recording stap lo samting olsem 40 languis lo jw.org

NO LAEK RAOA.

“Stat blong raoa hemi olsem wata hemi lus long smol hol long tangk, stopem bifoa bikfala faet i kamap.”—PROVEBS 17:14.

NO WARI TUMAS ABAOTEM FUTURE.

“No warim samting wea bae happen tumoro, leavim go datwan for tumoro nao, bikos evri day bae olketa problem kamap.”—MATTHEW 6:34.

TINGTING GUD BIFOR IU DUIM SAMTING, AND NO FOLLOWIM FEELING NOMOA.

“Gudfala tingting, hemi save lukaftarem yu, an wei fo save mining blong olketa samting, hemi save helpem yu.”—PROVEBS 2:11.