Skip to content

Skip to table of contents

For ting strong long marit promis hem olsem anka wea strongim marit taem iutufala kasem problem

 HASBAND AND WAEF

1: Tingim Marit Promis

1: Tingim Marit Promis

WANEM HEM MINIM

Olketa hasband and waef wea tingim marit promis, bae ting long marit olsem hem for olowe, and datwan savve mekem tufala hapi. Tufala evriwan barava sure tufala bae no lusim each other, nomata tufala kasem problem long marit.

Samfala wea marit gohed stap tugeta bikos olketa long famili and fren sei hem no stret for olketa divorce. Bat hem barava gud taem hasband and waef gohed stap tugeta bikos tufala lovem and respectim each other.

BIBLE PRINCIPLE: “Hasband . . . mas no lusim waef bilong hem.”—1 Corinth 7:11.

“Hasband and waef wea tingim marit hem important bae no kwiktaem feel nogud long each other. Olketa willing for sei sorre and forgive. Taem problem kamap, olketa no ting for divorce, bat olketa waka hard for stretem datwan.”—Micah.

WHY HEM IMPORTANT

Hasband and waef wea no ting strong long marit promis maet garem kaen tingting olsem taem tufala kasem problem, ‘Mitufala no fitim each other’ and tufala tingting for divorce.

“Staka wea marit garem finis tingting hao olketa savve divorce sapos olketa no hapi. Sapos man garem kaen tingting olsem, diswan showimaot hem no tingim marit hem for olowe.”—Jean.

WANEM IU SAVVE DUIM

TING RAONEM DISWAN

Taem iutufala raoa . . .

  • Waswe, iu garem tingting, ‘Mi shud no maritim hem nomoa ia’?

  • Waswe, iu ting iu bae hapi sapos iu maritim difren wan?

  • Waswe, iu savve talem kaen toktok olsem, “Mi bae lusim iu” or “Mi go lukaotem narawan wea gud winim iu”?

Sapos ansa bilong iu hem yes long eni kwestin hia, iu mas duim samting for strongim marit bilong iu.

STORY WITIM MARIT PARTNER

  • Waswe, iumi tufala start for no ting strong long marit promis? Sapos olsem, why nao datwan happen?

  • Wanem nao iumi tufala savve duim for strongim marit bilong iumi tufala?

GUD SAMTING FOR DUIM

  • Talem long each other olketa toktok wea showimaot iu lovem marit partner

  • Putim piksa bilong marit partner long desk long office for showimaot iu tingim marit promis

  • Ringim marit partner evriday taem iu go waka or taem iu go long nara ples

BIBLE PRINCIPLE: “No eni man mas aotem samting wea God joinim finis.”—Matthew 19:6.