Skip to content

Skip to table of contents

Olsem wata savve killim dae fire, wei for forgive savve finisim raoa

 HASBAND AND WAEF

4: Forgive

4: Forgive

WANEM HEM MINIM

For forgivim samwan hem minim iu no tingim moa nogud samting wea hem duim and iu no gohed feel nogud abaotem datwan. Bat taem iu forgivim samwan, datwan hem no minim iu ting smol long rong samting hem duim or act olsem datwan no happen nomoa.

BIBLE PRINCIPLE: “Nomata sapos eniwan long iufala hem feel nogud long narawan, hem mas no kros bat mas evritaem forgivim hem.” —Colossae 3:13.

“Sapos iu lovem samwan, bae iu no tingim nomoa olketa wik point bilong hem, bat bae iu tingim gud samting wea hem trae for duim.”—Aaron.

WHY HEM IMPORTANT

Sapos iu gohed for feel nogud, datwan savve affectim tingting bilong iu, spoelem health bilong iu, and savve spoelem marit bilong iu tu.

“Wantaem hasband bilong mi duim samting wea mekem mi feel nogud and hem sei hem sorre. Bat hem hard for mi forgivim hem. Hem tek longtaem for mi forgivim hem and datwan affectim marit bilong mitufala. Mi shud forgivim hem taem hem sei sorre.”—Julia.

WANEM IU SAVVE DUIM

TING RAONEM DISWAN

Next taem marit partner bilong iu talem or duim samting wea mekem iu feel nogud, tingim tufala kwestin hia:

  • ‘Waswe, hem isi tumas for mi feel nogud?’

  • ‘Waswe, hem duim barava nogud samting and hem mas sei sorre, or mi savve leavim go nomoa?’

STORY WITIM MARIT PARTNER

  • Waswe, mitufala savve kwiktaem forgivim each other, or nomoa?

  • Wanem nao savve helpem mitufala for kwiktaem forgivim each other?

GUD SAMTING FOR DUIM

  • Sapos iu feel nogud, no kwiktaem tingse marit partner bilong iu min for duim datfala nogud samting.

  • Forgivim marit partner bilong iu for samting wea hem duim, and tingim hao “iumi evriwan savve sin staka taem.”—James 3:2.

“Hem isi for forgive taem mitufala evriwan duim rong samting, bat hem no isi for forgive taem narawan nomoa duim rong samting. Iu mas hambol mekem iu savve forgivim narawan taem hem sei sorre.”—Kimberly.

BIBLE PRINCIPLE: “Kwiktaem for stretem eni problem.”—Matthew 5:25.

Sapos iu gohed for feel nogud, datwan savve affectim tingting bilong iu, spoelem health bilong iu, and savve spoelem marit bilong iu tu