Skip to content

Skip to table of contents

 STUDY ARTICLE 39

Lukim, Wanfala Big Crowd!

Lukim, Wanfala Big Crowd!

“Lukim wanfala big crowd wea no eniwan fit for kaontem. . . . Olketa standap front long datfala throne and front long datfala Pikinini Sheepsheep.”—REV. 7:9.

SONG 60 Man wea Obey Bae Hem Laef

WANEM IUMI BAE STORYIM *

1. Wanem nao kasem John klosap lo end blo first century C.E?

KLOSAP lo end blo first century C.E., aposol John kasem barava hard taem. Hem olo, and hem prisoner lo island blo Patmos, and luk olsem hem nomoa only aposol wea laef yet. (Rev. 1:9) Hem savve hao olketa wea againstim Jehovah gohed for teachim olketa laea teaching insaed lo kongregeson and olketa kosim tu wei for divaed. Luk olsem olketa tru Christian bae gogo for nomoa nao.—Jude 4; Rev. 2:15, 20; 3:1, 17.

Aposol John lukim “wanfala big crowd” wea olketa werem white kaleko and holem olketa leaf blo palm tree (Paragraf 2 storyim diswan)

2. Olsem Revelation 7:9-14 storyim, wanem vision nao John lukim wea mekem hem hapi tumas? (Lukim piksa lo kava.)

2 Lo semtaem wea John gohed for deal witim olketa hard taem hia, hem lukim wanfala vision abaotem wanfala profesi wea mekem hem hapi tumas. Lo datfala vision, fofala angel kasem komand for holem bak wind blo bigfala trabol, go kasem taem olketa putim lastfala mark lo datfala grup blo olketa wakaman blo God. (Rev. 7:1-3) Datfala grup hem nao 144,000 wea bae rul witim Jesus lo heven. (Luke 12:32; Rev. 7:4) Then John lukim nara grup wea barava big tumas wea mekem hem for singaot and sei: “Mi lukim wanfala big crowd wea no eniwan fit for kaontem. Olketa hia from evri kantri and tribe and pipol and languis. Olketa standap front long datfala throne and front long datfala Pikinini Sheepsheep.” (Readim Revelation 7:9-14.) Tingim hapi wea John garem taem hem savve hao staka pipol bae followim tru worship lo future!

3. (a) Why nao vision blo John shud strongim faith blo iumi? (b) Wanem nao bae iumi lanem lo disfala study?

3 Iumi sure datfala vision strongim faith blo John. And datwan shud barava strongim go moa faith blo iumi, bikos iumi stap lo taem wea datfala vision hem kamap tru! Distaem, iumi  lukim staka million pipol nao kam tugeta wea garem hope for go thru lo datfala big trabol and laef olowe lo earth. Lo disfala study, bae iumi lanem hao winim 80 year go finis, Jehovah showimaot klia hu nao datfala big crowd. And tu, bae iumi storyim tufala samting abaotem datfala grup: (1) hao big nao datfala grup, and (2) pipol hia kam from wea. Olketa point hia shud strongim faith blo evriwan wea hope for part lo datfala big crowd.

DATFALA BIG CROWD BAE STAP LO WEA?

4. Wanem tru teaching from Bible nao staka religion wea sei olketa Christian no luksavve lo hem, and hao nao datwan hem difren from olketa Bible Student?

4 Staka religion wea sei olketa Christian, no teachim disfala tru teaching wea kam from Bible abaotem hao lo future pipol wea obey bae laef olowe lo earth. (2 Cor. 4:3, 4) Distaem, staka religion wea sei olketa Christian teachim hao evri gud pipol bae go lo heven taem olketa dae. Bat, datwan hem difren from teaching blo olketa Bible Student, wanfala smol grup wea start pablisim Watch Tower lo 1879. Olketa luksavve hao God bae mekem Paradaes kamap moa lo earth and staka million pipol wea obey bae laef lo disfala earth, and no lo heven. Bat, hem tek taem for olketa minim gud hu nao olketa pipol hia wea obey.—Matt. 6:10.

5. Wanem nao biliv blo olketa Bible Student abaotem 144,000?

5 Olketa Bible Student luksavve tu hao Bible sei samfala pipol bae “God peim from earth” for go rul witim Jesus lo heven. (Rev. 14:3) Olketa hia nao 144,000 Christian wea dedicate lo God and wea strong, and faithful for servem God taem olketa stap yet lo disfala earth. Waswe, lo datfala big crowd?

6. Wanem nao biliv blo olketa Bible Student abaotem datfala big crowd?

6 Lo vision blo John, hem lukim datfala big crowd “standap front long datfala throne and front long datfala Pikinini Sheepsheep.” (Rev. 7:9) Datfala toktok mekem olketa Bible Student for tingse, olsem 144,000, datfala big crowd tu bae go lo heven. Bat sapos 144,000 and datfala big crowd tufala evriwan stap lo heven, lo wanem wei nao tufala grup hia difren? Olketa Bible Student tingse datfala big crowd hem olketa Christian wea no barava obeyim God taem olketa stap lo earth. Nomata olketa garem laef wea followim wanem Bible talem, samfala lo olketa maet still member blo olketa religion wea sei olketa Christian. So olketa Bible Student tingse kaen pipol olsem, olketa lovem God bat love blo olketa no barava strong, from datwan olketa no fit for kamap king witim Jesus. Olketa tingse from love blo big crowd hia no strong gud, so olketa qualify for go lo heven and standap front lo throne bat olketa no fit for sidaon lo throne for rul.

7. Lo tingting blo olketa Bible Student, hu nao bae stap lo earth taem Thousand Year Rul hem gohed, and wanem nao tingting blo olketa abaotem olketa faithful man lo bifor?

7 Sapos olsem, hu nao bae stap lo earth? Olketa Bible Student tingse bihaen 144,000 and big crowd go lo heven, bae staka million pipol bae laef lo earth and kasem olketa blessing anda lo datfala Thousand Year Rul blo Christ. Olketa Bible Student no expectim olketa hia for servem Jehovah bifor datfala Rul blo Christ hem start. Bat, olketa tingse datfala grup bae lane abaotem olketa wei blo Jehovah taem datfala Thousand Year gohed. Lo datfala taem, olketa wea followim olketa standard blo Jehovah bae kasem laef olowe lo earth, bat olketa wea no laek obey bae finis. And tu, olketa Bible Student tingse maet samfala man wea bae duim waka olsem olketa Prince lo earth lo future, wea insaed diswan hem olketa faithful man lo bifor (wea dae  bifor Christ) wea resurrect lo datfala taem, bae kasem reward for go lo heven bihaen datfala Thousand Year hem finis.—Sams 45:16.

8. Wanem nao thrifala grup wea olketa tingse hem part lo plan blo God?

8 So olketa Bible Student tingse thrifala grup nao stap: (1) datfala 144,000, wea bae rul witim Jesus lo heven; (2) datfala big crowd blo olketa Christian wea love blo olketa for God hem no mas strong, wea bae standap front lo throne blo Jesus lo heven; and (3) staka million pipol wea bae lane for followim olketa wei blo Jehovah and wea bae stap lo earth taem Thousand Year Rul blo Christ hem gohed. * Bat gogo, lo taem wea Jehovah markem, datfala laet blo truth hem start for shaen braet for mekem klia tru mining blo disfala topic.—Provebs 4:18.

LAET BLO TRUTH HEM KAMAP MOA BRAET

Lo convention lo 1935, staka wea garem hope for stap lo earth nao olketa baptaes (Paragraf 9 storyim diswan)

9. (a) Wanem nao mining blo wei wea datfala big crowd lo earth hem “standap front long datfala throne and front long datfala Pikinini Sheepsheep”? (b) Why nao disfala wei for minim Revelation 7:9 hem mek sense?

9 Lo 1935, datfala teaching abaotem datfala big crowd lo vision blo John hem kamap klia. Olketa Jehovah’s Witness luksavve hao datfala big crowd no need for go lo heven for “standap front long datfala throne and front long datfala Pikinini Sheepsheep.” Bat, really datwan hem tokpiksa nomoa. Hem minim nomata datfala big crowd stap lo earth, olketa standap “front long datfala throne” thru lo wei wea olketa luksavve lo paoa and position blo Jehovah and lo wei wea olketa stap anda lo rul blo hem. (Aesaea 66:1) And taem olketa showimaot faith lo ransom sakrifaes blo Jesus hem olsem olketa standap “front long datfala Pikinini Sheepsheep.” Lo sem wei tu, Matthew 25:31, 32 hem storyim hao “evriwan long full world,” wea minim tu olketa wicked pipol, olketa bae “stap front” lo Jesus taem hem sidaon lo throne blo hem. Hem klia hao diswan hem no minim evriwan hia stap lo heven bat hem minim olketa stap lo earth. Taem olketa minim klia disfala information, hem barava mek sense. Dastawe Bible no story abaotem wei wea big crowd bae go lo heven. Only wanfala grup nomoa kasem promis for laef olowe lo heven, and hem nao 144,000, wea bae “kamap olketa king for rulim disfala earth” witim Jesus.—Rev. 5:10.

10. Why nao datfala big crowd mas lane abaotem olketa wei blo Jehovah bifor Wan Thousand Year Rul hem start?

10 Start kam lo 1935, olketa Jehovah’s Witness luksavve hao datfala big crowd lo vision blo John, hem nao datfala grup blo olketa faithful Christian wea garem hope for laef olowe lo earth. For olketa laef go thru lo datfala big trabol, datfala big crowd mas lane abaotem olketa wei blo Jehovah bifor datfala Wan Thousand Year Rul hem start. Olketa need for showimaot olketa garem strong faith for mekem olketa winim olketa “samting hia wea bae happen” bifor Wan Thousand Year Rul blo Christ.—Luke 21:34-36.

11. Why nao samfala Bible Student tingse samfala bae go lo heven bihaen Wan Thousand Year?

11 Waswe lo datfala idea wea sei samfala wea faithful bae go lo heven bihaen Wan Thousand Year? Datfala idea hem kamap lo datfala magasin The Watch Tower blo February 15, 1913. Wanfala tingting hem olsem, ‘Why nao olketa faithful man lo bifor kasem nomoa reward for stap lo earth, bat olketa narawan wea no barava faithful olsem olketa, kasem reward for go lo heven?’ Olketa garem diskaen tingting bikos lo tufala idea wea no stret: (1) olketa tingse datfala big crowd bae stap lo heven and (2) olketa tingse datfala big crowd  hem olketa Christian wea love blo olketa no mas strong.

12-13. Wanem nao olketa anointed and olketa blo big crowd luksavve abaotem reward blo olketa?

12 Bat olsem iumi storyim, start kam lo 1935, olketa Jehovah’s Witness luksavve pipol wea no dae lo Armageddon nao hem datfala big crowd lo vision blo John. Olketa bae “no dae long datfala big trabol” wea bae kamap lo earth and olketa bae “singaot big olsem: ‘God bilong iumi wea sidaon long throne witim datfala Pikinini Sheepsheep, tufala nao sevem iumi.’” (Rev. 7:10, 14) And tu, Bible teachim hao olketa wea resurrect for go lo heven bae kasem “samting wea moabeta” winim olketa faithful man lo bifor. (Heb. 11:40) From datwan, olketa brata blo iumi hapi for start invaetem pipol for kam worshipim Jehovah and garem hope for stap olowe lo disfala earth.

13 Datfala big crowd hapi lo hope wea olketa garem. Olketa luksavve Jehovah nao bae chusim wea nao hem laekem olketa wea faithful for worshipim hem for go, lo heven or lo earth. Olketa anointed and olketa lo big crowd luksavve hao reward wea olketa bae kasem hem no bikos lo wanem olketa duim bat bikos Jehovah kaen tumas taem hem provaedem ransom sakrifaes blo Jesus Christ.—Rome 3:24.

BAE OLKETA STAKA TUMAS

14. Bihaen 1935, why nao staka tingting tumas abaotem hao datfala profesi blo big crown bae kamap tru?

14 Bihaen pipol blo Jehovah minim klia hu nao datfala big crowd lo 1935. Staka maet ting, ‘hao nao bae gogo olketa wea garem hope for stap lo earth kamap wanfala big crowd wea staka tumas?’ Olsem example, Ronald Parkin hem 12 years nomoa taem datfala mining blo big crowd hem kamap klia. Hem sei: “Lo datfala taem, lo full world olketa garem 56,000 pablisa nomoa and klosap evriwan lo olketa nao anointed. So lo datfala taem, datfala big crowd hem no staka nomoa.”

15. Hao nao disfala waka for hipimap datfala big crowd hem gohed?

15 Lo olketa year bihaen, olketa sendem olketa missionary go lo staka difren ples, and namba blo olketa Jehovah’s Witness gohed for grow. Then lo 1968, wanfala Bible study program hem start wea olketa iusim datfala buk Truth Where Bringim Man Long Life All-the-Way. Hem explainim truth lo Bible lo wei wea simpol, and datwan muvim staka pipol wea hambol for lane abaotem Jehovah. Insaed lo fofala year nomoa, klosap wan million pipol nao baptaes. From paoa blo Catholic Church lo Latin America and olketa nara kantri hem  gogo daon, and from olketa aotem wei for banim waka lo olketa kantri lo Eastern Europe and samfala ples lo Africa, staka million moa olketa baptaes. (Aesaea 60:22) Lo olketa year wea go pas, organization blo Jehovah iusim staka nara tul for helpem pipol lane abaotem wanem Bible teachim. Distaem hem barava klia hao datfala big crowd namba blo olketa winim eit million finis.

BIG CROWD WEA KAM FROM OLKETA DIDIFREN PLES

16. Datfala big crowd olketa kam from wea?

16 Taem John raetem vision blo hem, hem storyim hao datfala big crowd bae kam from “evri kantri and tribe and pipol and languis.” Profet Zechariah profesi abaotem sem samting taem hem raet olsem: ‘Long datfala taem, tenfala strensa wea langguis blong olketa hemi deferen, bae i holem kaleko blong wanfala Jiu, an tok olsem long hem, Plis yu letem mifala fo go wetem yufala long Jerusalem, bikos mifala herem dat God hemi stap wetem yufala.’—Sekaraea 8:23.

17. Wanem nao helpem pipol from evri difren kantri and languis?

17 Olketa Jehovah’s Witness luksavve for hipimap pipol from evri difren languis, hem minim olketa mas preachim disfala gud nius lo staka languis. Hem tru, for winim 130 years,  iumi transleitim olketa Bible pablikeson, bat distaem winim eni nara taem lo history, iumi duim transleison lo staka handred languis. Wei wea Jehovah hipimap datfala big crowd from evri nation hem wanfala mirakol wea happen lo taem blo iumi. Bikos iumi kasem spiritual kaikai lo staka didifren languis datwan mekem disfala big crowd wan mind for worshipim Jehovah. And tu, evriwan savve lo pipol blo Jehovah bikos lo wei wea olketa strong for gohed preach and love wea olketa showimaot lo each other. Datwan hem barava strongim faith blo iumi!—Matt. 24:14; John 13:35.

WANEM NAO IUMI LANEM FROM DISFALA VISION?

18. (a) Olsem Aesaea 46:10, 11 storyim, why nao iumi no sapraes lo hao Jehovah mekem datfala profesi abaotem big crowd for kamap tru? (b) Why nao olketa wea hope for stap lo earth no feel olsem olketa misstim eni samting?

18 Iumi garem staka reason for hapi lo datfala profesi abaotem big crowd! Iumi no sapraes lo hao Jehovah mekem datfala profesi for kamap tru lo spesol wei olsem. (Readim Aesaea 46:10, 11.) Olketa wea part lo big crowd tinghae lo hope wea Jehovah givim. Nomata spirit blo God no anointim olketa for rul witim Jesus lo heven, olketa no feel olsem olketa misstim eni samting. Lo Bible iumi read abaotem olketa faithful man and woman wea holy spirit leadim olketa nomata olketa no part lo datfala 144,000. Wanfala nao John Baptaesa. (Matt. 11:11) Narawan hem David. (Acts 2:34) Tufala hia and staka narawan bae laef bak and stap lo paradaes lo earth. Olketa wea resurrect, and tu datfala big crowd, bae garem chance for showimaot olketa faithful lo Jehovah and rul blo hem.

19. Hao nao wei wea vision blo John abaotem big crowd hem fulfill hem showimaot iumi stap lo barava important taem?

19 Distaem, winim enitaem bifor, God hipimap staka million pipol from evri nation. Nomata sapos iumi garem hope for stap lo heven or lo earth, iumi need for duim best blo iumi for helpem staka for kamap part lo big crowd blo “nara sheepsheep.” (John 10:16) Klosap nao Jehovah bae mekem datfala big trabol for distroem olketa gavman and religion wea mekem pipol barava safa. Lo future, datfala big crowd bae garem nambawan privilege for servem Jehovah lo earth for olowe!—Rev. 7:14.

SONG 139 Tingim Taem wea Evri Samting Hem Niu

^ par. 5 Lo disfala study, bae iumi storyim datfala vision blo John wea profesi abaotem wei for hipimap “wanfala big crowd.” Iumi sure diswan bae strongim faith blo evriwan wea garem hope for part lo datfala grup.

^ par. 8 Lukim Jehovah’s Witnesses—Proclaimers of God’s Kingdom, page 159-163.