Skip to content

Skip to table of contents

 STUDY ARTICLE 36

Armageddon Hem Gud Nius!

Armageddon Hem Gud Nius!

“Olketa hipimap olketa king long . . . Armageddon.” —REV. 16:16.

SONG 150 Lukaotem God for Sevem Iu

WANEM IUMI BAE STORYIM *

1-2. (a) Why nao Armageddon hem wanfala gud nius? (b) Olketa wanem kwestin nao bae iumi storyim lo disfala study?

SAMFALA pipol tingse “Armageddon” hem wanfala nuclear war or wanfala natural disaster wea bae distroem world. Bat wanem Bible talem abaotem Armageddon, hem samting for hapi lo hem, hem wanfala gud nius! (Rev. 1:3) War blo Armageddon hem no for spoelem olketa man bat for sevem olketa! Hao nao olsem?

2 Bible showimaot hao datfala war blo Armageddon hem bae sevem olketa pipol taem hem finisim rul blo olketa man. Datfala war bae distroem nogud pipol and sevem olketa wea raeteous. And Armageddon bae sevem olketa pipol bikos hem protectim earth for pipol no spoelem. (Rev. 11:18) For minim gud olketa point hia, bae iumi story raonem fofala kwestin. Wanem nao Armageddon? Olketa wanem samting nao bae happen bifor Armageddon? Wanem nao iumi savve duim for iumi sev lo Armageddon? Hao nao iumi savve gohed faithful taem end hem kakam klosap?

WANEM NAO ARMAGEDDON?

3. (a) Wanem nao disfala toktok “Armageddon” hem minim? (b) Olsem Revelation 16:14, 16 storyim, why nao iumi sei Armageddon hem no nem blo wanfala ples lo earth?

3 Readim Revelation 16:14, 16. Datfala word “Armageddon” hem kamap wanfala taem nomoa insaed Bible, and hem kam from wanfala Hebrew toktok wea minim Maunten blo Megiddo. (Rev. 16:16) Megiddo hem wanfala city lo Israel bifor. (Josua 17:11) Bat, Armageddon hem no wanfala ples lo earth. Bible iusim datfala toktok Armageddon for storyim taem wea “olketa king evriwea long earth” bae hipap tugeta for againstim Jehovah. (Rev. 16:14) Nomata olsem, lo disfala study, iumi bae iusim datfala toktok “Armageddon” for storyim tu datfala war wea kamap stretawe bihaen olketa king lo earth hipap tugeta. Hao nao iumi savve dat Armageddon hem wanfala tokpiksa ples nomoa?  First, no eni maunten blo Megiddo hem really stap. Mek-tu, datfala area lo Megiddo hem smol tumas so hem hard for “olketa king evriwea long earth” and olketa army and weapon blo olketa for hipap lo hem. Mek-thri, olsem bae iumi storyim insaed lo disfala article, datfala war blo Armageddon bae start taem “olketa king” attakim pipol blo God, wea stap evriwea lo earth.

4. Taem Jehovah storyim bigfala war blo hem, why nao hem joinim datwan witim Megiddo?

4 Taem Jehovah storyim bigfala war blo hem, why nao hem joinim datwan witim Megiddo? Lo bifor, Megiddo and Jezreel Valley hem olketa ples wea olketa iusim for faet. Samfala taem, Jehovah duim samting for helpem pipol blo hem for win. Olsem example “long wata long Megido,” God helpem Barak wea hem wanfala judge blo Israel, for winim army blo Canaan wea Sisera nao leadim. Barak and datfala profet Deborah, thankiu lo Jehovah from hem duim mirakol for helpem olketa for win. Tufala sing olsem: “Olketa star long skae tu i joen tugeta fo faet . . . agensim Sisera. Bikfala flad long Kison Riva hemi spoelem olketa.”—Jajis 5:19-21.

5. Lo wanem important wei nao war blo Armageddon hem difren from war wea Barak faet insaed?

5 Barak and Deborah finisim datfala song witim disfala toktok: “[Jehovah], letem olketa enemi blong yu i dae long sem wei wea Sisera hemi dae. Bat letem evriwan hu i lavem yu i saen olsem san wea hemi kamap long moning.” (Jajis 5:31) Lo Armageddon, olketa enemy blo God bae distroe, bat olketa wea lovem God bae sev. Bat important samting wea difren lo tufala war hia nao, lo Armageddon, pipol blo God bae no faet, and olketa bae no garem eni weapon tu! Bat samting wea mekem olketa strong hem bikos olketa stap kwaet and trustim Jehovah and army blo hem lo heven.—Aesaea 30:15; Rev. 19:11-15.

6. Hao nao God maet distroem olketa enemy blo hem lo Armageddon?

6 Hao nao God bae distroem olketa enemy blo hem lo Armageddon? Hem maet iusim olketa didifren wei. Olsem example, hem maet iusim olketa earthquake, hail ston, and laetning. (Job 38:22, 23; Esikiel 38:19-22) Hem maet mekem olketa enemy blo hem for faetem each other. (Mektu Kronikols 20:17, 22, 23) Hem maet iusim olketa angel blo hem for killim olketa nogud pipol. (Aesaea 37:36) Nomata wanem nao God iusim, hem bae win. Evri enemy blo hem bae finis. And evriwan wea raeteous bae sev.—Provebs 3:25, 26.

WANEM NAO BAE HAPPEN WEA LEAD GO LO ARMAGEDDON?

7-8. (a) Olsem 1 Thessalonica 5:1-6 storyim, wanem nao olketa world leader bae talemaot wea here difren? (b) Why nao datfala laea hem wanfala danger?

7 For talemaot “peace and stap gud” bae kamap bifor “day bilong Jehovah” hem start. (Readim 1 Thessalonica 5:1-6.) Lo 1 Thessalonica 5:2, “day bilong Jehovah” hem minim “datfala big trabol.” (Rev. 7:14) Hao nao bae iumi savve datfala big trabol hem redi for start? Bible sei bae pipol talemaot wanfala toktok wea here difren. Datwan hem olsem wanfala saen wea showimaot datfala big trabol hem redi for start.

8 Datfala toktok wea olketa bae talemaot hem nao peace and security, or “peace and stap gud nao.” Why nao olketa world leader bae talem datwan? Waswe, olketa bigman blo religion bae join witim olketa tu? Maet olsem. Bat, datfala toktok wea olketa bae talemaot hem wanfala laea blo olketa demon. Datfala laea hem danger tumas bikos hem mekem pipol for tingse olketa sef, batawea datwan nao taem wea big trabol wea winim enitaem bifor hem redi for start. Tru nao, bae “seknomoa olketa bae finis, olsem taem bigfala pain hem  seknomoa kasem woman wea klosap for bornem pikinini.” Waswe lo olketa pipol blo Jehovah wea faithful? Olketa maet sapraes taem seknomoa day blo Jehovah hem start, bat olketa bae redi finis for datwan.

9. Hao nao God bae distroem world blo Satan?

9 Jehovah bae no wantaem nomoa distroem full world blo Satan, olsem hem duim lo taem blo Noah. Bat hem bae duim diswan lo tufala difren taem. Firstaem, hem bae distroem Bigfala Babylon, wea hem nao evri false religion. Then mek-tu, hem bae finisim full world blo Satan lo Armageddon, insaed diswan hem olketa system blo Satan saed lo politik, bisnis, and military. Bae iumi storyim moa abaotem tufala important samting hia wea bae happen.

10. Olsem Revelation 17:1, 6 and 18:24, storyim, why nao Jehovah bae finisim Bigfala Babylon?

10 “Panis wea bae kasem datfala jury woman wea garem bigfala paoa.” (Readim Revelation 17:1, 6; 18:24.) Bigfala Babylon duim olketa samting wea hem mek shame lo nem blo God. Hem teachim pipol olketa laea samting abaotem God. False religion hem olsem wanfala jury woman bikos hem no faithful lo Jehovah from hem gohed for fren witim olketa gavman blo man. Hem iusim paoa wea hem garem for bossim pipol blo hem and tekem selen blo olketa. Hem duim samting wea kosim dae blo staka pipol, and hem duim diswan tu lo pipol blo God. (Rev. 19:2) Hao nao Jehovah bae finisim Bigfala Babylon?

11. Wanem nao datfala “wild animal wea kala bilong hem red,” and hao nao bae God iusim hem for againstim Bigfala Babylon?

11 Jehovah bae iusim “tenfala horn” blo “wild animal wea kala bilong hem red” for distroem “datfala jury woman wea garem bigfala paoa.” Datfala wild animal hem minim United Nations. Tenfala horn hem minim olketa gavman distaem wea olketa sapotim United Nations. Lo taem wea God markem, olketa gavman hia bae attakim Bigfala Babylon wea hem nao false religion. Olketa bae ‘tekem evriting blo hem and mekem hem  naked’ wea minim bae olketa tekem evri riches blo hem and mekem pipol luksavve hem wanfala nogud woman. (Rev. 17:3, 16) Olsem hem happen lo wanfala day nomoa, attak hia bae happen kwiktaem and evriwan wea sapotim hem bae seke lo datwan. Bikos hem savve haem hemseleva tumas and sei: “Mi wanfala queen, and mi no widow woman, and no enitaem bae mi sorre.”—Rev. 18:7, 8.

12. Wanem nao Jehovah bae no letem olketa nation for duim, and why nao olsem?

12 God bae no letem olketa nation for distroem pipol blo hem. Olketa pipol blo hem praod for garem nem blo hem, and olketa obeyim komand blo hem for ranawe from Bigfala Babylon. (Acts 15:16, 17; Rev. 18:4) Olketa waka hard tu for helpem olketa narawan for go aot from Bigfala Babylon. From datwan, olketa wea worshipim Jehovah bae no ‘kasem olketa nogud samting wea bae kasem Bigfala Babylon.’ Nomata olsem, faith blo olketa bae kasem test.

Nomata wea nao olketa stap, pipol blo Jehovah bae trustim hem taem datfala attak bae gohed (Paragraf 13 storyim diswan) *

13. (a) Hu nao Gog? (b) Olsem Esikiel 38:2, 8, 9 storyim, wanem nao bae mekem Gog for kasem datfala tokpiksa ples Armageddon?

13 Attak blo Gog. (Readim Esikiel 38:2, 8, 9.) Bihaen Jehovah distroem evri false religion, pipol blo hem nomoa bae showaot klia olsem taem wanfala tree hem standap seleva bihaen bigfala cyclone. Datwan bae mekem Satan for barava kros. Bae hem showimaot kros blo hem thru lo olketa “message wea no klin,” wea minim olketa laea story wea demon nao bihaenem wea bae kosim olketa nation for join tugeta for attakim pipol blo Jehovah. (Rev. 16:13, 14) Datfala grup blo olketa nation hem nao ‘Gog from land blo Magog.’ Taem olketa nation start for attakim pipol blo Jehovah, datwan minim olketa kasem nao datfala tokpiksa ples Armageddon.—Rev. 16:16.

14. Wanem samting nao Gog bae luksavve lo hem?

14 Gog bae hem trustim nomoa paoa blo hemseleva, wea hem nao army blo hem. (Mektu Kronikols 32:8) Iumi bae trustim God blo iumi Jehovah. Bat olketa nation bae tingse  iumi karangge for trustim Jehovah bikos olketa god blo Bigfala Babylon nating sevem Bigfala Babylon from “datfala wild animal” wea garem “tenfala horn”! (Rev. 17:16) So Gog expectim bae isi nomoa for hem win. “Olsem wanfala bikfala klaod long ren wea hemi kavarem olketa ples” hem bae attakim pipol blo Jehovah. (Esikiel 38:16) Batawea, lo datfala taem Gog bae just luksavve dat hem insaed lo wanfala trap nao. Olsem Pharaoh lo Red Sea, Gog bae luksavve hem really faet againstim Jehovah.—Eksodas 14:1-4; Esikiel 38:3, 4, 18, 21-23.

15. Hao nao Christ bae hem barava win?

15 Christ and army blo hem lo heven bae faet for pipol blo God and pisisim Gog and army blo hem. (Rev. 19:11, 14, 15) Bat waswe lo Satan, main enemy blo Jehovah, wea gohed laea lo olketa nation and kosim olketa for attakim pipol blo God lo Armageddon? Jesus bae torowem Satan and olketa demon blo hem insaed hol wea deep tumas, and lokim olketa for wan thousand years.—Rev. 20:1-3.

WANEM NAO IU SAVVE DUIM FOR SEV LO ARMAGEDDON?

16. (a) Hao nao iumi showimaot iumi “savve long God”? (b) Why nao wei for savve lo Jehovah bae helpem iumi lo Armageddon?

16 Nomata hao long nao iumi lo truth, for sev lo Armageddon, iumi mas showimaot iumi “savve long God” mekem iumi savve “obeyim datfala gud nius abaotem Lord bilong iumi Jesus.” (2 Thess. 1:7-9) Wei for “savve long God” minim for savve lo wanem God laekem and no laekem, and for savve lo olketa standard blo hem. And tu, iumi showimaot diswan taem iumi lovem and obeyim hem, and iumi worshipim hem nomoa. (1 John 2:3-5; 5:3) Taem iumi showimaot iumi savve lo God, then God bae “savve gud” lo iumi wea hem wanfala privilege and datwan bae sevem iumi lo taem blo Armageddon! (1 Cor. 8:3) Hao nao olsem? Bikos taem Jehovah luksavve lo iumi, datwan minim hem appruvim iumi.

17. Wanem nao hem minim for obeyim datfala “gud nius abaotem Lord bilong iumi Jesus”?

17 Datfala “gud nius abaotem Lord bilong  iumi Jesus” hem minim olketa tru samting wea Jesus teachim, wea stap insaed lo Bible. Iumi obeyim datfala gud nius taem iumi followim datwan lo laef blo iumi. For obey, hem minim tu for putim Kingdom olsem first samting, followim olketa standard blo Jehovah, and for talemaot Kingdom blo God. (Matt. 6:33; 24:14) And tu, hem minim for sapotim olketa brata blo Christ taem olketa lukaftarem bigfala responsibility blo olketa.—Matt. 25:31-40.

18. Lo wanem wei nao olketa anointed brata blo Christ bae rewardim olketa wea helpem olketa?

18 Klosap nao olketa anointed wan bae rewardim olketa “nara sheepsheep” from help wea olketa givim lo olketa anointed wan. (John 10:16) Lo wanem wei? Bifor war blo Armageddon hem start, evriwan blo 144,000 bae go ap finis lo heven and kamap olketa spirit wea no savve dae. Olketa bae joinim army lo heven wea bae finisim Gog and olketa sevem datfala “big crowd” wea hem olketa sheepsheep blo God. (Rev. 2:26, 27; 7:9, 10) Tru nao, hem wanfala privilege for olketa blo big crowd for sapotim olketa anointed taem olketa stap yet lo earth!

HAO NAO IUMI SAVVE GOHED FAITHFUL TAEM END HEM KAKAM KLOSAP?

19-20. Nomata iumi deal witim olketa hard taem, hao nao iumi savve gohed faithful taem Armageddon hem kakam klosap?

19 Lo olketa last day distaem wea no isi, staka pipol blo Jehovah mas deal witim olketa barava hard taem. Nomata olsem, iumi savve gohed hapi and no givap. (Jas. 1:2-4) Wanfala important samting hem for gohed for prea. (Luke 21:36) And tu, iumi no just prea nomoa bat iumi gohed for study and ting raonem Bible evriday, and ting raonem tu olketa profesi wea gohed for happen lo taem blo iumi. (Sams 77:12) Taem iumi duim olketa samting hia, and duim gud ministry blo iumi, datwan bae strongim faith and hope wea iumi garem!

20 Tingim taem Bigfala Babylon hem distroe and Armageddon hem finis nao, iu bae barava hapi! Main important samting wea bae mekem iu hapi tu, hem taem iu tingim hao evriwan bae mekhae lo nem blo God and rul blo hem! (Esikiel 38:23) Yes, Armageddon hem wanfala gud nius for olketa wea savve lo God, and wea obeyim son blo hem, and wea no givap go kasem end.—Matt. 24:13.

SONG 143 Gohed Waka Hard, Lukluk, and Weit

^ par. 5 Armageddon hem samting wea pipol blo Jehovah weitim for longtaem finis. Lo disfala study, bae iumi storyim wanem nao Armageddon, olketa samting wea bae happen bifor Armageddon, and hao iumi savve gohed faithful taem end hem kakam klosap.

^ par. 71 PIKSA: Olketa samting happen raonem iumi. Iumi bae (1) duim ministry go kasem taem iumi no fit for duim datwan, (2) gohed lo schedule blo iumi for study, and (3) gohed for trustim protection blo God.

^ par. 85 PIKSA: Olketa police redi for go insaed lo haos blo wanfala famili wea gohed for trustim hao Jesus and olketa angel blo hem lukim samting wea happen.