Skip to content

Skip to table of contents

Pipol mas herem warning taem Judgment blo God wea olsem “cyclone” hem kakam klosap!

Olketa Judgment blo God—Waswe, God Evritaem Givim Inaf Warning?

Olketa Judgment blo God—Waswe, God Evritaem Givim Inaf Warning?

WANFALA man wea waka lo weather forecast hem lukluk lo olketa piksa from satellite. Hem lukim wanfala big cyclone kakam klosap for kasem wanfala ples wea staka pipol nao stap lo hem. From hem warim safety blo pipol lo there, hem traem best blo hem for warnim olketa bifor cyclone kasem olketa.

Olsem tu, distaem Jehovah warnim pipol abaotem wanfala tokpiksa “cyclone” wea danger winim eni cyclone wea kamap lo olketa weather report. Hao nao hem gohed duim datwan? And why nao iumi savve dat hem givim inaf taem for pipol obeyim datfala warning? For ansarem olketa kwestin hia, iumi bae storyim samfala warning wea Jehovah givim lo bifor.

GOD GIVIM OLKETA WARNING FIRSTAEM

Lo bifor, Jehovah givim olketa warning abaotem olketa taem blo judgment wea olsem “cyclone” wea bae kamap againstim olketa wea no laek for obeyim olketa komand blo hem. (Provebs 10:25; Jeremaea 30:23) Lo each taem wea wanfala judgment bae happen, hem bae talem warning longtaem bifor datwan, and talem olketa wanem for duim for followim wanem hem talem. (Mektu Kings 17:12-15; Nehemaea 9:29, 30) For helpem pipol for change, staka taem hem iusim olketa faithful servant blo hem lo earth for talemaot judgment blo hem, and for helpem pipol luksavve olketa mas kwiktaem duim samting.—Emos 3:7.

Noah hem wanfala lo olketa faithful servant blo Jehovah lo bifor. For staka year, hem no fraet for warnim pipol wea garem nogud wei and wea raf tumas, abaotem bigfala Flood wea bae kam. (Jenesis 6:9-13, 17) Hem talem olketa tu wanem olketa need for duim for gohed laef lo taem blo Flood. From datwan, gogo olketa kolem hem datfala man for “preach abaotem samting wea raeteous.”—2 Pet. 2:5.

Nomata Noah traem best blo hem, pipol wea laef bifor Flood no laekem datfala message blo God. Olketa showimaot olketa barava no garem faith. From datwan, olketa dae taem datfala big Flood kam and finisim evriwan. (Matt. 24:39; Heb. 11:7) Taem olketa klosap for dae, olketa no fit sei dat God nating warning olketa.

Lo olketa nara taem, Jehovah warnim olketa man wanwan no longtaem bifor judgment blo hem start. Nomata olsem, hem mek sure pipol wea datwan bae affectim olketa bae garem inaf taem for duim samting. Olsem taem hem mekem Tenfala Trabol for kasem olketa lo Egypt, hem warning olketa firstaem. Olsem example, Jehovah sendem go Moses and Aaron for warnim Pharaoh and pipol blo hem abaotem mek-seven trabol wea hem datfala hailstorm. From datwan bae happen lo next day. Waswe, God givim inaf taem for olketa savve faendem sef ples for haed from datfala storm? Bible sei: “Samfala bikman blong king i herem tu Mesij blong [Jehovah], an olketa fraet. So olketa go kuiktaem fo tekem go olketa slev an olketa animol blong olketa insaet long haos. Bat olketa narafala bikman hu i les fo herem Mesij blong [Jehovah], olketa letem olketa slev an olketa animol blong olketa fo stap nomoa long aotsaet.” (Eksodas 9:18-21) Hem barava klia, Jehovah givim inaf warning mekem olketa savve kwiktaem duim samting mekem olketa no safa lo datfala mek-seven trabol.

Pharaoh and olketa servant blo hem kasem warning bifor datfala mek-ten trabol. Nomata olsem, olketa no laek for lisin lo datfala warning. (Eksodas 4:22, 23) From datwan, olketa firstborn son blo olketa dae. Datwan hem sorre samting! (Eksodas 11:4-10; 12:29) Waswe, olketa garem inaf taem for obeyim datfala warning bifor hem leit? Yes! Moses stretawe warnim olketa Israelite abaotem datfala mek-ten trabol and givim  instruction lo olketa famili lo hao for stap sef. (Eksodas 12:21-28) Haomas pipol nao obeyim wanem Moses talem? Samfala tingse, maet namba hem samting olsem thri million pipol, insaed diswan hem olketa Israelite and “plande long olketa narafala pipol” wea no Israelite and olketa blo Egypt tu, olketa hia no kasem judgment blo God and olketa lusim Egypt.—Eksodas 12:38.

Olsem olketa example hia showimaot, Jehovah evritaem mek sure pipol garem inaf taem for herem warning. (Diutronomi 32:4) Why nao God duim datwan? Aposol Peter storyim hao Jehovah “no laekem eniwan for dae bat hem laekem evriwan for garem chance for repent.” (2 Pet. 3:9) Tru nao, God lovem pipol. Hem laekem olketa for repent and change followim olketa warning bifor Judgment hem kam.—Aesaea 48:17, 18; Rome 2:4.

OBEYIM WARNING WEA GOD GIVIM DISTAEM

Distaem, evri pipol mas obeyim wanfala important warning wea olketa gohed for talemaot evriwea lo world. Taem Jesus stap lo earth, hem talem warning hao gogo disfala world bae distroe lo taem blo datfala “bigfala trabol.” (Matt. 24:21) Taem hem storyim datfala judgment wea bae kamap lo future, hem talem wanfala profesi abaotem wanem pipol blo hem bae lukim and feisim, taem datfala judgment hem kakam klosap. Olketa samting wea Jesus storyim lo datfala taem, hem nao wanem iumi lukim hem gohed for happen distaem.—Matt. 24:3-12; Luke 21:10-13.

For fitim wanem datfala profesi talem, Jehovah gohed for talem evriwan for stap anda lo rul blo Hem. Jehovah laekem olketa wea obeyim hem for garem gudfala laef distaem and for kasem olketa blessing lo raeteous niu world lo future. (2 Pet. 3:13) Jehovah laekem pipol for garem faith lo olketa promis blo hem, so hem provaedem datfala message abaotem ‘gud nius blo Kingdom’ wea Jesus sei bae pipol talemaot “long evri ples long world mekem pipol long evri kantri mas herem.” (Matt. 24:14) God organizem olketa pipol blo hem for “talemaot,” or preachim message blo hem lo samting olsem 240 kantri. Jehovah laekem for staka pipol nao for herem datfala warning and sef lo taem blo Judgment blo hem wea olsem cyclone wea kakam klosap.—Sefenaea 1:14, 15; 2:2, 3.

So important samting nao, hem no hao Jehovah givim inaf taem lo pipol for duim samting followim olketa warning blo hem. Olsem iumi lanem, hem evritaem givim warning. Bat important kwestin nao hem: Waswe, pipol bae obeyim warning blo God taem olketa still garem chance? Iumi wea talemaot message blo God mas gohed for helpem olketa nara pipol for mas kasem laef taem world hem finis.