Skip to content

Skip to table of contents

 STUDY ARTICLE 40

Gohed Busy lo Last Part blo “Olketa Last Day”

Gohed Busy lo Last Part blo “Olketa Last Day”

“Iufala mas faithful and gohed strong. Evritaem busy long waka bilong Lord.”—1 COR. 15:58.

SONG 58 Lukaotem Sheepsheep Bilong God

WANEM IUMI BAE STORYIM *

1. Wanem nao mekem iumi barava sure iumi stap lo “olketa last day”?

SAPOS iu born bihaen year 1914, datwan minim for full laef blo iu, iu stap lo “olketa last day” blo disfala world. (2 Tim. 3:1) Iumi evriwan herem nius abaotem olketa samting wea Jesus sei bae happen lo olketa last day. Insaed diswan, hem olketa war, pipol no garem kaikai, olketa earthquake, olketa nogud sik wea kwiktaem for spred, wei for brekem law kamap big, and wei for persecutim pipol blo Jehovah. (Matt. 24:3, 7-9, 12; Luke 21:10-12) And tu, iumi lukim wei blo pipol barava olsem wanem aposol Paul profesi abaotem. (Lukim box “ Wei blo Pipol Distaem.”) Iumi olketa Jehovah’s Witness barava sure iumi stap lo last part blo olketa last day.—Mic. 4:1, NW.

2. Olketa wanem kwestin nao iumi need for ansarem?

2 From staka year go pas finis from 1914, datwan showimaot iumi mas stap lo barava end blo “olketa last day.” From end hem barava klosap, iumi need for savve lo ansa blo samfala important kwestin olsem: Wanem nao bae happen lo end blo “olketa last day”? And wanem nao Jehovah expectim iumi for duim taem iumi weitim olketa samting hia for happen?

WANEM NAO BAE HAPPEN LO END BLO “OLKETA LAST DAY”?

3. Olsem profesi lo 1 Thessalonica 5:1-3 storyim, wanem nao olketa nation bae talemaot?

3 Readim 1 Thessalonica 5:1-3. Paul storyim “day bilong Jehovah.” Lo disfala scripture, disfala “day bilong Jehovah” hem start taem olketa attakim “Bigfala Babylon” wea hem nao evri false religion, and datfala day bae finis lo Armageddon. (Rev. 16:14, 16; 17:5) Bat bifor datfala “day” hem start, olketa nation bae talemaot ‘Peace and security!’ (Samfala transleison  iusim toktok: “Peace and stap gud.”) Samfala taem, olketa world leader savve iusim tu sem toktok taem olketa story abaotem hao for trae helpem olketa kantri for stap gud tugeta. * Nomata olsem, hao olketa bae talemaot ‘peace and security’ wea Bible storyim bae hem difren. Why nao olsem? Taem datwan happen, pipol bae tingse olketa world leader kasem goal blo olketa for mekem disfala world kamap sef ples for stap. Bat tru samting nao, “bigfala trabol” hem redi for start and “seknomoa olketa bae finis.”—Matt. 24:21.

Iumi no karangge for bilivim olketa nation taem olketa sei olketa mekem disfala world for garem ‘peace and security’ (Paragraf 3-6 storyim diswan) *

4. (a) Wanem nao iumi no savve yet abaotem hao olketa bae announcem ‘peace and security’? (b) Wanem nao iumi savve finis abaotem datwan?

4 Hem tru, iumi savve lo samfala samting abaotem taem wea olketa bae talemaot ‘peace and security.’ Bat iumi no savve lo olketa nara samting. Iumi no savve wanem samting nao bae happen wea lead go for datwan, or hao olketa bae announcem. And iumi no savve sapos olketa bae talemaot datwan staka taem, or bae hem wanfala big announcement wea olketa talemaot wantaem nomoa. Nomata wanem happen, iumi savve finis: Iumi no karangge for tingse olketa world leader savve mekem disfala world for garem peace. Bat, iumi luksavve hem nao samting wea Bible talem iumi for redi for hem. Hem saen wea showimaot “day bilong Jehovah” hem redi for start!

5. Hao nao 1 Thessalonica 5:4-6 helpem iumi for redi for “day bilong Jehovah”?

5 Readim 1 Thessalonica 5:4-6. Toktok blo Paul helpem iumi for savve wanem for duim for iumi redi for “day bilong Jehovah.” Iumi shud “no olsem olketa narawan wea sleep.” Iumi mas “gohed wekap” and redi. Olsem example, iumi mas careful for no letem eni samting mekem iumi for join insaed lo politik, nogud iumi spoelem wei wea iumi no teksaed. Sapos iumi duim datwan iumi kamap “olsem pipol long world.” (John 15:19) Iumi savve Kingdom blo God nomoa savve mekem full world for garem peace.

6. Wanem nao iumi laek helpem olketa narawan for duim, and why nao olsem?

6 Iumiseleva need for gohed wekap, bat lo semtaem iumi laek helpem olketa narawan tu for wekap and luksavve lo wanem Bible talem wea bae happen lo disfala world. And iumi mas tingim hao taem wea bigfala trabol hem start, hem bae leit nao for eniwan start worshipim Jehovah. Dastawe hem barava important for iumi preach distaem! *

GOHED BUSY FOR PREACH

Taem iumi preach, iumi showimaot hao Kingdom blo God nomoa savve mekem world kamap sef ples for stap (paragraf 7-9 storyim diswan)

7. Wanem nao Jehovah expectim iumi for duim?

7 Insaed lo lelebet taem wea hem stap yet bifor “day bilong Jehovah” hem start,  Jehovah expectim iumi for gohed busy for preach. Iumi mas mek sure iumi duim staka samting “long waka bilong Lord.” (1 Cor. 15:58) Jesus profesi abaotem wanem iumi bae duim. Taem hem storyim olketa big samting wea bae happen lo olketa last day, hem sei tu: “Waka for preachim gud nius mas gohed long evri kantri firstaem.” (Mark 13:4, 8, 10; Matt. 24:14) So tingim diswan: Each taem iu go preach, iu help for fulfillim datfala Bible profesi!

8. Hao nao waka for preach abaotem Kingdom hem gohed for grow?

8 Hao nao disfala waka for preach abaotem Kingdom hem gohed for grow? Evri year, staka pipol moa herem disfala gud nius. Olsem example, tingim hao evriwea lo world namba blo olketa wea talemaot gud nius abaotem Kingdom hem gohed for grow lo olketa last day. Lo 1914, iumi garem 5,155 pablisa lo 43 kantri. Distaem, samting olsem 8.5 million pablisa nao stap lo 240 kantri! Nomata olsem, waka blo iumi hem no finis yet. Iumi mas gohed for talemaot hao Kingdom blo God nomoa savve finisim olketa problem wea man garem.—Sams 145:11-13.

9. Why nao iumi mas gohed for preach abaotem Kingdom?

9 Waka blo iumi for preach abaotem Kingdom bae still gohed go kasem taem Jehovah sei hem finis nao. Waswe, staka taem stap yet for pipol lane for savve abaotem Jehovah God and Jesus Christ? (John 17:3) Iumi no savve. Samting wea iumi savve lo hem nao, go kasem taem wea big trabol bae start, eniwan wea “laekem laef olowe” still garem chance for obeyim datfala gud nius. (Acts 13:48) Hao nao iumi savve helpem olketa pipol hia bifor hem leit?

10. Wanem nao Jehovah givim for helpem iumi teachim pipol abaotem truth?

10 Jehovah iusim organization blo hem for givim iumi evri samting wea iumi needim for teachim truth lo pipol. Olsem example, evri week iumi garem midol week meeting wea trainim iumi. Datfala meeting helpem iumi for savve wanem for talem taem iumi preach and duim olketa return visit. And tu, hem teachim iumi hao for duim Bible study. Organization blo Jehovah provaedem tu olketa tul lo datfala Teaching Toolbox. Olketa tul hia savve helpem iumi for . . .

  •   startim story,

  • pullim interest,

  • muvim pipol for laek lane,

  • teachim truth lo olketa Bible study, and

  • invaetem olketa wea interest for go luk lo website blo iumi and for kam lo Kingdom Hall.

Hem tru, hem no inaf for garem nomoa olketa tul hia. Iumi mas iusim. * Olsem example, bihaen iu story witim wanfala man wea interest and iu givim hem wanfala tract or magasin hem savve readim datwan and ting raonem go kasem taem wea iu bae go bak lo hem moa. Hem responsibility blo iumi wanwan for gohed busy for duim disfala kingdom preaching waka evri month.

11. Why nao olketa wakem datfala Online Bible Study Lessons?

11 Nara example lo hao Jehovah helpem pipol for lanem truth hem disfala Online Bible Study Lessons lo jw.org®. (Go lo BIBLE TEACHINGS > ONLINE LESSONS.) Why nao olketa wakem olketa leson hia? Bikos evri month, staka thousand pipol raonem world savve go lo Internet for lukaotem olketa Bible leson. Olketa leson lo website blo iumi savve helpem pipol for start for lane abaotem truth lo Bible. Samfala pipol wea iumi story witim maet hol bak for acceptim wanfala Bible study. Sapos olsem, iumi savve showim lo olketa disfala sekson lo website blo iumi or sendem olketa wanfala link blo olketa leson hia. *

12. Wanem nao man savve lanem lo datfala Online Bible Study Lessons?

12 Datfala Online Bible Study Lessons hem storyim olketa subject olsem: “The Bible and Its Author,” “The Bible’s Main Characters,” and “The Bible’s Message of Hope.” Olketa subject hia storyim:

  • Hao Bible savve helpem man

  • Hu nao Jehovah, Jesus, and olketa angel

  • Why God creatim olketa man

  • Why nao wei for safa and olketa nogud samting hem stap

Olketa leson hia storyim tu hao Jehovah bae . . .

  • finisim wei for safa and dae,

  • mekem olketa wea dae for laef bak, and

  • finisim evri gavman blo man wea fail and changem witim Kingdom blo God.

13. Waswe, datfala online leson hem changem datfala Bible study arrangement? Explainim.

13 Datfala online leson hem no changem datfala Bible study arrangement. Jesus givim iumi privilege for teachim pipol for kamap disaepol. Iumi hope olketa wea interest bae go lo olketa online leson, tinghae lo wanem olketa lanem, and laek for savve moa abaotem datwan. Sapos olsem, maet olketa bae acceptim wanfala Bible study. Lo end blo each leson, man wea read savve submitim wanfala request for wanfala instructor for studyim Bible witim hem. Evriday, thru lo website blo iumi, samting olsem 230 pipol from evriwea lo world ask for wanfala Bible study. Disfala wei for studyim Bible witim man wanwan hem barava important!

GOHED TRAEM BEST FOR TEACHIM PIPOL FOR KAMAP DISAEPOL

14. Olsem wanem Jesus talem lo Matthew 28:19, 20, wanem nao iumi traem best for duim, and why nao olsem?

14 Readim Matthew 28:19, 20. Taem iumi conductim Bible study, iumi mas traem best for ‘teachim pipol for kamap disaepol and teachim olketa for followim evri samting wea  Jesus laekem olketa for duim.’ Iumi need for helpem pipol for luksavve hem barava important for olketa sapotim Jehovah and Kingdom blo hem. Diswan minim iumi mas trae for helpem pipol for followim wanem olketa lanem, dedicatem laef blo olketa lo Jehovah, and baptaes. Datwan nomoa bae mekem olketa sev lo day blo Jehovah.—1 Pet. 3:21.

15. Wanem nao iumi no garem taem for hem, and why nao olsem?

15 Olsem iumi storyim finis, from distaem go kasem end blo disfala world, lelebet taem nomoa stap. So iumi no garem inaf taem for gohed studyim Bible witim pipol wea no changem laef blo olketa for kamap disaepol blo Christ. (1 Cor. 9:26) Iumi mas hariap for duim waka hia! Staka pipol stap yet wea need for herem disfala Kingdom message bifor hem leit.

STAP KLIA FROM EVRI FALSE RELIGION

16. Olsem Revelation 18:2, 4, 5, 8 storyim, wanem nao iumi evriwan mas duim? (Lukim footnote tu.)

16 Readim Revelation 18:2, 4, 5, 8Olketa verse hia storyim nara samting wea Jehovah expectim olketa wea worshipim hem for duim. Evri tru Christian mas showimaot klia hao olketa barava difren from Bigfala Babylon. Bifor wanfala Bible student hem lane abaotem truth, maet hem member blo wanfala false religion. Maet hem savve go lo olketa service blo olketa and join insaed olketa samting wea church duim. Or maet hem givim olketa contribution for datfala religion. So bifor datfala Bible student fit for kamap anbaptaes pablisa hem mas barava lusim false religion. Hem shud raetem wanfala leta or duim samting for showimaot klia hao hem finis for member lo datfala church or eni organization wea join witim Bigfala Babylon. *

17. Wanem kaen waka for selen nao wanfala Christian mas no duim, and why nao olsem?

17 Wanfala tru Christian mas mek sure waka wea hem duim for selen mas no join witim Bigfala Babylon. (2 Cor. 6:14-17) Olsem example, wanfala tru Christian bae no kamap wakaman blo eni church. And tu, sapos wanfala Christian waka for wanfala company, bae hem no laek for duim eni big waka lo wanfala building wea mekhae lo false worship. And sapos hem ownim wanfala bisnis, hem bae no apply for eni waka or tekem kontrak for duim waka lo eni samting wea join witim Bigfala Babylon. Why nao iumi mas strong lo diswan? Bikos iumi no laek for join insaed eni waka and sin blo olketa  organization hia wea barava no klin lo eye blo God.—Aesaea 52:11. *

18. Hao nao wanfala brata strong for followim Bible principle saed lo waka blo hem for selen?

18 Samfala year bifor, wanfala man wea garem kontrak for duim waka lo wanfala church askem wanfala elder wea ownim bisnis blo hemseleva for duim wanfala smol waka for datfala church lo taon wea hem stap. Datfala man savve hao brata hia evritaem sei hem bae no savve waka lo olketa church. Bat lo datfala taem, man hia barava needim samwan for duim datfala waka. Nomata olsem, datfala brata strong for followim Bible principle and no acceptim datfala waka. Lo week bihaen, niuspepa lo datfala ples garem piksa blo nara carpenter wea putim ap cross lo datfala church. Sapos brata blo iumi hem no strong for followim Bible principle, piksa blo hem nao bae stap lo datfala niuspepa. Tingim hao datwan bae affectim olketa nara brata. And tu, datwan bae mekem Jehovah no hapi.

WANEM NAO IUMI LANEM FINIS?

19-20. (a) Wanem nao iumi lanem finis? (b) Wanem moa bae iumi lanem?

19 Bible sei next important profesi wea bae fulfill, hem nao taem olketa nation talemaot datfala ‘peace and security.’ Iumi hapi hao samting wea Jehovah teachim iumi, helpem iumi for luksavve nomata wanem olketa nation duim, hard for olketa mekem tru peace kamap. Wanem nao iumi shud duim bifor olketa talemaot ‘peace and security’ and taem wea seknomoa evri samting bae finis? Jehovah expectim iumi for gohed busy for preachim Kingdom message and for traem best for teachim pipol for kamap disaepol. Lo semtaem, iumi need for barava stap separate from evri false religion. Diswan minim for no member blo eni false religion and stap klia lo wei for duim eni waka for Bigfala Babylon.

20 Olketa nara samting moa bae kamap lo last part blo “olketa last day.” And Jehovah expectim iumi for duim samfala samting tu. Wanem nao olketa samting hia, and hao nao iumi savve redyim iumiseleva for evri samting wea klosap kamap lo future? Bae iumi storyim lo next study.

SONG 71 Iumi Army Bilong Jehovah!

^ par. 5 Iumi expectim hao klosap nao bae iumi herem olketa nation sei olketa kasem nao ‘peace and security!’ Datwan nao saen wea bae showimaot bigfala trabol hem redi for start. From distaem go kasem datfala taem, wanem nao Jehovah expectim iumi for duim? Disfala study bae helpem iumi for savve lo ansa.

^ par. 3 Olsem example, lo website blo United Nation olketa sei olketa duim samting for mekem “evri kantri lo world gohed garem peace and security.”

^ par. 10 For savve hao for iusim olketa samting wea stap lo Teaching Toolbox, lukim article “Teachim Truth Long Pipol” lo Wastaoa, blo October 2018.

^ par. 11 Distaem olketa leson hia stap lo English and Portuguese, bat bae olketa wakem staka languis moa bihaen.

^ par. 16 Iumi need for stap klia lo olketa kaen organization olsem olketa youth camp or olketa recreation center wea join witim false religion. Olsem example, bae iumi no member lo olketa grup olsem YMCA (Young Men’s Christian Association), for savve moa abaotem datwan lukim “Questions From Readers” lo The Watchtower blo January 1, 1979. Datwan hem semsem tu witim olketa kaen grup olsem YWCA (Young Women’s Christian Association). Nomata olketa grup hia maet sei olketa no duim samting saed lo religion, bat really olketa hia olketa organization wea mekhae lo olketa idea and goal blo religion.

^ par. 17 For savve moa wanem Bible talem abaotem wei for duim waka wea join witim religion, lukim “Kwestin From Reader” lo Wastaoa blo April 15, 1999.

^ par. 83 PIKSA: Olketa kastoma lo wanfala coffee shop lukluk lo “Breaking Nius” lo TV wea talemaot ‘peace and security.’ Wanfala Witness couple, rest lelebet lo datfala coffee shop bihaen preaching, tufala no trustim datfala report.