Skip to content

Skip to table of contents

“Baem Truth and No Salem”

“Baem Truth and No Salem”

“Baem truth and no salem, and tu wisdom, discipline, and wei for minim samting.”—PROV. 23:23; NW.

SONG: 94, 96

1, 2. (a) Wanem nao barava important samting long laef bilong iumi? (b) Olketa wanem truth nao iumi tinghae long hem, and why nao olsem? (Lukim olketa piksa long start bilong study.)

WANEM nao barava important samting long laef bilong iu? From iumi pipol bilong Jehovah barava important samting nao hem wei wea iumi fren witim hem. Iumi bae no exchangem datwan for eni samting. And tu, iumi tinghae long truth insaed Bible bikos datwan helpem iumi for fren witim Jehovah.—Col. 1:9, 10.

2 Jehovah nao Barava Nambawan Teacher wea teachim iumi staka nambawan truth insaed Bible. Hem teachim iumi why hem important for savve long nem bilong hem, and olketa nambawan wei bilong hem. Hem showimaot hem lovem iumi tumas dastawe hem givim Son bilong hem for dae for iumi. Jehovah teachim iumi tu abaotem Kingdom bilong hem wea Christ rulim. Jehovah givim nambawan hope for future for olketa anointed Christian wea bae go long heven, and “olketa nara sheepsheep” wea garem hope for stap long Paradaes earth. (John 10:16) Hem teachim iumi hao for garem olketa gudfala  wei. Iumi tinghae long olketa truth hia bikos olketa helpem iumi for fren gud witim Creator bilong iumi, and mekem iumi hapi and satisfae.

3. Waswe, Jehovah askem selen from iumi for baem truth?

3 Jehovah hem God wea kaen tumas dastawe hem givim Son bilong hem for dae for iumi. Taem Jehovah lukim samwan lukaotem truth, hem helpem datfala man for kasem datwan. No enitaem hem askem selen from iumi for baem truth. Wantaem, wanfala man wea nem bilong hem Simon laek givim selen long aposol Peter mekem hem savve kasem paoa for givim holy spirit long olketa narawan. Peter tok strong long hem and sei: “Iu witim selen bilong iu bae finis, bikos iu tingse iu savve peim disfala present wea God givim free nomoa.” (Acts 8:18-20) So, wanem nao hem minim for “baem” truth?

WANEM NAO HEM MINIM FOR “BAEM” TRUTH?

4. Long disfala study, wanem nao bae iumi lanem abaotem truth?

4 Long Proverbs 23:23, NW hem sei: “Baem truth and no salem, and tu wisdom, discipline, and wei for minim samting.” Iumi mas waka hard for lanem truth insaed Bible. Taem olsem, iumi bae let go long samfala samting for lanem truth. And bihaen iumi “baem truth” wea minim iumi lanem truth, iumi mas careful for no “salem” wea minim iumi mas no lusim truth. Hao nao iumi savve “baem” truth? Wanem nao samfala samting iumi mas lusim for kasem datfala truth? Ansa bilong olketa kwestin hia bae helpem iumi for barava tinghae long truth, and for disaed strong for no lusim truth. Taem olsem, iumi bae minim gud why truth hem barava important winim eni nara samting.

5, 6. (a) Why nao iumi no needim selen for baem truth? Explainim kam. (b) Wanem gud samting nao iumi kasem from iumi lanem truth?

5 Wei wea wanfala samting hem free no minim man bae no waka hard for kasem datwan. Hebrew toktok for “baem,” wea Proverbs 23:23 iusim savve minim tu wei for “kasem” samting. Tufala toktok hia showimaot man mas duim samting, or let go long samfala samting mekem hem kasem wanem hem barava important. For helpem iumi minim hao iumi savve baem truth, tingim sapos, olketa long wanfala market givim free olketa banana. Waswe, olketa banana hia bae seknomoa kasem haos bilong iumi? Nomoa. Iumi nao mas go long market and tekem kam long haos. So nomata olketa banana hia free, bat iumi nao mas duim samting for go tekem. Long sem wei, iumi no needim selen for lanem truth, bat iumi mas waka hard and sakrifaesim samfala samting for lanem truth.

6 Readim Aesaea 55:1-3. Long disfala scripture, Jehovah helpem iumi for savve wanem hem minim for “baem truth.” Jehovah sei toktok bilong hem olsem wata, milk, and wine. Long sem wei wea man wea laek for drink hem feel gud taem hem drinkim wata, truth savve mekem iumi hapi and feel gud. Olsem tu, wei wea milk mekem pikinini for strong, truth insaed Bible savve strongim wei wea iumi fren witim Jehovah. Jehovah sei toktok bilong hem olsem wine. Long wanem wei? Bible sei wine savve mekem pipol hapi. (Sams 104:14, 15) So really, taem Jehovah sei for baem wine hem story abaotem hao taem iumi obeyim olketa toktok bilong hem, iumi savve hapi. (Sams 19:8) Wei wea Jehovah comparem olketa samting hia witim toktok bilong hem, hem helpem iumi for minim gud samting wea iumi savve kasem taem iumi followim wanem iumi lanem long Bible. Distaem bae iumi  storyim faevfala samting wea maet iumi lusim mekem iumi savve “baem truth.”

WANEM NAO IU LUSIM MEKEM IU BAEM TRUTH?

7, 8. (a) Why nao man mas spendem staka taem for baem truth? (b) Olketa wanem sakrifaes nao wanfala student mekem, and wanem nao kamaot from datwan?

7 Taem. Iumi needim taem for herem message abaotem Kingdom, readim Bible and olketa Bible pablikeson, studyim Bible witim Olketa Jehovah’s Witness, prepare for olketa meeting, and for go long olketa meeting. For duim olketa samting hia, iumi mas let go long olketa samting wea no important and iusim gud taem bilong iumi. (Readim Ephesus 5:15, 16.) Hao long nao iumi savve study bifor iumi lanem olketa main truth long Bible? Hao evriwan lane hem no semsem. Bat, wei for lane abaotem wisdom bilong Jehovah, olketa wei bilong hem, and olketa samting wea hem duim, bae gohed for olowe. (Rome 11:33) Firstfala Watch Tower magasin, hem storyim truth olsem “wanfala smol flaoa” and hem sei: “No satisfae for garem wanfala flaoa nomoa. Sapos wanfala flaoa hem inaf, no eni nara flaoa moa bae stap. Gohed faendem staka flaoa moa.” So iumi savve ting raonem disfala kwestin, ‘Waswe, mi savve long staka samting abaotem Jehovah?’ Nomata sapos iumi laef for olowe, iumi bae gohed lanem staka samting abaotem Jehovah. Bat distaem, hem barava important for iumi iusim gud taem bilong iumi mekem iumi lanem staka samting wea iumi fit for lanem abaotem hem. Tingim example bilong samwan wea duim olsem.

8 Mariko, * wanfala young gele long Japan go stap long New York City long U.S.A., for attendim wanfala skul. Wantaem, wanfala pioneer sista meetim hem long haos tu haos. Mariko joinim finis wanfala religion long Japan wea start long 1959, bat hem laek for studyim Bible witim datfala sista. Hem laekem tumas samting wea hem lanem, so hem askem datfala sista for tufala savve study tufala taem insaed long week. Nomata Mariko busy long skul and hem garem part-taem waka, hem stretawe attendim olketa kongregeson meeting. And tu, hem no spendem tumas taem witim olketa fren bilong hem and for duim hapitaem, mekem hem garem taem for lane abaotem truth. Taem Mariko duim olsem, hem fren gud witim Jehovah, and insaed sem year hem baptaes. Sixfala month bihaen, long 2006, hem kamap pioneer, and hem gohed pioneer kam kasem distaem.

9, 10. (a) Taem iumi lanem truth, hao nao datwan changem tingting bilong iumi abaotem olketa material samting? (b) Wanem nao wanfala gele mas lusim, and hao nao hem ting long datwan?

9 Olketa material samting. For iumi lanem truth, maet iumi need for let go long waka wea mekem iumi garem big selen. Olsem example, Peter and Andrew tufala man for fishing, bat taem Jesus invaetem tufala for kamap disaepol bilong hem, tufala lusim nao datfala fishing bisnis. (Matt. 4:18-20) Diswan no minim taem iu lanem truth, iu mas lusim nao waka bilong iu for selen. Man need for waka mekem hem lukaftarem famili bilong hem. (1 Tim. 5:8) Bat taem iu lanem truth, staka taem hao iu ting long olketa material samting hem change and iu luksavve wanem hem barava important long laef. Jesus sei: “Iufala mas no hipimap riches long earth.” Bat hem sei: “Hipimap riches long heven.” (Matt. 6:19, 20) Hem nao samting wea Maria duim.

10 Maria laekem tumas for pleim golf taem hem smol gele. Taem hem long hae skul hem barava savve gud hao for pleim golf, gogo hem kasem scholarship for go long university. Maria laek for savve tumas hao for plei  golf and for kasem selen from datwan. Then gogo, hem start for studyim Bible. From hem tinghae tumas long wanem hem lanem, hem start for followim datwan. Hem sei: “Taem mi changem wei and tingting bilong mi followim olketa standard insaed Bible, datwan mekem mi barava hapi.” Maria luksavve, hard for hem fren gud witim Jehovah and long semtaem busy for kasem staka selen. (Matt. 6:24) So hem disaed for let go long wei for plei golf and duim samting wea important winim datwan. Distaem, Maria pioneer and hem sei: “Mi barava hapi and satisfae.”

11. Taem iumi lanem truth, hao nao datwan affectim wei wea iumi fren witim olketa relative and fren?

11 Olketa fren and relative. Taem iumi start for followim wanem iumi lanem insaed Bible, wei wea iumi fren witim olketa narawan and olketa relative savve change. Jesus helpem iumi for savve why nao olsem, taem hem prea olsem abaotem olketa disaepol bilong hem, “Iusim toktok bilong iu wea tru for mekem olketa holy.” (John 17:17) For “mekem olketa holy” savve minim for olketa mas kamap difren. Taem iumi start for followim truth, datwan mekem iumi difren from pipol long world, bikos iumi followim olketa standard long Bible. So nomata iumi laek for stap gud witim olketa fren and relative, maet samfala long olketa no interest long iumi olsem bifor. Olketa maet againstim tu wanem iumi bilivim. Iumi no sapraes long datwan. Jesus sei: “Bae enemy bilong man nao olketa wea stap long sem haos witim hem.” (Matt. 10:36) Bat Jesus promisim tu sapos iumi let go long samfala samting for lanem truth, iumi bae kasem staka samting moa winim wanem iumi lusim!—Readim Mark 10:28-30.

12. Wanem nao wanfala Jew lusim mekem hem lanem truth?

12 Aaron, hem wanfala Jew. Taem hem smol yet, hem bilivim hem no stret for talem nem bilong God. Bat hem barava laek for savve long truth abaotem God. Then wantaem, wanfala Witness showim hem sapos hem addim olketa vowel long fofala Hebrew consonant long nem bilong God, hem savve kolem datfala nem “Jehovah.” Aaron barava hapi tumas taem hem lanem olketa samting hia, so hem go long sinagog and talem long olketa rabbi! Aaron tingse bae olketa hapi for lanem truth abaotem nem bilong God, bat olketa nating hapi nomoa. Olketa spit long hem and raosem hem. Famili bilong hem tu againstim hem. Bat hem no letem olketa samting hia for stopem hem for gohed lane abaotem Jehovah. Aaron kamap wanfala Jehovah’s Witness and faithful for worshipim Jehovah for full laef bilong hem. So iumi tu expectim hao taem iumi lanem truth, wei wea iumi fren witim olketa relative and fren maet change.

13, 14. Hao nao iumi changem tingting and wei bilong iumi taem iumi lanem truth? Storyim example.

13 Tingting and fasin wea no klin. Taem iumi lanem truth and start for followim olketa standard insaed Bible, iumi mas willing for changem tingting and wei bilong iumi. Aposol Peter sei: “From iufala olketa pikinini wea obey, no followim olketa old wei wea iufala garem taem iufala no savve long God. Bat iufala mas holy long evri samting wea iufala duim.” (1 Pet. 1:14, 15) Long taon bilong Corinth bifor, staka pipol savve duim olketa nogud samting. Olketa pipol wea stap long there need for mekem samfala big change mekem olketa kamap klin long eye bilong Jehovah. (1 Cor. 6:9-11) Distaem tu, staka wea lanem truth duim sem samting. Peter explainim diswan taem hem sei: “Long bifor iufala gohed for duim olketa samting wea pipol long world duim. Iufala nating shame for duim rong samting. Iufala no kontrolem feeling for barava laek duim nogud samting  and iufala ova tumas for drink. Iufala join insaed olketa wild party, drunk olowe, and join insaed olketa rabis samting wea pipol duim for worshipim idol.”—1 Pet. 4:3.

14 For staka year, Devynn and Jasmine savve drunk olowe. Nomata Devynn hem accountant, hem change waka olowe bikos hem savve drunk. Jasmine hem woman for kros and raf tumas. Wanday, taem Jasmine drunk hem meetim tufala Witness missionary long saed road. Tufala Witness hia mekem arrangement for kam long haos bilong hem long week bihaen for studyim Bible. Bat taem tufala kasem haos bilong Jasmine and Devynn, tufala hia drunk. Tufala tingse olketa missionary hia bae no kam long haos for lukim tufala. Bat narataem tufala missionary hia kam, Jasmine and Devynn weitim tufala nao. Tufala barava laek for lanem truth insaed Bible, and tufala no delay for followim wanem tufala lanem. Insaed thrifala month nomoa, tufala stop for drunk and bihaen datwan, tufala stretem marit bilong tufala. Staka pipol long vilij bilong olketa luksavve Jasmine and Devynn changem laef bilong tufala, and datwan mekem olketa tu laek for studyim Bible.

15. Wanem nao wanfala long olketa barava hard samting for lusim taem iumi lanem truth, and why nao olsem?

15 Olketa kastom and olketa samting wea God heitim. For samfala pipol hem isi nomoa for lusim olketa kastom and samting wea Jehovah heitim. Bat olketa narawan faendem hem no isi for duim olsem. Olketa wari abaotem hao olketa famili, wakfren, or fren bae ting long olketa. Olketa luksavve samfala pipol garem strong tingting abaotem samfala kastom, olsem wei for mekhae long relative wea dae finis. (Diutronomi 14:1) So wanem nao savve helpem iumi for change? Iumi savve lane from gudfala example bilong olketa bifor wea changem samfala samting taem olketa lanem truth, olsem olketa firstfala Christian long Ephesus.

16. Wanem nao samfala long Ephesus mas lusim?

16 Long taon bilong Ephesus bifor, staka pipol savve duim magic. Taem olketa pipol hia kamap Christian, wanem nao olketa duim? Bible sei: “Staka wea duim magic tekem kam olketa buk bilong olketa and bonem front long evriwan. Taem olketa addim kost bilong evri buk hia hem kasem 50,000 silver coin. [So] message bilong Jehovah hem go kasem staka nara ples moa and plande pipol nao bilivim datwan.” (Acts 19:19, 20) Olketa faithful Christian hia willing for distroem olketa expensive buk bilong olketa and Jehovah blessim olketa.

17. (a) Wanem nao samfala samting wea maet iumi need for lusim for baem truth? (b) Olketa wanem kwestin nao bae iumi storyim long next study?

17 Wanem nao iu lusim mekem iu baem truth? Iumi evriwan spendem taem bilong iumi for lanem truth. Samfala long iumi mas lusim chance wea iumi garem for kasem staka material samting. And tu, wei wea iumi fren witim olketa narawan hem change. Staka long iumi changem tu wei and tingting bilong iumi mekem iumi followim wanem iumi lanem. Iumi lusim tu olketa kastom and olketa samting wea Jehovah heitim. Iumi sure truth wea stap insaed Bible hem barava important winim eni samting wea iumi sakrifaesim. Olketa truth wea iumi lanem insaed Bible helpem iumi for fren gud witim Jehovah, wea datwan nao hem barava important long laef bilong iumi. Taem iumi tingim evri blessing wea iumi kasem from iumi baem truth, hem hard for iumi minim why nao samfala laek for “salem” truth. Why nao samting olsem savve happen? And hao nao bae iumi mek sure iumi no lusim truth, wea datwan hem serious samting? Bae iumi ansarem olketa kwestin hia long next study.

^ par. 8 Long disfala article, mifala changem samfala nem.