Skip to content

Skip to table of contents

 STUDY ARTICLE 22

Savve Gud Hao for Study!

Savve Gud Hao for Study!

“Luksavve long olketa samting wea barava important.”—PHIL. 1:10.

SONG 35 “Luksavve Long Olketa Samting wea Important”

WANEM IUMI BAE STORYIM *

1. Why nao maet hem no isi for samfala laek duim study seleva?

DISTAEM, staka pipol mas waka hard for kasem selen wea olketa needim. Staka long olketa brata and sista bilong iumi mas waka for staka hour mekem olketa kasem inaf selen for lukaftarem famili saed long kaikai, kaleko, and ples for stap. Staka narawan mas iusim staka hour for travel evriday for go and kam bak from waka. Staka mas duim olketa hevi waka. Kasem evening, olketa brata and sista bilong iumi taed nao. So long taem olsem, man bae no feel laek for duim study seleva.

2. Wanem taem nao iu faendem hem isi for study?

2 Bat nomata olsem, iumi mas mek sure iumi garem taem for study, wea minim for barava studyim gud Bible and olketa nara pablikeson. Diswan barava important bikos wei wea iumi fren witim Jehovah and for iumi kasem laef olowe hem depend long datwan! (1 Tim. 4:15) Samfala mas wekap early long morning and duim study taem haos hem kwaet and mind hem fresh. Olketa narawan markem taem wea kwaet long end long day for study and ting raonem Bible and olketa pablikeson bilong iumi.

3-4. Wanem nao olketa change wea kamap saed long haomas information organization provaedem, and why nao olsem?

3 Iumi evriwan luksavve hem important for markem taem for study. Bat wanem nao iumi bae studyim? Maet iumi ting olsem, ‘Iumi garem staka samting tumas for readim, so hard for mi studyim evri samting.’ Samfala olketa readim evri pablikeson and lukluk long evri video wea iumi kasem, nomata olsem staka faendem hem no isi. Governing Body luksavve long diswan, dastawe olketa disaed for katem daon namba bilong olketa pablikeson wea olketa printim and wea stap long website bilong iumi.

4 Olsem example, distaem iumi no printim Yearbook of Jehovah’s Witnesses, bikos iumi garem staka naesfala experience long jw.org® and long olketa program long JW Broadcasting® wea kamap evri month. Distaem, datfala Wastaoa and Wekap! magasin  for pablik hem kamap thrifala taem insaed wanfala year nomoa. Olketa change hia no kamap for mekem iumi garem taem for duim olketa nara samting wea no part long worship, bat hem for helpem iumi for garem taem for duim “olketa samting wea barava important.” (Phil. 1:10) Distaem iumi bae storyim hao for markem wanem hem important for studyim and wanem iu savve duim mekem iu kasem gud samting from wei for duim study seleva.

MARKEM WANEM HEM IMPORTANT FOR STUDYIM

5-6. Wanem nao iumi laek for mek sure iumi studyim gud?

5 Wanem nao main samting wea iumi shud studyim? Hem important for spendem taem evriday for studyim Bible. Long schedule bilong kongregeson for olketa meeting, olketa katem daon haomas chapter long Bible for man readim long datfala week. Diswan hem for mekem hem isi for iumi garem moa taem for readim and ting raonem olketa verse and duim extra research. Hem no goal bilong iumi for readim nomoa olketa verse wea stap long schedule bilong datfala week, bat iumi laekem message wea stap long Bible for kasem heart bilong iumi and for mekem iumi kamap moa klos long Jehovah.—Sams 19:14.

6 Wanem nao olketa nara pablikeson wea iumi shud studyim? Iumi laek for prepare for Wastaoa Study and Kongregeson Bible Study, and tu, olketa nara information for meeting long midol week. Iumi shud readim tu olketa pablik Wastaoa and Wekap! magasin.

7. Waswe, iumi shud feel wikdaon sapos iumi no fit for readim and lukim evri information wea stap long website bilong iumi and long JW Broadcasting?

7 Maet iu sei olsem, ‘Hem gud, bat waswe long staka nara samting wea stap long website bilong iumi jw.org, and JW Broadcasting? Staka information nao stap long there!’ Tingim disfala example: Maet iu go long wanfala market wea garem staka naes kaikai, bat hard for iu peim evri kaen kaikai wea stap, so bae iu peim nomoa olketa kaikai wea iu chusim. Long sem wei, sapos hem hard for iu readim or lukim evri samting long website bilong iumi, no feel wikdaon. Duim nomoa wanem iu fit duim. Distaem bae iumi story raonem hao for study and hao for kasem gud samting from datwan.

STUDY MINIM MAN MAS WAKA HARD

8. Hao nao iumi savve prepare for Wastaoa Study, and wanem gud samting nao iumi savve kasem from datwan?

8 Wei for study hem minim iu read and trae for lanem samting from datfala information. Hem no minim wei for readim kwiktaem nomoa information and andalaenem ansa. Olsem example, taem iumi prepare for Wastaoa Study, ting raonem toktok wea stap anda long heding, “Wanem Iumi Bae Storyim” wea stap long start bilong study. Then lukluk long title bilong datfala article, olketa subheding, and olketa review kwestin. Then isisi readim gud full article. Lukluk gud long main sentence bilong wanfala paragraf, samfala taem disfala main sentence hem stap long start bilong paragraf. Waka bilong disfala main sentence hem for helpem iu minim wanem nao disfala paragraf bae storyim. Taem iu gohed readim olketa paragraf, ting raonem hao nao each paragraf join witim subheding and join witim main idea bilong datfala full study. Raetem daon eni point or toktok wea iu laek for savve moa abaotem and duim research long hem.

9. (a) Why nao iumi shud barava lukluk gud long olketa Scripture taem iumi studyim Wastaoa, and hao nao iumi savve duim datwan? (b) Olsem Josua 1:8 storyim, wanem moa iumi shud duim taem iumi readim scripture?

9 Wastaoa Study long kongregeson hem wanfala meeting wea helpem iumi for studyim Bible. So lukluk gud long olketa scripture, especially olketa wea bae iumi readim long taem  bilong meeting. Ting raonem hao olketa toktok insaed olketa verse wea sapotim wanem paragraf storyim. And tu, spendem taem for ting raonem olketa scripture wea iu readim and ting raonem hao nao iu savve followim datwan.—Readim Josua 1:8.

Parents, teachim pikinini bilong iu hao for study (paragraf 10 storyim diswan) *

10. Olsem wanem iumi lanem long Hebrew 5:14, why nao olketa parents shud iusim taem for famili worship for lanem pikinini long hao for duim study and for duim research?

10 Hem tru, olketa parents laekem olketa pikinini for enjoyim Famili Worship each week. Nomata parents shud evritaem plan for duim samting for famili worship bilong olketa, olketa mas no feel olsem olketa mas evritaem mekem spesol project. Samfala taem olketa savve lukluk long olketa program long JW Broadcasting for Famili Worship or garem olketa spesol project olsem for wakem wanfala smol ark bilong Noah, bat olketa need for tingim hao hem barava important for lanem olketa pikinini for savve hao for study. Olketa pikinini need for lane hao for prepare for olketa meeting and hao for duim research abaotem wanfala problem or kwestin wea kamap long skul. (Readim Hebrew 5:14.) Sapos famili spendem taem for study long haos, datwan bae helpem olketa pikinini for interest long olketa information wea kamap long olketa meeting, assembly, and olketa convention, nomata sapos olketa program hia no garem olketa video. Parents need for luksavve hao long nao study bae gohed each taem bikos datwan hem depend long age and wei bilong pikinini.

11. Why nao hem important for teachim olketa Bible student hao for olketa seleva duim deep study?

11 Olketa Bible student bilong iumi need for lane hao for study. Taem olketa just start for study, iumi savve hapi for lukim taem olketa andalaenem olketa ansa for study bilong olketa and for olketa meeting. Bat iumi mas teachim olketa for savve hao for duim research and hao for olketa seleva duim deep study. Taem iumi duim olsem, nomata sapos eni problem kamap olketa bae no need for go askem moa olketa narawan long kongregeson for helpem olketa long wanem olketa shud duim, bat olketa bae savve finis hao for kasem ansa for problem bilong olketa bikos olketa savve hao for duim research long olketa pablikeson bilong iumi.

GAREM GOAL TAEM IU STUDY

12. Wanem nao olketa goal bilong iumi taem iumi study?

12 Sapos iu no man for study, maet iu tingse hem hard for iu enjoyim wei for study. Bat bae iu savve enjoyim. Taem iu start lane hao for study, no study for longfala taem tumas, bat evritaem iu study, isisi spendem moa taem long  study bilong iu. Markem goal taem iu study. Main goal nao hem for fren gud witim Jehovah. Maet nara goal wea hem isi for iumi kasem, hem nao for ansarem eni kwestin wea samwan askem or for duim research taem iumi mas deal witim wanfala problem.

13. (a) Storyim wanem nao wanfala young wan savve duim for explainim biliv bilong hem long skul. (b) Hao nao iu savve followim kaonsel wea stap long Colossae 4:6?

13 Tingim disfala example. Maet iu wanfala young wan wea iu go long skul. Maet olketa classmate bilong iu bilivim teaching abaotem evolution, wea sei olketa man kamap seleva nomoa. Maet iu laek for explainim wanem Bible teachim, bat iu feel olsem iu no fit. Datwan minim iu need for duim wanfala study project! Tufala reason stap for duim diswan: (1) Hem for iu strongim biliv bilong iu hao God creatim evri samting and (2) for helpem iu for savve gud hao for explainim truth wea stap long Bible. (Rome 1:20; 1 Pet. 3:15) Maet iu savve askem iuseleva, ‘Why nao olketa classmate bilong mi bilivim evolution?’ Then iu savve iusim olketa pablikeson bilong iumi for duim research for savve gud abaotem datwan. Taem olsem, bae iu lukim hao hem nating hard nomoa for explainim biliv bilong iu. Staka pipol bilivim evolution bikos samwan wea olketa tinghae long hem nao talem olketa hao evolution hem tru. So sapos iu faendem wan or tufala point for storyim, maet datwan bae ansarem kwestin bilong man wea laek for lanem truth.—Readim Colossae 4:6.

LAEK FOR LANEM MOA SAMTING

14-16. (a) Wanem nao iu savve duim for lanem moa samting abaotem olketa Bible buk wea iu no mas savve gud long hem? (b) Explainim hao nao iu savve iusim olketa scripture wea stap long paragraf for lanem moa samting abaotem buk bilong Amos. (Lukim tu box “ Mekem Bible Kamap Real Long Mind Bilong Iu!”)

14 Tingim sapos long schedule bilong iumi for kongregeson meeting, iumi lukim hao iumi bae story raonem wanfala long olketa Bible buk wea start long Hosea go kasem Malachi, wea olketa didifren profet raetem. Maet iumi no savve gud abaotem wanfala long olketa profet hia. First samting iumi bae duim, iumi laek for savve wanem nao datfala profet hem raetem. Hao nao iumi savve duim datwan?

15 First samting, askem iuseleva: ‘Wanem nao mi savve finis abaotem profet wea raetem disfala buk? Hu nao hem, wea nao hem stap, wanem waka nao hem duim?’ Taem iumi lanem olketa samting hia abaotem hem, datwan bae helpem iumi for minim why nao hem iusim olketa toktok and tokpiksa insaed long datfala buk. Taem iu readim Bible, lukluk for olketa toktok wea bae helpem iu for minim wanem kaen man nao datfala profet.

16 Next samting, hem gud for faendemaot wanem taem nao olketa raetem datfala buk. Iu savve chekim diswan long “Table of the Books of the Bible” wea stap long page 1662-1663 long New World Translation of the Holy Scriptures. Iu savve reviewim tu chart wea stap long Appendix A6 wea storyim olketa profet and olketa king. Sapos datfala Bible buk story abaotem olketa profesi, hem gud for lane abaotem laef bilong pipol wea stap long datfala taem. Wanem nogud wei nao olketa pipol hia garem wea datfala profet trae helpem olketa for stretem? Hu nao olketa narawan wea laef long sem taem witim datfala profet? For iu savve gud moa abaotem wanem hem happen long datfala taem, iu maet need for luk long olketa nara Bible buk tu. Olsem example, for savve long moa information abaotem wanem nao happen long taem wea profet Amos hem stap, hem gud for chekim olketa buk bilong 2 Kings and 2 Chronicles, wea stap long marginal reference bilong Amos 1:1 long New World Translation. And tu, iu savve lukluk long buk bilong Hosea bikos maet hem laef long sem taem witim  profet Amos. Sapos iu lukluk long olketa nara buk hia datwan bae helpem iu for luksavve long laef bilong pipol long datfala taem.—2 Ki. 14:25-28; 2 Chron. 26:1-15; Hos. 1:1-11; Amos 1:1.

INTEREST LONG OLKETA SISMOL INFORMATION

17-18. Iusim olketa example long paragraf or eni example bilong iuseleva for showimaot hao olketa sismol information long Bible savve helpem iumi enjoyim wei for study seleva.

17 Taem iumi readim Bible, hem gud for iumi garem feeling for laek faendemaot moa samting. Olsem example, maet iu readim disfala profesi long Zechariah chapter 12 wea profesi abaotem dae bilong Messiah. (Zech. 12:10, NW) Long verse 12, hem story abaotem, “famili bilong Nathan” wea barava sorre tumas and krae taem Messiah hem dae. Winim wei for just leavim nomoa datfala smol information, askem iuseleva: ‘Hao nao famili bilong Nathan hem join witim Messiah? Hao nao mi savve kasem moa information abaotem diswan?’ Duim samfala research moa. Olsem example, chekim marginal reference wea stap long Zechariah 12:12 long New World Translation of the Holy Scriptures. Hem garem tufala scripture long marginal reference. First wan, hem 2 Samuel 5:13, 14, wea storyim hao Nathan hem wanfala long olketa son bilong King David. Mek-tu marginal reference hem Luke 3:23, 31, wea showimaot Jesus hem from laen bilong Nathan bikos hem born long Mary. (Lukim datfala kwestin “Hu nao dadi bilong Joseph?” long pablik Wastaoa magasin, No. 3, 2016, p. 9) Datwan barava interesting! Olsem iu savve finis, Jesus kam from laen bilong David. (Matt. 22:42) Bat David garem winim 20-fala son. So hem barava interesting tumas for savve hao profesi bilong Zechariah barava talem stret hao famili bilong Nathan nao bae sorre tumas taem Jesus hem dae.

 18 Tingim nara example. Long Luke chapter wan, iumi readim hao angel Gabriel go visitim Mary and talem hem bae hem garem wanfala baby boy, and hem sei: “Hem bae kamap wanfala barava important man and olketa bae kolem hem Son bilong Barava Haefala God. Jehovah God bae mekem hem King olsem dadi bilong hem, David, and bae hem King ovarem pipol bilong Jacob for olowe.” (Luke 1:32, 33) Staka taem iumi tingim nomoa olketa first toktok bilong angel Gabriel abaotem Jesus wea sei hem “Son bilong Barava Haefala God.” Bat Gabriel talem tu hao Jesus bae kamap “King.” So iumi savve tingim, hao nao feeling bilong Mary taem hem herem datwan. Waswe, hem tingse toktok bilong Gabriel minim Jesus bae changem King Herod or bae hem kamap wanfala ruler long Israel? Sapos Jesus kamap king, Mary bae kamap wanfala important woman bikos hem mami bilong king and famili bilong hem bae stap long haos bilong king. Bat Bible no talem sapos Mary hem ask abaotem datwan long Gabriel, and tu, no enitaem iumi readim hao Mary hem ask for kasem eni position long Kingdom, olsem wanem tufala disaepol bilong Jesus duim. (Matt. 20:20-23) Disfala smol information hem helpem iumi for luksavve Mary hem barava hambol woman!

19-20. Olsem James 1:22-25 and 4:8 storyim, wanem nao goal bilong iumi taem iumi study?

19 Iumi mas tingim, main goal bilong iumi taem iumi studyim Bible and olketa pablikeson bilong iumi hem for fren gud witim Jehovah. And tu, taem iumi study, iumi laek for luksavve iumi wanem kaen man, and olketa wanem kaen wei nao iumi need for changem mekem God hapi long iumi. (Readim James 1:22-25; 4:8.) Long each taem wea iumi redi for study, iumi shud askem Jehovah for givim kam holy spirit bilong hem. Iumi shud askem hem for helpem iumi for kasem gud samting from wanem iumi studyim and for luksavve olketa wanem samting nao iumi shud changem.

20 Iumi evriwan laek for olsem disfala faithful man wea psalm storyim, hem sei: “Olketa pipol ya i hapi bikos olketa falom Lo blong [Jehovah], an oltaem olketa gohed fo ridim an tingting long hem evri de an evri naet. . .  evrisamting wea olketa pipol ya i gohed fo duim i kamap gudfala.”—Sams 1:2, 3.

SONG 88 Mekem Mi Savve Olketa Wei Bilong Iu

^ par. 5 Jehovah kaen tumas for givim iumi staka information for readim, lukluk long hem, and for studyim. Disfala study article bae helpem iu chusim wanem for studyim, and hem storyim olketa nara idea wea savve helpem iu for kasem staka gud samting from wei for duim study seleva.

^ par. 61 PIKSA: Parents showim olketa pikinini hao for prepare for Wastaoa Study evri week.

^ par. 63 PIKSA: Wanfala brata duim research abaotem Amos, man wea raetem wanfala buk long Bible. Olketa piksa long bihaen showimaot wanem nao disfala brata hem tingim taem hem readim and ting raonem datfala story long Bible.