Skip to content

Skip to table of contents

 STUDY ARTICLE 19

Showimaot Love and Justice Nomata Staka Nogud Samting Happen

Showimaot Love and Justice Nomata Staka Nogud Samting Happen

“God, yu no olsem olketa narakaen god wea i hapi long olketa ravis wei, an yu nating laek fo lukim eni nogud samting fo hemi stap wetem yu.”—SAMS 5:4.

SONG 142 Hol Strong Long Hope Bilong Iumi

WANEM IUMI BAE STORYIM *

1-3. (a) Olsem Sams 5:4-6 storyim, hao nao Jehovah feel abaotem wei for duim nogud samting? (b) Why nao iumi fit for sei child sexual abuse hem barava againstim “law bilong Christ”?

JEHOVAH GOD heitim evri wei for duim nogud samting. (Readim Sams 5:4-6.) Bat, hem barava heitim child sexual abuse, bikos datwan hem wanfala barava nogud sin! From iumi olketa Witness bilong Jehovah, iumi followim example bilong hem, so iumi tu barava heitim child sexual abuse and iumi no letem or acceptim datwan long kongregeson.—Rome 12:9; Heb. 12:15, 16.

2 Evri kaen wei for duim child sexual abuse hem barava againstim “law bilong Christ”! (Gal. 6:2) Why nao iumi sei olsem? Olsem iumi lanem long study bifor diswan, law bilong Christ nao hem evri samting wea Jesus teachim thru long toktok and wanem hem duim. Disfala law mekhae long justice and faondeson bilong hem nao love. From olketa tru Christian followim datfala law, hao olketa treatim pikinini bae mekem olketa feel sef and feel olsem samwan lovem olketa. Bat child sexual abuse hem selfish, hem barava no stret and mekem pikinini no feel sef and tingse no eniwan lovem hem.

3 Sorre samting nao, child sexual abuse hem bigfala problem wea kamap evriwea long world, and diswan affectim olketa tru Christian tu. Why nao olsem? Bikos “olketa nogud man and olketa man for laea” staka tumas distaem, and samfala maet trae for kamap part long kongregeson. (2 Tim. 3:13) And tu, samfala wea part long kongregeson bat wea no laek followim standard bilong Jehovah, no kontrolem feeling bilong olketa for laekem sex and gogo olketa abusim olketa pikinini. Distaem bae iumi storyim why child sexual abuse hem wanfala serious sin. Then bae iumi storyim wanem olketa elder savve duim taem samwan long kongregeson  duim wanfala serious sin, olsem wei for duim child abuse. And wanem olketa parents savve duim for protectim pikinini bilong olketa. *

CHILD SEXUAL ABUSE HEM WANFALA SERIOUS SIN

4-5. Hao nao child sexual abuse hem wanfala sin againstim victim?

4 Child abuse savve barava affectim pipol for longfala taem. Hem spoelem datfala victim and olketa wea lukaftarem hem, olsem olketa famili member and olketa brata and sista long kongregeson. Child abuse hem wanfala serious sin.

5 Hem wanfala sin againstim victim. * Wei for mekem narawan feel pain and safa hem wanfala sin. Long next study, bae iumi storyim hao man wea abusim pikinini hem barava spoelem datfala pikinini and mekem pikinini hia for safa. Datfala man spoelem hao datfala pikinini trustim hem and mekem pikinini for no feel sef. Iumi mas protectim olketa pikinini from disfala nogud samting, and olketa victim needim help and comfort.—1 Thess. 5:14.

6-7. Why nao child abuse hem wanfala sin againstim kongregeson and againstim law bilong gavman?

6 Hem wanfala sin againstim kongregeson. Taem samwan wea part long kongregeson hem duim child sexual abuse hem barava spoelem nem bilong kongregeson. (Matt. 5:16; 1 Pet. 2:12) Samting wea datfala man duim barava spoelem nem bilong staka faithful Christian wea ‘traem best for keepim biliv bilong olketa strong.’ (Jude 3) Iumi barava no acceptim or letem pipol wea duim nogud samting and wea no repent, for gohed stap insaed kongregeson and gohed spoelem gudfala nem bilong kongregeson.

7 Hem wanfala sin againstim law bilong gavman. Olketa Christian mas “stap anda long olketa wea rul.” (Rome 13:1) Iumi duim diswan, taem iumi respectim and obeyim law bilong kantri. Sapos samwan long kongregeson brekem law, olsem for duim child sexual abuse, datwan hem sin againstim gavman. (Comparem Acts 25:8.) Olketa elder no garem paoa for panisim eniwan wea brekem law bilong kantri, bat long semtaem sapos law bae deal witim man wea duim child abuse, olketa elder bae no protectim hem. (Rome 13:4) Man wea duim sin mas harvestim samting wea hem plantim.—Gal. 6:7.

8. Hao nao God ting long olketa sin wea samwan duim againstim narawan?

8 Hem wanfala sin againstim God. (Sams 51:4) Taem samwan sin againstim nara man, datwan minim hem sin againstim God tu. Tingim example wea stap long Law wea God givim long olketa Israelite. Law sei sapos man hem ravem or laea long narawan, datwan minim hem sin againstim Jehovah. (Levitikas 6:1-4a) So taem samwan wea part long kongregeson abusim wanfala pikinini, hem sin againstim Jehovah bikos hem ravem or laea long datfala pikinini. Pikinini hia trustim hem bat hem iusim datfala trust for spoelem datfala pikinini, from datwan pikinini hia no feel sef nao. Man wea abusim pikinini hia hem barava spoelem nem bilong Jehovah. Dastawe, iumi fit for sei wei for duim child sexual abuse hem wanfala serious sin againstim God and iumi barava heitim datwan.

9. For staka year finis, olketa wanem information from Bible nao organization bilong Jehovah givim, and why nao olsem?

9 For staka year finis, organization bilong Jehovah givim staka information from Bible abaotem subject bilong child sexual abuse. Olsem example, staka article long Wastaoa and Awake!  storyim hao nao samwan wea kasem sexual abuse savve deal witim olketa feeling wea kamap from samting wea happen. Olketa storyim tu hao olketa narawan savve helpem and encouragem olketa, and wanem olketa parents savve duim for protectim pikinini. Olketa elder tu kasem training wea kam from Bible long wanem for duim taem samwan hem duim child sexual abuse. Organization gohed reviewim hao olketa elder savve deal witim olketa case bilong child abuse. Why nao olsem? Diswan for mek sure olketa elder deal witim datwan followim law bilong Christ.

HAO OLKETA ELDER SAVVE DEAL WITIM OLKETA SERIOUS SIN

10-12. (a) Taem olketa elder mas deal witim wanfala serious sin, wanem nao olketa evritaem tingim, and wanem nao goal bilong olketa? (b) Olsem James 5:14, 15 hem talem, wanem nao olketa elder mas traem best for duim?

10 Taem olketa elder deal witim wanfala serious sin, olketa evritaem tingim hao law bilong Christ sei olketa mas treatim olketa sheepsheep witim love and duim samting wea stret and followim justice bilong God. So, taem olketa elder kasem report abaotem wanfala serious sin olketa need for ting raonem firstaem samfala samting. Main goal bilong olketa elder hem for mekhae long Jehovah and for protectim nem bilong hem. (Levitikas 22:31, 32; Matt. 6:9) Nara important goal, hem for tingim spiritual saed bilong olketa brata and sista long kongregeson and olketa laek for helpem eniwan wea victim bilong serious sin.

11 And tu, sapos man wea duim datfala serious sin hem wanfala wea part long kongregeson, olketa elder bae traem best for faendaot sapos hem repent. (Readim James 5:14, 15.) Taem wanfala Christian followim wanem hemseleva laekem and duim wanfala serious sin, datwan hem showimaot hem sik long spiritual wei and hem no fren gud nao witim Jehovah. * So olketa elder olsem doctor, olketa bae traem best for helpem ‘datfala man wea sik for kamap gud bak.’ Kaonsel wea olketa elder givim from Bible savve helpem hem for fren bak moa witim Jehovah, bat hem savve duim diswan only sapos hem barava repent.—Acts 3:19; 2 Cor. 2:5-10.

12 Tru nao, olketa elder garem barava serious responsibility. Olketa barava lovem olketa sheepsheep wea God givim responsibility long olketa for lukaftarem. (1 Pet. 5:1-3) Olketa laekem olketa brata and sista for feel sef. Bikos long datwan, olketa kwiktaem for duim samting taem olketa herem report abaotem samwan wea duim serious sin, olsem child sexual abuse. Wanem nao bae olketa elder duim? Lukim olketa kwestin wea stap long start long paragraf  13,  15, and  17.

13-14. Waswe, olketa elder followim law bilong gavman abaotem wei for reportim samwan wea olketa accusim long child abuse? Minim kam.

 13 Taem olketa elder kasem report abaotem samwan wea olketa accusim long child sexual abuse, waswe, olketa followim law bilong gavman abaotem wei for reportim datwan? Yes. Sapos wanfala kantri garem olketa law olsem, taem olketa elder kasem report abaotem samwan wea olketa accusim long child abuse olketa mas obeyim law for reportim datwan. (Rome 13:1) Olketa law olsem hem no againstim law bilong God. (Acts 5:28, 29) So taem samwan talem olketa elder hao hem ting samwan abusim wanfala pikinini, olketa elder kwiktaem contactim branch office for kasem instruction long hao for obeyim law bilong kantri for reportim datwan.

14 Taem olketa elder story witim victim and parents bilong hem, or samwan wea savve long wanem hem happen, olketa elder savve letem olketa savve sapos olketa laek for reportim datwan long police, olketa shud feel free for duim datwan. Bat hao sapos datfala report hem abaotem wanfala wea part long kongregeson and then olketa long community herem? Waswe, datfala brata or sista wea reportim datwan, hem shud  feel hem spoelem nem bilong Jehovah? Nomoa. Man wea duim child abuse nao spoelem nem bilong God.

15-16. (a) Olsem 1 Timothy 5:19 talem, why nao olketa elder mas garem tufala witness bifor olketa arrangem wanfala judicial komiti? (b) Wanem nao olketa elder savve duim taem olketa faendaot samwan accusim wanfala wea part long kongregeson hem duim child sexual abuse?

 15 Insaed kongregeson, why nao olketa elder mas garem tufala witness bifor olketa arrangem wanfala judicial komiti? Diswan followim haefala standard bilong Bible saed long justice. Sapos man wea sin no talemaot rong wea hem duim, olketa elder mas garem tufala witness bifor olketa savve arrangem wanfala judicial komiti. (Diutronomi 19:15; Matt. 18:16; readim 1 Timothy 5:19.) So sapos wanfala report kamap abaotem samwan wea duim child abuse, waswe, diswan minim olketa mas garem tufala witness bifor olketa savve reportim datwan long police? Nomoa. Olketa elder or olketa narawan no need for garem tufala witness bifor olketa reportim samting wea maet happen wea hem wanfala crime.

16 Taem olketa elder savve samwan accusim wanfala wea part long kongregeson hem duim child sexual abuse, olketa elder traem best for obeyim law bilong gavman long hao for reportim datwan, and then olketa bae trae for faendaot wanem nao really happen and olketa bae iusim Bible for luksavve sapos bae olketa arrangem judicial komiti. Sapos man wea olketa accusim hem denyim samting wea happen, olketa elder bae askem olketa wea witnessim datfala rong for storyim saed bilong olketa. Sapos tufala pipol nao lukim samting wea happen, olketa elder garem strong pruv for arrangem wanfala judicial komiti. Wanfala witness, maet hem datfala pikinini wea olketa abusim or samwan wea lukim datfala samting wea happen. * Mek-tu witness, maet hem nara pikinini wea datfala sem man hem abusim or hem samwan wea lukim datfala abuse or hem lukim datfala man abusim nara pikinini. Sapos man wea reportim datfala child sexual abuse hem no garem mek-tu witness, datwan no minim samting wea hem talem hem no tru. Nomata sapos olketa elder no garem mek-tu witness for pruvim wanem hem happen, olketa luksavve maet wanfala serious sin hem happen wea barava mekem olketa narawan safa. Olketa elder bae gohed for comfortim and sapotim olketa wea maet safa from samting wea happen. And for protectim kongregeson, olketa elder bae evritaem lukluk long datfala man wea olketa accusim nogud hem bae trae for duim moa child abuse long future.—Acts 20:28.

17-18. Explainim wanem nao waka bilong judicial komiti.

 17 Wanem nao waka bilong judicial komiti? Disfala toktok “judicial” no minim olketa elder bae judgem, or disaedem sapos datfala man wea duim child abuse hem fit for kasem panis from gavman or nomoa. Olketa elder bae letem pipol wea gavman markem for lukaftarem law bilong kantri for deal witim datwan, and olketa bae no duim eni samting for disturbim datwan. (Rome 13:2-4; Titus 3:1) Waka bilong olketa elder hem for judgem sapos datfala man hem fit for gohed stap insaed kongregeson or nomoa.

18 Taem olketa elder insaed wanfala judicial komiti, waka bilong olketa hem for deal witim olketa spiritual samting. Olketa iusim Bible for helpem olketa for disaed sapos datfala man repent or nomoa. Sapos hem no repent, olketa elder bae disfellowshipim hem, and announcem datwan long kongregeson. (1 Cor. 5:11-13) Bat sapos hem repent, hem savve gohed for stap insaed kongregeson. Nomata olsem, olketa elder bae talem hem hao hem maet no fit for kasem eni privilege or responsibility long kongregeson long future. From olketa elder tingim safety bilong olketa pikinini, olketa bae story seleva witim each parents insaed kongregeson for lukaftarem gud  olketa pikinini bilong olketa taem datfala man stap. Bat taem olketa elder story witim olketa parents, olketa mas careful for no storyim hu nao olketa victim.

HAO FOR PROTECTIM PIKININI BILONG IU

For parents protectim pikinini from Child Sexual Abuse, olketa need for storyim information abaotem sex wea fitim. For duim datwan, parents iusim information wea organization bilong Jehovah provaedem. (Lukim paragraf 19-22)

19-22. Wanem nao olketa parents savve duim for protectim pikinini bilong olketa? (Lukim piksa long kava.)

19 Hu nao garem main responsibility for protectim olketa pikinini? Olketa parents. * Jehovah nao givim iufala olketa pikinini, olsem ‘present’ from hem. (Sams 127:3) Hem responsibility bilong iu for protectim olketa. Wanem nao iu savve duim for protectim pikinini bilong iu from child sexual abuse?

20 First samting, iu need for lane abaotem child sexual abuse. Iu need for savve abaotem wei bilong pipol wea savve abusim olketa pikinini and olketa teknik wea olketa iusim for laea long olketa. Lukluk evritaem for olketa situation wea maet danger for olketa pikinini. (Provebs 22:3) Iu mas tingim tu hao staka taem samwan wea duim child abuse hem man wea pikinini savve long hem and trustim.

21 Mek-tu samting, garem gudfala wei for story tugeta witim pikinini bilong iu. (Diutronomi 6:6, 7) Lisin gud taem pikinini bilong iu story. (Jas. 1:19) Pikinini savve hol bak for storyim samting wea happen. Maet hem fraet nogud no eniwan bilivim story bilong hem, or man wea abusim hem maet sei bae hem duim eni nogud samting long hem sapos hem reportim hem. Sapos iu tingse samting happen long pikinini bilong iu, hem gud for ask long kaenfala wei and lisin taem hem story.

22 Mek-thri samting, teachim pikinini bilong iu. Talem olketa wanem olketa need for savve abaotem sex. Haomas information olketa fit for savve, hem depend long age and savve bilong olketa. Teachim olketa wanem for talem and duim sapos samwan laek tasim olketa. Iusim information wea organization bilong Jehovah provaedem long hao for protectim olketa pikinini.—Lukim box “ Teachim Iuseleva, and Pikinini Bilong Iu.”

23. Hao nao iumi ting long child sexual abuse, and wanem kwestin nao bae iumi ansarem long next study?

23 Iumi olketa Jehovah’s Witness ting long child sexual abuse olsem wanfala serious sin and wanfala nogud crime. Anda long law bilong Christ, kongregeson bae no protectim man wea duim child abuse for kasem nogud samting wea kamaot from wanem hem duim. Bat, wanem nao iumi savve duim for helpem olketa wea safa from child abuse? Bae iumi ansarem datfala kwestin long next study.

SONG 103 Olketa Shepherd—Present From God

^ par. 5 Long disfala study, bae iumi storyim hao for protectim olketa pikinini from sexual abuse. Bae iumi story abaotem wanem olketa elder savve duim for protectim kongregeson and hao olketa parents savve protectim pikinini bilong olketa.

^ par. 3 MINING BILONG WANFALA TOKTOK: Child sexual abuse hem minim taem wanfala man or woman iusim pikinini for satisfaem feeling bilong hemseleva long sex. Olsem wei for duim sex long pikinini, iusim mouth long private part, duim sex long ass, tasim or holem private part bilong olketa, holem susu or ass, or duim eni nara samting long olketa pikinini saed long sex. Staka wea kasem abuse hem olketa gele, bat staka taem hem olketa boy tu. Staka taem olketa man nao spoelem pikinini, and samfala woman tu duim datwan.

^ par. 5 MINING BILONG WANFALA TOKTOK: Long disfala study and long next study, disfala toktok “victim” minim samwan wea olketa abusim or spoelem long sex taem hem pikinini. Disfala toktok hem for showimaot klia hao pikinini safa from samwan mekius or spoelem hem, and datfala pikinini hem innocent.

^ par. 11 Nomata man wea duim serious sin hem sik long spiritual wei hem shud no iusim datwan olsem excuse. Hem mas luksavve hem garem full responsibility for rong wea hem chus for duim and mas givim ansa long Jehovah.—Rome 14:12.

^ par. 16 Taem olketa elder story witim man wea samwan accusim, no enitaem bae olketa need for askem pikinini wea victim for kam and stap taem olketa story. Parents or eniwan wea datfala pikinini trustim nao shud talem olketa elder abaotem samting wea datfala pikinini storyim. Diswan for mekem pikinini hia no safa go moa.

^ par. 19 Disfala information hem for olketa parents, and tu, olketa wea garem raet olsem wanfala legal guardian or olketa narawan wea lukaftarem wanfala pikinini nomata hem no pikinini bilong olketa.