Skip to content

Skip to table of contents

 STUDY ARTICLE 18

Love and Justice Long Christian Kongregeson

Love and Justice Long Christian Kongregeson

“Gohed helpem narawan wea kasem hard taem. Sapos iufala duim olsem, iufala followim nao law bilong Christ.”—GAL. 6:2.

SONG 12 Nambawan God, Jehovah

WANEM IUMI BAE STORYIM *

1. Wanem nao tufala samting wea iumi fit for trustim?

JEHOVAH GOD lovem olketa wea worshipim hem. Hem duim bifor, and bae hem gohed duim. And tu, hem laekem tumas justice. (Sams 33:5) So, iumi fit for trustim tufala samting hia: (1) Jehovah sorre tumas taem hem lukim samwan no treatim gud pipol bilong hem. (2) Hem bae mek sure pipol bilong hem kasem justice. Long firstfala study article wea part long fofala article hia, * iumi lanem hao love nao faondeson bilong datfala Law wea God givim long Moses for olketa Israelite. Disfala Law mekhae long wei for showimaot justice long evriwan, especially for olketa wea no savve protectim olketa seleva. (Diutronomi 10:18) Datfala Law showimaot Jehovah barava lovem pipol bilong hem.

2. Olketa wanem kwestin nao bae iumi story raonem?

2 Law bilong Moses finis long 33 C.E. taem Christian kongregeson start. So waswe, olketa Christian bae garem tu eni law wea love nao faondeson bilong hem and wea mekhae long justice? Ia! Olketa Christian garem niu law. Long disfala study, bae iumi storyim wanem nao datfala law. Then bae iumi ansarem olketa kwestin hia: Why nao iumi sei love nao faondeson bilong disfala law? Why nao iumi sei disfala law mekhae long justice? Wanem nao disfala law talem abaotem hao olketa wea garem responsibility shud treatim olketa narawan?

WANEM NAO “LAW BILONG CHRIST”?

3. Wanem nao “law bilong Christ” wea Galatia 6:2 hem storyim?

3 Readim Galatia 6:2. Olketa Christian followim “law bilong Christ.” Jesus no raetem list bilong olketa law for olketa disaepol followim, bat hem givim olketa instruction, komand, and principle  for gaedem olketa. So “law bilong Christ” nao evri samting wea Jesus teachim. For iumi minim gud datfala law, bae iumi story raonem samfala information.

4-5. Hao nao Jesus teach, and wanem taem nao Jesus teach?

4 Hao nao Jesus teach? Wanfala wei Jesus teachim pipol hem thru long wanem hem talem. Toktok bilong hem garem paoa bikos hem teachim truth abaotem God, hem storyim plan bilong God for olketa man, and showim hao Kingdom bilong God nomoa savve finisim evri nogud samting wea mekem pipol safa. (Luke 24:19) Mek-tu wei Jesus teachim pipol hem thru long wanem hem duim. Evri samting wea hem duim hem example for olketa disaepol followim.—John 13:15.

5 Wanem taem nao Jesus teach? Hem teach taem hem duim ministry bilong hem long earth. (Matt. 4:23) And tu, bihaen hem resurrect hem gohed for teachim olketa disaepol. Olsem example, hem story witim samting olsem 500 disaepol and givim komand for ‘teachim pipol for kamap disaepol bilong hem.’ (Matt. 28:19, 20; 1 Cor. 15:6) From Jesus hem hed bilong kongregeson, hem gohed for teachim olketa disaepol bilong hem nomata hem go bak long heven. Olsem example, long 96 C.E., Christ talem aposol John for encouragem and givim kaonsel long olketa anointed Christian.—Col. 1:18; Rev. 1:1.

6-7. (a) Long wea nao iumi savve faendem olketa teaching bilong Jesus? (b) Hao nao iumi savve obeyim law bilong Christ?

6 Long wea nao iumi savve faendem olketa teaching bilong Jesus? Fofala Gospel nao storyim staka samting wea Jesus talem and duim taem hem long earth. Bikos holy spirit nao muvim olketa man wea “garem tingting bilong Christ” for raetem evri buk insaed long Christian Greek Scripture, olketa buk hia savve helpem iumi tu for savve long tingting bilong Jesus.—1 Cor. 2:16.

7 Olketa leson: Olketa teaching bilong Jesus helpem iumi long evri samting long laef. Dastawe, law bilong Christ savve helpem iumi insaed famili, long waka ples, long skul, and long kongregeson. Iumi lanem disfala law taem iumi readim olketa Christian Greek Scripture and ting raonem wanem iumi lanem. Iumi obeyim law bilong Christ taem iumi followim olketa instruction, komand, and principle insaed olketa Scripture hia. Taem iumi obeyim law bilong  Christ, iumi obeyim Jehovah, God wea lovem iumi, bikos evri samting wea Jesus teachim hem kam from Jehovah.—John 8:28.

LOVE NAO FAONDESON BILONG LAW BILONG CHRIST

8. Wanem nao faondeson bilong law bilong Christ?

8 Taem pipol stap insaed haos wea garem strong faondeson, olketa feel sef. Olsem tu gudfala law wea garem strong faondeson hem mekem pipol wea followim for feel sef. Law bilong Christ garem nambawan faondeson, wea hem nao love. Why nao iumi sei olsem?

Taem iumi deal witim olketa narawan long wei wea showimaot love, iumi obeyim datfala “law bilong Christ” (Paragraf 9-14 storyim diswan) *

9-10. Wanem nao showimaot love muvim Jesus for duim samting, and hao nao iumi savve followim example bilong hem?

9 First samting, love nao muvim Jesus long evri samting wea hem duim. Wanfala wei for showimaot love, hem for sorre and kaen long pipol. From Jesus sorre long pipol, hem teachim olketa, healim olketa wea sik, givim kaikai long olketa wea hangre, and resurrectim olketa wea dae. (Matt. 14:14; 15:32-38; Mark 6:34; Luke 7:11-15) Nomata hem mas spendem staka taem and strong bilong hem, Jesus willing for duim samting for olketa narawan winim wei for duim samting for hemseleva. Bat main samting wea showimaot Jesus garem love nao hem willing for dae for olketa narawan.—John 15:13.

10 Olketa leson: Iumi followim example bilong Jesus taem iumi tingim olketa narawan winim wei for tingim iumiseleva. And tu, iumi followim example bilong hem taem iumi sorre and kaen long pipol long territory. Taem datwan muvim iumi for preach and teachim gud nius long olketa, iumi showimaot iumi obeyim law bilong Christ.

11-12. (a) Wanem nao showimaot Jehovah barava kea long iumi? (b) Hao nao iumi savve showimaot love olsem Jehovah?

11 Mek-tu samting, Jesus showimaot love bilong Dadi bilong hem. Taem Jesus duim ministry bilong hem, Jesus showimaot hao Jehovah barava kea for olketa wea worshipim hem. Jesus teachim hao iumi wanwan barava spesol and important long Dadi bilong iumi long heven. (Matt. 10:31) Jehovah barava laek for welkamim bak eni sheepsheep wea lus and wea repent and kam bak long kongregeson. (Luke 15:7, 10) Jehovah pruvim love bilong hem taem hem givim Son bilong hem olsem ransom for sevem iumi.—John 3:16.

12 Olketa leson: Hao nao iumi savve showimaot love olsem Jehovah? (Eph. 5:1, 2) Iumi ting long olketa brata and sista olsem olketa important and spesol, and iumi hapi for welkamim bak eni sheepsheep wea lus and wea kam bak long Jehovah. (Sams 119:176) Iumi showimaot klia iumi lovem olketa brata and sista, taem iumi iusim taem and strong for helpem olketa, especially long taem wea olketa needim help. (1 John 3:17) Taem iumi showimaot iumi lovem olketa narawan, iumi obeyim law bilong Christ.

13-14. (a) Olsem John 13:34, 35 storyim, wanem komand nao Jesus talem for olketa disaepol, and why nao diswan hem wanfala niu komandment? (b) Hao nao iumi savve obeyim datfala niu komandment?

13 Mek-thri samting, Jesus komandim olketa disaepol for lovem each other long sem wei olsem hem lovem olketa. (Readim John 13:34, 35.) Komand bilong Jesus hem niu bikos anda long Law wea God givim olketa Israelite olketa no need for showimaot diskaen love. Bat disfala niu komand hem sei: Iu mas lovem olketa brata and sista long sem wei olsem Jesus lovem iu. Diswan minim for garem love wea mekem man willing for givim laef bilong hem for narawan. * Iumi mas lovem olketa brata and sista winim wei wea iumi lovem iumiseleva. Iumi mas barava lovem olketa gogo iumi willing for dae for olketa, olsem Jesus hem duim for iumi.

 14 Olketa leson: Hao nao iumi savve obeyim datfala niu komandment? Iumi mas duim samting for olketa brata and sista. Iumi willing for no just duim olketa big samting nomoa, olsem for givim laef bilong iumi for sevem olketa, bat iumi willing for duim olketa smol samting tu. Olsem example, wei for evritaem willing for helpem wanfala olo brata or sista for attendim meeting nomata hem no isi for iumi, or iumi willing for sakrifaesim samting wea iumiseleva laekem for mekem samwan wea iumi lovem for hapi, or for tekem taem-off from waka for help long taem bilong disaster. Diswan helpem kongregeson bilong iumi for kamap ples wea each wan savve stap gud and feel sef.

LAW BILONG CHRIST MEKHAE LONG JUSTICE

15-17. (a) Hao nao samting wea Jesus duim showimaot tingting bilong hem abaotem Justice? (b) Hao nao iumi savve followim example bilong Jesus?

15 Long Bible, disfala word “Justice,” minim wei for duim wanem God sei hem stret and for no favorim eniwan. Why nao iumi sei law bilong Christ mekhae long Justice?

Jesus showimaot respect and kaen long olketa woman, nomata sapos olketa woman hia hem kaen woman wea pipol barava ting daonem. (Paragraf 16 storyim diswan) *

16 Tingim hao samting wea Jesus duim showimaot tingting bilong hem abaotem Justice. Long datfala taem, olketa bigman bilong Jew heitim olketa wea no Jew, olketa no respectim olketa woman, and ting daonem olketa Jew wea no skul gud. Nomata olsem, Jesus no favorim eniwan and hem treatim gud evriwan. Hem acceptim olketa wea no Jew wea showimaot faith long hem. (Matt. 8:5-10, 13) Hem preach long evri pipol, nomata olketa rich or poor. (Matt. 11:5; Luke 19:2, 9) Hem no tok daonem olketa woman or raf taem hem deal witim olketa. Bat hem showimaot respect and kaen, nomata sapos olketa woman hia kaen type woman wea pipol barava ting daonem.—Luke 7:37-39, 44-50.

17 Olketa leson: Iumi savve followim example bilong Jesus taem iumi no favorim eniwan and preach long evriwan wea willing for lisin, nomata olketa rich or poor, or nomata wanem nao religion bilong olketa. Olketa brata followim example bilong Jesus taem olketa deal witim olketa woman long wei wea showimaot respect. Iumi obeyim law bilong Christ taem iumi duim olketa samting hia.

18-19. Wanem nao Jesus teachim abaotem justice, and olketa wanem leson nao iumi savve lanem from datwan?

18 Nara samting nao hem wanem Jesus teachim abaotem justice. Hem teachim olketa principle wea bae helpem olketa disaepol for treatim gud olketa narawan. Wanfala example nao hem datfala Golden Rul. (Matt. 7:12) Iumi evriwan laekem narawan for treatim iumi gud. So iumi tu shud treatim gud olketa narawan. Taem iumi duim datwan, maet olketa bae duim sem samting long iumi. Bat hao sapos samwan treatim iumi nogud? Jesus teachim tu olketa disaepol for trustim hao Jehovah bae ‘barava duim stret samting for olketa wea singaot long hem evritaem for helpem olketa.’ (Luke 18:6, 7) Datfala toktok hem wanfala promis wea showimaot God bilong justice hem savve long hard taem wea iumi feisim long olketa last day, and hem bae mek sure iumi kasem justice long taem wea hem markem.—2 Thess. 1:6.

19 Olketa leson: Taem iumi followim olketa principle wea Jesus teachim, iumi bae treatim olketa narawan long wei wea showimaot justice. And sapos iumi safa bikos iumi no kasem justice distaem long world bilong Satan, iumi savve kasem comfort from iumi savve hao Jehovah bae duim samting for mekem iumi kasem justice.

HAO NAO OLKETA WEA GAREM RESPONSIBILITY SHUD TREATIM OLKETA NARAWAN?

20-21. (a) Hao nao olketa wea garem responsibility shud treatim olketa narawan? (b) Hao nao hasband savve showimaot love olsem Jesus, and hao nao dadi shud treatim pikinini bilong hem?

20 Anda long law bilong Christ, hao nao olketa wea garem responsibility shud treatim olketa  narawan? From love nao faondeson bilong datfala law, olketa wea garem responsibility mas respectim olketa wea olketa lukaftarem, and treatim olketa long wei wea showimaot love. Olketa mas tingim hao Christ laekem man mas showimaot love evritaem.

21 Insaed famili. Hasband mas lovem waef bilong hem ‘olsem wei wea Christ lovem kongregeson.’ (Eph. 5:25, 28, 29) Hasband mas showimaot sem kaen love olsem Jesus long wei for willing for tingim firstaem wanem waef laekem or needim winim for tingim nomoa wanem hemseleva laekem. Samfala man faendem hem hard for showimaot kaen love olsem, maet bikos olketa growap midolwan pipol wea no tinghae long wei for lovem and treatim gud narawan. Maet hem no isi for olketa lusim olketa nogud wei wea olketa growap witim, bat for olketa obeyim law bilong Christ, olketa mas change. Hasband wea garem kaen love wea Christ showim, bae kasem respect from waef. Dadi wea lovem olketa pikinini bae no talem or duim samting wea bae spoelem olketa. (Eph. 4:31) Bat, bae hem talem olketa pikinini bilong hem hao hem lovem and hem tinghae long olketa, datwan mekem olketa for feel sef. Olketa pikinini bae lovem and trustim kaen dadi olsem.

22. Olsem 1 Peter 5:1-3 storyim, “olketa sheepsheep” hem bilong hu, and hao nao olketa elder shud treatim olketa sheepsheep hia?

22 Insaed kongregeson. Olketa elder mas no forget “olketa sheepsheep” hem no bilong olketa. (John 10:16; readim 1 Peter 5:1-3.) Olketa toktok olsem “sheepsheep bilong God” and “pipol bilong God,” hem mekem olketa elder for tingim hao olketa sheepsheep hia hem bilong Jehovah. Hem laekem olketa for kaen and showimaot love taem olketa deal witim olketa sheepsheep bilong hem. (1 Thess. 2:7, 8) Jehovah barava hapi long olketa elder wea showimaot love taem olketa duim waka bilong olketa olsem shepherd. And tu, olketa brata  and sista bae lovem and respectim olketa elder olsem.

23-24. (a) Wanem nao waka bilong olketa elder saed long wei for deal witim olketa serious sin? (b) Taem olketa elder deal witim olketa case olsem, wanem nao samfala samting wea olketa need for tingim?

23 Wanem nao waka bilong olketa elder saed long wei for deal witim olketa serious sin? Waka bilong olketa hem difren from waka wea olketa judge and elder duim anda long Law wea God givim long Israel. Anda long datfala Law, olketa judge and elder deal witim olketa samting saed long worship, and tu, olketa civil and criminal case. Bat anda long law bilong Christ, waka bilong olketa elder hem for deal nomoa witim hao datfala sin hem affectim worship bilong Jehovah. Olketa elder luksavve hao God givim responsibility long gavman for deal witim olketa criminal case and olketa civil case. Datwan minim gavman garem paoa for panisim man wea duim rong olsem for askem fine or for putim hem long prison.—Rome 13:1-4.

24 Hao nao olketa elder savve deal witim wanfala serious sin? Olketa iusim Bible for helpem olketa for lukluk gud long samting wea happen and for mekem eni disison. Olketa mas no forgetim hao love nao hem faondeson bilong law bilong Christ. Love muvim olketa elder for tingim, wanem olketa need for duim for helpem eniwan long kongregeson wea safa bikos samwan duim wanfala sin againstim hem. Then taem olketa deal witim datfala brata or sista wea duim datfala sin, love bae muvim olketa elder for tingim tufala kwestin hia: Waswe, hem repent? Waswe, iumi savve helpem hem for fren bak moa witim Jehovah?

25. Wanem nao bae iumi storyim long next study?

25 Iumi barava hapi for stap anda long law bilong Christ! Taem iumi evriwan traem best for obeyim datfala law, iumi help for mekem kongregeson kamap ples wea evriwan feel sef, garem love, and tinghae long each other. Nomata olsem, iumi still stap long world wea wei bilong olketa “nogud man” gohed for kamap “worse.” (2 Tim. 3:13) Iumi mas barava careful. So, hao nao kongregeson savve showimaot justice bilong God taem olketa deal witim child sexual abuse? Bae iumi ansarem datfala kwestin long next study.

SONG 15 Praisem Firstborn Bilong Jehovah!

^ par. 5 Disfala study hem mek-tu long fofala article wea storyim why iumi sure Jehovah hem God wea showimaot love and justice. Hem laekem pipol bilong hem for kasem justice, and hem savve comfortim eniwan wea no kasem justice bikos long disfala nogud world.

^ par. 1 Lukim study article “Love and Justice Long Israel Bifor” long Wastaoa bilong February 2019.

^ par. 13 MINIM BILONG WANFALA TOKTOK: Diskaen love wea mekem man willing for givim laef bilong hem for narawan hem muvim iumi for tingim firstaem wanem narawan laekem or needim, winim wei for tingim wanem iumiseleva laekem. Iumi willing for givim or lusim samting for mekem narawan kasem gud samting.

^ par. 61 PIKSA: Jesus lukim wanfala widow woman wea only son bilong hem dae. From hem sorre tumas long hem, Jesus resurrectim datfala young man.

^ par. 63 PIKSA: Jesus kaikai long haos bilong wanfala Pharisee wea nem bilong hem Simon. Wanfala woman, wea maet hem jury, wasim leg bilong Jesus witim tias bilong hem, draem witim hair bilong hem, and pourim oil long leg bilong hem. Simon no hapi long wanem woman hia duim, bat Jesus defendim datfala woman.