Skip to content

Skip to table of contents

Letem Laet Bilong Iu Shaen Mekem Pipol Praisem Jehovah

Letem Laet Bilong Iu Shaen Mekem Pipol Praisem Jehovah

“Letem olketa man lukim laet bilong iufala . . . Diswan bae mekem olketa for praisem Dadi bilong iufala.”—MATT. 5:16.

SONG: 77, 59

1. Wanem spesol samting nao mekem iumi hapi?

IUMI barava hapi for lukim wei wea pipol bilong Jehovah letem laet bilong olketa saen evriwea long world! Last year, pipol bilong Jehovah conductim winim 10,000,000 Bible study. And tu, tingim staka million pipol wea interest and kam long Memorial. Olketa lane abaotem love wea Jehovah showimaot taem hem givim kam datfala ransom.—1 John 4:9.

2, 3. (a) Wanem nao no savve stopem iumi for “shaen olsem laet”? (b) Wanem nao bae iumi storyim long disfala study?

2 Evriwea long world pipol bilong Jehovah story long staka difren languis. Nomata olsem, datwan no stopem iumi for wan mind for praisem Jehovah. (Rev. 7:9) Nomata wanem kaen languis iumi story long hem or wea nao iumi stap, iumi savve shaen “olsem laet insaed long disfala world.”—Phil. 2:15.

3 Ministry bilong iumi, wei wea iumi wan mind, and wei for gohed lukaot, evri samting hia givim praise long Jehovah. Long disfala study bae iumi storyim hao iumi savve letem laet bilong iumi shaen long thrifala samting hia.—Readim Matthew 5:14-16.

 INVAETEM PIPOL FOR WORSHIPIM JEHOVAH

4, 5. (a) Taem iumi preach iumi letem laet bilong iumi shaen, bat wanem moa iumi savve duim? (b) Olketa wanem gud samting nao savve kamaot from kaenfala wei bilong iumi? (Lukim piksa long start bilong study.)

4 Wanfala koment long article “Light in the Darkness,” long The Watch Tower, bilong June 1, 1925, sei long olketa last day no eniwan savve faithful long Lord sapos hem no duim samting for “letem pipol for lukim laet bilong hem shaen.” Datfala article sei tu: “Man mas letem laet bilong hem shaen long wei for talemaot gud nius long pipol and followim olketa raeteous standard bilong Jehovah.” Tru nao, wanfala wei for letem laet bilong iumi shaen hem taem iumi preachim gud nius and teachim pipol for kamap disaepol. (Matt. 28:19, 20) Nara samting tu, olketa gudfala wei bilong iumi savve givim praise long Jehovah. Pipol savve lukluk long olketa wei bilong iumi taem iumi preach. Taem iumi smile and sei hello, datwan helpem olketa for garem stretfala tingting abaotem iumi and God wea iumi worshipim.

5 Jesus sei olsem long olketa disaepol bilong hem: “Taem iufala go insaed wanfala haos, sei hello long olketa long haos.” (Matt. 10:12) Long olketa ples wea Jesus and olketa aposol preach long hem, hem wei bilong pipol for invaetem olketa stranger for kam insaed haos bilong olketa. Bat distaem long staka ples, diswan hem no wei bilong pipol. Sapos iu kaen and showimaot gudfala wei taem iu story long olketa, datwan bae mekem olketa no fraet or feel nogud long iu. Wei for smile hem best samting for duim for startim story. Datwan barava fitim olketa brata and sista wea duim pablik witnessing witim trolley. Taem iu share insaed datfala waka, maet iu bae lukim hao pipol interest taem iu smile and sei hello long olketa. Datwan maet mekem olketa kam and tekem eni pablikeson bilong iumi. And tu, kaenfala wei bilong iu maet mekem man hia willing for story.

6. Hao nao wanfala olo hasband and waef duim moa samting long ministry nomata tufala sik?

6 Wanfala olo hasband and waef long England, faendem hem no isi for go preach from haos tu haos from tufala sik. So tufala disaed for putim wanfala tebol witim olketa literature aotsaed long haos bilong tufala. Tufala stap klosap long wanfala skul, so tufala putim samfala pablikeson wea parents wea kam for pikinini bilong olketa, bae interest long hem. Staka long olketa interest for tekem Questions Young People Ask—Answers That Work, Volume 1 and 2, and tu, olketa brochure. Wanfala pioneer sista long kongregeson bilong tufala savve joinim tufala. Kaenfala wei bilong datfala sista and wei wea hasband and waef hia laek helpem olketa narawan, mekem wanfala long olketa dadi hia for acceptim Bible study.

7. Wanem nao man savve duim for helpem olketa refugee?

7 Staka kantri distaem garem olketa refugee wea ranawe from hom bilong olketa. Wanem nao man savve duim for helpem olketa for savve long Jehovah and plan bilong hem? First samting, hem gud for lanem hao for sei hello long languis bilong olketa. Datfala JW Language app savve helpem iumi for duim datwan. And tu, iumi savve lanem samfala short toktok long languis bilong olketa for mekem olketa interest for story. Then maet iumi savve showim tu jw.org and showim olketa video and pablikeson long languis bilong olketa.—Diutronomi 10:19.

8, 9. (a) Hao nao meeting wea kamap long midol week hem helpem iumi? (b) Hao nao parents savve helpem pikinini for tekpart long olketa meeting?

8 Jehovah provaedem Christian Laef and Ministry Meeting for helpem iumi duim gud ministry bilong iumi. Olketa samting wea iumi lanem long datfala meeting helpem  staka long iumi for savve hao for duim gud olketa return visit and olketa Bible study.

9 Staka niu wan wea kam long olketa meeting lukim olketa pikinini bilong iumi tekpart long olketa meeting tu. Iufala dadi and mami helpem pikinini bilong iufala for letem laet bilong olketa shaen taem iufala teachim olketa for givim ansa long toktok bilong olketa seleva. Taem olketa pikinini givim koment wea simpol and kam from heart bilong olketa, datwan bae mekem samfala wea just kam for laek lanem truth.—1 Cor. 14:25.

GOHED STRONGIM WEI FOR WAN MIND

10. Hao nao famili worship savve strongim wei wea famili wan mind?

10 Nara wei for letem laet bilong iumi shaen hem for strongim wei for wan mind insaed famili and long kongregeson. Wanfala wei wea dadi and mami savve duim diswan hem for duim Famili Worship evri week. Staka famili lukluk long JW Broadcasting long taem bilong famili worship, and bihaen olketa story raonem hao for followim wanem olketa lanem. Taem dadi and mami duim famili worship, tufala need for luksavve wei wea olketa bae teachim smol pikinini hem difren from olketa teenager. So tufala need for duim best for helpem evriwan long famili for kasem gud samting from wanem olketa lanem long famili worship.—Sams 148:12, 13.

Hem gud for spendem taem witim olketa olo brata and sista (Paragraf 11 storyim diswan)

11-13. Hao nao evriwan savve strongim wei for wan mind insaed kongregeson and helpem olketa narawan for letem laet bilong olketa shaen?

11 Hao nao olketa young wan savve strongim wei for wan mind insaed kongregeson and encouragem olketa narawan for letem laet bilong olketa shaen? Sapos iu wanfala young wan, fren gud witim olketa olo brata and sista. Hem gud for askem olketa for storyim experience bilong olketa abaotem samting wea helpem olketa for servem Jehovah for longfala taem. Diswan bae encouragem iu and olketa tu for gohed letem laet bilong truth for shaen. And iumi evriwan savve welkamim olketa wea kam long Kingdom Hall for olketa meeting. Taem iumi duim olsem, datwan bae strongim wei wea iumi wan mind and maet muvim olketa wea kam tu for letem laet bilong olketa shaen. Iu savve smile and sei hello long olketa, and helpem olketa faendem ples for sidaon. Tekem olketa for meetim olketa narawan long kongregeson mekem olketa feel welkam.

12 Sapos iu kasem assignment for conductim field service meeting, iu savve helpem olketa wea olo for gohed duim ministry. Mek sure datfala territory hem fitim olketa for  duim. Samfala taem, maet iu savve markem olketa for waka witim olketa young wan wea fit for helpem olketa long physical wei. And tu, iu savve tingim olketa wea sik and wea no fit for duim staka samting long ministry. Tru nao, wei wea iu kaen and tingim olketa narawan savve helpem olketa young wan, olo, olketa wea niu long truth and olketa wea stap insaed truth for longfala taem finis, for gohed strong for talemaot disfala gud nius.—Levitikas 19:32.

13 Man wea raetem psalm hem sei: “Hemi barava gud tumas taem olketa pipol blong God i wanmaen an stap tugeta gudfala!” (Readim Sams 133:1, 2.) Taem olketa Israelite hipap tugeta, olketa kasem gud samting from wei for associate witim olketa narawan wea worshipim Jehovah. Diswan hem olsem oil wea olketa pourim antap hed bilong man, wea mekem skin for fresh and smel gud. Long sem wei, iumi savve strongim wei for wan mind insaed kongregeson taem iumi kaen and showimaot gudfala wei. Sapos iu duim datwan finis iu fit for kasem praise. Hem gud for traem best for associate staka taem witim olketa brata and sista and savve gud long olketa.—2 Cor. 6:11-13.

14. Hao nao iu letem laet bilong iu shaen long ples wea iu stap?

14 Nomata wea nao iu stap, iu savve letem laet bilong iu shaen. Kaenfala wei bilong iu savve helpem olketa long ples wea iu stap for laek savve long truth. Askem iuseleva: ‘Wanem nao tingting bilong olketa neiba abaotem mi? Waswe, haos and area bilong mi hem klin and no olobaot? Waswe, mi savve helpem narawan?’ Askem olketa nara Witness abaotem hao kaenfala wei and gudfala example bilong olketa hem affectim olketa relative, neiba, waka fren, or skul fren. Sapos iu duim olsem, bae iu herem samfala gud samting wea kamaot from datwan.—Eph. 5:9.

GOHED FOR LUKAOT

15. Why nao hem important for gohed lukaot?

15 Sapos iumi laek for gohed letem laet bilong iumi shaen braet, iumi need for luksavve long taem wea iumi stap distaem. Staka taem Jesus talem olketa disaepol bilong hem for “gohed for lukaot.” (Matt. 24:42; 25:13; 26:41) Sapos iumi tingse “bigfala trabol” hem bae longtaem yet, iumi bae no ting strong for duim preaching waka. (Matt. 24:21) Winim wei for laet bilong iumi shaen braet bae laet bilong iumi bae isisi no braet gogo hem dae nao.

16, 17. Wanem nao iu savve duim for gohed lukaot?

16 Winim enitaem bifor, hem important for iumi gohed lukaot. Distaem evri samting wea happen hem gohed for kamap worse. Bat iumi savve, end bae kam long barava taem wea Jehovah markem. (Matt. 24:42-44) Go kasem datfala taem, iumi need for patient and gohed for lukaot. Readim Bible evriday and gohed for prea long Jehovah. (1 Pet. 4:7) Lane from example bilong olketa brata and sista wea worshipim Jehovah for staka year finis. Olsem example, iu savve read abaotem olketa experience olsem datfala article, “Mi ‘Holem Kaleko Bilong Wanfala Jew’ for Seventi Year,” wea stap long Wastaoa April 15, 2012, page 18-21.

17 Gohed busy for duim waka bilong Jehovah. Duim olketa kaenfala samting for narawan and spendem moa taem witim olketa brata and sista. Datwan bae mekem iu hapi and feel olsem taem hem go pas kwiktaem tumas. (Eph. 5:16) Insaed wan handred year wea go pas finis, pipol bilong Jehovah busy for duim staka samting. And distaem, iumi barava busy winim enitaem bifor bikos waka bilong Jehovah hem gohed for kamap big. So iumi gohed for letem laet bilong iumi shaen braet winim eni nara taem bifor.

Olketa shepherding kol givim iumi chance for kasem wisdom from God (Paragraf 18, 19 storyim diswan)

18, 19. Hao nao olketa elder helpem iumi for gohed strong for worshipim Jehovah? Storyim example.

 18 Taem iumi savve Jehovah laekem iumi for gohed worshipim hem nomata iumi no perfect, datwan strongim faith bilong iumi. For helpem iumi, hem givim iumi “olketa man olsem present,” hem nao olketa elder long kongregeson. (Readim Ephesus 4:8, 11, 12.) So taem olketa elder visitim iu, lane from savve wea olketa garem and followim advaes bilong olketa.

19 Olsem example, wanfala hasband and waef from England garem samfala problem, so tufala askem tufala elder for kam helpem tufala. Waef hem feel olsem hasband no leadim famili long spiritual wei. Hasband luksavve hem no savve teach long gudfala wei and no duim famili worship evri week. Then olketa elder helpem tufala hia for ting raonem example bilong Jesus. Olketa encouragem datfala hasband for followim wei wea Jesus hem lukaftarem olketa disaepol bilong hem. Olketa encouragem datfala waef tu for patient witim hasband bilong hem. And tu, olketa givim samfala idea long hao for tufala duim famili worship witim tufala pikinini bilong tufala. (Eph. 5:21-29) Bihaen datwan, datfala hasband traem best for lukaftarem famili bilong hem. Olketa elder encouragem hem moa for no givap and for depend long holy spirit bilong Jehovah for helpem hem leadim gud famili bilong hem long spiritual wei. Wei wea olketa elder sapotim and showimaot love long datfala famili hem helpem olketa for letem laet bilong olketa for shaen.

20. Wanem nao bae kamaot sapos iu letem laet bilong iu for shaen?

20 Man wea raetem wanfala psalm, hem sei: “Olketa pipol hu i tinghae long [Jehovah], an falom olketa strongfala toktok blong hem, olketa ya nao i hapi.” (Sams 128:1) Taem iu letem laet bilong iu shaen long wei for invaetem olketa narawan for worshipim God, strongim wei for wan mind, and gohed for lukaot, iu bae barava hapi. Olketa narawan bae luksavve gud samting wea iu duim, and datwan bae muvim olketa for praisem Dadi bilong iumi.—Matt. 5:16.