Skip to content

Skip to table of contents

 STUDY ARTICLE 28

Gohed Worshipim Jehovah Nomata Olketa Banim Waka blo Iumi

Gohed Worshipim Jehovah Nomata Olketa Banim Waka blo Iumi

“Hard tumas for mifala no storyim olketa samting wea mifala lukim and herem.”—ACTS 4:19, 20.

SONG 122 Gohed for Strong!

WANEM IUMI BAE STORYIM *

1-2. (a) Why nao iumi shud no sapraes taem gavman banim waka blo iumi? (b) Wanem nao bae iumi storyim lo disfala study?

LO 2018, winim samting olsem 223,000 pablisa nao stap lo olketa kantri wea gavman banim or stopem samfala samting lo waka blo iumi. Iumi no sapraes lo diswan. Olsem iumi lanem finis lo study bifor diswan, olketa tru Christian savve bae olketa kasem persecution. (2 Tim. 3:12) Nomata wea nao iumi stap, maet seknomoa gavman banim wei wea iumi worshipim God blo iumi Jehovah.

2 Sapos gavman lo ples wea iumi stap disaed for banim wei wea iumi worshipim Jehovah, iu maet askem iuseleva olketa kwestin olsem: Waswe, persecution hem showimaot God no hapi lo iumi? Waswe, from olketa banim waka blo iumi bae iumi stop nao for worshipim Jehovah? Waswe, mi shud muv go lo nara kantri wea olketa no banim waka blo iumi? Lo disfala study, bae iumi story raonem olketa kwestin hia. Bae iumi storyim tu, hao iumi savve gohed worshipim Jehovah nomata gavman banim waka blo iumi and wanem iumi mas careful for no duim.

WASWE, PERSECUTION SHOWIMAOT GOD NO HAPI LO IUMI?

3. Olsem 2 Corinth 11:23-27 storyim, wanem kaen persecution nao aposol Paul kasem nomata hem faithful, and wanem nao iumi lanem from example blo hem?

3 Sapos gavman banim waka blo iumi, maet iumi tingse God no blessim iumi. Bat tingim diswan, persecution hem no minim Jehovah hem no hapi lo iumi. Wanfala example nao hem aposol Paul. Iumi savve God hapi lo Paul. Hem garem privilege for raetem 14-fala leta wea stap insaed Christian Greek Scripture and hem kamap wanfala aposol for preach lo  pipol wea no Jew. Nomata olsem, hem feisim nogud persecution. (Readim 2 Corinth 11:23-27.) From samting wea kasem aposol Paul, iumi lanem hao Jehovah savve letem olketa faithful pipol blo hem for kasem persecution.   

4. Why nao world heitim iumi?

4 Jesus explainim why nao iumi shud expectim pipol for againstim iumi. Hem sei tu, olketa bae heitim iumi bikos iumi difren from pipol lo world. (John 15:18, 19) Taem iumi kasem persecution hem no minim Jehovah no blessim iumi. Bat hem showimaot iumi duim stret samting!

SAPOS OLKETA BANIM WAKA BLO IUMI, WASWE HEM STOPEM WORSHIP BLO IUMI?

5. Waswe, olketa man savve stopem wei for worshipim Jehovah? Explainim kam.

5 Olketa man hard tumas for stopem worship blo olmaeti God Jehovah. Staka pipol trae for duim datwan, bat olketa nating win. Tingim samting wea happen lo World War II. Lo datfala taem, olketa gavman lo staka kantri barava persecutim pipol blo God. Olketa banim waka blo Jehovah’s Witness lo Nazi Germany, Australia, Canada and tu lo olketa nara kantri. Nomata olsem, wanem nao happen? Lo 1939, taem World War II start, 72,475 pablisa stap evriwea lo world. Bat, olketa report showimaot lo end blo war lo 1945, namba blo pablisa kasem 156,299. Datwan showimaot Jehovah blessim olketa. Datfala namba hem dabol lo namba blo pablisa taem war hem start!

6. Winim wei for fraet, wanem gud samting nao savve kamaot from wei wea pipol againstim iumi? Storyim example.

6 Winim wei for fraet taem pipol againstim iumi, iumi savve duim moa samting for Jehovah. Olsem example, wanfala couple wea garem wanfala smol pikinini, stap lo wanfala kantri wea gavman disaed for banim waka blo iumi. Winim wei for fraet, tufala start for regular pioneer. Datfala sista disaed tu for lusim waka blo hem wea hem kasem gud pei lo hem. Datfala brata sei taem gavman banim waka blo iumi, pipol askem staka kwestin abaotem olketa Jehovah’s Witness. From datwan, hem isi for startim olketa Bible study. Nara gud samting tu kamaot from datfala ban. Wanfala elder sei staka wea stop for worshipim Jehovah start moa for attendim meeting and go preaching.

7. (a) Wanem nao iumi savve lanem from Levitikas 26:36, 37? (b) Wanem nao iu bae duim taem gavman banim waka blo iumi?

 7 Taem olketa enemy blo iumi banim waka blo iumi, olketa laek for mekem iumi fraet for duim waka blo Jehovah. Nara samting tu, olketa savve spredim olketa laea story, sendem police for go reidim haos blo iumi, tekem iumi lo kot, or maet putim iumi lo prison. Olketa tingse wei for putim samfala lo iumi lo prison bae mekem iumi evriwan for fraet. Sapos iumi start for letem olketa for mekem iumi fraet, then hem olsem iumiseleva nao banim worship blo iumi. Iumi no laek for olsem olketa wea Bible storyim lo Levitikas 26:36, 37. (Readim.) Iumi mas no letem wei for fraet for mekem iumi katdaon or stop for duim olketa spiritual samting. Iumi barava trustim Jehovah and iumi no panic. (Aesaea 28:16) Iumi mas prea and askem Jehovah for leadim iumi. Taem Jehovah sapotim iumi, nomata olketa gavman wea garem bigfala paoa, bae no savve stopem iumi for gohed faithful for worshipim God blo iumi.—Heb. 13:6.

HAO, MI SHUD MUV LO NARA KANTRI?

8-9. (a) Wanem disison nao each famili hed or man seleva mas disaedem? (b) Wanem nao bae helpem wanfala Christian for mekem wise disison?

8 Sapos gavman lo ples iu stap banim waka blo iumi, maet iu ting for muv lo nara kantri wea iu free for worshipim Jehovah. Diswan hem disison blo iuseleva and no eniwan savve disaedem datwan for iu. For helpem iu disaed, hem gud for ting raonem wanem olketa Christian lo first century duim taem olketa kasem persecution. Bihaen olketa sutim dae Stephen, olketa disaepol lo Jerusalem muv lo olketa nara ples olsem Judea and Samaria and go kasem olketa farawe ples olsem Phoenicia, Cyprus, and Antioch tu. (Matt. 10:23; Acts 8:1; 11:19) Bat hem gud for tingim tu, bihaen narataem wea persecution kasem olketa Christian lo first century, aposol Paul disaed for no muv go lo nara ples wea olketa no againstim preaching waka. Bat, hem disaed for stap and preachim gud nius and for strongim olketa brata wea stap lo olketa city wea safa from persecution.—Acts 14:19-23.

9 Wanem nao iumi savve lanem from olketa story hia? Each hed blo famili mas mekem disison sapos olketa laek for muv lo nara ples. Bifor hem disaed, hem shud prea and barava ting raonem situation blo famili blo hem and wanem nao gud and nogud samting wea savve kamap from wei for muv. Saed lo diswan, each Christian mas disaed seleva. (Gal. 6:5) Iumi shud no judgem eniwan abaotem disison blo olketa.

HAO NAO BAE IUMI GOHED WORSHIP TAEM GAVMAN BANIM WAKA?

10. Wanem direction nao branch office and olketa elder bae givim?

10 Hao nao iumi savve gohed for worship nomata gavman banim waka blo iumi? Branch office bae givim instruction lo olketa elder lo kongregeson and talem samfala idea lo hao for iumi kasem olketa spiritual kaikai, garem meeting, and hao for preach. Sapos branch office no savve contactim olketa elder, then olketa elder nao bae helpem iu and evriwan lo kongregeson for gohed worshipim Jehovah. Olketa bae givim direction followim wanem Bible and olketa nara pablikeson blo iumi talem.—Matt. 28:19, 20; Acts 5:29; Heb. 10:24, 25.

11. Why nao iu savve sure iu bae garem spiritual kaikai, and wanem nao iu savve duim for protectim olketa spiritual kaikai wea iu garem finis?

11 Jehovah promisim finis hem bae givim evri spiritual kaikai wea iumi needim. (Aesaea 65:13, 14; Luke 12:42-44) So iu savve trustim hao organization blo hem bae duim evri  samting wea hem savve duim for provaedem spiritual encouragement wea iu needim. Wanem nao iu savve duim? Taem gavman banim waka blo iumi, faendem sef ples for haedem Bible blo iu and olketa nara pablikeson. Careful for no putim olketa important spiritual kaikai hia lo ples wea isi for narawan faendem. Diswan hem nomata sapos iu iusim olketa electronic copy or olketa buk. Each wan lo iumi mas traem best for duim samting for stap strong lo spiritual wei.

From Jehovah sapotim iumi, iumi no fraet for hipap for worshipim hem (Paragraf 12 storyim diswan) *

12. Hao nao olketa elder savve organizem olketa meeting lo wei wea pipol bae no luksavve?

12 Waswe lo olketa meeting evri week? Olketa elder bae arrangem olketa meeting lo wei wea pipol bae no luksavve. Olketa maet sei for meet lo olketa smol grup, and maet evritaem olketa bae changem taem for meeting and ples for hipap. Taem iu arrive or lusim ples wea meeting kamap, no story big, datwan savve help for protectim evriwan. And tu, mas werem kaleko wea no luk olsem iu go lo wanfala meeting.

Nomata gavman banim waka iumi bae no stop for preach (Paragraf 13 storyim diswan) *

13. Wanem nao iumi savve lanem from story blo olketa brata blo iumi lo Soviet Union bifor?

13 Hao for duim preaching waka bae depend lo ples wea iumi stap. Bat bikos iumi lovem Jehovah and laek for talem narawan abaotem Kingdom blo hem, iumi bae faendem eni wei for iumi mas preach. (Luke 8:1; Acts 4:29) Wanfala woman for raetem history, Emily Baran, storyim preaching waka blo olketa Jehovah’s Witness lo taem blo Soviet Union bifor, hem sei: “Taem gavman talem olketa Jehovah’s Witness for no preach, olketa Witness iusim eni chance for story lo neiba, pipol lo waka ples, and olketa fren. From datwan olketa putim olketa lo prison, bat nomata olsem olketa gohed preach lo olketa nara prisoner.” Nomata gavman banim waka blo olketa brata lo Soviet Union bifor, olketa no enitaem stop for preach. So sapos enitaem olketa banim preaching waka lo ples iu stap, iu savve followim example blo olketa tu!

WANEM IUMI MAS CAREFUL FOR NO DUIM

Iumi mas savve wanem taem for kwaet nomoa (Paragraf 14 storyim diswan) *

14. Sams 39:1 helpem iumi for careful for no duim wanem samting?

14 Mas careful taem iu storyim information. Taem olketa banim waka blo iumi, iumi need for luksavve wanem taem nao iumi mas stap kwaet. (Eklesiastes 3:7) Iumi mas no storyim information wea olketa narawan shud no savve abaotem, olsem nem blo olketa brata and sista, ples for hipap for meeting, hao iumi duim ministry, and hao iumi kasem spiritual kaikai. Iumi bae no talem eni information olsem lo eniwan blo gavman. And tu, iumi shud no storyim lo olketa relative or olketa fren lo kantri blo iumi or lo nara kantri. Sapos iumi storyim olketa information olsem, iumi putim laef blo olketa brata blo iumi lo danger.—Readim Sams 39:1.

15. Wanem nao Satan trae for duim lo iumi, and wanem nao iumi shud duim?

 15 No letem olketa smol problem nomoa for divaedem iumi. Satan savve sapos pipol faet witim olketa seleva bae olketa no stand strong. (Mark 3:24, 25) Hem bae gohed for trae duim olketa samting for divaedem iumi. Wanem Satan laekem nao hem for iumi gohed for faet between iumiseleva nomoa, winim wei for iumi faet againstim hem.

16. Wanem gudfala example nao Sista Gertrud Poetzinger showimaot?

16 Olketa mature Christian tu need for careful lo diswan. Tingim example blo tufala anointed sista hia, Gertrud Poetzinger and Elfriede Löhr. Tufala and olketa nara sista stap tugeta lo wanfala concentration camp blo Nazi. Gertrud start for jealous taem Elfriede givim olketa tok for encouragem olketa nara sista. Bat bihaen, Gertrud luksavve hem shud no garem kaen tingting olsem and hem barava askem Jehovah for helpem hem. Hem raet olsem, “Iumi mas lane for acceptim dat olketa narawan maet garem moa savve or garem moa responsibility winim iumi.” Hao nao hem winim datfala feeling for jealous? Gertrud tingim olketa naesfala wei blo Elfriede and hao hem savve fren gud witim narawan. Taem hem duim olsem, hem fren gud moa witim Elfriede. Bihaen tufala kamaot from concentration camp, tufala gohed faithful for worshipim Jehovah go kasem taem tufala finisim assignment blo tufala lo earth. Sapos iumi waka hard for no gohed garem problem witim olketa brata blo iumi, datwan showimaot iumi no letem eni samting for divaedem iumi.—Col. 3:13, 14.

17. Why nao iumi mas no followim tingting blo iumiseleva?

17 No followim tingting blo iuseleva. Sapos iumi followim direction wea iumi kasem from olketa brata wea garem responsibility for lukaftarem iumi, iumi bae misstim olketa problem. (1 Pet. 5:5) Olsem example, lo wanfala kantri wea olketa banim waka blo iumi, olketa brata wea garem responsibility, talem olketa pablisa for no givimaot eni pablikeson lo ministry. Nomata olsem, wanfala pioneer brata lo datfala ples tingse hem nao savve, so hem gohed for givimaot olketa pablikeson. Wanem nao happen? No longtaem bihaen hem and samfala narawan finis for duim enitaem witnessing, olketa police kwestinim olketa. Luk olsem, samfala man wea waka for gavman followim olketa and tekem bak olketa pablikeson wea olketa givimaot. Wanem nao iumi savve lanem from disfala experience? Iumi need for followim direction nomata sapos iumi tingse iumi nao savve. Jehovah bae evritaem hapi lo iumi sapos iumi obey and followim direction  wea iumi kasem from olketa brata wea hem markem for leadim iumi.—Heb. 13:7, 17.

18. Why nao iumi mas careful for no mekem olketa rul wea pipol no needim?

18 No mekem olketa rul wea pipol no needim. Sapos olketa elder mekem olketa rul wea pipol no needim, datwan bae putim hevi lo olketa narawan. Brata Juraj Kaminský storyim taem gavman banim waka lo kantri wea nem blo hem Czechoslovakia bifor, sei: “Bihaen olketa arrestim staka lo olketa elder and olketa brata wea garem responsibility, samfala brata wea lukaftarem kongregeson and circuit start for mekem olketa rul for olketa pablisa for mas followim and talem olketa wanem olketa shud duim and shud no duim.” Jehovah no givim raet lo eniwan for mekem olketa disison for olketa narawan. Sapos samwan mekem olketa rul wea iumi no needim datwan bae no protectim olketa brata, bat hem olsem hem trae for bossim faith blo olketa.—2 Cor. 1:24.

MAS NO STOP FOR WORSHIPIM JEHOVAH

19. Nomata Satan traem best blo hem, hao nao Mektu Kronikols 32:7, 8 hem strongim iumi?

19 Main enemy blo iumi Satan, bae no stop for trae for persecutim olketa faithful servant blo Jehovah. (1 Pet. 5:8; Rev. 2:10) Satan and olketa wea sapotim hem, bae traem best for banim worship blo Jehovah. Nomata olsem, iumi no garem eni reason for letem wei for fraet for mekem iumi stop for worshipim Jehovah. (Diutronomi 7:21) Jehovah stap witim iumi, and hem bae gohed for sapotim iumi nomata sapos olketa banim waka blo iumi.—Readim Mektu Kronikols 32:7, 8.

20. Wanem nao iu disaed strong for duim?

20 Iumi mas disaed strong for duim sem samting wea olketa brata blo iumi lo first century olketa duim, olketa talem disfala toktok lo olketa ruler lo datfala taem: “Hem saed bilong iufala sapos iufala tingse hem stret long tingting bilong God for mifala obeyim iufala and no obeyim God. Bat hard tumas for mifala no storyim olketa samting wea mifala lukim and herem.”—Acts 4:19, 20.

SONG 73 Mekem Mifala for No Fraet

^ par. 5 Wanem nao bae iumi duim sapos gavman banim waka blo iumi? Disfala study bae givim iumi olketa gudfala idea lo wanem for duim and no duim mekem iumi no stop for worshipim Jehovah!

^ par. 59 PIKSA: Evri piksa hia showimaot hao olketa Witness preach lo olketa kantri wea olketa stopem samfala samting lo waka blo iumi. Lo disfala piksa wanfala smol grup hipap for meeting insaed storeroom blo wanfala brata.

^ par. 61 PIKSA: Wanfala sista (lo left saed) story lo wanfala woman and trae for faendem wei for startim story abaotem olketa spiritual samting.

^ par. 63 PIKSA: Wanfala brata wea police kwestinim hem, no laek for talemaot eni information abaotem kongregeson blo hem.