Skip to content

Skip to table of contents

 STUDY ARTICLE 4

“Spirit Bilong God Showimaot Klia”

“Spirit Bilong God Showimaot Klia”

“Spirit bilong God showimaot klia long heart bilong iumi, iumi olketa pikinini bilong hem.”—ROME 8:16.

SONG 25 Spesol Pipol Bilong God

WANEM IUMI BAE STORYIM *

Lo wanfala spesol wei Jehovah givim holy spirit blo hem lo wanfala grup blo samting olsem 120 Christian lo Pentecost (Paragraf 1-2 storyim diswan)

1-2. Wanem spesol samting nao happen lo day blo Pentecost lo 33 C.E.?

LO SUNDAY morning lo year 33 C.E., hem day blo Pentecost lo Jerusalem. Wanfala grup blo 120 disaepol hipap lo rum antap lo wanfala haos. (Acts 1:13-15; 2:1) Tu-thri day bifor datwan, Jesus talem olketa for gohed stap lo Jerusalem bikos olketa bae kasem wanfala spesol present. (Acts 1:4, 5) Then wat nao happen?

2 ‘Seknomoa olketa herem wanfala big noise wea start kam long skae,’ and wea saond olsem strongfala wind. Olketa herem datfala saond lo full haos. Then “olketa lukim samting olsem olketa smolfala fire wea laet” stap antap lo hed blo olketa disaepol, and evriwan lo “olketa kasem holy spirit.” (Acts 2:2-4) Lo disfala spesol wei, Jehovah givim holy spirit blo hem lo datfala grup. (Acts 1:8) Olketa hia kamap olketa first wan for kasem anointing from holy spirit * and olketa kasem hope for rul witim Jesus lo heven.

WANEM NAO HAPPEN TAEM SAMWAN KASEM ANOINTING?

3. Why nao olketa lo Pentecost barava sure dat olketa kasem anointing from holy spirit?

3 Sapos iu wanfala lo olketa disaepol wea stap lo rum hia lo datfala day, iu bae no savve forgetim datwan. Samting wea luk olsem wanfala smol fire hem laet antap lo hed blo iu, and  iu start for story lo difren languis! (Acts 2:5-12) Iu bae barava sure dat iu kasem anointing from holy spirit. Bat waswe, evriwan wea kasem anointing, olketa kasem datwan lo kaen spesol wei olsem and lo semtaem lo laef blo olketa? Nomoa. Hao nao iumi savve lo datwan?

4. Waswe, olketa anointed wan lo first century kasem anointing lo semtaem lo laef blo olketa? Minim kam.

4 Distaem bae iumi storyim wanem taem nao samwan kasem anointing. Lo Pentecost 33 C.E., hem no datfala grup blo samting olsem 120 Christian nomoa kasem anointing from holy spirit. Lo datfala sem day, samting olsem 3,000 moa kasem holy spirit wea Jesus promisim. Olketa kasem anointing taem olketa baptaes. (Acts 2:37, 38, 41) Bat lo olketa year bihaen, no evri anointed Christian kasem anointing taem olketa baptaes. Olketa Samaritan kasem anointing lelebet longtaem bihaen olketa baptaes. (Acts 8:14-17) And lo narafala wei wea barava difren and spesol, Cornelius and famili blo hem kasem anointing bifor olketa baptaes.—Acts 10:44-48.

5. Olsem 2 Corinth 1:21, 22 storyim, wanem nao happen taem samwan kasem anointing from holy spirit?

5 Distaem bae iumi storyim wanem nao happen lo samwan taem hem kasem anointing from holy spirit. Samfala wea kasem anointing, maet lo firstaem olketa faendem hem hard for acceptim dat Jehovah hem chusim olketa. Olketa maet ting, ‘Why nao God chusim mi?’ Olketa narawan maet no ting olsem. Nomata wanem tingting nao olketa garem, aposol Paul explainim wanem nao happen lo evriwan wea kasem anointing. Hem sei: “Bihaen iufala biliv long hem, God iusim holy spirit wea hem promisim for putim mark * long iufala. Hem iusim Christ nao for duim diswan. Datfala holy spirit hem olsem wanfala promis for showimaot iumi bae kasem samting wea God promisim long iumi.” (Eph. 1:13, 14) So Jehovah iusim holy spirit  blo hem for barava showimaot klia lo olketa Christian hia dat hem chusim olketa. Lo wei olsem, datfala holy spirit hem “olsem wanfala [saen or] promis” wea hem givim for mekem olketa sure dat lo future olketa bae laef olowe lo heven and no lo earth.—Readim 2 Corinth 1:21, 22.

6. Wanem nao wanfala anointed Christian mas duim for kasem reward blo hem for go lo heven?

6 Sapos wanfala Christian hem anointed, waswe, datwan minim hem kasem finis datfala reward for go lo heven? Nomoa. Hem sure dat Jehovah chusim hem for go lo heven. Bat, hem mas tingim disfala kaonsel: “Olketa brata, from God hem chusim iufala, traem best for gohed faithful long hem. Sapos iufala gohed duim olketa samting hia, bae iufala win.” (2 Pet. 1:10) So nomata sapos Jehovah chusim wanfala anointed Christian for go lo heven, hem bae kasem datfala reward only sapos hem gohed faithful.—Phil. 3:12-14; Heb. 3:1; Rev. 2:10.

HAO NAO SAMWAN HEM SAVVE SAPOS HEM ANOINTED?

7. Hao nao olketa anointed wan savve olketa garem hope for go lo heven?

7 Bat hao nao wanfala brata or sista savve hem garem hope for go lo heven? Ansa hem klia tumas insaed toktok wea Paul talem for olketa lo Rome wea kasem anointing for kamap “olketa holy wan.” Hem sei olsem lo olketa: “God iusim datfala spirit for adoptim iumi olsem olketa son bilong hem. Datfala spirit mekem iumi singaot olsem: ‘Abba, Dadi!’ Spirit bilong God showimaot klia long heart bilong iumi, iumi olketa pikinini bilong hem.” (Rome 1:7, ftn; 8:15, 16) So thru lo holy spirit blo hem, God barava mekem klia lo olketa anointed wan hao olketa garem hope for go lo heven.—1 Thess. 2:12.

8. Hao nao 1 John 2:20, 27 showimaot olketa anointed Christian no needim eniwan for talem dat olketa anointed?

8 Taem Jehovah givim invitation lo olketa for go lo heven, hem mek sure no eni daot stap lo mind and heart blo olketa. (Readim 1 John 2:20, 27.) Olketa anointed Christian need for kasem teaching from Jehovah thru lo kongregeson olsem iumi evriwan tu. Bat olketa no needim eniwan for talem olketa dat olketa anointed. Jehovah iusim holy spirit wea hem nao barava strongfala paoa blo hem lo full universe, for mekem hem barava klia lo olketa dat olketa anointed!

OLKETA “BORN MOA”

9. Olsem Ephesus 1:18 storyim, taem samwan hem kasem anointing, wanem change nao bae olketa experiencem?

9 Staka brata and sista distaem maet faendem hem hard for minim wanem nao happen lo samwan taem God anointim hem. Datwan mek sense bikos olketa no anointed. God wakem olketa man for laef olowe lo earth, no lo heven. (Jenesis 1:28; Sams 37:29) Bat Jehovah chusim samfala for stap lo heven. Taem hem anointim olketa, hem barava changem nao hope and tingting blo olketa mekem olketa luk forward for laef lo heven.—Readim Ephesus 1:18.

10. Wanem nao hem minim for “born moa”? (Lukim footnote tu.)

10 Taem olketa Christian kasem anointing from holy spirit, olketa “born moa [or born again].” * Taem Jesus storyim diswan hem showimaot hao hem hard for barava explainim lo samwan wea no anointed feeling blo man wea “born moa” or wea “born long holy spirit.”—John 3:3-8.

11. Explainim change wea kamap lo tingting blo samwan wea kasem anointing.

 11 Wanem change nao kamap lo tingting blo olketa Christian wea kasem anointing? Bifor Jehovah anointim olketa Christian hia, olketa garem strongfala hope for laef olowe lo earth. Olketa barava luk forward lo taem wea Jehovah bae finisim evri nogud samting and mekem disfala earth for kamap paradaes. Maet olketa tingim go taem wea olketa bae welkamim bak wanfala famili member or fren wea dae. Bat bihaen olketa kasem anointing, tingting blo olketa hem change. Why nao olsem? Olketa no ting daonem datfala hope for laef olowe lo earth. Olketa no changem tingting blo olketa bikos olketa stress or sorre. Olketa no seknomoa tingse for laef olowe lo earth bae boring. Bat, Jehovah nao iusim holy spirit for changem tingting and hope wea olketa garem.

12. Olsem 1 Peter 1:3, 4 storyim, hao nao olketa anointed Christian feel abaotem hope blo olketa?

12 Samwan wea kamap anointed maet feel hem no fitim disfala spesol privilege. Nomata olsem, no enitaem hem bae daotem dat Jehovah chusim hem finis. Hem bae barava hapi and tinghae lo hope blo hem for stap lo heven.—Readim 1 Peter 1:3, 4.

13. Hao nao olketa anointed wan feel abaotem laef blo olketa lo earth?

13 So waswe, datwan minim olketa anointed wan laek for dae? Aposol Paul ansarem datfala kwestin. Hem comparem body blo man witim wanfala tent and hem sei: “Iumi wea stap long disfala tent iumi krae long heart and wari tumas, no bikos iumi laek for aotem disfala tent . . . bat bikos iumi laek for kasem datfala haos long heven, mekem body hem finis and iumi kasem laef olowe.” (2 Cor. 5:4) Olketa Christian hia olketa no tingse laef lo earth hem boring and olketa laek for dae kwiktaem nomoa. Bat, olketa enjoyim laef and laek for iusim each day for worshipim Jehovah witim famili and olketa fren blo olketa. Nomata olsem, lo evri samting wea olketa duim, olketa evritaem tingim datfala nambawan hope wea olketa garem for future.—1 Cor. 15:53; 2 Pet. 1:4; 1 John 3:2, 3; Rev. 20:6.

WASWE, JEHOVAH ANOINTIM IU?

14. Wanem nao samfala samting wea no minim dat samwan kasem anointing from holy spirit?

14 Enitaem iu ting, ‘Waswe, mi anointed or nomoa?’ Sapos olsem, tingim olketa important kwestin hia: Waswe, iu garem strong feeling for laek duim will blo Jehovah? Waswe, iu ting lo iuseleva olsem samwan wea barava strong for duim preaching waka? Waswe, iu enjoyim wei for lane abaotem olketa deep samting lo Bible abaotem God? (1 Cor. 2:10) Waswe, iu feel olsem Jehovah barava blessim preaching waka blo iu? Waswe, iu garem disfala feeling for mas barava helpem olketa narawan lo spiritual wei? Waswe, iu lukim pruv wea showimaot Jehovah barava helpem iu lo staka difren wei lo laef? Sapos ansa blo iu for olketa kwestin hia hem yes, waswe, datwan pruvim iu kasem anointing for go lo heven? Nomoa. Why nao olsem? Bikos evri servant blo Jehovah savve garem sem kaen feeling olsem, nomata olketa anointed or nomoa. And thru lo holy spirit blo hem, Jehovah savve givim sem paoa lo eni servant blo hem, nomata wanem hope nao hem garem. Sapos iu ting raonem yet and no sure dat iu kasem anointing, datkaen wei for daot olsem hem minim iu no wanfala anointed. Olketa wea Jehovah chusim bae no ting, ‘Waswe, mi anointed or nomoa?’ Olketa barava sure lo datwan!

Jehovah iusim holy spirit blo hem for givim paoa lo Abraham, Sarah, David, and John Baptaesa for duim olketa spesol samting, bat hem no iusim datfala spirit for givim hope lo olketa for stap lo heven (Paragraf 15-16 storyim diswan) *

15. Hao nao iumi savve dat no evriwan wea kasem holy spirit nao God chusim for go lo heven?

 15 Insaed Bible, hem garem staka example blo olketa faithful man wea kasem holy spirit. Bat, olketa no garem hope for stap lo heven. Holy spirit leadim David. (Fas Samuel 16:13) Holy spirit helpem hem for minim olketa deep samting abaotem Jehovah, and tu, holy spirit muvim hem for raetem samfala part blo Bible. (Mark 12:36) Nomata olsem, aposol Peter sei: “David hem no go ap long heven.” (Acts 2:34) John Baptaesa kasem holy spirit. (Luke 1:13-16) Jesus sei no eniwan hem winim John, bat then Jesus sei John no insaed lo datfala Kingdom lo heven. (Matt. 11:10, 11) Jehovah iusim holy spirit blo hem for givim lo olketa man hia paoa for duim olketa spesol samting, bat hem no iusim datfala spirit for chusim olketa for stap lo heven. Waswe, datwan minim olketa no barava faithful olsem olketa wea God chusim for rul lo heven? Nomoa. Hem just minim Jehovah bae mekem olketa laef bak insaed lo Paradaes earth.—John 5:28, 29; Acts 24:15.

16. Wanem hope nao staka pipol blo Jehovah luk forward for hem distaem?

16 Klosap evri pipol blo Jehovah lo earth distaem no garem hope for stap lo heven. Olketa olsem Abraham, Sarah, David, John Baptaesa, and staka nara man and woman bifor, wea luk forward for stap lo earth taem Kingdom blo God bae rul ovarem olketa.—Heb. 11:10

17. Olketa wanem kwestin nao bae iumi storyim lo next study?

17 Distaem samfala anointed wan still stap midolwan olketa pipol blo God, so maet iumi garem samfala kwestin. (Rev. 12:17) Olsem example, hao nao olketa anointed shud ting lo olketa seleva? Sapos samwan lo kongregeson blo iu start for kaikaim bred and drinkim wine lo Memorial, hao nao iu shud treatim datfala man? And hao sapos namba blo olketa wea sei olketa anointed hem gogo ap? Waswe, iu shud wari abaotem datwan? Iumi bae ansarem olketa kwestin hia lo next study.

^ par. 5 Start kam lo Pentecost 33 C.E., Jehovah givim wanfala barava spesol hope lo samfala Christian. Disfala hope hem for olketa rul lo heven witim Son blo hem. Bat, hao nao olketa Christian hia savve dat olketa kasem datfala spesol privilege? Wanem nao happen taem samwan hem kasem disfala invitation? Disfala study hem kam from wanfala article wea stap lo January 2016 Wastaoa. Disfala study bae ansarem olketa interesting kwestin hia.

^ par. 2 MINING BLO WANFALA TOKTOK: Kasem anointing from holy spirit: Jehovah iusim holy spirit blo hem for chusim man wea bae rul witim Jesus lo heven. Datfala holy spirit hem olsem “wanfala promis” wea God givim lo datfala man for showimaot wanem hem bae kasem lo future. (Eph. 1:13, 14) Olketa Christian hia savve sei holy spirit “showimaot klia” lo olketa hao reward blo olketa hem lo heven.—Rome 8:16.

^ par. 5 MINING BLO WANFALA TOKTOK: Putim mark. Jehovah putim mark lo olketa anointed wan, bat datfala mark hem no permanent yet. Just bifor wanfala faithful anointed Christian hem dae, or bifor bigfala trabol start, bae hem kasem mek-tu mark wea hem nao permanent wan.—Eph. 4:30; Rev. 7:2-4; lukim “Kwestin From Reader” lo April 2016 Wastaoa.

^ par. 10 For kasem moa information abaotem wanem hem minim for “born moa,” lukim Wastaoa, July 1, 2009, page 3-12.

SONG 27 Olketa Son Bilong God Showaot

^ par. 57 PIKSA: Nomata iumi stap lo prison bikos lo faith blo iumi or iumi free for preach and teachim truth, iumi savve luk forward for stap lo earth taem Kingdom blo God bae rul ovarem iumi.