Skip to content

Skip to table of contents

 STUDY ARTICLE 3

Iumi Spesol lo Jehovah!

Iumi Spesol lo Jehovah!

“Hem tingim iumi taem iumi feel sorre.”—PS. 136:23, NW.

SONG 33 Torowem Hevi Long Jehovah

WANEM IUMI BAE STORYIM *

1-2. Olketa wanem situation nao samfala pipol blo Jehovah feisim, and hao nao datwan savve affectim olketa?

TINGIM thrifala example hia: Doctor talem wanfala young brata dat hem garem big sik wea bae isisi mekem full body for wik. Wanfala brata wea winim 50 years mas finis from waka, and nomata hem traem best for lukaotem waka hem no savve faendem eni waka. Wanfala faithful olo sista no savve duim nao staka samting olsem hem duim bifor lo waka blo Jehovah.

2 Sapos iu garem sem problem olsem olketa hia, iu maet feel dat iu no fit for duim eni samting nao. Olketa situation hia savve mekem iu for no hapi, mekem iu ting daonem iuseleva, and affectim wei wea iu fren witim olketa narawan.

3. Hao nao Satan and olketa wea followim hem ting lo laef?

3 Disfala world showimaot tingting blo Satan abaotem laef blo olketa man. Start kam from bifor, Satan ting lo olketa man olsem olketa no important. Satan barava no kea abaotem Eve. Nomata hem savve Eve bae dae, hem talem Eve dat hem bae kamap free sapos hem disobeyim God. Satan nao kontrolem olketa samting saed lo bisnis, gavman, and religion blo disfala world. So iumi no sapraes for lukim dat staka bisnisman, olketa leader blo gavman and religion garem sem wei blo Satan for no respectim olketa man and ting nating lo laef blo olketa.

4. Wanem nao iumi bae storyim lo disfala study?

4 Bat Jehovah hem no olsem, hem laekem iumi for hapi lo wanem iumi fit for duim, and hem bae helpem iumi taem  iumi feisim olketa situation wea savve mekem iumi for feel iusles. (Ps. 136:23, NW; Rome 12:3) Disfala study bae storyim hao Jehovah helpem iumi lo olketa situation hia: (1) Taem iumi sik, (2) taem iumi garem problem saed lo selen, and (3) taem wei for olo mekem iumi feel olsem iumi no savve duim eniting for Jehovah nao. Bat, firstaem bae iumi lukim why nao iumi sure dat each wan lo iumi hem spesol lo Jehovah.

IUMI SPESOL LO JEHOVAH

5. Wanem nao pruvim lo iu dat olketa man barava spesol lo Jehovah?

5 Nomata Jehovah wakem iumi from dust lo graon, iumi barava spesol winim datwan. (Jenesis 2:7) Tingim samfala reason why iumi savve dat iumi spesol lo Jehovah. Hem creatim iumi for garem olketa wei blo hem. (Jenesis 1:27) Taem hem duim datwan, hem mekem iumi gud winim evri nara creation lo earth, and hem markem iumi for lukaftarem earth and olketa animal.—Sams 8:4-8.

6. Wanem nao nara samting wea pruvim iumi spesol lo Jehovah nomata iumi no perfect?

6 Nomata bihaen Adam sin, tingting blo Jehovah hem no change, iumi still spesol lo hem. Iumi barava important lo hem dastawe hem givim Jesus, Son blo hem wea hem lovem tumas, olsem wanfala ransom for olketa sin blo iumi. (1 John 4:9, 10) Bikos lo datfala ransom, Jehovah bae resurrectim “pipol wea raeteous and pipol wea no raeteous” wea dae from sin blo Adam. (Acts 24:15) Bible showimaot hao nomata iumi sik, garem hard taem saed lo selen, or olo, iumi barava important lo Jehovah.—Acts 10:34, 35.

7. Wanem nao olketa nara reason wea mekem iumi bilivim dat iumi spesol lo Jehovah?

7 Iumi garem samfala reason moa for bilivim dat iumi spesol lo Jehovah. Hem leadim iumi kam lo hem and hem lukim wei wea iumi acceptim datfala gud nius. (John 6:44) Taem iumi fren gud witim Jehovah, hem fren gud witim iumi tu. (Jas. 4:8) Jehovah spendem taem and duim staka samting for teachim iumi, datwan showimaot iumi barava spesol lo hem. Hem savve wanem kaen man nao iumi distaem, and hem savve wanem kaen man nao iumi savve kamap. And hem stretem iumi bikos hem lovem iumi. (Provebs 3:11, 12) Evri samting hia barava showimaot klia hao iumi spesol lo Jehovah!

8. Hao nao toktok wea stap lo Sams 18:27-29 affectim hao iumi ting lo olketa problem blo iumi?

8 Nomata samfala ting lo King David olsem hem iusles man nomoa, David savve dat Jehovah lovem and sapotim hem. Datwan helpem David garem stret tingting abaotem situation blo hem. (Mektu Samuel 16:5-7) Taem iumi feel sorre or feisim olketa problem, Jehovah savve helpem iumi for garem stretfala tingting and hem bae helpem iumi for winim olketa problem hia. (Readim Sams 18:27-29.) Sapos Jehovah sapotim iumi, no eni samting savve stopem iumi for hapi and gohed servem hem. (Rome 8:31) Distaem bae iumi storyim thrifala situation wea taem hem kamap, hem important for iumi tingim hao Jehovah lovem and tinghae lo iumi.

TAEM IUMI SIK

Wei for readim toktok blo Jehovah wea stap lo Bible bae helpem iumi for deal witim negative tingting wea iumi garem taem iumi sik (Paragraf 9-12 storyim diswan)

9. Hao nao sik savve affectim wei wea iumi ting lo iumiseleva?

9 Sik savve affectim mind blo iumi, hem savve mekem iumi feel olsem iumi no savve duim eni gud samting for eniwan. Iumi maet shame taem pipol luksavve dat iumi sik, or iumi mas depend lo olketa narawan for help. Nomata sapos olketa narawan no savve dat iumi sik, iumi maet garem feeling for shame  bikos iumi no savve duim olketa samting wea iumi bin duim bifor. Lo olketa hard taem olsem, Jehovah savve encouragem iumi. Hao nao hem savve encouragem iumi?

10. Olsem Provebs 12:25 talem, wanem nao savve helpem iumi taem iumi sik?

10 Taem iumi sik, “gudfala toktok” savve encouragem iumi. (Readim Provebs 12:25.) Lo Bible, Jehovah givim olketa gudfala toktok for remindim iumi hao iumi important lo hem nomata iumi sik. (Sams 31:19; 41:3) Sapos iumi readim and readim bak moa olketa toktok hia, Jehovah bae helpem iumi for deal witim negative tingting wea iumi garem taem iumi sik.

11. Hao nao Jehovah helpem wanfala brata?

11 Tingim disfala experience blo Jorge. Taem Jorge young, hem kasem wanfala sik wea kwiktaem tumas for spoelem body blo hem and datwan mekem hem feel iusles. Jorge sei: “Mi no savve hao for deal witim sik blo mi and mi shame bikos datfala sik hem mekem olketa narawan for lukluk strong lo mi. Taem sik blo mi kamap worse, mi tingim hao laef blo mi bae barava change. Mi feel sorre tumas, and mi barava askem Jehovah for helpem mi.” Hao nao Jehovah helpem hem? Hem sei moa: “Bikos mi garem problem saed lo wei for concentrate, olketa encouragem mi for readim olketa short verse lo Psalms wea storyim hao Jehovah kea for olketa wea worshipim hem. Mi readim bak moa olketa scripture hia each day, and datwan barava comfortim mi. Gogo olketa narawan lukim hao mi start for smile moa. Olketa talem tu hao wei wea mi hapi hem encouragem olketa. Mi luksavve dat Jehovah hem ansarem olketa prea blo mi! Hem helpem mi for changem hao mi ting lo miseleva. Mi putim mind blo mi nomoa lo wanem Bible talem  abaotem hao Jehovah ting lo mi nomata mi sik.”

12. Taem iu sik, hao nao iu savve kasem help from Jehovah?

12 Taem iu sik, iu savve sure dat Jehovah savve lo wanem hem kasem iu. Iu savve barava askem hem for helpem iu garem stretfala tingting abaotem situation blo iu. Then lukluk lo Bible for faendem olketa gudfala toktok wea Jehovah givim iumi. Ting raonem olketa verse wea showimaot hao Jehovah barava tinghae lo olketa wea worshipim hem. Taem iu duim olsem, iu bae lukim hao Jehovah hem kaen tumas lo olketa wea faithful for servem hem.—Sams 84:11.

TAEM IUMI GAREM PROBLEM SAED LO SELEN

Wei for tingim evritaem hao Jehovah promis for provaedem wanem iumi needim bae helpem iumi taem iumi no savve faendem waka (Paragraf 13-15 storyim diswan)

13. Hao nao feeling blo wanfala hed lo famili sapos hem lusim waka blo hem?

13 Evri hed blo famili laek for provaedem wanem famili needim. Bat hao sapos olketa finisim wanfala brata from waka blo hem, nomata hem no duim eni rong samting. Hem trae for lukaotem nara waka bat hem no savve faendem. From datwan, maet hem feel iusles. Hao nao wei for tingim olketa promis blo Jehovah savve helpem hem?

14. Why nao Jehovah keepim olketa promis blo hem?

14 Jehovah evritaem keepim olketa promis blo hem. (Josua 21:45; 23:14) Hem duim datwan for staka reason. First reason, hem bikos datwan bae affectim nem blo hem or hao pipol ting lo hem. Jehovah promis hao hem bae lukaftarem olketa wea faithful for worshipim hem, and hem ting hem mas duim wanem hem promisim. (Sams 31:1-3) Nara samting tu, Jehovah savve dat iumi bae feel sorre tumas sapos hem no lukaftarem evriwan wea part lo famili blo hem. Jehovah promis for givim wanem iumi needim lo laef  and wanem iumi needim for gohed faithful for servem hem, and no eni samting savve stopem hem for fulfillim datfala promis!—Matt. 6:30-33; 24:45.

15. (a) Wanem challenge nao olketa Christian lo first century feisim? (b) Wanem nao Sams 37:18, 19 helpem iumi for barava trustim?

15 Taem iumi tingim why Jehovah keepim olketa promis blo hem, iumi savve barava trustim hao hem bae helpem iumi taem iumi kasem hard taem saed lo selen. Tingim example blo olketa Christian lo first century. Taem bigfala persecution kamap lo kongregeson lo Jerusalem, klosap evriwan olketa ranawe go stap lo olketa didifren ples, olketa aposol nomoa stap. (Acts 8:1) So wanem nao datwan minim? Olketa kasem hard taem saed lo selen! Luk olsem olketa Christian hia lusim olketa haos and bisnis blo olketa. Nomata olsem, Jehovah no lusim olketa; and tu olketa no lusim hapi wea olketa garem. (Acts 8:4; Heb. 13:5, 6; Jas. 1:2, 3) Jehovah sapotim olketa faithful Christian hia, and hem bae sapotim iumi tu.—Readim Sams 37:18, 19.

TAEM IUMI KAMAP OLO AND NO SAVVE DUIM STAKA SAMTING

Nomata iumi olo, wei for tingim wanem iumi fit for duim bae helpem iumi for sure Jehovah tinghae lo iumi and wei wea iumi faithful for duim waka blo hem (Paragraf 16-18 storyim diswan)

16. Wanem nao savve mekem iumi for tingse maet Jehovah no tinghae lo worship blo iumi?

16 Taem iumi gogo for olo, maet iumi start for feel olsem iumi no fit nao for duim staka samting for Jehovah. Maet King David feel olsem tu taem hem gogo for olo. (Sams 71:9) Hao nao Jehovah savve helpem iumi?

17. Wanem nao iumi savve lanem from experience blo sista Jheri?

17 Tingim experience blo wanfala sista wea nem blo hem Jheri. Olketa invaetem hem for attendim wanfala meeting blo maintenance training lo Kingdom Hall, bat hem no laek for go. Hem sei: “Mi olo nao, mi wanfala widow,  and Jehovah bae no fit for iusim mi bikos mi no garem eni savve saed lo maintenance. Mi iusles nomoa.” Lo naet bifor datfala meeting, hem prea lo Jehovah from heart blo hem. Next day, taem hem arrive lo Kingdom Hall, hem still ting olsem, ‘For wat nomoa mi kam?’ Taem datfala meeting gohed, wanfala brata strongim hao samting wea Jehovah laekem nao hem for iumi garem wei for willing for Jehovah teachim iumi. Jheri sei: “Mi ting, ‘Mi fit for duim datwan!’ Mi start for krae bikos mi luksavve Jehovah ansarem prea blo mi. Hem showim mi hao mi fit for duim samting for Jehovah and hem willing for teachim mi!” Taem hem ting bak, Jheri sei moa: “Taem mi go lo datfala meeting mi fraet, wikdaon, and sorre. Bat taem mi go aot from datfala meeting mi no fraet nao, mi kasem encouragement, and mi luksavve mi spesol lo Jehovah!”

18. Wanem nao Bible talem wea showimaot Jehovah gohed for tinghae lo worship blo iumi nomata iumi gogo for olo?

18 Taem iumi gogo for olo, iumi savve sure dat Jehovah still garem waka for iumi duim. (Sams 92:12-15) Jesus teachim hao nomata maet iumi no fit for duim staka samting or iumi tingse wanem iumi duim hem smol tumas, Jehovah barava tinghae lo wanem iumi fit for duim lo waka blo hem. (Luke 21:2-4) So ting abaotem wanem iu fit for duim. Olsem example, gohed story abaotem Jehovah, prea for olketa brata and sista, and encouragem olketa narawan for gohed faithful. Jehovah laekem iumi for waka witim hem bikos iumi willing for obeyim hem, and no bikos iumi fit for duim staka samting.—1 Cor. 3:5-9.

19. Hao nao Rome 8:38, 39 encouragem iumi?

19 Iumi hapi tumas for worshipim Jehovah, wanfala God wea ting lo iumi olsem iumi spesol lo hem! Hem creatim iumi for duim wanem hem laekem, and tru worship nomoa savve mekem man hapi and satisfae lo laef. (Rev. 4:11) Nomata pipol lo world maet ting lo iumi olsem iumi iusles, Jehovah no ting olsem. (Heb. 11:16, 38) Taem iumi feel wikdaon bikos lo sik, hard taem saed lo selen, or taem iumi kamap olo, iumi laek for evritaem tingim hao no eni samting savve stopem iumi for kasem love blo Dadi blo iumi lo heven.—Readim Rome 8:38, 39.

^ par. 5 Waswe, iu feisim olketa situation wea mekem iu feel iusles? Disfala study bae remindim iu dat iu barava spesol lo Jehovah. And disfala study bae storyim tu, wanem iu savve duim for no ting daonem iuseleva nomata wanem nao happen.

SONG 30 Dadi, God, and Fren Bilong Mi