LONG Wednesday morning, January 24, 2018, Bethel famili long United States and Canada herem wanfala spesol announcement: Brata Kenneth Cook, Junior, hem kamap wanfala member bilong Governing Body Bilong Olketa Jehovah’s Witness.
Brata Cook hem born and growap long south-central Pennsylvania, long U.S.A. Hem lanem truth from wanfala classmate bilong hem bifor hem graduate from hae skul and hem baptaes long June 7, 1980. Hem start for regular pioneer long September 1, 1982. Bihaen hem pioneer for tufala year, hem kasem invitation for go waka long Bethel. Hem start waka long Wallkill, New York, long October 12, 1984.
For 25 year, Brata Cook duim olketa difren assignment long Printery and Bethel Office. Hem maritim waef bilong hem Jamie, long 1996, and tufala waka tugeta long Wallkill Bethel. Long December 2009, Brata and Sista Cook muv go long Watchtower Educational Center long Patterson, New York, and long there Brata Cook kasem assignment for waka long Writing Correspondence Department. Long April 2016, bihaen tufala go bak for lelebet taem long Wallkill, Brata and Sista Cook go moa long Brooklyn, New York. Faevfala month bihaen, tufala muv go long hedquarter long Warwick, New York. Long January 2017, Brata Cook kasem assignment for waka olsem helper bilong Raeting Komiti bilong Governing Body.