Skip to content

Skip to table of contents

 STUDY ARTICLE 1

“Iu No Wari Bikos Mi Nao God Bilong Iu”

“Iu No Wari Bikos Mi Nao God Bilong Iu”

“Iu no fraet bikos mi stap witim iu. Iu no wari bikos mi nao God bilong iu. Mi bae strongim iu, ia, mi bae helpem iu.”—ISA. 41:10, NW.

SONG 7 Jehovah Nao Strong Bilong Iumi

WANEM IUMI BAE STORYIM *

1-2. (a) Hao nao message wea stap long Isaiah 41:10 helpem Yoshiko? (b) Jehovah givim message long Isaiah 41:10 for hu?

WANFALA faithful Christian sista wea nem bilong hem Yoshiko, herem wanfala nogud nius. Doctor talem Yoshiko hao hem bae laef for tu-thri month nomoa. Taem olsem, wanem nao Yoshiko duim? Hem tingim favorite scripture bilong hem long Isaiah 41:10, NW wea sei: “Iu no fraet bikos mi stap witim iu. Iu no wari bikos mi nao God bilong iu. Mi bae strongim iu, ia, mi bae helpem iu, Mi bae hol strong long iu witim raet hand bilong mi wea evritaem duim stret samting.” Then hem talem doctor hem no fraet bikos Jehovah holem hand bilong hem. * Toktok long verse hia helpem sista bilong iumi for barava trustim Jehovah. Datfala sem verse savve helpem iumi tu for no wari taem iumi mas deal witim olketa barava hard taem. Bat for savve hao for duim datwan, bae iumi storyim firstaem why God givim datfala message long Isaiah.

2 Jehovah talem Isaiah for raetem datfala toktok for comfortim olketa Jew wea bihaen olketa kamap prisoner long Babylon. Nomata olsem, datfala message hem no for olketa Jew wea prisoner nomoa bat hem for evri pipol bilong hem, start long bifor kam kasem distaem. (Aesaea 40:8; Rome 15:4) Iumi stap long taem wea “evri samting hem hard tumas,” dastawe winim enitaem bifor iumi barava needim datfala encouragement wea stap long buk bilong Isaiah.—2 Tim. 3:1.

3. (a) Wanem promis nao stap long Isaiah 41:10, wea hem yeartext for 2019? (b) Why nao iumi needim olketa promis hia?

3 Long disfala study, iumi bae storyim thrifala promis bilong Jehovah long Isaiah 41:10 wea strongim faith bilong iumi: (1) Jehovah bae stap witim iumi, (2) hem nao God bilong iumi,  and (3) hem bae helpem iumi. Iumi needim olketa promis * hia bikos, olsem Yoshiko, iumi tu feisim olketa hard taem long laef bilong iumi. And, iumi mas deal witim olketa problem wea gohed for happen long disfala world. Samfala long iumi gohed for kasem persecution tu from olketa strongfala gavman. Distaem bae iumi story raonem thrifala promis hia.

“MI STAP WITIM IU”

4. (a) Wanem nao first promis wea iumi bae storyim? (Lukim footnote tu.) (b) Hao nao Jehovah showimaot hem barava lovem iumi? (c) Hao nao samting wea God talem hem affectim iu?

4 First promis wea Jehovah talem for strongim iumi, hem nao: “Iu no fraet bikos mi stap witim iu.” * Jehovah showimaot hem stap witim iumi long wei wea hem barava tingim and lovem iumi. Tingim samting wea hem talem wea showimaot hem barava lovem iumi, hem sei: “Mi tinghevi tumas long yufala, an mi lavem yufala. An mi laekem tumas fo liftimap nem blong yufala.” (Aesaea 43:4) No eni samting long disfala universe savve stopem wei wea Jehovah lovem olketa wea worshipim hem, and tu, bae hem faithful long iumi for olowe. (Aesaea 54:10) From hem fren witim iumi and lovem iumi, iumi no fraet. Hem bae protectim iumi distaem, olsem hem protectim Abram (Abraham) wea hem fren bilong hem. Jehovah sei olsem long Abram: “Yu no fraet. Bae mi gohed fo lukaftarem yu.”—Jenesis 15:1.

Jehovah savve helpem iumi for winim olketa hard taem wea iumi feisim wea olsem river and fire (Paragraf 5-6 storyim diswan) *

5-6. (a) Hao nao iumi savve Jehovah barava laek for helpem iumi taem iumi kasem olketa hard taem? (b) Wanem nao iumi lanem from example bilong Yoshiko?

5 Iumi savve Jehovah barava laek for helpem iumi taem iumi kasem olketa hard taem long laef bikos hem promis olsem long pipol bilong hem: “Taem trabol hemi kasem yufala olsem wea yufala gotru long dipsi, bae mi stap wetem yufala. An taem yufala garem hadtaem olsem wea yufala gotru long riva wea hemi ran bikfala, bae hemi no save draonem yufala. Ya, taem trabol hemi kasem yufala olsem wea yufala gotru long faea, bae hemi no save bonem yufala.” (Aesaea 43:2) Wanem nao olketa toktok hia minim?

 6 Jehovah no promis for finisim olketa hard taem wea iumi deal witim. Bat, hem bae no letem olketa problem wea olsem wanfala river for mekem iumi draon, or olketa test wea olsem wanfala fire, for finisim iumi evribit. Hem promisim iumi hao hem bae stap witim iumi, and helpem iumi for go thru long olketa hard taem hia. Wanem nao Jehovah bae duim? Hem bae helpem iumi for no fraet mekem iumi savve gohed faithful long hem nomata sapos iumi bae dae. (Aesaea 41:13) Yoshiko wea iumi storyim long start, luksavve diswan hem tru. Dota bilong hem sei: “Mifala barava tinghae long wei wea mami no wari tumas. Mifala luksavve Jehovah givim hem peace long mind and heart. Go kasem taem hem dae, mami savve story long olketa nurse and olketa nara sikman abaotem Jehovah and olketa promis bilong hem.” Wanem nao iumi lanem from example bilong Yoshiko? Taem iumi trustim promis bilong God wea sei, “bae mi stap wetem yufala,” iumi tu bae no fraet and strong for feisim olketa hard taem wea kasem iumi.

“MI NAO GOD BILONG IU”

7-8. (a) Wanem nao mek-tu promis wea iumi bae storyim, and wanem nao datwan minim? (b) Why nao Jehovah talem olketa Jew long Babylon for “no wari”? (c) Hao nao olketa toktok wea stap long Aesaea 46:3, 4 helpem pipol bilong God for no fraet?

7 Tingim mek-tu promis wea Isaiah raet abaotem, wea sei: “Iu no wari bikos mi nao God bilong iu.” Wanem nao disfala toktok wari hem minim? Taem Isaiah raetem disfala verse, hem iusim languis word for “wari” wea minim “for lukluk raon bikos iu fraet nogud eniting or eniwan spoelem iu,” or for “luk raon bikos iu fraet and panic.”

8 Why nao Jehovah talem olketa Jew wea bae prison long Babylon for no “wari”? Bikos hem savve pipol bilong Babylon bae fraet. Wanem nao bae mekem olketa fraet? Klosap long end bilong 70 year wea olketa Jew stap olsem prisoner, bae bigfala army bilong Medo-Persia attakim Babylon. Jehovah bae iusim disfala army for mekem pipol bilong hem free from wei for prison long Babylon. (Aesaea 41:2-4) Taem olketa pipol bilong Babylon and olketa pipol from nara nation luksavve enemy bilong olketa hem kakam klosap, olketa talem olketa toktok for gohed strongim each other. And tu, olketa mekem staka idol bikos olketa tingse datwan bae protectim olketa. (Aesaea 41:5-7) Bat long datfala taem, Jehovah helpem olketa Jew prisoner for no fraet taem hem sei olketa nao wakaman bilong hem wea hem chusim, so olketa mas no wari bikos hem nao God bilong olketa. (Aesaea 41:8-10) Tingim hao Jehovah sei: “Mi nao God bilong iu.” Toktok hia helpem olketa wea faithful for worshipim Jehovah for luksavve hem no forgetim olketa. Hem God bilong olketa yet and olketa still pipol bilong hem. Hem sei: “Bae mi lukaftarem yufala . . . an sevem yufala.” Olketa toktok hia barava strongim and encouragem olketa Jew long Babylon.—Readim Aesaea 46:3, 4.

9-10. Why nao iumi no need for fraet? Storyim example.

9 Winim enitaem bifor, staka pipol barava wari bikos olketa samting wea happen long world distaem hem kamap worse tumas. Tru nao, olketa problem hia affectim iumi tu. Bat iumi no need for fraet. Jehovah sei: “Mi nao God bilong iu.” Hao nao disfala toktok savve helpem iumi for no wari?

10 Tingim wanfala example: Tufala passenger, Jim and Ben, insaed wanfala plane wea strong wind gohed for sekem. Taem wind bangam and sekem datfala plane. Then wanfala voice tok kam long laod speaker and sei: “Werem seat belt bilong iu. Bae iumi flae thru long strong wind for lelebet taem.” Jim start  for wari tumas. Then datfala pilot sei moa: “Iufala no wari. Mi pilot nao mi story kam.” Taem Jim herem datwan hem sekem hed bilong hem and sei, “Hao nao datfala toktok bae helpem iumi?” Bat, hem lukim Ben nating luk wari nomoa. Jim askem hem: “Why nao iu no wari?” Ben smile and sei: “Bikos mi barava savve gud long datfala pilot. Hem dadi bilong mi ia!” Then Ben sei: “Mi laek storyim dadi bilong mi long iu, bikos mi sure sapos iu savve abaotem hem and wei wea hem barava savve gud hao for flaem plane, iu tu bae no wari.”

11. Wanem nao iumi lanem from example abaotem tufala passenger?

11 Wanem nao iumi savve lanem from disfala example? Olsem Ben, iumi tu bae no wari bikos iumi savve gud long Dadi bilong iumi long heven, Jehovah. Iumi savve hao hem bae lukaftarem iumi thru long olketa barava hard taem wea iumi feisim long olketa last day distaem. (Aesaea 35:4) Iumi trustim Jehovah, dastawe iumi no wari and no fraet nomata pipol long world barava fraet. (Aesaea 30:15) And tu, iumi olsem Ben taem iumi story long olketa narawan abaotem olketa reason why iumi barava trustim God. Taem iumi duim olsem, olketa tu bae barava sure nomata olketa feisim hard taem, Jehovah bae sapotim olketa.

‘MI BAE STRONGIM IU AND HELPEM IU’

12. (a) Wanem nao mek-thri promis wea bae iumi storyim? (b) Wanem nao iumi lanem from Aesaea 40:10?

12 Tingim mek-thri promis wea Isaiah raetem, wea sei: “Mi bae strongim iu, ia, mi bae helpem iu.” Isaiah explainim finis hao Jehovah bae strongim pipol bilong hem, taem hem sei: “Lod [Jehovah] hemi kam nao fo rul long bikfala paoa blong hem.” (Aesaea 40:10) Disfala toktok showimaot Jehovah hem wanfala King wea garem bigfala paoa. Hem iusim paoa bilong hem for sapotim and protectim olketa pipol bilong hem long bifor, and tu, hem gohed for strongim and protectim olketa wea  trustim hem distaem.—Diutronomi 1:30, 31; Aesaea 43:10.

No eni weapon bae win for againstim strongfala hand bilong Jehovah wea savve protectim iumi (Paragraf 12-16 storyim diswan) *

13. (a) Wanem taem nao Jehovah savve keepim promis bilong hem for strongim iumi? (b) Wanem promis nao savve strongim and mekem iumi no fraet?

13 Jehovah savve keepim disfala promis, especially taem olketa enemy persecutim iumi. Hem sei: “Mi bae strongim iu.” Distaem long samfala ples long world, olketa enemy bilong iumi trae hard for stopem preaching waka or banim organization bilong iumi. Nomata olsem, iumi no wari tumas abaotem datwan. Jehovah talem wanfala promis wea strongim and mekem iumi barava trustim hem. Hem promis hao hem bae no letem eni weapon for spoelem pipol bilong hem. (Aesaea 54:17) Disfala toktok remindim iumi abaotem thrifala important samting.

14. Why nao iumi no sapraes taem olketa enemy bilong God attakim iumi?

14 First samting, from iumi olketa follower bilong Christ iumi expectim pipol bae heitim iumi. (Matt. 10:22) Jesus talem olketa disaepol bilong hem hao long olketa last day pipol bae barava persecutim olketa. (Matt. 24:9; John 15:20) Mek-tu, profesi bilong Isaiah warnim iumi hao olketa enemy bae no just heitim iumi nomoa, bat olketa bae iusim olketa difren weapon for againstim iumi. Samfala long olketa weapon hia hem wei wea olketa talem olketa laea story wea luk olsem hem tru, or maet olketa barava laea abaotem iumi, and olketa maet barava raf taem olketa persecutim iumi. (Matt. 5:11) Jehovah bae no stopem olketa enemy bilong iumi for iusim olketa weapon hia for faet againstim iumi. (Eph. 6:12; Rev. 12:17) Bat iumi no need for fraet. Why nao olsem?

15-16. (a) Wanem nao mek-thri samting wea iumi need for tingim, and nao Aesaea 25:4, 5 sapotim datwan? (b) Wanem nao Aesaea 41:11, 12 talem abaotem olketa wea faet againstim iumi?

15 Tingim mek-thri samting. Jehovah sei no eni weapon wea pipol iusim for againstim iumi bae win. Olsem wanfala wall wea protectim iumi from bigfala rain and wind,  Jehovah bae protectim iumi from wei wea olketa enemy againstim iumi. (Readim Aesaea 25:4, 5.) Samting wea olketa enemy bilong iumi duim bae no savve spoelem iumi for olowe.—Aesaea 65:17.

16 Jehovah strongim tu wei wea iumi trustim hem taem hem storyim klia samting wea bae happen long olketa wea againstim iumi. (Readim Aesaea 41:11, 12.) Nomata olketa enemy barava strong for faet againstim iumi or nomata samting wea olketa duim long iumi hem kamap moa worse, olketa bae kasem sem samting nomoa, hem nao: Evri enemy bilong pipol bilong God bae lus and olketa bae finis evribit.

STRONGIM GO MOA WEI WEA IUMI TRUSTIM JEHOVAH

Iumi savve strongim wei wea iumi trustim Jehovah taem iumi read abaotem hem long Bible evritaem (Paragraf 17-18 storyim diswan) *

17-18. (a) Hao nao wei for readim Bible savve strongim wei wea iumi trustim God? Storyim example. (b) Hao nao wei for ting raonem yeartext for 2019 bae helpem iumi?

17 Taem iumi savve gud long Jehovah, datwan bae strongim wei wea iumi trustim hem. And only wei for savve gud long God hem nao for readim Bible and ting raonem gud wanem iumi readim. Bible garem staka story wea showim hao Jehovah protectim pipol bilong hem bifor. Olketa story hia mekem iumi barava trustim hao Jehovah bae protectim and lukaftarem iumi distaem.

18 Tingim disfala example. Isaiah iusim wanfala nambawan tokpiksa for showim hao Jehovah protectim iumi. Hem sei Jehovah hem olsem wanfala shepherd and olketa wea worshipim hem olsem smol sheepsheep. Isaiah sei olsem abaotem Jehovah: “Hemi olsem man hu hemi karim olketa [smol sheepsheep] long am blong hem.” (Aesaea 40:11) Taem iumi feelim wei wea strong hand bilong Jehovah karem iumi, datwan mekem iumi no wari and sure hem protectim iumi. For helpem iumi no wari nomata iumi feisim olketa problem, datfala wakaman wea faithful and wise chusim Isaiah 41:10, NW olsem yeartext for 2019, wea sei: “Iu No Wari Bikos Mi Nao God Bilong Iu.” Ting raonem olketa toktok hia wea savve strongim trust bilong iumi. Datwan bae strongim iu for feisim olketa hard taem wea bae kamap.

SONG 38 Hem Bae Mekem Iu Strong

^ par. 5 Yeartext for 2019 showimaot thrifala reason why iumi no need for wari nomata olketa nogud samting happen long world or kasem iumi. Disfala study bae storyim olketa reason hia and helpem iumi for no wari tumas and trustim Jehovah. Ting raonem disfala yeartext. Traem best for baeheartim. Sapos iu duim olsem, datwan bae strongim iu for deal witim olketa hard taem wea bae kamap.

^ par. 3 MINING BILONG WANFALA TOKTOK: Wanfala promis hem minim tru samting wea samwan talem or samting wea iumi sure hem bae happen. Olketa promis bilong Jehovah mekem iumi barava trustim hem and helpem iumi for no wari tumas abaotem olketa problem wea maet kamap long laef bilong iumi.

^ par. 4 Disfala toktok “No fraet” hem kamap thrifala taem long Aesaea 41:10, 13, and 14. Long olketa sem verse hia, staka taem hem iusim disfala toktok “Mi” (wea minim Jehovah). Why nao Jehovah muvim Isaiah for iusim disfala toktok staka taem? Hem for strongim disfala important point. Wei for trustim Jehovah nomoa savve helpem iumi for katem daon wei for fraet.

^ par. 52 PIKSA: Olketa long famili feisim hard taem long waka ples, saed long health, long ministry, and long skul.

^ par. 54 PIKSA: Olketa police kam long haos wea olketa Jehovah’s Witness holem meeting, bat olketa brata and sista nating panic.

^ par. 56 PIKSA: Wei for duim Famili Worship evritaem savve strongim iumi for no givap.