Skip to content

Skip to table of contents

“Spirit Bilong God Showimaot Klia Long Heart Bilong Iumi”

“Spirit Bilong God Showimaot Klia Long Heart Bilong Iumi”

“Spirit bilong God showimaot klia long heart bilong iumi, iumi olketa pikinini bilong hem.” —ROME 8:16.

SONG: 109, 108

1-3. Olketa wanem samting nao happen long Pentecost 33 C.E. wea mekem datfala day hem spesol, and wanem profesi nao kamap tru long datfala taem? (Lukim piksa long start bilong study.)

TINGIM samting wea happen long Jerusalem long Pentecost 33 C.E. Hem wanfala spesol day for pipol long Jerusalem. Long datfala Sunday morning hem spesol festival for start bilong wheat harvest. Long temple hae priest offerim finis olketa sakrifaes. Then long samting olsem naen klok, hem offerim tufala bred wea garem yeast wea olketa wakem from olketa firstfala wheat wea olketa harvestim. Hae priest holem tufala bred hia long hand bilong hem and muvim from saed tu saed for offerim go long Jehovah.—Lev. 23:15-20.

2 Olketa hae priest duim datwan long evri Pentecost for staka handred year finis. Samting wea hae priest duim taem hem offerim tufala bred hia hem olsem wanfala important samting wea happen long Pentecost 33 C.E. Datfala samting hem happen long 120 disaepol bilong Jesus wea prea insaed long rum antap long wanfala haos long Jerusalem. (Acts 1:13-15) Samting olsem  800 year bifor datwan, profet Joel hem talem profesi abaotem diswan. (Joel 2:28-32; Acts 2:16-21) Wanem nao datfala important samting wea happen?

3 Readim Acts 2:2-4. Long Pentecost 33 C.E., God givim holy spirit long 120 disaepol hia and olketa kamap olketa anointed Christian. (Acts 1:8) Then, staka pipol hipap raonem olketa disaepol, and olketa disaepol hia start for story abaotem olketa nambawan samting wea olketa lukim and herem. Aposol Peter story abaotem olketa samting wea happen and why hem barava important. Then hem talem olketa wea hipap: “Iufala mas repent and baptaes long nem bilong Jesus Christ mekem iufala kasem forgiveness for sin bilong iufala. Then iufala bae kasem datfala holy spirit.” Long datfala day, samting olsem 3,000 pipol nao baptaes, and olketa tu kasem holy spirit.—Acts 2:37, 38, 41.

4. (a) Why nao iumi interest long samting wea happen long Pentecost 33 C.E.? (b) Wanem nara important samting nao maet happen staka year bifor, long sem day? (Lukim endnote.)

4 Hu nao hae priest piksarem, and wanem nao tufala bred wea hem offerim long Pentecost hem piksarem? Hae priest hem piksarem Jesus. Tufala bred hem piksarem olketa anointed disaepol bilong Jesus. Olketa disaepol hia hem olketa man wea sin, and Bible sei olketa hia nao “olketa first wan.” (Jas. 1:18) God hem adoptim olketa for kamap olketa son bilong hem and hem chusim olketa for rul long Kingdom witim Jesus long heven. (1 Pet. 2:9) Jehovah bae iusim Kingdom for givim gudfala samting for olketa man wea obeyim hem. So nomata iumi garem hope for rul witim Jesus long heven or laef olowe long paradaes long earth, Pentecost 33 C.E. hem barava important long iumi. [1]

HAO GOD ANOINTIM WANFALA CHRISTIAN

5. Hao nao iumi savve anointing wea evri anointed Christian kasem hem no semsem?

5 Olketa disaepol wea stap long datfala rum long datfala day bae no savve forgetim samting wea happen. Evriwan long olketa garem smolfala fire wea laet antap long hed bilong olketa. Jehovah mekem olketa savve toktok long olketa difren languis. Olketa barava sure Jehovah anointim olketa long holy spirit. (Acts 2:6-12) Bat olketa spesol samting hia no happen long evriwan wea kamap anointed Christian. Olsem example, Bible no storyim olketa smolfala fire laet antap long hed bilong samting olsem 3,000 pipol long Jerusalem wea baptaes long datfala sem day. Olketa hia kasem anointing taem olketa baptaes. (Acts 2:38) And tu, no evri Christian kasem anointing taem olketa baptaes. Olketa Christian long Samaria kasem anointing bihaen olketa baptaes. (Acts 8:14-17) Bat Cornelius and olketa long haos bilong hem kasem anointing bifor olketa baptaes.—Acts 10:44-48.

6. Wanem nao evri anointed Christian kasem, and wanem nao olketa sure long hem?

6 So anointing wea evri anointed Christian kasem hem no semsem. Maet samfala stretawe luksavve long datwan. Olketa narawan, hem tek taem for olketa luksavve. Nomata olsem, evri anointed Christian kasem sem samting wea aposol Paul storyim taem hem sei: “Bihaen iufala biliv long hem, God iusim holy spirit wea hem promisim for putim mark long iufala. Hem iusim Christ nao for duim diswan. Datfala holy spirit hem olsem wanfala promis for showimaot iumi bae kasem samting wea God promisim long iumi.” (Eph. 1:13, 14) So Jehovah iusim holy spirit bilong hem for showimaot klia long olketa Christian hia hem chusim olketa for go long heven. Datwan mekem olketa barava sure olketa bae laef olowe long heven  and no long earth.—Readim 2 Corinth 1:21, 22; 5:5.

7. Wanem nao evri anointed Christian mas duim mekem olketa kasem reward bilong olketa?

7 Taem wanfala Christian kasem anointing, waswe, datwan minim bae hem go long heven nao? Nomoa. Hem savve God chusim hem for go long heven. Bat for hem kasem datfala reward, hem mas gohed faithful long Jehovah. Peter explainim datwan olsem: “So olketa brata, from God hem chusim iufala, traem best for gohed faithful long hem. Sapos iufala gohed duim olketa samting hia, bae iufala win. Bae iufala kasem bigfala blessing for go insaed long datfala Kingdom wea no savve finis and wea hem bilong Lord bilong iumi, Jesus Christ, wea hem nao sevem iumi.” (2 Pet. 1:10, 11) So evri anointed Christian mas gohed faithful for worshipim Jehovah. Nomata God chusim olketa for go long heven, olketa bae no kasem datfala reward sapos olketa no gohed faithful.—Heb. 3:1; Rev. 2:10.

HAO NAO HEM SAVVE?

8, 9. (a) Why nao hem hard for staka pipol bilong God for minim samting wea kasem wanfala Christian wea God anointim? (b) Hao nao wanfala Christian savve God chusim hem for go long heven?

8 Maet hem hard for staka pipol bilong God distaem for minim samting wea kasem wanfala Christian wea God anointim. Datwan hem bikos olketa seleva no kasem anointing from God. God wakem olketa man for laef olowe long earth, and no long heven. (Gen. 1:28; Ps. 37:29) Nomata olsem, Jehovah chusim samfala for kamap olketa king and priest long heven. So taem God anointim olketa, hope wea olketa garem, tingting bilong olketa, hem change nao. Olketa luk forward for laef long heven.—Readim Ephesus 1:18.

9 Bat hao nao wanfala Christian savve God chusim hem for go long heven? Tingim samting wea Paul talem long olketa anointed Christian long Rome, wea God ‘chusim olketa for kamap olketa holy wan bilong hem.’ Hem sei long olketa: “Spirit bilong God no mekem iumi for slave and for fraet moa, bat God iusim datfala spirit for adoptim iumi olsem olketa son bilong hem. Datfala spirit mekem iumi singaot olsem: “Abba, Dadi!” Spirit bilong God showimaot klia long heart bilong iumi, iumi olketa pikinini bilong hem.” (Rome 1:7, footnote; 8:15, 16) God iusim holy spirit bilong hem for showimaot klia long wanfala Christian hem chusim hem for go rul witim Jesus long heven.—1 Thess. 2:12.

10. Wanem nao 1 John 2:27 hem minim taem hem sei olketa anointed Christian no needim eniwan for teachim olketa?

10 Olketa anointed Christian no needim nara Christian for talem olketa God chusim olketa for go long heven. Jehovah nao mekem olketa sure long datwan. Aposol John sei long olketa anointed Christian: “Datfala Holy God hem chusim iufala, and iufala evriwan savve long olketa tru teaching.” Hem sei tu: “God hem iusim holy spirit for chusim iufala and datfala spirit hem gohed for stap long iufala, dastawe, iufala no needim eniwan for teachim iufala. Bat God iusim datfala spirit nao for teachim iufala abaotem evri samting and hem tru and hem no laea. So gohed for wan mind witim hem olsem datfala spirit hem teachim iufala for duim.” (1 John 2:20, 27) Olketa anointed Christian needim Jehovah for teachim olketa, olsem olketa nara Christian. Bat olketa no needim nara Christian for talem olketa God chusim olketa for kamap anointed Christian. Jehovah iusim holy spirit bilong hem for showimaot klia long olketa hem chusim olketa for go long heven!

 OLKETA “BORN MOA”

11, 12. Wanem nao maet wanfala anointed Christian tingim, bat wanem nao hem barava sure long hem?

11 Taem olketa Christian kasem anointing, olketa barava change. Jesus sei hem olsem olketa “born moa.” [2] (John 3:3, 5) Jesus sei moa: “Iu sapraes taem mi sei iufala mas born moa. Bat iu mas no olsem. Wind savve blow long eni ples wea hem laekem. Iu savve herem bat iu no savve wea nao hem kam from or wea nao hem go. Olketa wea born long holy spirit, olketa olsem tu.” (John 3:7, 8) Tru nao, hem no isi for explainim samting wea kasem wanfala Christian wea God anointim long samwan wea no kasem anointing.

12 Wanfala Christian wea kasem anointing maet ting olsem, ‘Why nao Jehovah chusim mi?’ Or maet hem ting olsem hem no fit. Nomata olsem, hem barava sure Jehovah chusim hem for go long heven. So hem barava hapi and tinghae long datfala hope. Olketa anointed Christian garem sem feeling olsem Peter wea sei: “Praisem God wea hem Dadi bilong Lord bilong iumi Jesus Christ. From hem showimaot bigfala mercy long iumi hem mekem iumi born moa for iumi savve garem strongfala hope. Iumi savve garem diswan bikos Jesus Christ hem laef bak. Hem mekem iumi born long wanfala laef wea garem reward wea hem promis for givim long iumi. No eni samting savve spoelem reward hia, hem holy, and hem stap for olowe. Hem stap finis long heven for iufala.” (1 Pet. 1:3, 4) Taem olketa anointed Christian readim datfala scripture, olketa barava sure Dadi bilong olketa hem story kam long olketa.

13. Taem wanfala Christian kasem anointing, hao nao tingting bilong hem change, and why nao olsem?

13 Bifor Jehovah chusim olketa Christian hia for go long heven, olketa garem hope for laef olowe long earth. Olketa luk forward long taem wea Jehovah bae mekem disfala earth kamap paradaes and finisim evri nogud samting. Maet olketa tingim taem wea olketa bae lukim moa wanfala famili member or fren hem laef bak. And olketa luk forward for wakem wanfala haos and stap insaed, and plantim olketa tree and kaikaim frut long olketa tree hia. (Isa. 65:21-23) Why nao tingting bilong olketa hem change? Waswe, tingting bilong olketa change from olketa barava sorre or wari? Waswe, seknomoa olketa tingse for laef olowe long earth bae hem boring and bae olketa no hapi for stap long earth? Or waswe, olketa laek for go stap long heven nomoa? Nomoa. God nao chusim olketa for go long heven. Taem God duim datwan, hem iusim holy spirit for changem tingting bilong olketa and hope wea olketa garem.

14. Hao nao olketa anointed Christian ting long laef wea olketa garem long earth?

14 So waswe, olketa anointed Christian laek for dae? Paul storyim feeling bilong olketa anointed Christian. Hem sei body bilong olketa hem olsem wanfala “tent,” and hem sei: “Iumi wea stap long disfala tent iumi krae long heart and wari tumas, no bikos iumi laek for aotem disfala tent olsem iumi aotem kaleko, bat bikos iumi laek for kasem datfala haos long heven, mekem body hem finis and iumi kasem laef olowe.” (2 Cor. 5:4) Olketa anointed Christian no laek for dae. Olketa enjoyim laef, and olketa laek for worshipim Jehovah evriday witim famili and olketa fren bilong olketa. Nomata olsem, olketa evritaem tingim nambawan hope wea God promisim for olketa long future.—1 Cor. 15:53; 2 Pet. 1:4; 1 John 3:2, 3; Rev. 20:6.

WASWE, JEHOVAH CHUSIM IU?

15. Wanem nao no pruvim God chusim wanfala Christian for go long heven?

15 Maet iu tingting raonem sapos iu wanfala wea God chusim iu for go long heven. Sapos iu tingse maet God chusim iu, hem gud  for iu tingim olketa important kwestin hia: Waswe, iu strong for duim preaching waka? Waswe, iu barava interest for studyim Bible and for lanem “wisdom bilong God wea big tumas”? (1 Cor. 2:10) Waswe, iu lukim wei wea Jehovah barava blessim ministry bilong iu? Waswe, iu barava laek for duim wanem Jehovah laekem? Waswe, iu barava lovem pipol and iu laek for helpem olketa for worshipim Jehovah? Waswe, iu lukim wei wea Jehovah helpem iu long samfala samting long laef bilong iu? Sapos ansa bilong iu for olketa kwestin hia hem yes, waswe, diswan minim God chusim iu for go long heven? Nomoa. Why nao olsem? Bikos evriwan wea worshipim Jehovah kasem gud samting from Jehovah, nomata olketa anointed Christian or nomoa. And Jehovah savve iusim holy spirit bilong hem for helpem eniwan wea worshipim hem, nomata hem garem hope for go long heven or stap long earth. For tok stret, sapos iu tingting raonem sapos iu wanfala wea God chusim iu for go long heven, datwan showimaot God no chusim iu. Olketa wea Jehovah chusim no ting raonem sapos olketa bae go long heven or nomoa! Olketa savve olketa bae go!

16. Hao nao iumi savve no evriwan wea kasem holy spirit nao God chusim olketa for go long heven?

16 Bible storyim staka wea faithful long Jehovah and wea kasem holy spirit bilong hem, bat olketa no go long heven. Wanfala long olketa hia hem John Baptaesa. Jesus sei no eni man long earth hem winim John Baptaesa, bat then hem sei John bae no rul olsem wanfala king long heven. (Matt. 11:10, 11) David tu kasem holy spirit bilong God. (1 Sam. 16:13) Holy spirit helpem David for minim olketa deep samting abaotem Jehovah, and tu, holy spirit mekem David for raetem samfala sekson long Bible. (Mark 12:36) Nomata olsem, aposol Peter sei David “no go ap long heven.” (Acts 2:34) Jehovah iusim holy spirit for helpem olketa hia for duim staka nambawan samting, bat hem no iusim holy spirit for chusim olketa for go long heven. Waswe, datwan showimaot olketa no barava faithful long God or olketa no fit for rul long heven? Nomoa. Jehovah laekem olketa for laef bak long Paradaes long earth.—John 5:28, 29; Acts 24:15.

17, 18. (a) Wanem hope nao staka wea worshipim Jehovah distaem olketa garem? (b) Olketa wanem kwestin nao bae iumi storyim long nextfala study?

17 Staka wea worshipim Jehovah distaem bae no go long heven. Olketa luk forward for laef olowe long earth taem Kingdom bilong God hem rulim olketa, olsem Abraham, David, John Baptaesa, and staka man and woman wea Bible storyim. (Heb. 11:10) Samfala anointed Christian nomoa laef yet long earth long disfala taem bilong end. (Rev. 12:17) So staka long datfala 144,000 wea God chusim for go long heven, olketa dae finis and olketa long heven distaem.

18 Bat sapos wanfala Christian sei hem kasem anointing, hao nao iumi wea garem hope for laef long earth shud ting long datfala Christian? Sapos wanfala Christian long kongregeson bilong iu start for kaikaim bred and drinkim wine long taem bilong Memorial, hao nao iumi shud ting long hem? And waswe, iumi shud wari sapos namba bilong olketa wea sei olketa anointed Christian hem gohed for kamap big? Bae iumi storyim olketa kwestin hia long nextfala study.

^ [1] (paragraf 4) Maet olketa Israelite celebratem Pentecost long sem taem long year wea Jehovah givim Law bilong Moses long olketa Israelite long Sinai. (Ex. 19:1) So maet Jehovah iusim Moses for startim Law agreement witim nation bilong Israel long sem day long year wea Jesus startim niu agreement witim olketa bilong spiritual Israel.

^ [2] (paragraf 11) For savve long wanem nao hem minim for born moa, lukim Wastaoa bilong July 1, 2009, page 3-11.