Skip to content

Skip to table of contents

 STUDY ARTICLE 6

Jehovah Hem Dadi blo Iumi wea Lovem Iumi Tumas

Jehovah Hem Dadi blo Iumi wea Lovem Iumi Tumas

“So iufala mas prea long wei olsem: ‘Dadi bilong mifala.’”—MATT. 6:9.

SONG 135 “Son Bilong Mi, Iu Mas Wise”

WANEM IUMI BAE STORYIM *

1. Wanem nao samwan bae duim sapos hem laek for lukim king blo Persia?

TINGIM sapos iu stap lo Persia samting olsem 2,500 year go finis. Iu laek for story lo king abaotem wanfala samting, so iu go lo Shushan, datfala city wea king hem stap. Bat, hem bae hard tumas for iu go story lo king sapos hem no letem. Sapos hem no letem bat iu go, olketa savve killim iu dae!—Esta 4:11.

2. Jehovah laek iumi for feel hao taem iumi story lo hem?

2 Iumi barava hapi bikos Jehovah hem no olsem king blo Persia! Jehovah hem garem bigfala paoa winim eni man wea rul, nomata olsem, hem hapi for iumi story lo hem enitaem nomoa. Hem laekem iumi for feel free for story lo hem. Olsem example, nomata Jehovah garem olketa spesol title olsem, Nambawan Creator, Olmaeti, and Sovereign Lord, hem invaetem iumi for story lo hem and kolem hem “Dadi” blo iumi. (Matt. 6:9) Iumi hapi tumas bikos Jehovah laekem iumi for feel klos lo hem olsem!

3. Why nao iumi fit for kolem Jehovah “Dadi,” and wanem nao disfala study bae storyim?

3 Hem stret for iumi kolem Jehovah “Dadi,” bikos hem nao givim laef. (Sams 36:9) From hem nao Dadi blo iumi, iumi garem responsibility for obeyim hem. Sapos iumi obeyim hem, bae iumi enjoyim staka nambawan blessing. (Heb. 12:9) Wanfala lo olketa blessing hia nao hem for laef olowe lo heven or lo earth. Iumi enjoyim tu olketa gud samting distaem. Disfala study bae storyim wanem Jehovah duim distaem wea showimaot hem Dadi wea lovem iumi, and why iumi savve sure dat hem bae no enitaem lusim iumi lo future. Bat firstaem, bae iumi storyim why iumi sure Dadi blo iumi lo heven hem lovem iumi tumas and hem kea for iumi.

 JEHOVAH HEM DADI WEA LOVEM AND KEA FOR IUMI

Jehovah laek for klos lo iumi olsem wanfala dadi wea laek for klos lo olketa pikinini blo hem (Paragraf 4 storyim diswan)

4. Why nao hem no isi for samfala ting lo God olsem Dadi blo olketa?

4 Waswe, iu faendem hem hard for ting lo God olsem Dadi blo iu? Samfala maet ting Jehovah hem hae tumas, so olketa feel olsem olketa no important and no fit. Olketa daotem hao Olmaeti God kea for each wan lo olketa. Bat, Dadi blo iumi wea lovem iumi no laekem iumi for feel olsem. Hem givim laef lo iumi and hem laekem iumi for fren witim hem. Bihaen aposol Paul storyim diswan, hem explainim lo olketa wea lisin lo hem lo Athens dat Jehovah hem no farawe from iumi wanwan. (Acts 17:24-29) Jehovah laekem each wan lo iumi for story lo hem, olsem wei wea wanfala pikinini savve story lo parents wea lovem and kea for hem.

5. Wanem nao iumi lanem from experience blo wanfala sista?

5 Nara reason why hem no isi for samfala ting lo Jehovah olsem Dadi hem bikos real dadi blo olketa no showimaot love or kaen lo olketa. Wanfala sista hem sei olsem: “Dadi blo mi hem raf tumas. Firstaem wea mi start for study, hem hard for mi ting lo Jehovah olsem wanfala Dadi. Bat gogo taem mi savve lo Jehovah, tingting blo mi hem change.” Waswe, iu feel olsem tu? Sapos olsem, iu savve sure hao gogo bae iu savve ting lo Jehovah olsem wanfala best Dadi.

6. Olsem Matthew 11:27 storyim, wanem nao wanfala wei wea Jehovah helpem iumi for ting lo hem olsem Dadi wea lovem iumi?

6 For helpem iumi ting lo Jehovah olsem Dadi wea lovem iumi, Jehovah mek sure olketa keepim record blo olketa samting wea Jesus talem and duim. (Readim Matthew 11:27.) From Jesus barava followim olketa wei blo Dadi blo hem, dastawe hem fit for sei: “Man wea lukim mi hem lukim Dadi tu.” (John 14:9) Staka taem Jesus story abaotem Jehovah olsem wanfala Dadi. Insaed fofala gospel, taem Jesus story abaotem Jehovah, hem iusim datfala toktok “Dadi” samting olsem 165 taems. Why nao Jesus story olsem abaotem Jehovah staka taem? Wanfala reason hem for helpem pipol bilivim dat Jehovah hem Dadi wea showimaot love.—John 17:25, 26.

7. Wanem nao iumi lanem from hao Jehovah treatim Son blo hem?

7 Tingim wanem iumi savve lanem from hao Jehovah treatim Son blo hem Jesus. Jehovah evritaem herem olketa prea blo Jesus. Bat hem no just herem nomoa, hem ansarem tu. (John 11:41, 42) Nomata wanem test Jesus feisim, hem evritaem feelim love and sapot blo Dadi blo hem.—Luke 22:42, 43.

8. Lo olketa wanem wei nao Jehovah provaed for Jesus?

8 Jesus showimaot hem luksavve Dadi blo hem nao givim hem laef and gohed for strongim hem, dastawe hem sei: “Bikos long [Dadi] nao mi laef.” (John 6:57) Jesus barava trustim Dadi blo hem, and Jehovah provaedem olketa physical need blo hem. Main important samting, Jehovah provaedem spiritual need blo hem.—Matt. 4:4.

9. Hao nao Jehovah showimaot hem Dadi wea lovem and kea for Jesus?

9 From Jehovah hem Dadi wea showimaot love, hem mek sure Jesus savve dat Hem lovem and sapotim hem. (Matt. 26:53; John 8:16) Jehovah no protectim Jesus from evri samting wea savve spoelem hem, bat hem helpem Jesus for no givap taem hem kasem test. Jesus savve hao nomata hem bae safa, datwan hem for lelebet taem nomoa. (Heb. 12:2) Jehovah showim lo Jesus hao hem kea for hem taem hem lisin, provaed, trainim and  sapotim hem. (John 5:20; 8:28) Distaem bae iumi lukim hao Dadi blo iumi lo heven hem kea for iumi lo sem wei tu.

HAO DADI WEA LOVEM IUMI HEM KEA FOR IUMI

Wanfala dadi wea garem love bae (1) lisin, (2) provaed, (3) trainim, and (4) protectim olketa pikinini blo hem. Dadi blo iumi lo heven bae kea for iumi lo sem wei tu (Paragraf 10-15 storyim diswan) *

10. Olsem Sams 66:19, 20 storyim, hao nao Jehovah showimaot hem lovem iumi?

10 Jehovah lisin lo olketa prea blo iumi. (Readim Sams 66:19, 20.) Jehovah laekem iumi for feel free for prea lo hem, hem talem iumi for prea staka taem. (1 Thess. 5:17) Lo wei wea showimaot respect, iumi savve prea lo God enitaem and lo eni ples wea iumi stap. No enitaem hem busy tumas for herem olketa prea blo iumi, hem evritaem redi and lisin gud taem iumi prea. Taem iumi tinghae lo wei wea Jehovah lisin lo olketa prea blo iumi, datwan bae mekem iumi kamap moa klos lo hem. Man wea raetem psalm sei: “Mi lavem [Jehovah] tumas, bikos hemi lisin long prea blong mi.”—Sams 116:1.

11. Hao nao Jehovah ansarem olketa prea blo iumi?

11 Dadi blo iumi no just lisin lo olketa prea blo iumi nomoa, bat hem ansarem tu. Aposol John sei: “Eni samting wea iumi askem wea followim tingting bilong God, God hem herem iumi.” (1 John 5:14, 15) Hem tru, Jehovah maet no ansarem olketa prea blo iumi olsem hao iumi expectim. Hem savve wanem nao best for iumi, so samfala taem maet hem laekem iumi for weit firstaem or maet hem sei no lo wanem iumi askem.—2 Cor. 12:7-9.

12-13. Lo olketa wanem wei nao Dadi blo iumi lo heven provaed for iumi?

12 Jehovah provaed for iumi. Jehovah duim samting wea hem laekem evri dadi for duim. (1 Tim. 5:8) Hem provaedem wanem olketa pikinini blo hem needim. Hem no laekem iumi for wari abaotem kaikai, kaleko, and ples for stap. (Matt. 6:32, 33; 7:11) Olsem parents wea lovem iumi, Jehovah mek sure iumi garem evri samting wea iumi needim for future.

13 Main important samting nao hem wei wea Jehovah provaedem olketa spiritual need blo iumi. Thru lo Bible, Jehovah teachim iumi truth abaotem hemseleva, olketa plan blo hem, why iumi laef, and wanem bae happen lo future. Hem showimaot hem tingim iumi wanwan taem hem iusim parents blo iumi or olketa narawan for teachim iumi for savve lo hem. And iumi gohed for kasem help from olketa kaenfala elder and olketa nara mature brata and sista. And tu, Jehovah givim iumi instruction lo olketa meeting taem iumi lane abaotem hem witim olketa brata and sista blo iumi. Lo olketa wei olsem, Jehovah showim lo iumi hao hem wanfala Dadi wea interest lo iumi evriwan.—Sams 32:8.

14. Why nao Jehovah trainim iumi, and hao nao hem duim datwan?

14 Jehovah trainim iumi. Iumi no perfect olsem Jesus. So for trainim iumi, hem bae disciplinem iumi lo taem wea iumi needim. Bible remindim iumi olsem: “Jehovah hem stretem man wea hem lovem.” (Heb. 12:6, 7) Jehovah disciplinem iumi lo staka wei. Olsem example, samting wea iumi readim lo Bible or wanem iumi herem lo meeting hem savve stretem iumi. Or maet olketa elder nao helpem iumi. Nomata hao nao iumi kasem discipline, love nao evritaem muvim Jehovah for duim datwan.—Jeremaea 30:11.

15. Lo olketa wanem wei nao Jehovah protectim iumi?

15 Jehovah sapotim iumi taem iumi kasem test. Olsem wanfala dadi wea sapotim pikinini blo hem lo olketa hard taem, Dadi blo iumi lo heven strongim iumi taem iumi feisim olketa test. Hem iusim holy spirit blo hem for protectim iumi from eni samting wea savve spoelem spiritual saed blo iumi.  (Luke 11:13) Jehovah protectim iumi tu taem iumi discourage or wari. Olsem example, hem givim iumi wanfala nambawan hope. Datfala hope for future helpem iumi for no givap lo olketa hard taem. Tingim diswan: Nomata wanem kaen nogud samting kasem iumi, Dadi blo iumi wea lovem iumi bae finisim evri samting wea mekem iumi safa. Eni test wea kasem iumi hem for lelebet taem nomoa, bat blessing wea Jehovah givim hem for olowe.—2 Cor. 4:16-18.

DADI BLO IUMI BAE NO ENITAEM LUSIM IUMI

16. Wanem nao happen taem Adam no obeyim Dadi blo hem wea lovem hem?

16 Wanfala samting wea pruvim dat Jehovah lovem iumi, hem nao hao hem deal witim firstfala problem wea kamap lo famili blo hem lo earth. Taem Adam no obeyim Dadi blo hem, hem and evri pikinini blo hem lusim nao wei for part lo hapi famili blo Jehovah. (Rome 5:12; 7:14) Nomata olsem, Jehovah duim samting for helpem olketa pikinini blo Adam.

17. Bihaen Adam disobey, wanem nao Jehovah stretawe duim?

17 Jehovah panisim Adam, bat hem givim hope lo olketa pikinini blo Adam. Hem stretawe promisim dat olketa wea obey bae kam bak insaed famili blo hem. (Jenesis 3:15; Rome 8:20, 21) Jehovah fit for duim diswan bikos lo ransom sakrifaes blo Son blo hem, Jesus. Wei wea hem givim Son blo hem for dae for iumi, hem pruvim dat Jehovah barava lovem iumi.—John 3:16.

Sapos iumi go difren from God bat iumi repent, Dadi blo iumi lo heven wea lovem iumi hem redi and willing for welkamim iumi (Paragraf 18 storyim diswan)

18. Nomata sapos iumi go difren from Jehovah, why nao iumi sure hem laekem iumi for kamap olketa pikinini blo hem?

18 Nomata iumi no perfect, Jehovah laekem iumi for stap insaed famili blo hem, and hem no ting lo datwan olsem wanfala hevi. Iumi maet mekem hem feel nogud, or iumi maet go  difren for lelebet taem, bat Jehovah no givap lo iumi. Jesus showimaot hao big nao love wea Jehovah garem for olketa pikinini blo hem taem hem talem story abaotem son wea lus. (Luke 15:11-32) Datfala dadi lo story hia still garem hope dat son blo hem bae kam bak. Taem son kam bak, datfala dadi welkamim hem. Sapos iumi go difren bat iumi repent, iumi sure Dadi blo iumi lo heven wea lovem iumi hem redi and willing for welkamim iumi.

19. Hao nao bae Jehovah stretem evri samting wea Adam spoelem?

19 Dadi blo iumi bae stretem evri samting wea Adam spoelem. Bihaen Adam disobey, Jehovah plan for adoptim 144,000 man and woman from earth for kamap olketa king and priest lo heven witim Son blo hem. Jesus and olketa wea rul witim hem bae helpem olketa man wea obey for kamap perfect lo niu world. Bihaen olketa winim datfala last test for pruvim sapos olketa obey, God bae givim laef olowe lo olketa. Dadi blo iumi bae barava hapi taem hem lukim earth fulap witim olketa perfect son and dota. Datfala taem bae hem barava naes tumas!

20. Lo olketa wanem wei nao Jehovah showimaot hem lovem iumi tumas, and wanem nao bae iumi storyim lo next study?

20 Jehovah showimaot dat hem lovem iumi tumas. Hem nao best Dadi. Hem herem olketa prea blo iumi and hem provaedem wanem iumi needim lo physical and spiritual wei. Hem trainim and sapotim iumi. Hem bae givim tu olketa nambawan blessing for iumi lo future. Iumi hapi for savve hao Dadi blo iumi hem lovem and kea for iumi! Lo next study, bae iumi storyim samfala wei wea iumi olketa pikinini blo hem savve showimaot iumi tinghae lo love blo hem.

SONG 108 God Hem Love and Hem Faithful

^ par. 5 Staka taem iumi ting lo Jehovah olsem Creator and Haefala Ruler blo iumi. Bat iumi garem olketa gud reason for ting lo hem olsem Dadi wea lovem and kea for iumi. Disfala study bae storyim olketa reason hia. Iumi bae storyim tu why iumi sure Jehovah bae no enitaem lusim iumi.

^ par. 59 PIKSA: Lo fofala piksa hia hem showimaot wanfala dadi and pikinini blo hem: wanfala dadi barava lisin gud lo son blo hem, wanfala dadi provaedem wanem dota blo hem needim, wanfala dadi teachim son blo hem, and wanfala dadi comfortim son blo hem. Datfala drawing bihaen lo fofala piksa hia showim hand blo Jehovah wea remindim iumi dat Jehovah kea for iumi lo sem wei tu.