Skip to content

Skip to table of contents

 STUDY ARTICLE 8

Iumi Bae Garem Peace Taem Iumi Faet Againstim Feeling for Jealous

Iumi Bae Garem Peace Taem Iumi Faet Againstim Feeling for Jealous

“Iumi mas traem best for stap gud witim nara pipol and duim olketa samting wea savve strongim narawan.”—ROME 14:19.

SONG 113 Peace Bilong Iumi

WANEM IUMI BAE STORYIM *

1. Hao nao wei for jealous affectim famili blo Joseph?

JACOB lovem evri son blo hem, bat fevaret son blo hem nao Joseph wea hem 17 years old. Hao nao feeling blo olketa brata blo Joseph taem olketa lukim datwan? Olketa start for jealous lo hem, and datwan mekem olketa for heitim hem. Joseph no duim eni samting wea fit for mekem olketa brata blo hem for heitim hem. Nomata olsem, olketa salem Joseph for kamap slave and laea lo dadi blo olketa and sei wanfala wild animal nao killim dae fevaret son blo hem. Wei for jealous spoelem peace wea olketa garem insaed famili and mekem dadi blo olketa for sorre tumas.—Jenesis 37:3, 4, 27-34.

2. Olsem Galatia 5:19-21 talem, why nao wei for jealous hem danger tumas?

2 Lo Bible, wei for jealous * hem insaed lo list blo olketa nogud samting wea lead go lo dae and wea mekem man no fit for kasem Kingdom blo God. (Readim Galatia 5:19-21.) Staka taem wei for jealous nao kosim olketa nogud samting olsem wei for kros, raoa, and enemy lo each other.

3. Wat nao bae iumi storyim lo disfala study?

3 Example blo olketa brata blo Joseph showimaot hao wei for jealous savve spoelem wei for fren tugeta and spoelem tu peace insaed lo famili. Nomata hem bae hard for iumi duim wanem olketa brata blo Joseph duim, heart blo iumi evriwan no perfect and savve laea lo iumi. (Jeremaea 17:9) Dastawe, maet samfala taem iumi stragol witim feeling for jealous. Bae iumi storyim samfala warning example lo Bible wea savve helpem iumi for luksavve lo olketa reason why feeling for jealous savve  grow insaed lo heart. Iumi bae storyim tu samfala samting wea iumi savve duim for faet againstim feeling for jealous, and for keepim peace.

WAT NAO SAVVE KOSIM WEI FOR JEALOUS?

4. Why nao olketa Philistine jealous lo Isaac?

4 Taem man garem staka material samting. Isaac hem wanfala rich man, and datwan mekem olketa lo Philistine for jealous lo hem. (Jenesis 26:12-14) Olketa blokem tu olketa well wea Isaac depend lo hem for givim wata lo olketa animal blo hem. (Jenesis 26:15, 16, 27) Olsem olketa Philistine hia, distaem tu samfala pipol savve jealous lo olketa narawan wea garem staka material samting winim olketa. Olketa no just laekem nomoa samting wea olketa hia garem, bat olketa duim samting for spoelem tu wanem olketa garem.

5. Why nao olketa bigman blo religion jealous lo Jesus?

5 Taem pipol tinghae lo narawan. Olketa bigman blo Jew religion jealous lo Jesus bikos staka pipol tinghae lo hem. (Matt. 7:28, 29) God nao sendem kam Jesus, and hem teachim olketa tru samting. Nomata olsem, olketa bigman blo religion hia spredim olketa laea story for spoelem Jesus. (Mark 15:10; John 11:47, 48; 12:12, 13, 19) Hao nao disfala story hem olsem wanfala warning for iumi? Iumi mas faet againstim eni feeling for jealous lo eni brata or sista lo kongregeson bikos hem garem olketa naesfala wei wea mekem olketa narawan tinghae lo hem. Bat, iumi shud trae for followim olketa gudfala wei wea hem garem.—1 Cor. 11:1; 3 John 11.

6. Hao nao Diotrephes showimaot hem jealous?

6 Taem samwan kasem eni privilege lo kongregeson. Lo first century, Diotrephes jealous lo olketa wea lead insaed kongregeson. From hem ‘laek for kamap leader’ lo kongregeson, hem tok spoelem John and olketa nara brata mekem olketa lo kongregeson no respectim olketa. (3 John 9, 10) Nomata hem bae hard for iumi duim samting wea Diotrephes hem duim, maet iumi start for jealous lo wanfala brata or sista wea kasem assignment wea iumi laek for kasem, especially sapos iumi feel olsem iumi savve gud hao for duim datfala assignment winim datfala brata or sista.

Heart blo iumi hem olsem graon, and gudfala wei blo iumi hem olsem olketa naes flaoa. Bat wei for jealous hem olsem rabis grass. Wei for jealous savve stopem olketa gudfala wei for grow, olsem love, wei for sorre lo narawan, and kaen (Paragraf 7 storyim diswan)

7. Hao nao wei for jealous savve affectim iumi?

7 Wei for jealous hem olsem rabis grass. Sapos wei for jealous start for grow insaed lo heart blo iumi, bae hem hard lelebet for aotem. Olketa samting wea savve mekem grow wei for jealous hem nao olketa nogud feeling olsem wei for praod, selfish, and nogud wei for jealous. Olsem rabis grass wea stopem wanfala flaoa for grow, wei for jealous savve stopem olketa gudfala wei olsem love, wei for sorre lo narawan, and kaen. Sapos iumi lukim hao wei for jealous hem start for grow, iumi need for aotem from heart blo iumi. Hao nao iumi savve faet againstim feeling for jealous?

MEKEM GROW WEI FOR HAMBOL AND SATISFAE

Hao nao iumi savve faet againstim wei for jealous wea olsem rabis grass? Holy spirit blo God savve helpem iumi aotem wei for jealous and changem witim wei for hambol and satisfae (Paragraf 8-9 storyim diswan)

8. Olketa wanem fasin nao savve helpem iumi for faet againstim wei for jealous?

8 Iumi savve faet againstim wei for jealous taem iumi mekem grow wei for hambol and satisfae. Taem iumi garem olketa gudfala wei hia bae iumi no jealous. Wei for hambol bae helpem iumi for no tingting tumas abaotem iumiseleva. Man wea hambol no tingse hem fit for kasem staka samting winim olketa narawan. (Gal. 6:3, 4) Man wea garem wei for satisfae bae hapi nomoa lo wanem hem garem and no comparem hemseleva witim olketa narawan. (1 Tim. 6:7, 8) Man wea hambol and satisfae bae hapi taem hem lukim narawan kasem gud samting.

9. Olsem Galatia 5:16 and Philippi 2:3, 4 talem, wanem nao holy spirit bae helpem iumi for duim?

 9 Iumi needim holy spirit blo God for helpem iumi for no garem wei for jealous and for mekem grow wei for hambol and satisfae. (Readim Galatia 5:16; Philippi 2:3, 4.) Holy spirit blo Jehovah savve helpem iumi for lukluk gud lo iumiseleva and why iumi duim samting. Witim help blo God, iumi savve aotem nogud tingting and feeling and changem witim olketa gudfala wei. (Sams 26:2; 51:10) Tingim example blo Moses and Paul, tufala win for faet againstim wei for jealous.

Wanfala young Israelite man ran go lo Moses and Joshua for talem dat tufala man lo camp act olsem profet. Joshua askem Moses for stopem tufala man hia, bat Moses no laek for duim datwan. Bat, hem talem Joshua dat hem hapi Jehovah putim spirit blo Hem lo tufala man hia (Paragraf 10 storyim diswan)

10. Wanem nao happen wea maet olsem wanfala test for Moses? (Lukim piksa lo kava.)

10 Moses garem big responsibility for lukaftarem pipol blo God, bat hem no trae for stopem olketa narawan for garem tu datfala responsibility. Olsem example, wantaem Jehovah tekem aot samfala holy spirit blo hem from Moses and givim lo wanfala grup blo olketa Israelite elder wea standap klosap lo datfala tent blo meeting. No longtaem bihaen, Moses herem dat tufala elder wea no kam lo datfala tent blo meeting, tufala tu kasem holy spirit and start for act olsem olketa profet. Wanem nao Moses duim taem Joshua askem hem for stopem tufala elder hia? Moses no jealous lo wei wea Jehovah givim holy spirit lo tufala. Bat, hem hambol and hapi witim olketa. (Nambas 11:24-29) Wanem leson nao iumi savve lanem from Moses?

Hao nao olketa Christian elder savve followim example blo Moses lo wei for hambol? (Paragraf 11-12 storyim diswan) *

11. Hao nao olketa elder savve followim example blo Moses?

11 Sapos iu wanfala elder, waswe, enitaem olketa askem iu for trainim samwan lo kongregeson for lukaftarem wanfala privilege wea iu barava enjoyim? Olsem example, maet iu barava enjoyim wei for conductim Wastaoa Study evri week. Then olketa askem iu for trainim nara brata mekem gogo hem bae fit for duim datfala privilege, sapos iu hambol olsem Moses, iu bae no garem tingting for sei olketa bae kamap moa important winim iu. Bat, bae iu hapi for helpem brata blo iu.

12. Hao nao staka brata and sista distaem showimaot wei for hambol and satisfae?

12 Tingim nara situation wea staka olo brata feisim. For staka year olketa serve olsem coordinator blo body of elders. Bat taem olketa kasem 80 year olketa willing for givim datfala assignment lo narawan. Olketa circuit overseer wea kasem 70 years old hambol for givim datfala privilege lo narawan and acceptim niu assignment lo service blo Jehovah. And no longtaem go nomoa staka wea waka lo olketa Bethel raonem world change assignment for waka lo field. Olketa faithful brata and sista hia no feel nogud lo samwan wea changem olketa for duim assignment wea olketa bin duim bifor.

13. Why nao maet hem isi for Paul feel jealous lo 12 aposol?

13 Aposol Paul hem nara gud example lo hao for mekem grow wei for hambol and satisfae. Paul no letem wei for jealous grow insaed heart blo hem. Nomata hem barava waka hard lo ministry, hem hambol for sei: “Olketa nara aposol winim mi, and hem no fitim for olketa kolem mi wanfala aposol.” (1 Cor. 15:9, 10) Taem Jesus duim ministry blo hem lo earth 12-fala aposol followim hem, bat Paul no kamap wanfala Christian go kasem bihaen Jesus dae and resurrect. Gogo hem kamap “wanfala aposol for preach long pipol wea no Jew,” bat Paul no qualify for kasem datfala spesol privilege for kamap wanfala lo 12 aposol. (Rome 11:13; Acts 1:21-26) Winim wei for jealous lo 12-fala man hia and wei wea olketa fren klos witim Jesus, Paul gohed satisfae witim wanem hem garem.

14. Wanem nao iumi bae duim sapos iumi hambol and satisfae?

14 Sapos iumi hambol and satisfae, iumi bae olsem Paul and showimaot respect lo olketa  wea Jehovah givim responsibility lo olketa. (Acts 21:20-26) Hem mekem arrangement for appointim olketa man for lukaftarem kongregeson. Nomata olketa no perfect, Jehovah ting lo olketa “olsem present.” (Eph. 4:8, 11) Taem iumi respectim olketa hia and hambol for followim direction wea olketa givim, iumi stap klosap lo Jehovah and enjoyim peace witim olketa brata and sista blo iumi.

“TRAEM BEST FOR STAP GUD WITIM NARA PIPOL”

15. Wanem nao iumi need for duim?

15 Peace no savve grow sapos wei for jealous stap. Iumi need for aotem feeling for jealous from heart blo iumiseleva and no duim samting wea mekem narawan for jealous. Iumi mas duim olketa important samting hia sapos iumi laek obeyim komand blo Jehovah for “traem best for stap gud witim nara pipol and duim olketa samting wea savve strongim narawan.” (Rome 14:19) Wanem nao iumi savve duim for helpem olketa narawan for faet againstim feeling for jealous, and wanem nao iumi savve duim for keepim peace?

16. Hao nao iumi savve helpem olketa narawan for faet againstim feeling for jealous?

16 Tingting and wanem iumi duim savve barava affectim olketa narawan. World laekem iumi for “show-off” witim wanem iumi garem. (1 John 2:16) Bat datwan savve mekem feeling for jealous kamap. Iumi savve helpem narawan for no jealous taem iumi no story tumas abaotem olketa samting wea iumi garem or plan for baem. Nara wei wea iumi savve helpem olketa narawan for no jealous hem for hambol nomata  iumi kasem eni privilege lo kongregeson. Sapos iumi story tumas abaotem wanem iumi duim, iumi mekem hem isi for narawan garem feeling for jealous. Bat lo narasaed, taem iumi showimaot interest lo narawan and tinghae lo gud samting wea olketa duim, iumi helpem olketa for satisfae and iumi keepim peace and wan mind insaed kongregeson.

17. Wanem nao olketa brata blo Joseph fit for duim, and why nao olsem?

17 Iumi savve win for faet againstim wei for jealous! Tingim moa example blo olketa brata blo Joseph. Staka year bihaen olketa treatim nogud Joseph, olketa meetim hem lo Egypt. Bifor Joseph talem olketa hu nao hem, hem testim olketa brata blo hem firstaem for faendaot sapos olketa changem nao wei blo olketa. Hem mekem kaikai for evriwan, and kaikai wea hem givim lo Benjamin hem big winim olketa narawan. (Jenesis 43:33, 34) Nomata hem duim olsem, hem no lukim eni saen wea showimaot olketa jealous lo Benjamin. Bat olketa barava tingim brata blo olketa and dadi blo olketa, Jacob. (Jenesis 44:30-34) From olketa brata blo Joseph no garem nao wei for jealous, datwan mekem olketa fit for mek peace moa insaed famili blo olketa. (Jenesis 45:4, 15) Lo sem wei tu, sapos iumi aotem eni feeling for jealous, datwan bae help for keepim peace insaed famili and kongregeson.

18. Olsem James 3:17, 18 storyim, wanem nao bae kamap sapos iumi help for mek peace?

18 Jehovah laekem iumi for faet againstim wei for jealous and traem best for garem peace. Iumi mas waka hard for duim tufala samting hia. Olsem iumi storyim lo disfala study, iumi evriwan savve garem feeling for jealous. (Jas. 4:5) And tu, wei blo pipol lo world distaem mekem feeling for jealous isi for kamap. Bat sapos iumi mekem grow wei for hambol, satisfae, and garem wei for tinghae, datwan bae mekem iumi no garem wei for jealous. Bat hem bae helpem iumi for keepim peace and mekem grow olketa raeteous wei.—Readim James 3:17, 18.

SONG 130 Forgivim Narawan

^ par. 5 Organization blo Jehovah garem peace. Bat iumi savve spoelem disfala peace sapos iumi letem feeling for jealous grow insaed lo iumi. Lo disfala study, bae iumi storyim wanem nao savve kosim wei for jealous. Bae iumi storyim tu hao for faet againstim disfala wei for jealous and wanem iumi savve duim for keepim peace.

^ par. 2 MINING BLO WANFALA TOKTOK: Bible storyim hao wei for jealous savve mekem man for no just laekem nomoa olketa samting wea narawan garem, bat hem bae duim samting for spoelem tu wanem olketa garem.

^ par. 61 PIKSA: Lo meeting blo body of elders, olketa elder askem datfala olo brata wea savve conductim Wastaoa Study evri week for trainim wanfala young elder for lukaftarem datfala responsibility. Nomata olo brata hia barava enjoyim datfala assignment, hem hapi for sapotim disison blo olketa elder taem hem givim samfala gud advaes lo datfala young brata and praisem hem.