Skip to content

Skip to table of contents

Waswe, Iu Savve Gud Long Jehovah Olsem Noah, Daniel, and Job?

Waswe, Iu Savve Gud Long Jehovah Olsem Noah, Daniel, and Job?

“Olketa man nogud i nating save jaj long stretfala wei, bat olketa hu tinghae long [Jehovah] i savegud long hem.”—PROVEBS 28:5.

SONG: 43, 133

1-3. (a) Wanem nao bae helpem iumi for gohed faithful long God insaed olketa last day distaem? (b) Wanem nao bae iumi storyim long disfala study?

DISTAEM iumi klosap kasem end bilong olketa last day and staka nogud pipol stap. Olketa gohed ‘grou olsem gras.’ (Sams 92:7) So no sapraes taem staka pipol no laekem samting wea God sei hem stret. Paul talem olketa Christian: “Iufala mas olsem smol pikinini wea no savve long rabis samting,” bat “iufala mas garem tingting bilong man wea mature.” (1 Cor. 14:20) Hao nao iumi savve duim datwan?

2 Iumi savve faendem ansa insaed theme scripture bilong iumi, wea sei: “Olketa hu tinghae long [Jehovah] i savegud long hem.” Diswan minim olketa savve long evri samting olketa need for duim for mekem Jehovah hapi. (Provebs 28:5) And tu, Provebs 2:7, 9 teachim iumi hao Jehovah savve helpem pipol wea duim stret samting for kamap wise. From datwan, olketa “save wanem hemi gud an stret.”

3 Noah, Daniel, and Job garem datfala wisdom wea kam from  God. (Esikiel 14:14) Pipol bilong God distaem tu garem wisdom olsem. Waswe long iu? Waswe, iu garem datfala wisdom? Taem iumi savve wanem for duim for mekem Jehovah hapi, datwan showimaot iumi “savegud long hem.” Long disfala study bae iumi lanem, (1) hao nao gogo Noah, Daniel, and Job lane abaotem God? (2) Hao nao datfala savve abaotem God helpem olketa? And (3) hao nao iumi savve gohed garem faith olsem olketa?

NOAH FREN GUD WITIM GOD NOMATA HEM STAP LONG NOGUD WORLD

4. Hao nao gogo Noah savve long Jehovah, and hao nao wei for savve gud long God helpem hem?

4 Hao nao gogo Noah savve long Jehovah? Start from taem Adam and Eve garem olketa pikinini, pipol lane abaotem Jehovah long thrifala wei: From creation, from olketa faithful servant bilong God, and from wei wea Jehovah blessim olketa taem olketa obeyim hem. (Aesaea 48:18) Taem Noah lukluk long creation, hem lukim olketa samting wea pruvim God hem stap and hem lanem olketa fasin bilong God. From datwan, Noah luksavve Jehovah nomoa garem bigfala paoa and hem nomoa trufala God. (Rome 1:20) Dastawe, Noah no biliv nomoa long God, bat hem garem strongfala faith long hem.

5. Hao nao Noah lane abaotem plan bilong God for olketa man?

5 Bible sei: “Bihaen man herem message nao hem savve garem faith.” (Rome 10:17) Maet Noah herem story abaotem Jehovah from olketa relative. Maet from dadi bilong hem Lamech, wea garem faith long God and wea born bifor Adam dae. (Lukim piksa long start bilong study.) Maet Noah lane tu from grandadi bilong hem, Methuselah, and grandadi bilong Methuselah, Jared, wea gohed laef for 366 year bihaen Noah born. * (Luke 3:36, 37) Maet olketa hia and waef bilong olketa nao teachim Noah abaotem wei wea Jehovah creatim olketa man and hao hem laekem olketa for garem pikinini, fulimap earth, and worshipim hem. Luk olsem Noah lane tu abaotem hao Adam and Eve no obeyim Jehovah, and hem lukim nogud samting wea kamaot from datwan. (Jenesis 1:28; 3:16-19, 24) Noah lovem wanem hem lanem and datwan muvim hem for worshipim Jehovah.—Jenesis 6:9.

6, 7. Hao nao hope strongim faith bilong Noah?

6 Hope savve strongim faith. So tingim, taem Noah savve nem bilong hem minim rest or kasem comfort, datwan givim hem hope and strongim faith bilong hem. (Jenesis 5:29) Jehovah iusim Lamech for story olsem abaotem Noah: “Pikinini ya bae hemi helpem yumi, mekem yumi res lelebet long olketa hadwaka blong yumi long graon ya, wea [Jehovah] hemi jajem finis an hemi mekem kamap nogud.” So Noah hope bae God mekem evriting kamap gud. Olsem Abel and Enoch, hem tu garem faith hao wanfala “pikinini” bae smasem hed bilong datfala snek.—Jenesis 3:15.

7 Noah no barava minim gud promis bilong God wea stap long Jenesis 3:15. Bat hem luksavve datfala profesi givim hope for future. And tu, datfala profesi join witim message wea Enoch talemaot taem hem sei Jehovah bae distroem olketa nogud man. (Jude 14, 15) Tru nao, message bilong Enoch, wea bae fulfill evribit long Armageddon, barava strongim faith and hope bilong Noah!

8. Hao nao stretfala savve abaotem God protectim Noah?

8 Hao nao stretfala savve abaotem God helpem Noah? From Noah lane abaotem Jehovah, hem garem faith and wisdom. Diswan protectim hem, especially for no duim eniting wea bae mekem Jehovah no hapi. Noah laek fren witim God, hem no laek fren witim olketa wea no worshipim God. Noah luksavve olketa  angel wea change for kamap man olketa laea long pipol. Pipol barava tinghae long olketa from olketa garem paoa and maet olketa laek worshipim olketa tu. (Jenesis 6:1-4, 9) And tu, Noah savve Jehovah laekem olketa man nao for garem pikinini and fulimap earth. (Jenesis 1:27, 28) So taem olketa demon tekem olketa woman and garem pikinini, Noah luksavve datwan hem barava rong. Diswan showaot klia taem olketa pikinini hia grow big and kamap strong winim olketa nara pikinini. Jehovah talem Noah hem bae mekem flood for kam and finisim evri nogud pipol. Bikos Noah garem faith long warning bilong Jehovah, hem buildim ark, and famili bilong hem sev.—Heb. 11:7.

9, 10. Hao nao iumi savve garem faith olsem Noah?

9 Hao nao iumi savve gohed garem faith olsem Noah? Iumi mas studyim gud Bible, followim wanem iumi lanem, and iusim datwan for mekem gudfala disison and changem laef bilong iumi. (1 Pet. 1:13-15) Taem iumi duim olsem, faith and wisdom bilong God bae protectim iumi from olketa trik bilong Satan and wei bilong disfala world. (2 Cor. 2:11) Disfala world mekem pipol for laekem tumas raf fasin and duim nogud samting. And tu, hem mekhae long wei for duim nomoa wanem man seleva laekem. (1 John 2:15, 16) Sapos man no garem strong faith, maet disfala world mekem hem tingse end farawe yet. Taem Jesus sei distaem hem semsem witim taem bilong Noah, hem no storyim raf fasin or wei for duim nogud samting, bat, hem storyim hao olketa normal samting savve mekem iumi busy and no tinghae long spiritual samting.—Readim Matthew 24:36-39.

10 Askem iuseleva: ‘Waswe, samting wea mi duim showimaot mi savve gud long Jehovah? Waswe, faith bilong mi muvim mi for duim wanem Jehovah sei hem stret and for teachim narawan abaotem diswan tu?’ Ansa bilong iu bae helpem iu for luksavve sapos iu fren gud witim God olsem Noah.

DANIEL SHOWIMAOT WISDOM BILONG GOD TAEM HEM STAP LONG BABYLON

11. (a) From Daniel lovem Jehovah nomata hem young, datwan showimaot parents bilong hem duim wanem? (b) Wanem kaen wei bilong Daniel nao iu laek for garem?

11 Hao nao gogo Daniel savve long Jehovah? Luk olsem, parents bilong Daniel teachim hem for lovem Jehovah and evri toktok bilong hem. And Daniel duim datwan for full laef bilong hem. Nomata taem hem olo, hem gohed studyim gud olketa scripture. (Daniel 9:1, 2) Daniel barava savve gud long Jehovah. Hem savve tu long evri samting wea Jehovah duim for olketa Israelite. Iumi savve long diswan bikos long toktok wea stap long Daniel 9:3-19, wea hem hambol prea wea Daniel talem from heart. Readim disfala prea and ting raonem gud. Tingim, ‘Wanem nao disfala prea teachim mi abaotem Daniel?’

12-14. (a) Wanem nao showimaot Daniel garem wisdom wea kam from God? (b) Wanem nao Jehovah duim for blessim wei wea Daniel no fraet and faithful?

12 Hao nao stretfala savve abaotem God helpem Daniel? Hem no isi for wanfala faithful Jew for gohed worshipim God long Babylon. Olsem example, Jehovah talem disfala komand long olketa Jew: ‘Yufala mas wakahad fo helpem biktaon wea yufala go stap long hem.’ (Jeremaea 29:7) Bat, hem talem tu, olketa mas worshipim hem nomoa witim full heart. (Eksodas 34:14) Hao nao bae Daniel obeyim tufala komand hia? Wisdom bilong God helpem Daniel for minim principle for obeyim olketa wea rul, bat hem luksavve tu long taem wea hem mas obeyim Jehovah winim olketa man. Staka handred year bihaen, Jesus talem tu sem samting.—Luke 20:25.

13 Tingim samting wea Daniel duim taem olketa  givim law for prea nomoa long king for 30 day and no prea long eni nara god or man. (Readim Daniel 6:7-10.) Maet hem fit for mek excuse and sei: ‘Hem for 30 day nomoa.’ Bat Daniel no ting datfala law hem important winim wei for worshipim God. Daniel fit for prea haed long Jehovah. Bat hem savve staka pipol lukim hem prea evriday. So nomata datwan hem danger, hem gohed prea long ples wea pipol lukim bikos hem no laekem pipol for tingse hem stop nao for worshipim Jehovah.

14 Jehovah blessim wei wea Daniel no fraet and faithful. Hem duim wanfala mirakol and sevem Daniel from olketa lion. From datwan, pipol evriwea long Media and Persia lane abaotem Jehovah.—Daniel 6:25-27.

15. Hao nao iumi savve garem faith olsem Daniel?

15 Hao nao iumi savve gohed garem faith olsem Daniel? Sapos iumi laek for garem strongfala faith, hem no inaf for readim Bible nomoa. Iumi need for barava minim gud. (Matt. 13:23) Iumi laek for savve long tingting and feeling bilong Jehovah. So iumi mas ting raonem samting wea iumi readim. Hem barava important for prea evritaem, especially taem iumi kasem hard taem. Iumi savve garem faith hao Jehovah bae givim wisdom and strong wea iumi askem thru long prea.—Jas. 1:5.

JOB FOLLOWIM OLKETA PRINCIPLE TAEM HEM ISI OR HARD

16, 17. Hao nao gogo Job savve long Jehovah?

16 Hao nao gogo Job savve long Jehovah? Job no wanfala Israelite. Bat Abraham, Isaac, and Jacob olketa relative bilong hem and Jehovah teachim olketa abaotem hu nao hem and abaotem plan bilong hem for olketa man. Iumi no savve hao nao gogo Job lane abaotem olketa nambawan samting hia. (Job 23:12) Hem sei olsem abaotem Jehovah: ‘Mi herem wanem pipol talem abaotem yu.’ (Job 42:5) And tu, Jehovah seleva talem hao Job savve long truth abaotem Hem.—Job 42:7, 8.

Iumi savve garem strongfala faith taem iumi lukluk long creation and lane abaotem olketa fasin bilong Jehovah (Paragraf 17 storyim diswan)

17 Job lane abaotem Jehovah tu taem hem lukluk long creation. (Job 12:7-9, 13) Elihu and Jehovah storyim olketa samting abaotem creation for helpem Job luksavve olketa man smol tumas and God hem barava hae. (Job 37:14; 38:1-4) Toktok bilong Jehovah affectim Job and mekem hem hambol and sei long God: “Mi save dat yu garem evri paoa, an yu save duim nomoa evrisamting wea yu planem.” And tu, hem sei: “Mi sidaon insaet long  asis an long dast fo somaot dat mi sensim tingting blong mi.”—Job 42:2, 6.

18, 19. Hao nao Job showimaot hem savve gud long Jehovah?

18 Hao nao stretfala savve abaotem God helpem Job? Job barava minim gud olketa principle bilong God. Hem savve gud long Jehovah and datwan mekem hem laek for duim stret samting. Olsem example, Job savve hem no fit for sei hem lovem God sapos hem no kaen long narawan. (Job 6:14) Hem no tingse hem gud winim olketa narawan, bat hem treatim olketa olsem famili bilong hem nomata olketa rich or poor. Job sei: “Disfala sem God wea hemi mekem mi long bele blong mami blong mi, hemi tu hemi mekem olketa ya long bele blong mami blong olketa.” (Job 31:13-22) Nomata Job rich and garem paoa, hem no praod and ting nating long olketa narawan. Hem barava difren from pipol wea rich and garem paoa distaem.

19 Job no laek for worshipim eni difren samting. Hem no join insaed false worship or letem olketa material samting for kamap important winim Jehovah. Hem savve sapos hem duim datwan, hem rejectim “God hu hemi hae tumas.” (Readim Job 31:24-28.) And tu, Job tingim marit hem wanfala serious promis wea hasband and waef mekem. Hem promis long hemseleva, hem bae no lukluk long wei for laekem eni difren woman. (Job 31:1) Datwan interesting bikos long taem bilong Job, Jehovah letem man for garem winim wanfala waef. So sapos Job laekem nara waef hem savve tekem nomoa. * Bat, maet hem savve long arrangement bilong Jehovah for wanfala man maritim nomoa wanfala woman and maet Job chus for followim datwan. (Jenesis 2:18, 24) Samting olsem 1,600 year bihaen diswan, Jesus teachim datfala sem principle abaotem sex and marit.—Matt. 5:28; 19:4, 5.

20. Hao nao wei for savve gud long Jehovah and olketa standard bilong hem helpem iumi for mekem olketa wise disison?

20 Hao nao iumi savve gohed garem faith olsem Job? Iumi need for savve gud long Jehovah and letem datwan affectim evri samting iumi duim. Olsem example, Bible sei Jehovah no laekem olketa wea raf tumas and wea “laek fo mekem trabol,” and iumi shud no associate witim olketa wea savve laea. (Readim Sams 11:5; 26:4.) So askem iuseleva: ‘Wanem nao tufala scripture hia showimaot abaotem tingting bilong Jehovah? Hao nao datwan shud affectim olketa disison bilong mi abaotem olketa samting olsem Internet, movie, buk, music, and olketa fren?’ Ansa bilong iu bae helpem iu for luksavve sapos iu savve gud long Jehovah. Iumi no laekem disfala nogud world for affectim iumi. So iumi mas ‘iusim evritaem tingting bilong iumi for luksavve long wanem hem stret and no stret,’ and tu, for luksavve long wanem hem wise and no wise.—Heb. 5:14; Eph. 5:15.

21. Wanem nao bae helpem iumi for savve gud long Jehovah?

21 From Noah, Daniel, and Job traem best for savve long Jehovah, datwan helpem olketa for “savegud long hem” mekem olketa duim wanem hem hapi long hem. Example bilong olketa showimaot hao sapos man duim samting wea Jehovah laekem bae hem garem gudfala laef. (Sams 1:1-3) So tingim diswan, ‘Waswe, mi savve gud long Jehovah olsem Noah, Daniel, and Job?’ Tru nao, distaem iumi lanem staka samting abaotem Jehovah winim olketa faithful man bifor bikos Jehovah givim iumi staka information abaotem hemseleva. (Provebs 4:18) So studyim gud Bible, ting raonem, and prea for holy spirit. Taem iu duim olsem, disfala nogud world bae no affectim iu. Bat bae iu garem wisdom bilong God and fren gud witim Dadi long heven.—Provebs 2:4-7.

^ par. 5 Enoch, great-grani bilong Noah, “fren gud wetem God” tu. Bat hem dae 69 year bifor Noah born.—Jenesis 5:23, 24.

^ par. 19 Noah tu olsem. Hem garem nomoa wanfala waef nomata olketa man long datfala taem start for tekem staka waef no longtaem bihaen Adam and Eve lusim garden bilong Eden.—Jenesis 4:19.