Skip to content

Skip to table of contents

Man wea No Kros Kwiktaem Hem Wise

Man wea No Kros Kwiktaem Hem Wise

Antonia hem wanfala nurse wea waka bilong hem for lukaftarem olketa olo. Taem hem kasem haos bilong wanfala olo wea hem lukaftarem, gele bilong olo hia kros and barava tok spoelem hem. Hem sei Antonia hem kam leit for lukaftarem mami bilong hem. Bat Antonia hem no leit. Nomata olsem, hem sei sorre nomoa long datfala woman.

NEXT taem Antonia kam long haos, datfala woman tok moa long Antonia. Wanem nao Antonia duim? Hem sei: “Hem no isi for deal witim datwan bikos hem no garem eni reason for tok spoelem mi olsem.” Nomata olsem, Antonia sei sorre moa long datfala woman and talem hem, hem luksavve why hem feel nogud hem bikos long hard samting wea kasem hem.

Sapos iu nao Antonia, wanem nao bae iu duim? Waswe, bae iu trae for kontrolem kros bilong iu? Or waswe, bae iu faendem hem hard for kontrolem kros bilong iu? For tok stret, maet bae hem no isi for kontrolem kros bilong iu sapos semkaen samting happen long iu. Taem iumi kasem hard taem or samwan tok spoelem iumi, hem barava no isi for kontrolem kros bilong iumi.

Bat Bible encouragem olketa Christian for no kros kwiktaem. Taem iumi duim olsem, datwan showimaot iumi hambol and wise. Bible buk James sei: “Hu long iufala nao hem wise and hem savve minim samting? Hem mas showimaot diswan long gudfala samting wea hem duim. From hem wise, hem duim datwan long hambol wei.” (Jas. 3:13) Long wanem wei nao man wea no kros kwiktaem showimaot hem wise? And  wanem nao savve helpem iumi for garem disfala wei?

MAN WEA NO KROS KWIKTAEM HEM WISE

Wei for no kros kwiktaem hem daonem kros bilong narawan. “Wei for tok isi long man savve daonem kros, bat toktok wea raf savve mekem man kros.”Prov. 15:1.

Man wea kros savve mekem problem kamap worse, bikos hem olsem hem addim firewood long fire. (Prov. 26:21) Bat man wea kontrolem kros bilong hem, hem daonem kros bilong narawan and savve changem tingting bilong man wea kros tu.

Diswan nao samting wea happen. From woman hia lukim Antonia no kros long hem, hem start for krae nao. Woman hia talem Antonia hem garem famili problem and olketa nara problem tu. Antonia preach long hem and startim Bible study witim hem. Diswan hem happen bikos Antonia hem hambol and no kros kwiktaem.

Wei for no kros kwiktaem savve mekem iumi hapi. “Olketa wea hambol bae hapi, bikos God bae givim earth long olketa.”Matt. 5:5.

Hao nao olketa wea no kros kwiktaem olketa hapi? Staka wea bifor olketa raf, distaem olketa hapi bikos olketa no kros kwiktaem. Datwan mekem laef bilong olketa kamap gud and olketa savve bae olketa kasem gudfala samting long future. (Col. 3:12) Adolfo, wanfala circuit overseer long Spain hem story abaotem laef bilong hem bifor hem kam insaed long truth.

Adolfo hem sei: “Laef bilong mi hem olobaot nomoa. Staka taem mi no savve kontrolem kros bilong mi and from mi raf tumas, gogo samfala fren bilong mi fraetem mi tu. Then wanfala big samting kasem mi wea mekem mi change. Mi insaed wanfala faet and olketa busarem mi sixfala taem and mi klosap dae from mi lusim staka blood.”

Bat distaem, from Adolfo hem change, olketa narawan lanem wei for no kros kwiktaem from example bilong hem and samting hem talem. Staka laekem wei bilong hem bikos hem no raf and hem kaen tumas. Adolfo sei hem hapi from hem changem olketa nogud wei bilong hem. And hem tinghae long wei wea Jehovah helpem hem for no kros kwiktaem.

Wei for no kros kwiktaem hem mekem Jehovah hapi. “Son bilong mi, duim samting wea wise, and mekem heart bilong mi hapi, mekem mi savve givim ansa long man wea tok daonem mi.”Prov. 27:11.

Devil, wea hem main enemy bilong Jehovah hem tok daonem hem. Hem fitim for Jehovah kros long Devil long olketa nogud samting wea hem talem abaotem hem, bat Bible sei Jehovah hem “no savve kros kwiktaem.” (Ex. 34:6) Taem iumi traem best for followim example bilong God for no kros kwiktaem, iumi duim samting wea wise and mekem Jehovah barava hapi.—Eph. 5:1.

Pipol long world distaem olketa raf tumas. Maet iumi meetim pipol wea “tok praod, mekhae long olketa seleva, tok spoelem God and man, . . . laea for spoelem narawan, no savve kontrolem seleva, [and] raf.” (2 Tim. 3:2, 3) Nomata olsem, olketa Christian mas gohed for hambol. Bible hem sei “wisdom from heven hem mekem man . . . stap gud witim narawan, [and] no forcem tingting bilong hem” long narawan. (Jas. 3:17) Taem iumi stap gud witim narawan and no forcem tingting bilong iumi long olketa, iumi showimaot iumi garem wisdom from God. Taem iumi garem wisdom hia, datwan bae helpem iumi for no kros taem samwan tok spoelem iumi, and diswan bae mekem iumi fren gud witim Jehovah, wea hem garem bigfala wisdom.