Skip to content

Skip to table of contents

 STUDY ARTICLE 33

“Olketa wea Lisin Long Iu” Bae Kasem Laef

“Olketa wea Lisin Long Iu” Bae Kasem Laef

“Lukluk gud evritaem long iuseleva and long samting wea iu teachim. Gohed strong for duim olketa samting hia bikos wei for duim olsem bae mekem iu and olketa wea lisin long iu for kasem laef.”—1 TIM. 4:16.

SONG 67 “Talemaot Toktok Bilong God”

WANEM IUMI BAE STORYIM *

1. Wanem nao iumi evriwan laekem olketa relative for kasem?

WANFALA sista wea nem blo hem Pauline * hem sei: “Start taem mi lanem truth, mi laekem tumas for evriwan lo famili blo mi for stap witim mi lo paradaes. Especially hasband blo mi, Wayne, and smol boy blo mitufala. Mi laekem tumas for tufala joinim mi for worshipim Jehovah.” Waswe, iu garem olketa relative wea no lovem Jehovah bikos olketa no savve yet lo hem? Maet iu tu garem semkaen feeling wea Pauline garem abaotem famili blo hem.

2. Olketa wanem kwestin nao bae iumi storyim lo disfala study?

2 Iumi no savve forcem olketa relative blo iumi for acceptim gud nius, bat iumi savve encouragem olketa for ting raonem and acceptim message blo Bible. (2 Tim. 3:14, 15) Why nao iumi shud witness lo olketa relative blo iumi? Why nao iumi need for minim feeling blo olketa? Wanem nao iumi savve duim for helpem olketa relative for lovem Jehovah? Hao nao evriwan lo kongregeson savve helpem iumi?

WHY NAO IUMI SHUD WITNESS LO OLKETA RELATIVE?

3. Olsem wanem 2 Peter 3:9 talem, why nao iumi shud witness lo olketa relative blo iumi?

3 Klosap nao Jehovah bae finisim disfala nogud world. Only olketa wea “showimaot olketa laekem laef olowe” bae sev. (Acts 13:48) Iumi iusim staka taem and strong blo iumi for preach lo olketa difren pipol lo ples iumi stap, bat iumi laekem tu olketa relative blo iumi for worshipim Jehovah witim iumi. Dadi blo iumi Jehovah wea lovem iumi, “no laekem  eniwan for dae bat hem laekem evriwan for garem chance for repent.”—Readim 2 Peter 3:9.

4. Taem iumi witness lo olketa relative blo iumi, wanem samting wea no stret nao maet iumi duim?

4 Hem gud for tingim hao tufala wei stap for storyim message blo salvation, wanfala hem stret bat narawan hem no stret. Maet taem iumi story lo difren pipol iumi kaen lo olketa, bat taem iumi story lo olketa relative maet iumi savve tok stret tumas.

5. Bifor iumi storyim truth lo olketa relative blo iumi, wanem nao iumi mas tingim?

5 Taem iumi ting bak lo firstaem wea iumi trae for witness lo relative blo iumi, maet iumi regret lo hao iumi story lo hem and iumi wish nomoa iumi no story olsem. Aposol Paul givim disfala kaonsel lo olketa Christian: “Toktok bilong iufala mas evritaem kaen and olsem iufala putim solt long hem, mekem iufala savve hao for givim ansa long evri man.” (Col. 4:5, 6) Hem gud for tingim disfala advaes taem iumi story lo olketa relative blo iumi. Sapos nomoa, bae olketa feel nogud lo iumi and no laek lisin lo iumi.

WANEM NAO IUMI SAVVE DUIM FOR HELPEM OLKETA RELATIVE?

Taem iu showimaot iu minim feeling blo olketa and wei wea iu duim samting datwan savve givim gudfala witness (Paragraf 6-8 storyim diswan) *

6-7. Storyim wanfala example wea showimaot hem important for minim feeling blo marit partner wea no Witness?

6 Showimaot iumi minim feeling blo olketa. Pauline, wea iumi storyim finis, hem sei: “Firstaem mi laek for storyim nomoa olketa spiritual samting lo hasband blo mi. Mitufala no savve storyim eni nara samting.” Bat, Wayne, hasband blo Pauline no really savve abaotem Bible and hem no minim wanem nao Pauline savve storyim. Lo tingting blo hem, Pauline tingim nomoa religion blo hem. And hem wari nogud Pauline joinim wanfala dangerous grup wea laea lo hem.

 7 Pauline hem storyim hao lo bifor hem savve spendem staka taem blo hem lo olketa evening and weekend, for go lo olketa brata and sista, for go meeting, go preaching and for go lo olketa hapitaem. Hem sei: “Samfala taem, Wayne arrive bak lo haos bat haos hem emti and datwan mekem hem lonely.” Tru nao, Wayne missim waef and smol boy blo hem. Wayne bat no savve tu hu nao olketa pipol wea waef and pikinini gogo witim, and hem feel olsem waef blo hem ting lo olketa niu fren blo hem olsem olketa important winim hem nao. Gogo Wayne sei bae hem divorcem Pauline. So, iu tingse eni nara wei hem stap wea Pauline shud duim for showimaot hem minim feeling blo hasband blo hem?

8. Olsem 1 Peter 3:1, 2 hem storyim, wanem nao savve barava affectim olketa relative?

8 Showimaot gudfala wei. Staka taem, wanem iumi duim nao affectim olketa relative winim wanem iumi talem. (Readim 1 Peter 3:1, 2.) Gogo Pauline luksavve lo datwan, hem sei: “Mi savve Wayne lovem mifala and hem no really laek for divorce. Bat samting hem talem mekem mi luksavve mi mas start for duim samting followim wei blo Jehovah. Winim wei for toktok tumas, mi need for showimaot gudfala example thru lo wanem mi duim.” Pauline stop for trae forcem Wayne for story abaotem Bible, and hem start for story witim hem abaotem olketa nara samting. Wayne lukim hao Pauline hem duim best for stap gud witim hem, and tu boy blo tufala garem gudfala wei. (Provebs 31:18, 27, 28) Taem Wayne lukim gud samting kamaot from wei wea famili blo hem followim wanem Bible talem, datwan mekem hem start for ting raonem and acceptim message blo Bible.—1 Cor. 7:12-14, 16.

9. Why nao iumi mas gohed traem best?

 9 Gohed traem best for helpem olketa relative. Jehovah showimaot gudfala example for iumi. Hem gohed for givim chance lo pipol for acceptim gud nius and kasem laef. (Jeremaea 44:4) And aposol Paul talem Timothy for gohed strong for helpem olketa narawan. Why nao olsem? Bikos taem hem duim olsem, hem bae mekem hemseleva and olketa wea lisin lo hem for kasem laef. (1 Tim. 4:16) Iumi lovem olketa relative, so iumi laekem olketa for savve lo truth wea stap insaed lo Bible. Gogo wanem Pauline talem and duim hem barava helpem famili blo hem. Distaem hem barava hapi bikos hem and hasband blo hem worshipim Jehovah tugeta. Tufala evriwan pioneer and Wayne hem wanfala elder.

10. Why nao iumi need for patient?

10 Mas patient. Taem iumi followim olketa standard blo God lo laef blo iumi, olketa relative maet faendem hem hard for acceptim wanem iumi duim. Staka taem, first samting olketa lukim hem wei wea iumi no join witim olketa lo celebration blo false religion and no joinim politik. Lo firstaem, samfala relative maet kros lo iumi. (Matt. 10:35, 36) Bat iumi shud no givap. Sapos iumi stop for helpem olketa for luksavve lo wanem iumi bilivim, hem olsem iumi judgem olketa dat olketa no fit for kasem laef olowe. Jehovah no givim iumi waka for judge, bat hem givim datfala assignment lo Jesus. (John 5:22) Sapos iumi patient, gogo maet olketa relative blo iumi bae willing for lisin lo message blo iumi.—Lukim box “ Iusim Website for Teach.”

11-13. Wanem nao iumi savve lanem from hao Alice deal witim parents blo hem?

11 Mas strong bat kaen. (Provebs 15:2) Tingim example blo Alice. Hem lane abaotem Jehovah taem hem stap farawe from parents blo hem, wea tinghae lo politik and no biliv lo God. Hem luksavve hem mas talem tufala kwiktaem abaotem olketa gud samting wea hem lanem. Alice sei: “Sapos iu ting for weit firstaem and talem olketa bihaen hao iu changem biliv blo iu, datwan bae mekem olketa for seke tumas.” Hem savve raet leta lo tufala and askem tingting blo tufala abaotem samfala topic wea maet tufala bae interest lo hem, olsem wanem nao Bible teachim abaotem love. (1 Cor. 13:1-13) Hem talem thankiu lo tufala for wei wea tufala lukaftarem and teachim hem from taem hem smol, and hem savve sendem present lo tufala. Evritaem wea hem savve visitim tufala, hem savve duim staka waka lo haos for helpem mami blo hem. Lo firstaem, tufala no hapi taem Alice storyim niu biliv blo hem lo tufala.

12 Taem Alice stap witim parents blo hem, hem gohed lo Bible reading schedule blo hem. Alice sei: “Datwan helpem mami for luksavve Bible hem barava important lo mi.” Lo semtaem, dadi blo Alice disaed for lanem samting abaotem Bible mekem hem luksavve why nao tingting blo gele blo hem change and hem laek for faendem samting lo Bible for againstim wanem Bible talem. Alice sei: “Mi givim hem wanfala Bible and mi raetem wanfala note for hem insaed.” Wanem nao kamaot from datwan? Winim wei for againstim hem, wanem dadi blo Alice lanem lo Bible hem barava tasim heart blo hem.

13 Iumi mas strong bat iumi mas kaen tu, nomata sapos iumi feisim olketa hard taem. (1 Cor. 4:12b) Olsem example, Alice no givap nomata mami blo hem againstim hem. Hem sei: “Taem mi baptaes, mami blo mi sei mi wanfala ‘nogud dota.’” Wanem nao Alice duim? “Winim wei for kwaet nomoa, mi explainim lo wei wea showimaot respect, hao mi disaed finis for kamap wanfala Jehovah’s Witness, and no eniwan savve changem wanem  mi disaedem. Mi trae helpem mami for minim dat mi barava lovem hem. Mitufala evriwan krae, and then mi kukim wanfala naes kaikai for hem. Start lo datfala taem, mami hem start for luksavve hao Bible hem mekem mi for garem olketa gudfala wei.”

14. Why nao iumi mas no letem olketa relative for changem wanem iumi disaedem?

14 For olketa relative luksavve hao wei for worshipim Jehovah hem important samting lo iumi datwan hem savve tek taem. Olsem example, taem Alice disaed for pioneer winim wei for duim waka wea parents blo hem laekem, datwan mekem mami for krae moa. Bat Alice hem strong lo wanem hem disaedem. Hem sei: “Sapos iu letem famili for changem disison blo iu lo wanfala samting, then bae olketa laekem iu for duim datwan lo olketa nara samting tu. Bat sapos iu kaen and iu strong taem iu deal witim famili, maet samfala bae laek for lisin lo iu.” Datwan nao samting wea happen lo Alice. Distaem dadi and mami blo Alice tufala pioneer and dadi blo hem elder.

HAO NAO EVRIWAN LO KONGREGESON SAVVE HELP?

Hao nao kongregeson savve helpem famili member wea no Witness? (Paragraf 15-16 storyim diswan) *

15. Olsem wanem Matthew 5:14-16 and 1 Peter 2:12 storyim, hao nao “gudfala samting” wea olketa narawan duim savve helpem olketa relative blo iumi?

15 Jehovah iusim “gudfala samting” wea olketa lo kongregeson duim for pullim pipol kam lo hem. (Readim Matthew 5:14-16; 1 Peter 2:12.) Sapos hasband or waef blo iu hem no Jehovah’s Witness, waswe, hem meetim finis olketa lo kongregeson blo iu? Pauline, wea iumi storyim finis, hem savve invaetem olketa brata and sista for kam lo haos mekem hasband blo hem Wayne savve lo olketa. Wayne storyim hao wantaem  wanfala brata duim samting wea helpem hem for minim hu nao olketa Witness. Hem sei: “Datfala brata willing for tekem day off from waka just for watchim game witim mi. Datwan mekem mi luksavve hem semsem olsem mi nomoa!”

16. Why nao iumi shud invaetem olketa relative blo iumi for attendim olketa meeting?

16 Wanfala gudfala wei for helpem olketa relative, hem for invaetem olketa for kam lo meeting witim iumi. (1 Cor. 14:24, 25) First meeting wea Wayne attendim nao hem Memorial bikos datfala meeting kamap bihaen waka and program hem short nomoa. Hem sei: “Mi no minim wanem datfala tok storyim, bat samting wea mi no forgetim hem olketa pipol. Olketa kam welkamim mi and sekhand. Mi luksavve olketa hia gudfala pipol.” Wanfala couple evritaem kaen tumas lo Pauline, olketa helpem hem and pikinini lo meeting and lo ministry. So gogo taem Wayne disaed for lanem moa samting abaotem wanem Pauline bilivim, hem askem datfala brata for study witim hem.

17. Iumi shud no blamem iumiseleva lo wanem samting, bat why nao iumi mas no givap for helpem olketa relative?

17 Iumi hope evri relative blo iumi bae joinim iumi for worshipim Jehovah. Bat, nomata iumi waka hard for helpem olketa relative blo iumi for worshipim Jehovah, maet olketa no kam insaed lo truth. Sapos olsem, iumi shud no blamem iumiseleva for disison blo olketa. Bikos iumi no savve forcem eniwan for acceptim wanem iumi bilivim. Nomata olsem, no tingse wei wea iu duim samting bae no affectim olketa, sapos olketa relative lukim hao iumi hapi taem iumi worshipim Jehovah, datwan savve helpem olketa. Prea for olketa. Story kaen lo olketa. Mas no hol bak for helpem olketa! (Acts 20:20) Trustim hao Jehovah bae blessim hard waka blo iu. And sapos olketa relative blo iu chus for lisin lo iu, bae olketa kasem laef!

SONG 57 Preach Long Evri Difren Kaen Man

^ par. 5 Iumi laekem olketa relative blo iumi for savve lo Jehovah, bat olketa seleva nao mas disaed sapos olketa laek for worshipim hem or nomoa. Lo disfala study, bae iumi storyim wanem iumi savve duim for mekem hem moa isi for olketa lisin lo iumi.

^ par. 1 Mifala changem samfala nem. Lo disfala study, disfala toktok “relative” hem minim olketa famili member wea no worshipim Jehovah yet.

^ par. 53 PIKSA: Wanfala young brata helpem dadi blo hem wea no Witness for fixim car blo hem. Lo taem wea fitim, hem showim hem wanfala video lo jw.org®.

^ par. 55 PIKSA: Wanfala sista lisin gud taem hasband blo hem wea no Witness storyim day blo hem wea busy tumas. Bihaen, datfala sista enjoyim wei for spendem taem witim famili blo hem.

^ par. 57 PIKSA: Datfala sista invaetem olketa narawan lo kongregeson for kam lo haos blo hem. Olketa showimaot olketa interest for savve lo hasband blo hem. Bihaen, hasband kam lo meeting witim waef blo hem.