Skip to content

Skip to table of contents

 STUDY ARTICLE 31

“Iumi No Givap”!

“Iumi No Givap”!

“Dastawe iumi no givap.”—2 COR. 4:16.

SONG 128 No Givap Go Kasem End

WANEM IUMI BAE STORYIM *

1. Wanem nao olketa Christian mas duim for finisim datfala resis for laef?

EVRI Christian insaed wanfala resis for laef. Nomata iumi ran for staka year finis or iumi just start, iumi need for ran go kasem taem iumi finisim datfala resis. Advaes wea aposol Paul givim for olketa Christian lo Philippi encouragem iumi for mas finisim datfala resis. Taem olketa Christian lo datfala kongregeson lo first century kasem leta from Paul, samfala lo olketa worshipim Jehovah for staka year finis. Olketa strong for ranran, bat Paul remindim olketa for gohed and no givap. Hem laekem olketa for followim example blo hem for traem best for kasem datfala “goal.”—Phil. 3:14

2. Why nao advaes blo Paul for olketa lo Philippi hem kam lo barava taem?

2 Advaes blo Paul for olketa lo Philippi hem barava fitim datfala taem. Taem wea kongregeson start, olketa deal witim wei wea pipol heitim olketa. Paul and Silas obeyim datfala direction from God for go “long Macedonia,” and olketa kasem Philippi lo samting olsem 50 C.E. (Acts 16:9) Olketa meetim wanfala woman wea nem blo hem Lydia, wea willing for lisin, and “Jehovah openem heart bilong hem” for acceptim gud nius. (Acts 16:14) Lydia and olketa lo haos blo hem baptaes. Bat Satan start for mek trabol. Olketa bigman lo datfala taon kasholem Paul and Silas, and tekem tufala go lo magistrate and laea for sei tufala mek trabol. From datwan, olketa whipim Paul and Silas, putim tufala lo prison, and bihaen raosem tufala from datfala taon. (Acts 16:16-40) Waswe, tufala givap? Nomoa! Bat waswe lo olketa brata and sista lo datfala niu kongregeson? Olketa tu no givap! Iumi sure gud example blo Paul and Silas barava encouragem olketa.

3. Wanem nao Paul luksavve lo hem, and olketa wanem kwestin nao bae iumi story raonem?

3 Paul disaed strong for no givap. (2 Cor. 4:16) Bat hem luksavve tu, for hem finisim datfala resis, hem mas tingim evritaem goal blo hem. Wanem nao bae iumi lanem from example blo Paul? Wanem nao samfala example distaem wea helpem  iumi for luksavve iumi tu savve winim olketa samting wea maet mekem iumi givap? And hao nao hope blo iumi for future hem strongim wei wea iumi disaed for no givap?

HAO EXAMPLE BLO PAUL HELPEM IUMI

4. Nomata wanem Paul feisim, hao nao hem gohed traem best blo hem?

4 Tingim hao Paul gohed for traem best blo hem. Hem prisoner lo wanfala haos lo Rome. So hem no free for go preach. Nomata olsem, hem busy for preach lo olketa wea visitim hem and raetem leta lo olketa kongregeson wea stap farawe. Distaem tu, staka brata and sista wea no fit for lusim haos, olketa iusim evri chance for preach lo eniwan wea kam lo haos blo olketa. And tu, olketa savve raet leta lo pipol wea olketa brata and sista no fit for kasem.

5. Olsem wanem Philippi 3:12-14 talem, wanem nao helpem Paul for evritaem tingim goal blo hem?

5 Paul no letem olketa mistek or samting wea hem duim bifor, for disturbim waka blo hem for Jehovah. Bat, Paul sei for mekem hem “kasem olketa samting wea stap front” lo hem, wea hem nao for winim datfala resis, hem mas “no tingim olketa samting long bihaen.” (Readim Philippi 3:12-14.) Wanem nao samfala samting wea maet disturbim waka blo Paul for Jehovah? First samting, Paul bin duim staka samting saed lo religion blo olketa Jew. Nomata olsem, hem ting lo datwan olsem “rabis nomoa.” (Phil. 3:3-8) Mek-tu, hem no letem feeling for guilty from hem persecutim pipol blo Jehovah bifor, for mekem hem wikdaon. And mek-thri, Paul no tingse hem duim finis staka samting for Jehovah. Paul hem go lo prison, olketa whipim hem, sutim hem, ship wea hem go insaed hem rek, and hem no garem inaf kaikai and kaleko, nomata olsem, hem gohed duim gud ministry blo hem. (2 Cor. 11:23-27) Bat nomata hem duim staka samting finis and hem bin safa, Paul savve hem mas gohed waka hard. Iumi tu mas olsem.

6. Wanem nao samfala lo ‘olketa samting lo bihaen’ wea iumi shud no tingim?

6 Hao nao iumi savve followim example blo Paul for “no tingim olketa samting long bihaen”? Samfala lo iumi maet feel guilty bikos lo olketa sin wea iumi duim bifor. Sapos olsem, hem gud for duim study project abaotem ransom blo Christ. Taem iumi study, ting raonem, and prea abaotem datfala subject, datwan maet helpem iumi for no feel guilty tumas. And tu, hem maet helpem iumi for no gohed kros lo iumiseleva for samting wea Jehovah forgivim finis. Nara samting iumi savve lanem from Paul. Maet samfala lusim waka for big selen, for duim moa samting for Kingdom. Sapos olsem, iumi shud no tingim moa olketa samting lo bihaen, wea minim iumi no regret lo olketa chance wea iumi bin garem for kasem olketa material samting. (Nambas 11:4-6; Eklesiastes 7:10) Olketa samting lo bihaen, savve minim tu eniting wea iumi duim finis for Jehovah or hard taem wea iumi deal witim bifor. Hem tru, wei for ting bak lo hao Jehovah blessim and sapotim iumi bifor, savve helpem iumi for klos lo Dadi blo iumi. Bat, iumi no laek for tingse bikos iumi duim staka samting for Jehovah finis, iumi shud rest nao.—1 Cor. 15:58.

Lo resis for kasem laef, iumi mas stap klia lo olketa samting wea savve disturbim iumi and iumi tingim nomoa for kasem goal blo iumi (Paragraf 7 storyim diswan)

7. Olsem 1 Corinth 9:24-27 storyim, wanem nao iumi need for duim for win lo disfala resis for laef? Storyim example.

7 Paul barava minim gud toktok blo Jesus wea sei: “Iufala mas barava trae hard.” (Luke 13:23, 24) Paul luksavve hem mas olsem Christ and barava waka hard go kasem end. Dastawe hem comparem laef blo wanfala Christian witim wanfala resis. (Readim  1 Corinth 9:24-27.) Lo wanfala resis, man wea ranran tingim nomoa for kasem end and hem no laekem eni samting for disturbim hem. Olsem example, samfala resis savve go thru lo taon wea garem olketa stoa and nara samting wea savve disturbim man. Iu tingse man wea ran bae stop and lukluk firstaem lo olketa samting wea olketa advertisem? Nomoa nao, bikos hem laek for win! Lo resis for kasem laef, iumi tu mas stap klia lo olketa samting wea savve disturbim iumi. Sapos iumi tingim nomoa goal blo iumi, then iumi bae traem best olsem Paul, mekem iumi winim datfala prize!

OLKETA CHALLENGE WEA TESTIM FAITH BLO IUMI

8. Wanem nao thrifala challenge wea iumi bae storyim?

8 Distaem bae iumi storyim thrifala challenge wea savve mekem iumi wikdaon. Wanfala nao, wanem iumi expectim hem no happen, mek-tu, strong blo iumi gogo daon, and mek-thri, olketa hard taem wea no finis kwiktaem. Iumi savve kasem gud samting taem iumi lane from hao olketa narawan deal witim olketa kaen samting olsem.—Phil. 3:17.

9. Taem samting wea iumi expectim hem no happen, hao nao datwan savve affectim iumi?

9 Wanem iumi expectim hem no happen. Iumi evriwan barava laekem tumas for kasem olketa gud samting wea Jehovah promisim. Tru nao, taem profet Habakkuk talem hao hem laekem tumas for Jehovah finisim olketa nogud samting lo Judah, Jehovah talem hem for mas gohed for expectim datwan. (Habakuk 2:3) Bat, taem samting wea iumi expectim hem luk olsem hem delay, datwan savve mekem iumi slow daon. Maet hem mekem iumi for wikdaon. (Provebs 13:12) Diswan happen lo olketa year klosap lo 1914. Staka anointed Christian expectim for kasem reward blo olketa for go lo heven lo 1914. Bat, taem datwan no happen, hao nao olketa faithful brata and sista hia deal witim datwan?

Nomata Royal and Pearl Spatz no kasem wanem tufala expectim lo 1914, bat tufala gohed faithful for staka year moa bihaen (Paragraf 10 storyim diswan)

10. Taem samting wea wanfala couple expectim hem no happen, hao nao tufala deal witim datwan?

10 Tingim example blo wanfala faithful brata and sista wea mas winim datfala challenge.  Brata Royal Spatz baptaes lo 1908 taem hem 20 year. Hem barava sure klosap hem bae kasem reward for go lo heven. Dastawe, lo 1911 hem story lo Pearl, wanfala sista wea tufala plan for marit, and hem sei: “Iu savve nao wanem bae happen lo 1914. Sapos bae iumi tufala marit, hem gud for duim datwan kwiktaem!” Waswe, taem tufala no go lo heven lo 1914, tufala givap for ran lo resis for kasem laef? Nomoa, bikos important samting lo tufala hem for faithful for servem Jehovah, and no datfala reward. Tufala disaed strong for gohed ran lo resis and no givap. Royal and Pearl gohed strong and faithful go kasem taem tufala finisim waka blo tufala lo earth. Masbi, iu tu barava laek for lukim taem Jehovah mekhae lo nem and rul blo hem and fulfillim evri promis blo hem. Iumi sure evri samting hia bae happen lo taem wea Jehovah markem. Go kasem datfala taem, iumi gohed busy for servem God and nomata sapos iumi expectim samting bat hem no happen, no letem datwan mekem iumi slow daon or wikdaon.

Nomata hem olo, Arthur Secord gohed strong for servem Jehovah (Paragraf 11 storyim diswan)

11-12. Why nao iumi savve gohed for servem Jehovah nomata sapos strong blo iumi gogo daon? Storyim example.

11 Strong blo iumi gogo daon. Wanfala man wea ran lo resis hem need for strong lo physical wei, bat iu no needim kaen strong olsem for helpem iu lo spiritual wei. Staka wea strong blo olketa gogo daon, olketa still gohed strong lo spiritual wei. (2 Cor. 4:16) Olsem example, Brata Arthur Secord * wea hem waka lo Bethel for 55 years, hem 88 years old and health blo hem no mas gud. Wantaem, wanfala nurse kam lo bed blo hem for helpem hem. Nurse hia luk lo hem and sei lo kaenfala wei: “Brata Secord, disfala body hem bin duim staka waka for Jehovah.” Bat Arthur no laek tingim samting wea hem duim finis. Hem luk lo datfala nurse and smile, and sei: “Datwan tru, bat ino samting iumi duim bifor nao important. For faithful distaem nao hem important.”

12 Maet iu servem Jehovah for staka year and distaem maet health blo iu mekem iu no fit nao for duim staka samting olsem bifor. Sapos olsem, no feel nogud. For sure Jehovah tingim waka wea iu faithful for duim for hem bifor. (Heb. 6:10) And lo distaem, tingim hao wei for lovem Jehovah witim full heart hem no depend lo haomas waka iumi duim for hem. Bat, iumi showimaot iumi barava lovem Jehovah taem iumi garem positive tingting and duim wanem iumi fit for duim. (Col. 3:23) Jehovah luksavve lo iumi and hem no expectim iumi for duim samting wea iumi no fit for duim.—Mark 12:43, 44.

Anatoly and Lidiya Melnik gohed faithful nomata tufala kasem staka hard taem (Paragraf 13 storyim diswan)

13. Hao nao experience blo Anatoly and Lidiya encouragem iumi for gohed waka hard nomata iumi kasem olketa hard taem?

 13 Olketa hard taem wea no finis kwiktaem. Samfala pipol blo Jehovah mas deal witim olketa hard taem and persecution for staka year. Olsem example, Anatoly Melnik * hem just 12 years taem olketa arrestim and putim dadi blo hem lo prison and sendem dadi go lo Siberia, wea winim 7,000 kilometer farawe from famili blo hem lo Moldova. Wan year bihaen, olketa sendem Anatoly, mami blo hem, and tufala grani blo hem go lo Siberia tu. Gogo, olketa savve attendim meeting lo nara vilij, bat olketa mas wakabaot for 30 kilometer lo snow wea cold tumas. Gogo bihaen, from olketa putim Brata Melnik lo prison for thrifala year, hem mas go from waef blo hem Lidiya and smol gele blo tufala wea hem wan year nomoa. Nomata for staka year, olketa mas feisim hard taem, Anatoly and famili blo hem gohed faithful for servem Jehovah. Distaem Anatoly hem 82 year, and hem member lo Branch Komiti lo Central Asia. Olsem Anatoly and Lidiya, iumi tu laek for duim wanem iumi fit for duim lo waka blo Jehovah, and gohed and no givap olsem iumi duim finis.—Gal. 6:9.

HOPE BLO IUMI FOR FUTURE MUVIM IUMI FOR GOHED

14. Wanem nao Paul luksavve hem need for duim for kasem goal blo hem?

14 Paul barava sure dat hem bae finisim resis blo hem and kasem goal blo hem. From hem anointed Christian, hem luk forward for kasem “datfala prize for laef long heven.” Bat, for kasem datfala goal, hem luksavve hem mas gohed for “waka hard.” (Phil. 3:14) Paul storyim wanfala interesting example lo olketa lo Philippi for helpem olketa for minim hao for gohed for ting strong lo goal blo olketa.

15. Why nao Paul iusim subject abaotem citizen for encouragem olketa Christian lo Philippi for gohed “waka hard”?

15 Paul remindim olketa lo Philippi hao hom blo olketa hem lo heven wea minim olketa kamap citizen lo heven. (Phil. 3:20) Why nao wei for citizen hem important lo olketa? Lo datfala taem, pipol barava tinghae tumas lo wei for kamap wanfala citizen blo Rome. * Bat olketa anointed Christian bae kamap citizen blo wanfala gavman wea winim gavman blo Rome, and olketa bae kasem staka gud samting from datwan. Tru nao, for citizen  blo Rome hem samting nating nomoa sapos man comparem witim wei for citizen lo heven! Dastawe, Paul encouragem olketa lo Philippi for ‘mek sure wei bilong olketa hem fitim datfala gud nius abaotem Christ,’ wea diswan minim wei blo olketa hem fitim olketa citizen blo heven. (Phil. 1:27) Olketa anointed Christian distaem showimaot gudfala example lo wei for waka hard for kasem goal blo olketa for laef olowe lo heven.

16. Nomata iumi hope for laef lo heven or lo earth, wanem nao iumi mas gohed for duim olsem Philippi 4:6, 7 talem?

16 Nomata iumi hope for laef olowe lo heven or lo paradaes lo earth, iumi mas gohed waka hard for kasem datfala goal. Nomata wanem nao iumi feisim, iumi mas no tingim olketa samting lo bihaen, and iumi shud no letem eni samting stopem iumi for gohed for servem Jehovah. (Phil. 3:16) Maet olketa samting wea iumi expectim luk olsem hem delay, or strong blo iumi gogo daon. Iumi maet feisim olketa hard taem and persecution for staka year. Nomata wanem iumi feisim, iumi “mas no wari abaotem eni samting.” Bat iumi need for barava askem help blo God and thankiu lo hem, and hem bae givim iu peace wea winim wanem man savve tingim.—Readim Philippi 4:6, 7.

17. Wanem nao bae iumi storyim lo next study?

17 Olsem man wea ran hem barava traem best for finisim last part blo datfala resis, iumi mas barava tingting strong for kasem datfala goal for finisim resis for laef. Nomata wanem iumi feisim lo laef and witim strong wea iumi garem, iumi mas gohed traem best and waka hard for kasem olketa gud samting wea stap front lo iumi. Wanem nao iumi savve duim for followim stretfala direction and for ran lo speed wea fitim iu? Next study bae helpem iumi for savve wanem nao shud first samting lo laef blo iumi and hao for “luksavve long olketa samting wea barava important.”—Phil. 1:9, 10.

SONG 79 Teachim Olketa for Gohed Strong

^ par. 5 Nomata iumi worshipim Jehovah for longtaem finis or just start nomoa, iumi laek mekem worship blo iumi kamap moabeta and gohed for kamap mature. Aposol Paul encouragem olketa Christian for mas no givap! Leta blo hem for olketa lo Philippi encouragem iumi for no givap taem iumi gohed ran lo resis for laef. Disfala study bae helpem iumi for duim wanem Paul talem.

^ par. 11 Lukim laef story blo Brata Secord, “My Part in Advancing Right Worship,” hem stap lo The Watchtower, June 15, 1965.

^ par. 13 Lukim laef story blo Brata Melnik, “Taught From Childhood to Love God,” lo Awake!, October 22, 2004.

^ par. 15 From gavman blo Rome nao rul ovarem Philippi, olketa wea stap lo there kasem olketa gud samting from wei wea olketa citizen blo Rome. So disfala example hem samting wea pipol hia barava minim gud.