Skip to content

Skip to table of contents

Gohed Waka Hard for Duim Moa Samting for Jehovah

Gohed Waka Hard for Duim Moa Samting for Jehovah

“Gohed waka hard for readim olketa Holy Raeting long olketa narawan, and encouragem and teachim olketa.”—1 TIM. 4:13.

SONG: 45, 70

1, 2. (a) Wanem nao showimaot profesi long Isaiah 60:22 hem kamap tru distaem? (b) Wanem nao samfala waka for duim insaed organization bilong Jehovah long earth distaem?

“OLKETA wea no staka bae kamap wan thousand, and olketa wea smol sekson nomoa bae kamap wanfala maeti nation.” (Isaiah 60:22) Disfala profesi hem kamap tru long olketa last day distaem. Long 2015 service year, 8,220,105 pablisa preachim gud nius abaotem Kingdom evriwea long world! God storyim disfala waka bae kamap big. Hem sei: “Mi Jehovah, bae mi mekem datwan for happen kwiktaem long taem bilong hem.” So diswan minim, staka waka hem stap for iumi duim long distaem and long future tu. Waswe, iumi duim best bilong iumi for preachim gud nius and teachim pipol? Staka brata and sista olketa regular pioneer or duim auxiliary pioneer waka. Samfala go stap long nara ples for duim preaching waka, and olketa narawan waka hard for buildim olketa Kingdom Hall.

2 Evri year, samting olsem 2,000 niufala kongregeson hem start. Olketa kongregeson hia needim olketa elder and ministerial servant for lukaftarem olketa. Tru nao, staka waka hem stap for olketa brata and olketa sista tu for duim.—1 Cor. 15:58.

 WANEM HEM MINIM FOR DUIM MOA SAMTING FOR JEHOVAH

3, 4. Wanem nao samfala spiritual goal wea iu laek for kasem?

3 Readim 1 Timothy 3:1. Greek word wea iumi transleitim “laek for,” savve minim for barava trae for kasem wanfala samting. Taem aposol Paul iusim datfala word, hem showimaot man mas waka hard sapos hem laek for fren gud witim Jehovah. Tingim sapos wanfala brata laek for kamap wanfala ministerial servant. Hem luksavve hem mas waka hard for showimaot olketa gudfala wei wea Christian shud garem. Then, taem hem kamap wanfala ministerial servant, hem mas gohed waka hard mekem hem savve kamap wanfala elder.

4 Samfala brata and sista changem samfala samting long laef bilong olketa mekem olketa savve duim moa samting long waka bilong Jehovah. Olsem example, maet olketa laek for regular pioneer, waka long Bethel, or buildim olketa Kingdom Hall. Iumi bae lukim wanem Bible talem wea savve helpem iumi for duim moa samting for Jehovah.

WAKA HARD FOR DUIM MOA SAMTING FOR JEHOVAH

5. Wanem nao olketa young wan savve duim long waka bilong Jehovah?

5 Olketa young wan savve duim staka samting for sapotim waka bilong Jehovah bikos olketa strong and healthy. (Readim Proverbs 20:29.) Samfala young wan long Bethel duim waka for printim olketa buk and Bible. Staka young brata and sista buildim or fixim olketa Kingdom Hall. Olketa narawan help long disaster relief waka. And staka pioneer wea young lanem wanfala languis or go stap long nara ples for preachim gud nius.

6-8. (a) Wanem nao wanfala young wan duim for garem stretfala tingting abaotem waka bilong God, and wanem nao kamaot from datwan? (b) Wanem nao iumi savve duim mekem iumi luksavve “wei wea [Jehovah] hem gud tumas”?

6 Iumi lovem Jehovah and iumi laek for duim best bilong iumi long waka bilong hem. Nomata olsem, maet firstaem iumi garem sem feeling olsem wanfala brata wea nem bilong hem Aaron. Hem no hapi nomata hem worshipim God. Start long taem wea Aaron hem smol, hem savve attendim olketa meeting and joinim preaching waka, bat hem sei, “Mi savve boring long olketa meeting and field service.” So wanem nao hem duim?

7 Aaron hem traem best for readim Bible evriday, prepare for olketa meeting, and givim ansa long olketa meeting. And tu, hem gohed prea evritaem long Jehovah. Evri samting hia helpem hem for kamap mature Christian. Hem pioneer, hem help long disaster relief waka, and hem go stap long nara kantri for duim preaching waka. Distaem hem wanfala elder and hem waka long Bethel. Hao nao tingting bilong hem abaotem wanem hem duim long laef bilong hem? Aaron sei: “Mi duim olketa samting hia and mi lukim Jehovah hem gud tumas. From Jehovah blessim mi, mi laek for showimaot mi barava tinghae long hem, so mi duim moa samting long waka bilong hem. Taem mi duim olsem, mi kasem samfala blessing moa.”

8 Man wea raetem psalm hem sei: “Lane abaotem Jehovah and bae iu lukim wei wea hem gud tumas.” Hem sei tu: “Olketa wea lukaotem Jehovah bae no short long eni gudfala samting.” (Readim Psalm 34:8-10.) Tru tumas, taem iumi duim best bilong iumi long waka bilong Jehovah, bae iumi barava hapi bikos iumi savve iumi duim wanem hem laekem. And bae hem duim wanem hem promisim for lukaftarem iumi.

 NO GIVAP

9, 10. Why nao hem important for iumi mas ‘patient for weit’?

9 Maet iumi laek for duim samfala samting moa long waka bilong Jehovah. Bat waswe sapos iumi waka hard for longfala taem finis for wanfala privilege long kongregeson bat iumi no kasem yet? Or waswe sapos iumi weitim samfala samting for change long laef bilong iumi for duim moa samting for Jehovah? Iumi mas patient. (Mic. 7:7) Nomata sapos Jehovah letem samting wea kasem iumi for gohed, iumi savve hem bae evritaem sapotim iumi. Iumi savve lane from example bilong Abraham. Jehovah promisim hem bae hem garem wanfala son, bat hem mas weit for staka year bifor Isaac hem born. Nomata Abraham mas weit for longfala taem, hem patient and barava trustim Jehovah.—Gen. 15:3, 4; 21:5; Heb. 6:12-15.

10 Nomata olsem, hem no isi for iumi weitim wanfala samting wea iumi laekem. (Prov. 13:12) Bat sapos iumi gohed for tingim olowe datwan, hem savve mekem iumi barava wikdaon. Samting iumi savve duim taem iumi weit nao, iumi savve waka hard for duim olketa samting wea bae helpem iumi for kamap mature long spiritual wei mekem iumi fit for duim samfala waka long kongregeson.

11. Olketa wanem gudfala wei nao iumi laek waka hard for garem, and why nao hem important for garem olketa wei hia?

11 Waka hard for garem olketa gudfala wei. Taem iu readim Bible and ting raonem wanem iu readim, datwan bae helpem iu for wise, for garem gudfala tingting, and for mekem olketa gudfala disison. Olketa brata need for garem olketa wei hia mekem olketa savve duim gud waka bilong olketa  long kongregeson. (Prov. 1:1-4; Titus 1:7-9) Taem iumi studyim Bible, iumi bae luksavve long tingting bilong Jehovah abaotem olketa samting wea iumi feisim. Then evriday, iumi savve iusim wanem iumi lanem for mekem olketa gudfala disison wea Jehovah bae hapi long hem. Olsem example, iumi bae savve hao for stap gud witim nara pipol, hao for iusim selen long wisefala wei, and hao for chusim hapitaem and kaleko wea fitim wanfala Christian.

12. Hao nao iumi shud duim eni assignment wea iumi kasem?

12 Duim gud eni assignment wea iu kasem. Taem olketa Israelite wakem bak temple, Nehemiah needim samfala man for duim samfala waka. Hem chusim olketa faithful man. Hem savve olketa man hia lovem God and olketa bae duim gud waka wea hem givim long olketa. (Neh. 7:2; 13:12, 13) Distaem tu, olketa wea faithful and waka hard bae pipol trustim olketa and bae olketa kasem moa responsibility. (1 Cor. 4:2) So nomata iu wanfala brata or sista, duim best bilong iu long eni waka wea iu kasem long organization bilong Jehovah.—Readim 1 Timothy 5:25.

13. Wanem example nao Joseph showimaot taem olketa narawan duim nogud samting long hem?

13 Depend long Jehovah. Wanem nao iu savve duim sapos samwan duim eni samting long iu wea hem no stret? Hem gud for stretem datwan kwiktaem. Bat sapos iu gohed for mek excuse and sei iu nao stret, datwan savve mekem problem kamap big. Iumi savve lanem staka samting from example bilong Joseph. Olketa brata bilong hem duim barava nogud samting long hem. Pipol talem laea story abaotem hem, and olketa putim hem long prison nomata hem no duim eni rong samting. Bat Joseph depend long Jehovah. Hem tingim olketa promis bilong Jehovah, and hem gohed faithful. (Ps. 105:19) Taem hem kasem olketa hard taem hia, datwan helpem hem for garem olketa gudfala wei. Bihaen, from hem garem olketa gudfala wei hia, datwan helpem hem for duim gud important waka wea hem kasem. (Gen. 41:37-44; 45:4-8) Sapos samwan duim eni samting long iu wea hem no stret, prea long Jehovah for givim iu wisdom. Bae hem helpem iu for no kros and for tok kaen long olketa.—Readim 1 Peter 5:10.

WAKA HARD FOR DUIM GUD MINISTRY

14, 15. (a) Why nao iumi mas “lukluk gud evritaem” long hao iumi preach? (b) Wanem nao iu savve duim sapos iu no faendem pipol long territory bilong iu? (Lukim piksa long start bilong study, and box “ Waswe, Iu Laek for Traem Olketa Difren Wei for Preach?”)

14 Paul encouragem Timothy for “gohed waka hard for readim olketa Holy Raeting long olketa narawan, and encouragem and teachim olketa.” Paul sei tu: “Lukluk gud evritaem long iuseleva and long samting wea iu teachim.” (1 Tim. 4:13, 16) Long datfala taem, Timothy hem preach for staka year finis. So why nao Timothy mas gohed waka hard for duim gud ministry? Timothy luksavve pipol savve change and laef bilong olketa savve change tu. So hem tu mas gohed for changem wei wea hem teachim pipol. Iumi tu mas duim sem samting taem iumi preach long pipol.

15 Long samfala ples, pipol no stap long haos taem iumi go preach long olketa. Long olketa nara ples, maet pipol stap, bat hem hard for iumi kasem olketa bikos olketa stap long olketa haos wea garem fence. Sapos hem nao samting wea kasem iu, waswe, iu savve traem eni nara wei for faendem pipol long territory bilong iu?

16. Wanem gud samting nao savve kamaot from wei for duim pablik witnessing?

16 Staka brata and sista savve laekem tumas for duim pablik witnessing. Olsem example, long staka ples olketa go long olketa train station, bas stop, market, and park for  faendem pipol. For startim story long pipol long olketa ples olsem, maet iumi savve story witim samwan abaotem wanfala nius iumi herem long TV or radio. Or maet iumi savve story abaotem famili, or askem kwestin abaotem waka bilong hem. Sapos hem luk olsem hem interest, maet iumi savve talem wanfala point from Bible and askem tingting bilong hem abaotem datwan. Staka taem pipol savve interest for savve long wanem Bible talem.

17, 18. (a) Wanem nao savve helpem iu for no fraet for duim pablik witnessing? (b) Why nao hem gud for garem sem tingting olsem David taem iumi duim ministry?

17 Maet iu faendem hem hard for startim story witim pipol long pablik wea iu no savve long olketa. Datwan nao samting wea kasem Eddie, wanfala pioneer long New York City. Bat wanfala samting nao helpem hem for no fraet. Hem sei: “Taem mitufala waef bilong mi duim famili worship, mitufala duim research for faendem ansa long olketa kwestin bilong pipol. Mifala savve askem olketa nara brata and sista tu for samfala idea.” Distaem Eddie luk forward for duim pablik witnessing.

18 Taem iumi savve hao for story witim pipol and duim gud ministry bilong iumi, olketa narawan bae luksavve iumi kamap strongfala Christian. (Readim 1 Timothy 4:15.) And maet iumi helpem samwan for worshipim Jehovah tu. David sei: “Mi bae blessim Jehovah evritaem. Mi bae no stop for praisem hem. Mi bae tok praod abaotem Jehovah. Olketa wea hambol bae herem and hapi.”—Ps. 34:1, 2.

IUMI MEKHAE LONG JEHOVAH TAEM IUMI DUIM MOA SAMTING FOR HEM

19. Hao nao iu savve gohed for hapi nomata iu kasem hard taem?

19 David sei: “Jehovah, evri samting wea iu wakem bae praisem iu. And olketa wea faithful long iu bae praisem iu. Olketa bae story abaotem rul bilong iu wea hem nambawan, and bigfala paoa wea iu garem, mekem olketa man savve long olketa nambawan samting wea iu duim and rul bilong iu wea hem barava nambawan.” (Ps. 145:10-12) Iumi wea lovem Jehovah and wea faithful long hem barava laek for story abaotem hem long olketa narawan. Bat waswe sapos iu sik or iu olo, and iu no fit for spendem staka taem long preaching waka? Iu mas tingim diswan: Long evritaem wea iu story long olketa narawan, olsem olketa nurse or doctor, iu praisem Jehovah nao. Sapos iu stap long prison bikos iu worshipim Jehovah, iu still fit for story long olketa narawan abaotem Jehovah, and datwan mekem heart bilong Jehovah barava hapi. (Prov. 27:11) And sapos iuseleva nomoa long famili bilong iu wea worshipim Jehovah, hem barava hapi tumas long iu tu. (1 Pet. 3:1-4) Nomata iu kasem hard taem, iu fit for praisem Jehovah, gohed fren gud witim hem, and duim moa samting for hem.

20, 21. Hao nao iu savve kamap olsem wanfala blessing for olketa narawan?

20 Jehovah bae blessim iu sapos iu gohed fren gud witim hem and duim best bilong iu for worshipim hem. Maet sapos iu changem samfala samting wea iu duim long laef bilong iu, bae iu garem moa chance for story long pipol abaotem olketa nambawan promis bilong God. Maet iu savve duim olketa nara samting tu for helpem olketa brata and sista. And taem olketa brata and sista lukim iu waka hard long kongregeson, bae olketa barava lovem iu.

21 Nomata iumi just start for worshipim Jehovah or iumi worshipim hem for longfala taem finis, iumi evriwan savve gohed for fren gud witim hem and duim moa samting for hem. Long nextfala study, bae iumi storyim hao iumi savve helpem olketa narawan tu for duim sem samting.