Skip to content

Skip to table of contents

 STUDY ARTICLE 15

Followim Example Bilong Jesus and Gohed for Garem Peace

Followim Example Bilong Jesus and Gohed for Garem Peace

“Peace bilong God wea winim nao wanem man savve minim bae gaedem heart.”—PHIL. 4:7.

SONG 113 Peace Bilong Iumi

WANEM IUMI BAE STORYIM *

1-2. Why nao Jesus hem wari tumas?

LONG sem day wea Jesus dae, hem wari tumas. Hem savve olketa nogud man bae killim hem dae. Bat hem no just wari abaotem datwan nomoa. Hem barava lovem Dadi bilong hem and laek for mekem hem hapi. Jesus savve sapos hem faithful taem hem feisim datfala barava hard test, datwan bae help for mekhae long nem bilong Jehovah. Jesus lovem tu olketa pipol, and hem savve wei wea iumi man bae kasem laef olowe hem depend long wei wea hem bae gohed faithful go kasem taem hem dae.

2 Jesus garem peace nomata hem barava wari and stress. Hem sei olsem long olketa aposol bilong hem: “Iufala bae gohed for garem peace wea mi givim long iufala.” (John 14:27) Jesus hem garem “Peace bilong God,” wea minim mind bilong hem kwaet bikos hem garem wei for fren gud witim Jehovah. Datwan nao helpem Jesus for garem peace long mind and heart.—Phil. 4:6, 7.

3. Wanem nao bae iumi storyim long disfala study?

3 No eniwan long iumi bae feisim kaen hevi and stress wea Jesus kasem, bat evriwan wea followim Jesus bae feisim olketa hard taem. (Matt. 16:24, 25; John 15:20) And samfala taem iumi tu savve barava wari olsem Jesus. Wanem nao iumi savve duim for no letem wei for wari spoelem wei for garem peace long mind? Bae iumi storyim thrifala samting wea Jesus duim taem hem duim ministry bilong hem long earth and hao iumi savve followim example bilong hem taem iumi kasem olketa hard taem.

JESUS GOHED FOR PREA

Iumi savve gohed garem peace thru long wei for prea (Paragraf 4-7 storyim diswan)

4. For fitim wanem 1 Thessalonica 5:17 talem, olketa wanem example nao showimaot Jesus prea staka taem long day wea hem dae?

4 Readim 1 Thessalonica 5:17. Long sem day wea Jesus dae, staka taem nao hem prea. Taem hem showim long olketa disaepol  hao for rememberim dae bilong hem, hem prea for datfala bred and wine. (1 Cor. 11:23-25) Bifor olketa lusim ples wea olketa duim pasova, hem prea witim olketa disaepol. (John 17:1-26) Long datfala sem naet, taem Jesus and olketa disaepol arrive long Maunt Olive Tree, hem prea staka taem. (Matt. 26:36-39, 42, 44) And tu, lastfala toktok bilong Jesus bifor hem dae, hem wanfala prea. (Luke 23:46) Wei wea Jesus prea evritaem long datfala day, hem showimaot hem barava depend long Jehovah.

5. Why nao olketa aposol isi for fraet?

5 Wanfala reason why Jesus fit for winim datfala test hem bikos hem depend long Dadi bilong hem thru long prea. Bat, olketa aposol no gohed for prea long datfala naet. From datwan hem isi for olketa fraet taem olketa kasem test. (Matt. 26:40, 41, 43, 45, 56) Taem iumi kasem olketa hard taem, iumi bae gohed for faithful only sapos iumi followim example bilong Jesus and gohed for prea. Wanem nao iumi savve prea abaotem?

6. Hao nao faith savve helpem iumi for gohed garem peace?

6 Iumi savve prea and askem Jehovah for “strongim go moa faith” bilong iumi. (Luke 17:5; John 14:1) Iumi needim faith bikos Satan bae testim evriwan wea followim Jesus. (Luke 22:31) Hao nao faith savve helpem iumi gohed garem peace nomata iumi mas deal witim staka problem wea kamap? Taem iumi duim evri samting wea iumi fit for duim for deal witim wanfala hard taem, faith bae muvim iumi for leavim evri wari bilong iumi long hand bilong Jehovah. Bikos iumi trustim hao Jehovah nao savve wanem for duim winim iumi, datwan helpem iumi for garem peace long mind and heart.—1 Pet. 5:6, 7.

7. Wanem nao iu lanem from story bilong Robert?

7 Prea helpem iumi for gohed garem peace  long mind nomata iumi feisim eni hard taem. Tingim example bilong Robert, wanfala faithful elder wea distaem hem winim 80 year. Hem sei: “Toktok long Philippi 4:6, 7 helpem mi for deal witim staka hard taem long laef bilong mi. Mi mas deal witim olketa problem saed long selen. And tu, for lelebet taem mi lusim privilege bilong mi olsem wanfala elder.” Wanem nao helpem Robert for gohed garem peace long mind? Hem sei: “Taem mi start for wari, mi kwiktaem for prea. Mi luksavve taem mi prea staka taem and barava prea strong from heart, datwan helpem mi for garem peace long mind.”

JESUS BARAVA LAEK FOR PREACH

Iumi savve gohed garem peace thru long wei for preach (Paragraf 8-10 storyim diswan)

8. Olsem John 8:29 storyim, wanem nao nara reason why Jesus garem peace long mind and heart?

8 Readim John 8:29. From Jesus savve hem mekem Dadi bilong hem hapi, datwan mekem hem garem peace long mind and heart nomata olketa persecutim hem. Hem gohed for obey nomata taem hem no isi. Hem lovem Dadi bilong hem and hem ting long waka bilong Jehovah olsem main samting long laef bilong hem. Taem hem long heven, hem wanfala nambawan wakaman bilong God. (Provebs 8:30) And taem hem long earth, hem barava busy for teachim olketa narawan abaotem Dadi bilong hem. (Matt. 6:9; John 5:17) Datfala waka mekem Jesus barava hapi.—John 4:34-36.

9. Hao nao wei for busy long preaching waka helpem iumi for garem peace long mind and heart?

9 Iumi savve followim example bilong Jesus taem iumi obeyim Jehovah and “evritaem busy long waka bilong Lord.” (1 Cor. 15:58) Taem iumi “barava busy” long preaching  waka, datwan bae helpem iumi for garem stretfala tingting abaotem olketa problem wea iumi kasem. (Acts 18:5) Olsem example, iumi savve meetim pipol long ministry wea garem olketa problem wea worse winim problem wea kasem iumi. Bat, taem olketa lane for lovem Jehovah and followim wanem hem talem, laef bilong olketa hem kamap gud, datwan mekem olketa barava hapi. Evritaem iumi lukim datwan, hem mekem iumi barava sure Jehovah bae lukaftarem iumi. And wei wea iumi trustim Jehovah bae helpem iumi for gohed garem peace long mind and heart. Wanfala sista wea stragol long full laef bilong hem for deal witim feeling for wari tumas and feeling for tingse hem iusles hem luksavve diswan hem tru. Hem sei: “Taem mi busy for duim ministry, datwan helpem mi for kontrolem feeling bilong mi and mekem mi hapi. Mi tingse datwan hem bikos taem mi preach mi barava feel klos long Jehovah.”

10. Wanem nao iu lanem from samting wea Brenda storyim?

10 Tingim tu example bilong wanfala sista wea nem bilong hem Brenda. Hem and gele bilong hem garem wanfala barava serious sik wea gogo bae mekem body hem no strong. Brenda no strong and no fit for wakabaot so hem mas iusim wheelchair. Samfala taem hem preach from haos tu haos, bat staka taem hem preach thru long leta. Hem sei: “Taem mi luksavve and acceptim hao olketa no savve kiurim sik bilong mi long disfala taem, datwan mekem mi for ting strong for duim ministry. Wei for preach helpem mi for no wari tumas. Bat hem mekem mi for busy for helpem olketa long territory wea mi preach long olketa. And tu, datwan mekem mi for evritaem tingim hope bilong mi for future.”

JESUS ACCEPTIM HELP FROM OLKETA FREN BILONG HEM

Iumi savve gohed garem peace thru long wei for garem olketa gudfala fren (Paragraf 11-15 storyim diswan)

11-13. (a) Hao nao olketa aposol and olketa narawan showimaot olketa gudfala fren bilong Jesus? (b) Hao nao olketa fren bilong Jesus affectim hem?

11 Hem no isi taem Jesus duim ministry bilong hem, nomata olsem, olketa faithful aposol bilong hem duim samting wea showimaot olketa gudfala fren bilong hem. Wanem olketa duim hem olsem samting wea Bible talem long Proverbs, wea sei: “Gudfala fren hem faithful winim wanfala really brata.” (Prov. 18:24, NW) Jesus tinghae long olketa fren olsem. Taem Jesus duim ministry bilong hem, no eniwan long olketa really brata bilong hem showimaot faith long hem. (John 7:3-5) And tu, wanfala taem, olketa relative bilong hem tingse hem krangge. (Mark 3:21) Bat olketa aposol no olsem, dastawe long naet bifor hem dae, Jesus fit for sei olsem: “Iufala nao nating lusim mi taem mi kasem hard taem.”—Luke 22:28.

12 Samfala taem olketa aposol duim samting wea mekem Jesus feel nogud, bat Jesus no lukluk nomoa long mistek bilong olketa bikos hem luksavve olketa garem faith long hem. (Matt. 26:40; Mark 10:13, 14; John 6:66-69) Long last naet bifor olketa killim Jesus dae, hem sei olsem long olketa faithful man hia: “Mi kolem iufala olketa fren bikos mi talem iufala evri samting wea mi herem from Dadi bilong mi.” (John 15:15) For sure, olketa fren bilong Jesus barava encouragem hem. Wei wea olketa helpem Jesus long ministry mekem hem hapi tumas.—Luke 10:17, 21.

13 Jesus garem tu staka nara fren, olketa man and olketa woman. Olketa savve helpem hem long preaching waka and long olketa nara samting tu. Samfala invaetem hem for kaikai long haos bilong olketa. (Luke 10:38-42; John 12:1, 2) Olketa narawan savve gogo witim hem and sharem wanem olketa garem witim hem. (Luke 8:3) From Jesus fren gud witim olketa, olketa tu  laek for fren witim hem. Hem duim gud samting for olketa and hem no expectim olketa for duim samting wea olketa no fit for duim. Nomata Jesus hem perfect, hem tinghae long sapot wea hem kasem from olketa fren bilong hem wea no perfect. And iumi sure, olketa barava helpem hem for gohed garem peace long mind and heart.

14-15. Hao nao iumi savve garem olketa gudfala fren, and hao nao olketa savve helpem iumi?

14 Olketa gudfala fren bae helpem iumi for gohed faithful long Jehovah. Best samting wea bae helpem iumi for garem gudfala fren, hem nao sapos iumi kamap gudfala fren bilong olketa. (Matt. 7:12) Olsem example, Bible encouragem iumi for iusim taem and strong bilong iumi for helpem narawan, especially olketa wea garem need. (Eph. 4:28) Waswe, iu tingim eniwan long kongregeson bilong iu wea iu savve helpem? Maet iu savve duim shopping for wanfala pablisa wea stap long haos from hem sik or olo. Or iu savve givim kaikai for wanfala famili wea no garem inaf selen. Sapos iu savve hao for iusim jw.org® website and JW Library® app, iu savve helpem narawan insaed kongregeson for minim hao for iusim olketa samting hia. Taem iumi busy for helpem olketa narawan, datwan bae mekem iumi barava hapi.—Acts 20:35.

15 Olketa fren wea iumi garem bae sapotim iumi taem iumi kasem olketa hard taem, and helpem iumi for gohed garem peace long mind and heart. Olsem wei wea Elihu lisin long Job taem hem storyim olketa hard taem wea hem kasem, olketa fren bilong iumi savve helpem iumi taem olketa willing for lisin taem iumi storyim feeling bilong iumi long olketa. (Job  32:4) Iumi shud no expectim olketa fren bilong iumi for disaedem samting for iumi, bat iumi showimaot iumi wise taem iumi lisin long advaes wea olketa givim wea kam from Bible. (Provebs 15:22) And olsem wei wea King David hambol for acceptim help from olketa fren bilong hem, iumi tu shud hambol for acceptim help from olketa fren bilong iumi long taem wea iumi needim. (Mektu Samuel 17:27-29) Tru nao, olketa gudfala fren olsem olketa present from Jehovah.—Jas. 1:17.

HAO FOR GOHED GAREM PEACE

16. Olsem Philippi 4:6, 7 storyim, wanem nao only wei wea iumi savve garem peace? Minim kam.

16 Readim Philippi 4:6, 7Why nao Jehovah sei wei for iumi garem peace hem thru “long Christ Jesus”? Bikos bae iumi gohed garem peace long mind and heart only sapos iumi minim and showimaot faith long waka wea Jesus duim for fulfillim plan bilong Jehovah. Olsem example, bikos long ransom sakrifaes bilong Jesus, iumi fit for kasem forgiveness. (1 John 2:12) Datwan barava comfortim iumi! And from Jesus hem King long Kingdom bilong God, hem bae finisim evri nogud samting wea kamaot from rul bilong Satan and nogud world bilong hem. (Aesaea 65:17; 1 John 3:8; Rev. 21:3, 4) Datwan barava strongim hope bilong iumi for future! And tu, nomata Jesus givim iumi wanfala assignment wea no isi, hem stap witim iumi and bae hem sapotim iumi insaed olketa last day. (Matt. 28:19, 20) Datwan strongim wei wea iumi no fraet! From iumi kasem comfort, garem hope, and no fraet, datwan helpem iumi for gohed garem peace long mind and heart.

17. (a) Hao nao wanfala Christian savve gohed garem peace long mind and heart? (b) Olsem John 16:33 promisim, wanem nao bae iumi fit for duim?

17 Bat, hao nao iu savve gohed garem peace long mind taem iu kasem olketa barava hardfala test? Iu savve garem peace taem iu followim example bilong Jesus. First samting, iumi need for prea, and nomata wanem happen gohed for prea. Mek-tu, obeyim Jehovah and strong for preach, nomata long taem wea hem no isi. And mek-thri, depend long olketa fren bilong iu for helpem iu taem iu kasem olketa hard taem. Taem iu duim olsem, peace bilong God bae gaedem heart and tingting bilong iu. And olsem Jesus, iu bae winim eni hard taem wea iu kasem.—Readim John 16:33.

SONG 41 Plis Herem Prea Bilong Mi

^ par. 5 Iumi evriwan deal witim olketa problem wea savve mekem iumi for no garem peace. Disfala study bae storyim thrifala samting wea Jesus duim and hao iumi savve gohed garem peace nomata iumi feisim olketa barava hard taem.