Skip to content

Skip to table of contents

 STUDY ARTICLE 14

Waswe, Iu Barava Duim Gud Ministry Bilong Iu?

Waswe, Iu Barava Duim Gud Ministry Bilong Iu?

“Duim waka for talemaot gud nius, and barava duim gud ministry bilong iu.”—2 TIM. 4:5.

SONG 57 Preach Long Evri Difren Kaen Man

WANEM IUMI BAE STORYIM *

Bihaen Jesus resurrect hem go long olketa disaepol bilong hem and talem olketa for “go and teachim pipol . . . for kamap disaepol” (Lukim paragraf 1)

1. Wanem nao evri wakaman bilong God laek for duim, and why nao olsem? (Lukim piksa long kava.)

CHRIST JESUS givim komand long olketa follower bilong hem for “go and teachim pipol long evri kantri for kamap disaepol.” (Matt. 28:19) Evri faithful wakaman bilong God laek for lanem hao for “barava duim gud” ministry wea Jesus givim long olketa. (2 Tim. 4:5) Tru nao, disfala waka nomoa hem barava important, savve mekem man satisfae, and hem samting wea man mas busy long hem winim eni nara waka. Bat, nomata iumi barava laek for duim ministry, maet hem no isi for spendem staka taem for duim datwan.

2. Olketa wanem hard samting nao iumi maet deal witim taem iumi duim ministry bilong iumi?

2 Staka nara important samting stap wea savve tekem taem and strong bilong iumi. Maet iumi mas waka staka hour for provaedem need bilong iumi and famili. Iumi maet stragol for deal witim samfala responsibility insaed famili, maet iumi sik, wari, and iumi maet garem olketa problem bikos iumi olo. Hao nao iumi savve duim gud ministry bilong iumi taem iumi deal witim olketa hard samting olsem?

3. Wanem nao iumi savve lanem from toktok bilong Jesus long Matthew 13:23?

3 Sapos samfala samting mekem hem hard for iumi spendem staka taem long waka bilong Jehovah, iumi shud no feel wikdaon. Jesus savve no evriwan long iumi bae fit for duim sem samting insaed waka for plantim Kingdom seed. (Readim Matthew 13:23.) Jehovah tinghae long evri samting wea iumi duim for hem, sapos hem nao best bilong iumi. (Heb. 6:10-12) Bat, maet living bilong iumi hem fitim for iumi duim moa samting. Long disfala study, bae iumi story raonem hao for mekem ministry kamap main  samting long laef bilong iumi, hao for mekem laef hem simpol, and hao for kamap gud long wei for preach and teach. Bat distaem, iumi laek faendaot wanem nao hem minim for barava duim gud ministry bilong iumi?

4. Wanem nao hem minim for barava duim gud ministry bilong iumi?

4 For barava duim gud ministry bilong iumi, hem minim iumi mas evritaem duim best bilong iumi for preach and teach. Bat samting wea important long Jehovah, hem why iumi duim datfala waka and hem no haomas taem iumi spendem. Iumi duim ministry * witim full soul bilong iumi bikos iumi lovem Jehovah and olketa narawan. (Mark 12:30, 31; Col. 3:23) For duim waka bilong God witim full soul, hem minim for iumi givim iumiseleva and iusim full strong for duim best bilong iumi long olketa waka bilong hem. Bikos iumi tinghae long privilege for duim preaching waka, iumi bae duim best for sharem gud nius witim evriwan wea iumi meetim.

5-6. Storyim example abaotem hao samwan wea no garem inaf taem, hem savve mekem ministry kamap main samting long laef bilong hem.

5 Tingim disfala example: Wanfala young man hem enjoyim tumas wei for pleim guitar. Hem savve laek tumas for pleim music enitaem nomoa. Gogo, hem kasem wanfala waka long olketa weekend for pleim guitar long wanfala ples for kaikai. Bat, hem no kasem inaf selen from datfala waka. So hem mas waka olsem wanfala stoakeeper start from Monday go kasem Friday. Nomata hem mas spendem staka taem for waka long datfala stoa, music nao main samting long heart bilong hem. Hem laekem tumas for kamap gud long hao for pleim music and hem laekem datwan for kamap full-taem waka bilong hem. Nomata hem no garem staka taem, hem evritaem iusim eni chance wea hem garem for pleim music.

6 Long sem wei, maet iu no fit for spendem staka taem long preaching waka, nomata iu barava laekem tumas for duim datwan. Bat, iu gohed traem best for kamap gud long wei for kasem heart bilong pipol wea iu preach long olketa. From iu garem staka samting for duim, iu maet tingim hao nao bae iu mekem preaching waka hem main samting long laef bilong iu.

 HAO FOR MEKEM MINISTRY KAMAP MAIN SAMTING LONG LAEF

7-8. Hao nao iumi savve garem sem tingting olsem Jesus abaotem ministry?

7 Jesus showimaot nambawan example long hao for ting long ministry. Wei for story abaotem Kingdom bilong God nao hem main samting long laef bilong hem. (John 4:34, 35) Hem wakabaot for staka handred kilometer for preach long evri pipol. Hem mekius long evri chance for story long pipol long haos bilong olketa or eni ples hem meetim pipol. Jesus mekem ministry kamap main samting long laef bilong hem.

8 Iumi savve followim example bilong Jesus for lukaotem chance for story abaotem gud nius long enitaem and long eni ples wea iumi meetim pipol. Iumi willing for sakrifaesim samfala samting wea iumiseleva laekem, mekem iumi duim disfala preaching waka. (Mark 6:31-34; 1 Pet. 2:21) Samfala long kongregeson serve olsem spesol, regular, or auxiliary pioneer. Samfala savve lane for story long nara languis or muv go long ples wea needim staka pablisa for preach. Bat, staka long olketa wea duim disfala preaching waka hem olketa pablisa nomoa wea duim best bilong olketa. So nomata man fit for duim staka samting or lelebet samting nomoa, Jehovah no askem iumi for duim samting wea iumi no fit for duim. Hem laekem iumi evriwan for enjoyim waka wea iumi duim for hem taem iumi talemaot “datfala nambawan gud nius wea hem kam from datfala hapi God.”—1 Tim. 1:11; Diutronomi 30:11.

9. (a) Hao nao Paul showimaot hem mekem preaching waka kamap main samting long laef bilong hem nomata hem waka for selen? (b) Wanem nao Acts 28:16, 30, 31 showimaot abaotem hao Paul ting long ministry bilong hem?

9 Aposol Paul showimaot gudfala example long wei for mekem ministry kamap main samting long laef bilong hem. Long mek-tu missionary gogo bilong hem long Corinth, hem no garem inaf selen so hem mas spendem taem for wakem olketa tent. Nomata olsem, Paul no ting long wei for wakem tent olsem main waka bilong hem. Hem duim datfala waka for sapotim hemseleva and no putim hevi long olketa brata and sista long Corinth taem hem duim waka for talemaot gud nius. (2 Cor. 11:7) Nomata Paul mas duim samfala waka for selen, hem gohed for keepim ministry olsem main samting and hem preach long evri Sabbath. Then long taem wea fitim, Paul hem givim moa taem bilong hem for duim preaching waka. “Hem barava busy nao for preachim message bilong God. Hem preach long olketa Jew for pruvim Jesus nao hem datfala Christ.” (Acts 18:3-5; 2 Cor. 11:9) Bihaen, taem hem stap long prison long Rome for tufala year, Paul preach long olketa wea visitim hem and hem savve raetem olketa leta. (Readim Acts 28:16, 30, 31.) Paul disaed strong for no letem eni samting kamap important winim ministry bilong hem. Hem raet olsem: “God givim disfala ministry long mifala . . . . Dastawe mifala no givap.” (2 Cor. 4:1) Olsem Paul, nomata sapos iumi mas spendem taem for waka for selen, iumi savve mekem Kingdom waka for kamap main important waka long laef.

Staka wei stap for iumi barava duim gud ministry bilong iumi (Paragraf 10-11 storyim diswan)

10-11. Hao nao iumi savve barava duim gud ministry bilong iumi nomata iumi garem health problem?

10 Sapos iumi no savve go preach from haos tu haos bikos iumi olo or garem health problem, iumi savve enjoyim olketa nara wei for duim ministry. Olketa Christian long first-century, preach long pipol long eni ples wea olketa meetim. Olketa mekius long evri chance for story abaotem truth long pipol long enitaem or eni ples wea olketa meetim pipol, olsem long haos tu haos or long olketa pablik ples. (Acts 17:17; 20:20) Sapos iumi no fit for wakabaot farawe, maet iumi savve sidaon long ples wea staka pipol go pas mekem iumi preach long olketa. Or maet iumi savve duim enitaem witnessing, raetem leta, or duim telephone witnessing. Staka pablisa wea olo or  garem health problem savve hapi and satisfae taem olketa duim olketa nara wei hia for duim preaching waka.

11 Nomata iu garem health problem, iu savve barava duim gud ministry bilong iu. Tingim moa example bilong aposol Paul. Hem sei: “Nomata wanem samting hem kasem mi, paoa wea mi kasem from God nao hem strongim mi for gohed.” (Phil. 4:13) Paul needim datfala paoa, bikos wanfala taem hem sik taem hem travel for duim missionary waka. Hem storyim long olketa long Galatia hao wei wea hem sik nao mekem hem garem chance for storyim gud nius long olketa. (Gal. 4:13) Long sem wei, taem iumi sik datwan givim iumi chance tu for storyim gud nius long olketa narawan, olsem olketa nurse, doctor, and olketa narawan wea lukaftarem iumi. Staka long olketa pipol hia go waka taem olketa pablisa savve go for preach long haos bilong olketa.

HAO FOR MEKEM LAEF BILONG IU SIMPOL

12. Wanem nao hem minim for “lukluk long wanfala samting nomoa”?

12 Jesus sei: “Laet bilong body hem eye. Sapos eye bilong iu hem lukluk long wanfala samting nomoa, full body bilong iu bae garem laet tu.” (Matt. 6:22) Wanem nao hem minim? Hem minim iumi need for mekem laef bilong iumi simpol or for garem nomoa wanfala goal, or plan, and no letem eni samting mekem iu go difren from datwan. Jesus seleva showimaot example taem hem mekem ministry nao main samting long laef bilong hem, and hem teachim olketa disaepol for mekem waka bilong Jehovah and Kingdom for kamap main samting long laef bilong olketa. Iumi followim example bilong Jesus taem iumi mekem “Kingdom and olketa samting wea God sei hem stret” for kamap main samting long laef bilong iumi.—Matt. 6:33.

13. Wanem nao savve helpem iumi for mekem ministry kamap main samting long laef bilong iumi?

 13 For ministry kamap main samting long laef, iumi need for mekem laef bilong iumi simpol. Diswan bae mekem iumi garem moa taem for helpem olketa narawan for savve and lovem Jehovah. * Olsem example, for mekem iumi garem moa taem for duim ministry insaed long wanfala week, waswe, iumi savve mekem samfala change saed long haomas taem iumi iusim for waka for selen? Waswe, iumi savve katem daon taem wea iumi iusim for duim samfala samting wea iumiseleva laekem wea maet tekem tumas taem bilong iumi?

14. Wanem nao wanfala hasband and waef duim for changem samfala samting mekem olketa garem moa taem for ministry?

14 Diswan nao samting wea wanfala elder, Elias, and waef bilong hem duim. Hem sei: “Mitufala no fit for pioneer stretawe, bat mitufala disaed for mekem samfala change long laef. Firstaem, mitufala mekem samfala smol change mekem mitufala garem moa taem for preach. Olsem example, mitufala trae for iusim gud selen, katem daon taem wea mitufala iusim for duim samting wea mitufala seleva laekem. And mitufala askem olketa boss bilong mitufala for changem schedule long waka bilong mitufala. From datwan, mitufala fit for preach long olketa evening, conductim samfala Bible study, and tu, tufala taem long month mitufala joinim preaching waka long midol week. Mitufala barava enjoyim datwan!”

HAO FOR KAMAP GUD LONG WEI FOR PREACH AND TEACH

Wei for followim wanem iumi lanem long midol week meeting bae helpem iumi for gohed kamap gud long wei for duim ministry (Paragraf 15-16 storyim diswan) *

15-16. Olsem 1 Timothy 4:13, 15 storyim, hao nao iumi savve gohed kamap gud long wei for preach? (Lukim tu box “ Olketa Goal for Helpem Mi Barava Duim Gud Ministry Bilong Mi.”)

15 Nara wei for barava duim gud ministry bilong iumi, hem for kamap gud long wei for  preach. Long samfala waka, man need for gohed kasem training mekem hem kamap gud and kasem moa savve long hao for duim waka bilong hem. Iumi wea preach abaotem Kingdom mas olsem tu. Iumi need for gohed lane hao for kamap gud long ministry bilong iumi.—Provebs 1:5; readim 1 Timothy 4:13, 15.

16 Bat, hao nao iumi savve gohed for kamap gud long ministry bilong iumi? Iumi mas lisin gud long olketa instruction wea iumi kasem evri week long Christian Laef and Ministry Meeting. Disfala meeting provaedem staka nambawan training for helpem iumi kamap gud long wei for preach. Olsem example, taem chairman storyim kaonsel for olketa student wea kasem assignment, iumi savve lanem samfala idea wea savve helpem iumi for kamap gud long ministry. And iumi savve followim olketa idea hia taem iumi storyim gud nius long samwan. Iumi savve askem field service grup overseer bilong iumi for helpem iumi or iumi savve ask for waka witim hem long ministry or waka witim wanfala pioneer, circuit overseer, or wanfala pablisa wea savve gud hao for duim ministry. Taem iumi start for savve gud long hao for iusim each tul wea stap long Teaching Toolbox, datwan bae mekem iumi barava enjoyim wei for preach and teach.

17. Wanem nao bae iu kasem taem iu barava duim gud ministry bilong iu?

17 Hem nambawan privilege for iumi waka tugeta witim Jehovah! (1 Cor. 3:9) Taem iu mek sure long “olketa samting wea barava important” and ting long ministry olsem main samting long laef, datwan bae mekem iu barava hapi taem iu gohed worshipim Jehovah. (Phil. 1:10; Sams 100:2) From iu wanfala wakaman bilong God, iu savve barava sure hao hem bae givim paoa wea iu needim for barava duim gud ministry bilong iu, nomata iu kasem hard taem or iu no fit for duim samfala samting. (2 Cor. 4:1, 7; 6:4) Nomata maet iu fit for duim lelebet samting nomoa or staka samting long ministry, bae iu savve hapi bikos iu duim ministry bilong iu witim full soul. (Gal. 6:4) Taem iu barava duim gud ministry bilong iu, datwan showimaot iu lovem Jehovah and lovem olketa narawan. Bible sei: “Wei for duim olsem bae mekem iu and olketa wea lisin long iu for kasem laef.”—1 Tim. 4:16.

SONG 58 Lukaotem Sheepsheep Bilong God

^ par. 5 Iumi kasem komand from Jesus for preachim datfala gud nius abaotem Kingdom and for teachim pipol for kamap disaepol. Long disfala study, bae iumi storyim hao for barava duim gud ministry bilong iumi nomata iumi kasem staka problem. And tu, bae iumi lane abaotem hao iumi savve kamap gud long wei for preach and barava enjoyim datwan.

^ par. 4 MINING BILONG WANFALA TOKTOK: Christian Ministry bilong iumi hem savve minim tu evri difren kaen wei for preach and teach, construction and maintenance waka, and wei for duim disaster relief waka.—2 Cor. 5:18, 19; 8:4.

^ par. 13 Lukim sevenfala samting wea stap long box “Hao for Mekem Laef Bilong Iu Simpol” long Wastaoa bilong July 2016, page 10.

^ par. 62 OLKETA PIKSA: Long midol week meeting, wanfala sista duim demonstration long hao for duim return visit. Bihaen, taem chairman givim kaonsel, datfala sista raetem note bilong hemseleva insaed Teach Gud brochure. Then, taem hem duim ministry long weekend, hem followim wanem hem lanem long meeting.